ពេលបារាំង រៀបចំកិច្ចប្រជុំកំពូលមេដឹកនាំអឺរ៉ុប ស្ដីពីសន្តិសុខក្នុងតំបន់ និងជម្លោះនៅអ៊ុយក្រែនអាមេរិកប្តូរជំហរ!?
21-September-2026 / ព័ត៌មានអន្តរជាតិ
បារាំង៖ កាលពីថ្ងៃអាទិត្យ ប្រទេសបារាំង បានប្រកាសថា ខ្លួននឹងធ្វើជាម្ចាស់ផ្ទះរៀបចំកិច្ចប្រជុំកំពូលបន្ទាន់នៃក្រុមមេដឹកនាំអឺរ៉ុបនៅថ្ងៃចន្ទ ទី១៧ ខែកុម្ភៈ ដើម្បីពិភាក្សាអំពីបញ្ហាសង្គ្រាមនៅអ៊ុយក្រែន និងសន្តិសុខក្នុងតំបន់អឺរ៉ុប។ កិច្ចប្រជុំរបស់ក្រុមមេដឹកនាំអឺរ៉ុប បានកើតមានឡើងដើម្បីជាការឆ្លើយតបយ៉ាងជាក់លាក់ ចំពោះវិធីសាស្ត្រដោះស្រាយជម្លោះ ដោយឯកតោភាគី ពីសំណាក់ប្រធានាធិបតីអាម៉េរិក លោក ដូណាល់ ត្រាំ (Donald Trump) ។
កាលពីថ្ងៃសៅរ៍ទី១៥កុម្ភៈ បេសកជនអាម៉េរិក ទទួលបន្ទុកកិច្ចការជម្លោះនៅអ៊ុយក្រែន លោក កេត កែលឡុក (Keith Kellogg) បាននិយាយថា សហរដ្ឋអាម៉េរិក កំពុងដឹកនាំក្នុងការពិភាក្សាពីការស្ដារសន្តិភាពនៅអ៊ុយក្រែន ដោយទីក្រុងវ៉ាស៊ីនតោន បានផ្ញើកម្រងសំណួរទៅកាន់សហគមន៍អឺរ៉ុបថា តើពួកគេអាចរួមចំណែកអ្វីបានខ្លះចំពោះការធានាសន្តិសុខសម្រាប់រដ្ឋធានីគៀវ? ។ដូចនេះ ពួកគេគួរផ្តោតលើតួនាទីដែលអាចរួមចំណែកដល់សន្តិសុខរបស់អ៊ុយក្រែន ជាជាងការដាក់បញ្ចូលនៅក្នុងកិច្ចចរចាជាក់ស្ដែង ។
ជាការឆ្លយតបនាយករដ្ឋមន្ត្រីអង់គ្លេស លោក Keir Starmer បាននិយាយកាលពីថ្ងៃអាទិត្យ ទី១៦ ខែកុម្ភៈថាលោកបានត្រៀមខ្លួនរួចជាស្រេច ដើម្បីបញ្ជូនកងទ័ពអង់គ្លេសទៅកាន់អ៊ុយក្រែន ជាផ្នែកមួយនៃកងកម្លាំងរក្សាសន្តិភាពក្រោយសង្គ្រាមបិទបញ្ចប់ ខណៈរូបលោកកំពុងព្យាយាមបង្ហាញសហរដ្ឋអាមេរិកថាប្រជាជាតិអឺរ៉ុបគួរតែមានតួនាទីមួយនៅក្នុងកិច្ចចរចាដើម្បីបញ្ចប់ ជម្លោះ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។
តាមលោក Starmer នាយករដ្ឋមន្ត្រីប្រទេសនៅក្រៅអឺរ៉ុបការធានាឱ្យបាននូវសន្តិភាពយូរអង្វែងនៅអ៊ុយក្រែន គឺជារឿងចាំបាច់បំផុត សំដៅកំញើញកុំឱ្យលោកប្រធានាធិបតីរុស្ស៉ី វ្ល៉ាឌីមៀ ពូទីន បើកការឈ្លានពានជាថ្មី នៅពេលអនាគត។ ក្នុងអត្ថបទមួយចុះផ្សាយដោយកាសែត Daily Telegraph លោកនាយករដ្ឋមន្ត្រីអង់គ្លេសបានបញ្ជាក់ទៀតថាការបញ្ចប់សង្គ្រាមរបស់រុស្ស៉ីជាមួយអ៊ុយក្រែន មិនមែន បណ្ដោះអាសន្ន ហើយទុកឱកាសឱ្យលោក ពូទីន បើកការវាយប្រហារសាជាថ្មីនោះទេ។
