បន្ទាប់ពីលោក បៃដិន អំពាវនាវឱ្យមានបទឈប់បាញ់ជាបន្ទាន់នៅ ហ្កាហ្សាកាតាថា ការចរចាកិច្ចព្រមព្រៀងបទឈប់បាញ់ កំពុងស្ថិតនៅក្នុងដំណាក់កាលចុងក្រោយ
21-September-2026 / ព័ត៌មានអន្តរជាតិ
កាតា៖ បើតាមអ្នកនាំពាក្យក្រសួងការបរទេសរបស់ប្រទេសកាតា បាននិយាយកាលពីថ្ងៃអង្គារម្សិលមិញថា ការចរចាបទឈប់បាញ់ដើម្បីបញ្ចប់ស្ថានការណ៍ជម្លោះនៅតំបន់ហ្គាហ្សា ដែលកំពុងធ្វើឡើងនៅក្នុងរដ្ឋធានីដូហា បានចូលដល់ដំណាក់កាលចុងក្រោយហើយ ។
ថ្លែងនៅក្នុងសន្និសីទសារព័ត៌មានអ្នកនាំពាក្យក្រសួងការបរទេសកាតា លោក Mohammed Al Ansari ថា ភាគីអ្នកចរចារបស់អ៊ីស្រាអែល និងក្រុមហាម៉ាស កំពុងត្រៀមធើ្វសេចក្តីសម្រេចចិត្តចុងក្រោយលើលក្ខខណ្ឌដែលបានឯកភាពគ្នា និងរំពឹងឈានទៅប្រកាសកិច្ចព្រមព្រៀងបទឈប់បាញ់នៅតំបន់ហ្គាហ្សាក្នុងពេលឆាប់ៗខាងមុខ។
អ្នកនាំពាក្យរូបនេះ បានបញ្ជាក់ទៀតថា "ដំណើរការចរចាដែលកំពុងធើ្វឡើងនៅក្នុងប្រទេសកាតានាពេលនេះ គឺជាជំនួបចរចាកម្រិតខ្ពស់បំផុតរវាងអ៊ីស្រាអែលនិងហាម៉ាស ក្រោមការសម្របសម្រួលរបស់ភាគីពាក់ព័ន្ធក្នុងតំបន់។ លោកបានបន្តទៀតថា លោកកំពុងទន្ទឹងរង់ចាំព័ត៌មានចុងក្រោយនៃដំណើរការពិភាក្សាពីក្រុមអ្នកពាក់ព័ន្ធនៅក្នុងកិច្ចប្រជុំ ហើយលោកជឿថា ការចរចានេះ កំពុងវិវត្តន៍ទៅមុខយ៉ាងវិជ្ជមាន និងជាដំណាក់កាលចុងក្រោយនៃការធើ្វសេចក្តីសម្រេចចិត្ត។ ប៉ុន្តែទោះជាយ៉ាងនេះក្តី ដរាបណានៅមិនទាន់មានការប្រកាសជាផ្លូវការទេ នោះអ្វីៗនៅតែអាចមានការប្រែប្រួល ដូច្នេះលោកមិនអាចធើ្វការធានាអះអាងចំពោះអ្វីមួយជាក់លាក់បានឡើយ។
លោក Ansari បានឱ្យដឹងបន្ថែមថា ប្រទេសកាតា បានបញ្ជូនសេចក្តីព្រាងចុងក្រោយនៃកិច្ចព្រមព្រៀងឈប់បាញ់ទៅឱ្យអ៊ីស្រាអែលនិងក្រុមហាម៉ាស់ និងបានបង្ហាញក្តីសង្ឃឹមថា ភាគីទាំងពីរនឹងអាចចូលរួមក្នុងការចរចាជាលើកចុងក្រោយជាមួយនឹងឥរិយាបថប្រកបដោយការទទួលខុសត្រូវខ្ពស់ ដើម្បីឈានទៅដល់ការចុះហត្ថលេខាលើកិច្ចព្រមព្រៀងបទឈប់បាញ់ឱ្យបានឆាប់តាមតែអាចធ្វើទៅបាន សម្រាប់ការបញ្ចប់ជម្លោះ និងបន្ធូរបន្ថយស្ថានភាពទុក្ខលំបាករបស់ប្រជាជននៅតំបន់ហ្គាហ្សា។
សូមបញ្ជាក់ថាសេវិមានបានឱ្យដឹងថាប្រធានាធិបតីអាមេរិក លោក ចូ បៃដិន កាលពីថ្ងៃអាទិត្យ ទី១២ ខែមករា បានពិភាក្សាតាមទូរស័ព្ទជាមួយនាយករដ្ឋមន្ត្រីអ៉ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) ខណៈក្រុមមន្ត្រីអាមេរិកកំពុងស្វះស្វែងជំរុញឱ្យមានបទឈប់បាញ់ និងកិច្ចព្រមព្រៀងដោះលែងចំណាប់ខ្មាំង មុននឹងលោក បៃដិន ត្រូវចប់អាណត្តិ នៅថ្ងៃទី២០ ខែមករា។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។
តាមសេតវិមាន លោក បៃដិន និងលោក ណេតាន់យ៉ាហ៊ូ បានពិភាក្សាពីកិច្ចប្រឹងប្រែងដែលកំពុងធ្វើឡើង ដើម្បីឈានដល់កិច្ចព្រមព្រៀងបញ្ឈប់សង្គ្រាមនៅក្នុងតំបន់ហ្កាហ្សា និងការដោះលែង ចំណាប់ខ្មាំងនៅសេសសល់។ សេតវិមានបន្ថែមថា លោក បៃដិន បានសង្កត់ធ្ងន់ពីតម្រូវការបន្ទាន់សម្រាប់បទឈប់បាញ់ក្នុងតំបន់ហ្កាហ្សា និងការដោះលែងចំណាប់ខ្មាំងសេសសល់ ជាមួយការ បង្កើនលំហូរជំនួយមនុស្សធម៌ចូលទៅក្នុងតំបន់ហ្កាហ្សា តាមរយៈការបញ្ឈប់ការវាយប្រយុទ្ធគ្នានៅក្រោមកិច្ចព្រមព្រៀងមួយ។
ដោយឡែក លោក ណេតាន់យ៉ាហ៊ូ បានធ្វើបច្ចុប្បន្នភាពអំពី ភាពរីកចម្រើននៅក្នុងកិច្ចចរចា និងអំពីសិទ្ធិអំណាចដែលលោកបានផ្ដល់ឱ្យគណៈប្រតិភូសន្តិសុខជាន់ខ្ពស់របស់លោក ដែលបច្ចុប្បន្នកំពុងស្ថិតនៅក្នុងទីក្រុងដូហា ប្រទេសកាតា ក្នុងគោលបំណងជំរុញឱ្យមានកិច្ចព្រមព្រៀងដោះលែងចំណាប់ខ្មាំង។លោក បៃដិន និងលោក ណេតាន់យ៉ាហ៊ូ ក៏បានពិភាក្សាគ្នាផងដែរពីការប្រែប្រួលស្ថានការណ៍នៅក្នុងតំបន់មជ្ឈិមបូព៌ា បន្ទាប់ពីមានបទឈប់បាញ់នៅលីបង់ ការដួលរលំនៃរបបលោក Assad នៅស៊ីរី រួមទាំងការធ្លាក់ចុះទន់ខ្សោយនៃអំណាចរបស់អ៉ីរ៉ង់ក្នុងតំបន់។
គួរបញ្ជាក់ថា ទីប្រឹក្សាសន្តិសុខជាតិរបស់លោក បៃដិន គឺលោក Jake Sullivan បាននិយាយក្នុងកម្មវិធី State of the Union របស់ទូរទស្សន៍ CNN កាលពីអាទិត្យនោះដែរថាភាគីទាំងឡាយ កំពុងខិតជិតទៅរកកិច្ចព្រមព្រៀងមួយ តែនៅមានបញ្ហាមួយចំនួនត្រូវដោះស្រាយ៕
