បញ្ជូនប្រពន្ធនគរបាលនិងគ្នីគ្នា៤នាក់ទៀតទៅតុលាការករណីយ៍ជួញគ្រឿងញៀន
30-March-2025 / សន្តិសុខសង្គម
បាត់ដំបង៖នៅថ្ងៃ៥មេសាសមត្តកិច្ចអាវុធហត្ថខេត្តបានបញ្ជូនក្រុមជូញដូរគ្រឿងញៀនចំនួន០៥នាក់ទៅតុលាការ ដែលក្នុងនោះមានឈ្មួញម្នាក់ជាប្រពន្ឋមេប៉ូលីស ព្រហ្មទណ្ឌកំរិតធ្ងន់នៃស្នងការ ខេត្តបាត់ដំបងផងដែរ។សេចក្តីរាយការណ៍របស់មន្ត្រីកងរាជអាវុធហត្ថខេត្តបាត់ដំបងបានឲ្យដឹងថា ជនសង្ស័យជូញដូរគ្រឿងញៀនទាំង០៥នាក់រួមមាន៖ ១-ឈ្មោះ ចែត ស្រីមុំ ភេទស្រី អាយុ៣២ឆ្នាំ នៅភូមិស្ដៅ ឃុំស្ដៅ ស្រុករតនមណ្ឌល ២-ឈ្មោះ យាន ស្រីនិក ហៅចាន់នី ភេទស្រី អាយុ១៦ឆ្នាំ នៅភូមិតាគ្រាម ឃុំតាគ្រាម ស្រុករតនមណ្ឌល ៣-ឈ្មោះ វ៉ាត ណៃ ភេទប្រុស អាយុ២១ឆ្នាំ នៅភូមិព្រៃពោធ៏ ឃុំអណ្ដើកហែប ស្រុករតនមណ្ឌល ៤-ឈ្មោះ មឿន ប៊ុនថន ភេទប្រុស អាយុ២៦ឆ្នាំ និង៥-ឈ្មោះ ម៉ៃ ចិន្តា ភេទប្រុស អាយុ៤០ឆ្នាំ ជន២នាក់នេះ នៅភូមិបាណង់ ឃុំស្ដៅ ស្រុករតនមណ្ឌល ។
ក្រុមជូញដូរគ្រឿងញៀនទាំងប្រុសទាំងស្រីនេះ ត្រូវបានកម្លាំងការិយាល័យជំនាញសហការជាមួយកម្លាំងមូលដ្ឋានកងរាជអាវុធហត្ថស្រុករតនមណ្ឌលឆ្មក់ចូលបង្ក្រាបបានពេលកំពុងប្រព្រឹត្តបទល្មើសជាក់ស្ដែង កាលពីរសៀលថ្ងៃទី០៣ មេសា នៅចំណុចភូមិស្ដៅ ឃុំស្ដៅ ស្រុករតនមណ្ឌល ។មន្ត្រីជំនាញដកហូតវត្ថុតាងបានរួមមាន៖ ថ្នាំញៀនប្រភេទមេតំហ្វេតាមីន ICE (ម៉ាទឹកកក) ចំនួន៥៨កញ្ចប់ មានទម្ងន់២១,៦៥ក្រាម ម៉ូតូដែលជាមធ្យោបាយសម្រាប់ប្រព្រឹត្តបទល្មើសចំនួន០២គ្រឿង និង សម្ភារៈពាក់ព័ន្ធមួយចំនួនទៀត ។
ក្នុងចំណោមសមាសភាពក្រុមជនសង្ស័យជូញដូរថ្នាំញៀនទាំង០៥នាក់នេះ មានម្នាក់ឈ្មោះ ចែត ស្រីមុំ ជា«មេខ្លោង» ដែលមានស្វាមីជាមន្ត្រីនគរបាលឈ្មោះ កោ ស៊ុនកាំង មានតួនាទីនាយការិយាល័យព្រហ្មទណ្ឌកំរិតធ្ងន នៃស្នងការខេត្តបាត់ដំបង ។ប្រភពដដែលបានទម្លាយទៀតថា ភរិយាលោកមន្ត្រីនគរបាលម្នាក់នេះមានប្រវត្តិរកស៊ីជូញដូរគ្រឿងញៀននេះ ច្រើនឆ្នាំកន្លងមកហើយ តែគេមិនដែលឃើញសមត្ថកិច្ចក្នុងមូលដ្ឋានអើពើ ឬចុះបង្ក្រាបម្ដងណាទេ ។លោក កោ ស៊ុនកាំង ស្វាមីស្ត្រីឈ្មោះ ចែត ស្រីមុំ (ជនសង្ស័យ) មិនអាចទំនាក់ទំនងសុំការបំភ្លឺបានទេក្នុងករណីនេះ គិតត្រឹមម៉ោង១រសៀលថ្ងៃទី០៥ មេសា ពាក់ព័ន្ធនឹងរឿងរ៉ាវប្រពន្ធរបស់លោក ជាប់សង្ស័យពីបទជូញដូរគ្រឿងញៀនខុសច្បាប់នេះ ។
សូមបញ្ជាក់ដែថាដោយសារគ្រឿងញៀននេះដែរស្ដ្រីវ័យជាង៦០ឆ្នាំប្លាយម្នាក់ បានដេកស្លាប់ក្នុងថ្លុកឈាមដោយសារត្រូវយុវជនបែកថ្នាំម្នាក់ដែលរស់នៅក្នុងភូមិជាមួយគ្នា ប្រើដាវយ៉ាងមុតចូលទៅកាប់តែម្ដងនៅភូមិស្វាយស ឃុំកំរៀង ស្រុកកំរៀង ខេត្តបាត់ដំបង។ លោក សូ ឌី ប្រធានមន្ទីរប្រឆាំងបទល្មើសនៃបញ្ជាការដ្ឋានកងរាជអាវុធហត្ថខេត្តបានប្រាប់ថា ក្រុមជនសង្ស័យពាក់ព័ន្ធករណីជូញដូរគ្រឿងញៀនទាំង០៥នាក់ ត្រូវបានបញ្ជូនទៅកាន់សាលាដំបូងខេត្ត នៅព្រឹកថ្ងៃទី០៥ មេសា នេះហើយ ដោយយោងតាមបទបញ្ជាលោកមេបញ្ជាការខេត្ត ក្រោយបញ្ចប់នីតិវិធីសួរនាំ ។
បើតាមការបញ្ជាក់ពីសាក្សីបាននិយាយថា ស្ត្រីរងគ្រោះមានឈ្មោះ យុទ្ធ អាយុ ៦៥ ឆ្នាំ ត្រូវជាភរិយារបស់លោក សឿន លឿត ជានាយកសាលាបឋមសិក្សាជលគីរី។ លោកនាយកទៀតសោតកំពុងសម្រាកពីការងារដោយសារមានបញ្ហាលើសឈាមស្លាប់មួយចំហៀងខ្លួនគឺសម្រាកនៅនឹងផ្ទះ។សាក្សីបានបន្តថា នៅមុនពេលកើតហេតុប្រហែលជាម៉ោង ៣ រសៀលថ្ងៃទី ៥ ខែមេសា ឆ្នាំ២០២៥ គឺមានយុវជនម្នាក់ឈ្មោះ ចូច អាយុប្រហែលជាង ២០ ឆ្នាំ ត្រូវជាកូនលោកមេភូមិស្វាយស ហើយមានទីលំនៅទល់មុខផ្ទះជនរងគ្រោះ បានកាន់ដាវដើរចូលទៅដល់ផ្ទះលោកនាយកសាលានោះតែម្ដង ប៉ុន្តែដោយសារលោកកម្រើកខ្លួនងើបមិនបានក៏បានធ្វើសញ្ញារាដៃ ហាក់ដូចជាធ្វើសញ្ញាកុំឲ្យធ្វើបាបគាត់។ ភ្លាមៗនោះយុវជនបែកថ្នាំរូបនេះបានដើរបង្ហួសចូលទៅចង្ក្រានបាយហើយបានកាត់ទៅលើស្ត្រីដែលជាប្រពន្ធរបស់លោកនាយកសាលា ដោយគ្មានហេតុផលបណ្ដាលឲ្យស្លាប់ភ្លាមៗនៅនឹងកន្លែង រួចជនរូបនេះក៏បានត្រឡប់ទៅផ្ទះរបស់ខ្លួនវិញ ធ្វើហាក់ដូចជាមិនដឹងរឿងអ្វីទាល់តែសោះ។
.jpg&h=97&w=146)
.jpg&h=97&w=146)