ការអត្ថាធិប្បាយរបស់លោក Starmer គឺជាលើកដំបូងបំផុតដែលរូបលោកបាននិយាយចំៗថានឹងពិចារណាបញ្ជូនកងកម្លាំងរក្សាសន្តិភាពអង់គ្លេសទៅកាន់អ៊ុយក្រែន ដោយកន្លងមក លោកធ្លាប់បាននិយាយថាអង់គ្លេសមានឆន្ទៈដើរតួនាទីជាផ្នែកមួយនៃកិច្ចព្រមព្រៀងសន្តិភាព។គួរបញ្ជាក់ថា លោក Starmer ត្រូវបានរំពឹងថានឹងចូលរួមជាមួយអធិការបតីអាល្លឺម៉ង់ លោក Olaf Scholz នាយករដ្ឋមន្ត្រីប៉ូឡូញ លោក Donald Tusk ប្រមុខ NATO លោក Mark Rutte នាយករដ្ឋមន្ត្រីអ៉ីតាលី លោកស្រី Giorgia Meloni ព្រមទាំងមេដឹកនាំផ្សេងទៀត នៅឯកិច្ចប្រជុំបន្ទាន់មួយក្នុងទីក្រុងប៉ារីសនៅថ្ងៃចន្ទដើមសប្ដាហ៍នេះ ក្រោយប្រធានាធិបតីបារាំង លោក Emmanuel Macron កោះប្រជុំ។
ថ្លែងទៅកាន់វិទ្យុ France Inter រដ្ឋមន្ត្រីការបរទេសបារាំង លោក ហ្សង់ណូអែល បារ៉ុត (Jean-Noel Barrot) បានពន្យល់ថា "លោកប្រធានាធិបតី ម៉ាក្រុង (Macron) នឹងកោះប្រជុំបណ្តាប្រទេសសំខាន់ៗនៅតំបន់អឺរ៉ុប ដើម្បីពិភាក្សាគ្នាអំពីសន្តិសុខរបស់ប្លុកនេះ" ដោយបន្ថែមថា «កិច្ចប្រជុំនេះ នឹងផ្ដោតលើកិច្ចពិភាក្សាជាក់ស្ដែង ចំពោះសន្តិសុខក្នុងតំបន់អឺរ៉ុប រួមទាំងបញ្ហាសង្គ្រាមនៅអ៊ុយក្រែន ជាជាងការពិភាក្សាគ្នាដោយភាពតានតឹង» ។
តាមរយៈកិច្ចប្រជុំកំពូលស្រដៀងគ្នារាប់សិបកិច្ចប្រជុំរួចមកហើយនោះ បានបង្ហាញថា ទោះបីជាមានភាពតានតឹងបែបណាក្ដី ក៏អឺរ៉ុបនៅតែតស៊ូ នៅក្នុងផែនការបង្រួបបង្រួម ដើម្បីដោះស្រាយជាមួយរុស្ស៊ី ក្នុងការបញ្ចប់ជម្លោះនៅអ៊ុយក្រែនដែលបានបន្តអូសបន្លាយអស់រយៈពេល៤ឆ្នាំឆាប់ៗនេះ ។បន្ទាប់ពីលេចចេញនៅការប្តេជ្ញាចិត្តរបស់បារាំងនិងបណ្តាប្រទេសនៅអឺរ៉ុបរដ្ឋមន្ត្រីការបរទេសអាមេរិក លោក Marco Rubio បាននិយាយបន្ធូបរិយាកាសមកវិញថា៖អ៊ុយក្រែន និងអឺរ៉ុប នឹងមានកៅអីអង្គុយនៅឯតុចរចាពិតប្រាកដមួយ ដើម្បីបញ្ចប់សង្គ្រាមនៅអ៊ុយក្រែន ជាមួយ ការសង្កត់ធ្ងន់ថាកិច្ចសន្ទនារបស់សហរដ្ឋអាមេរិកជាមួយរុស្ស៉ីកាលពីពេលថ្មីៗនេះគឺជាឱកាសមួយដើម្បីបង្ហាញថាតើលោកប្រធានាធិបតីរុស្ស៉ី វ្ល៉ាឌីមៀ ពូទីន មានភាពប្រាកដប្រជាកម្រិតណាចំពោះ សន្តិភាព។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។
ការអត្ថាធិប្បាយ របស់លោក Rubio កើតមានឡើងក្រោយបេសកជនទទួលបន្ទុកបញ្ហាអ៊ុយក្រែនរបស់ប្រធានាធិបតីអាមេរិក កាលពីថ្ងៃសៅរ៍ ទី១៥ ខែកុម្ភៈ បាននិយាយថា អឺរ៉ុបនឹងមិនមាន កៅអីអង្គុយ នៅតុចរចាសន្តិភាពអ៊ុយក្រែនឡើយ បន្ទាប់ពីទីក្រុងវ៉ាស៉ីនតោន បានបញ្ជូនកម្រងសំណួរទៅកាន់បណ្តាប្រទេសអឺរ៉ុប ដើម្បីសាកសួរថា តើពួកគេអាចចូលរួមចំណែកអ្វីខ្លះ ក្នុងការធានា សន្តិសុខសម្រាប់ទីក្រុងកៀវ។ក្នុងបទសម្ភាសន៍ជាមួយកម្មវិធី Meet the Press របស់ទូរទស្សន៍ CBS លោក Rubio ព្យាយាមបន្សាបការព្រួយបារម្ភរបស់អឺរ៉ុបដែលត្រូវបានផាត់ចេញពី កិច្ចចរចាដំបូងរវាងសហរដ្ឋអាមេរិក និងរុស្ស៉ីដែលគ្រោងនឹងប្រព្រឹត្តទៅក្នុងប្រទេសអារ៉ាប៊ីសាអូឌីត ក្នុងពេលឆាប់ៗ។
លោក Rubio បាននិយាយថាដំណើរការកិច្ចចរចាពិតប្រាកដមិនទាន់ចាប់ផ្ដើមនៅឡើយទេ ហើយប្រសិនបើមានភាពរីកចម្រើន អ៊ុយក្រែន និងអឺរ៉ុបនឹងមានវត្តមាននៅឯកិច្ចចរចាដែរ។
លោករដ្ឋមន្ត្រីការបរទេសអាមេរិក លោក Marco Rubio បានទៅដល់ប្រទេសអារ៉ាប៊ីសាអូឌីតហើយ នាថ្ងៃចន្ទ ទី១៧ ខែកុម្ភៈ នៅមុនកិច្ចពិភាក្សាដែលបានគ្រោងទុកជាមួយក្រុមមន្ត្រីរុស្ស៉ី ក្នុងបំណងបិទបញ្ចប់សង្គ្រាមជិត ៣ឆ្នាំរវាងរុស្ស៉ី និងអ៊ុយក្រែន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។លោក Rubio ដែលបានជជែកតាមទូរស័ព្ទជាមួយរដ្ឋមន្ត្រីការបរទេសរុស្ស៉ីលោក Sergei Lavrov កាលលពីថ្ងៃសៅរ៍ នឹងជួបក្រុមមន្ត្រីរុស្ស៉ីនៅប្រទេសអារ៉ាប៊ីសាអូឌីត រួមជាមួយទីប្រឹក្សាសន្តិសុខជាតិ លោក Mike Waltz និងបេសកជនអាមេរិកប្រចាំមជ្ឈិមបូព៌ា លោក Steve Witkoff។ ដោយឡែក ភាគីរុស្ស៉ីគេមិនទាន់ដឹងសមាសភាពនៅឡើយ។បើតាមកាសែតរុស្ស៉ី Kommersant កិច្ចចរចានឹងធ្វើឡើងនាថ្ងៃអង្គារ ក្នុងរដ្ឋធានីរីយ៉ាដ។ ប្រសិនបើគ្មានការប្រែប្រួលទេ វានឹងក្លាយកិច្ចពិភាក្សាផ្ទាល់មុខកម្រិតខ្ពស់លើកដំបូង ក្នុងរយៈពេលប៉ុន្មានឆ្នាំ រវាងមន្ត្រីរុស្ស៉ី និងអាមេរិក ហើយនៅមុនពេលមានកិច្ចប្រជុំ រវាងប្រធានាធិបតីអាមេរិក និងប្រធានាធិបតីរុស្ស៉ី។
គួរបញ្ជាក់ថា ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី ក៏កំពុងស្ថិតនៅក្នុងតំបន់មជ្ឈិមបូព៌ាដែរ។ លោកបានទៅដល់អេមីរ៉ាត់អារ៉ាប់រួម កាលពីថ្ងៃអាទិត្យ ហើយមានបំណងទៅបំពេញទស្សនកិច្ចនៅអារ៉ាប៊ីសាអូឌីត និងតួកគី ប៉ុន្តែមិនបញ្ជាក់កាលបរិច្ឆេទ។ លោក ហ្សេលេនស្គី និយាយថា លោកគ្មានគម្រោងជួបមន្ត្រីរុស្ស៉ី ឬអាមេរិកទេ ហើយអ៊ុយក្រែនមិនត្រូវបានគេជឿថា នឹងត្រូវបានអញ្ជើញឱ្យចូលរួមកិច្ចពិភាក្សា ដែលរៀបចំដោយអារ៉ាប៊ីសាអូឌីតនោះទេ។វត្តមានកិច្ចប្រជុំរបស់លោក Zelenskiy នាពេលនេះ ត្រូវមន្ត្រីរដ្ឋាភិបាលអ៊ុយក្រែនបញ្ជាក់ថា នឹងផ្តល់អាទិភាពលើកម្មវិធីមនុស្សធម៌របស់លោកស្រី Olena ដែលមានគោលដៅធានាថា "ពលរដ្ឋអ៊ុយក្រែនដែលត្រូវបានរុស្ស៊ីចាប់ពង្រត់ អាចវិលត្រឡប់មកកាន់ប្រទេសកំណើតរបស់ខ្លួនវិញ រួមទាំងបង្កើតភាពជាដៃគូសេដ្ឋកិច្ចនិងវិនិយោគជាមួយបរទេស សម្រាប់ដំណើរការកសាងប្រទេសអ៊ុយក្រែនឡើងវិញ។
ជុំវិញរឿងនេះ មានប្រភពចំនួន ៣ បានបញ្ជាក់ប្រាប់សារព័ត៌មានរ៉យទ័រកាលពីសប្តាហ៍មុនថា៖ រដ្ឋាភិបាលប្រទេសអារ៉ាប់រួម គឺជាអ្នកបានផ្តួចផ្តើមគំនិតធើ្វជាម្ចាស់ផ្ទះនៃកិច្ចប្រជុំកំពូលសន្តិភាពរវាងអ៊ុយក្រែននិងរុស្ស៊ី ហើយកិច្ចប្រជុំនេះ ត្រូវគេរំពឹងថា នឹងអាចនាំឱ្យមានការជួបជជែកទល់មុខដោយផ្ទាល់រវាងលោក Zelenskiy ជាមួយប្រធានាធិបតីរុស្ស៊ី លោក Vladimir Putin នៅថ្ងៃណាមួយក្នុងពេលឆាប់ៗខាងមុខ។សម្រាប់អាមេរិកដែលគេដឹងថាមុខលុយវិញទោះបីជាលោក ដូណាល់ ត្រាំ មិនគាំទ្រចំពោះការផ្តល់ជំនួយរបស់ទីក្រុងវ៉ាស៊ីនតោនទៅឲ្យអ៊ុយក្រែន ក៏ពិតមែន ប៉ុន្តែឥឡូវអ្នកសាធារណរដ្ឋរូបនេះ ប្រាប់ឲ្យសម្ព័ន្ធមិត្តអឺរ៉ុប ទិញសព្វាវុធរបស់អាមេរិក ដើម្បីយកទៅជួយទីក្រុងកៀវ ទៅវិញ។
ឆ្លើយសំណួរអ្នកកាសែតថាតើ លោកនឹងព្រមឲ្យអឺរ៉ុបទិញអាវុធជួយដល់អ៊ុយក្រែនឬក៏អត់នោះ? ប្រធានាធិបតីអាមេរិក តបទៅវិញថា «ជាការពិត!»។ សម្ព័ន្ធមិត្តទីក្រុងវ៉ាស៊ីនតោន នៅទ្វីបអឺរ៉ុបអាចទិញអាវុធផលិតដោយអាមេរិក ហើយយកទៅជួយអ៊ុយក្រែន បាន។ស្របពេលជាមួយគ្នានោះ លោក ត្រាំ បានបង្ហាញទំនុកចិត្តថា រុស្ស៊ីនឹងមិនចូលរួមក្នុងជម្លោះយោធាជាមួយអង្គការណាតូឡើយ។លោក ត្រាំ បានសម្តែងការមិនយល់ស្របជាមួយនឹងសេចក្តីថ្លែងការណ៍របស់ប្រធានាធិបតីអ៊ុយក្រែនលោក វ៉ា្លឌីមៀរ ហ្សេលេនស្គី ដែលថា រុស្ស៊ីអាចនឹងកំណត់គោលដៅលើប្រទេសណាតូនាពេលខាងមុខ។ ដូច្នេះហើយទើបលោកពន្យល់ថា ការរំពឹងទុករបស់អ៊ុយក្រែនក្នុងការចូលរួមជាមួយអង្គការណាតូ គឺជាកត្តាសំខាន់ដែលនាំទៅដល់ការឈ្លានពានឆ្នាំ២០២២ អ៊ីចឹង អាមេរិកគួរតែចៀសវាងបង្ហាញការគាំទ្រសម្រាប់សមាជិកភាពណាតូរបស់ទីក្រុងកៀវ។ក្រៅពីអំពាវនាវឲ្យអឺរ៉ុបទិញអាវុធលោកក៏បង្ហាញពីចេតនាបញ្ជូនទ័ពអាមេរិក ទៅយាមការពារអណ្តូងរ៉ែកម្រនៅអ៊ុយក្រែន ដែរ។នេះបើយោងតាមប្រភពស្និទ្ធិនឹងរដ្ឋាភិបាលទីក្រុងវ៉ាស៊ីនតោន ប៉ុន្តែសុំមិនបញ្ចេញឈ្មោះបានប្រាប់ទៅសារព័ត៌មាន NBC កាលពីចុងសប្តាហ៍។
ព័ត៌មាននេះ កើតឡើងចំពេលទីប្រឹក្សាសន្តិសុខជាតិអាមេរិកលោក Michael Waltz ទារឲ្យអ៊ុយក្រែន សងមកវិញនូវការវិនិយោគរបស់អាមេរិកក្នុងសង្គ្រាមនេះ ព្រោះវាជាវិធីដ៏ល្អបំផុត បើចង់ឲ្យទីក្រុងវ៉ាស៊ីនតោនជួយខ្លួនទៀត នាពេលអនាគត។ចំណែកលោក ត្រាំ ឯណោះ ក៏ទារឲ្យទីក្រុងកៀវ សងប្រាក់៥០០ពាន់លានដុល្លារមកទីក្រុងវ៉ាស៊ីនតោនវិញដែរ ដោយសងតាមរយៈកិច្ចព្រមព្រៀងប្រគល់ធនធានរ៉ែកម្រ ដូចដែលលោកធ្លាប់បានលើកឡើង។។តែប្រធានាធិបតីអ៊ុយក្រែនបានបដិសេធរឿងចែកផលរ៉ែជាមួយអាមេរិកនេះដោយលោកនិយាយថាចង់បានភាពច្បាស់លាស់ជាងការនិយាយបេបនេះ!។សហរដ្ឋអាមេរិកគឺជាអ្នកគាំទ្រដ៏សំខាន់របស់ទីក្រុងកៀវ ចាប់តាំងពីជម្លោះរុស្ស៊ី-អ៊ុយក្រែន ផ្ទុះឡើងក្នុងខែកុម្ភៈឆ្នាំ២០២២ ហើយកាលពីខែមុន ប្រធានាធិបតីអាមេរិកលោក ដូណាល់ ត្រាំ អះអាងថា ទីក្រុងវ៉ាស៊ីនតោនបានចំណាយប្រាក់ចំនួន ២០០ពាន់លានដុល្លារជួយទីក្រុងកៀវ។
