សម្តេចបវរធិបតី ហ៊ុន ម៉ាណែត ប្រកាសស្វាគមន៍លោក ជេម សុខ ឲ្យមកស្រុកខ្មែរ និងបដិសេធរាល់ការអំពាវនាវដែលនាំឱ្យបាត់បង់អស្ថិរភាពសង្គម ការញុះញង់ទាំងឡាយនាំឲ្យជាតិបែកបាក់
07-November-2024 / ផ្សេងៗ
ខេត្តកែប៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានប្រតិកម្មចំពោះការរិះគន់របស់លោក ជេម សុខ អ្នកអត្ថាធិប្បាយតាមបណ្តាញសង្គមនៅក្រៅប្រទេស ដែលវាយប្រហារចំពោះ រដ្ឋមន្ត្រីមួយចំនួនថា មិនមានសកម្មភាព និងសមិទ្ធផលអ្វីឡើយ ក្នុងពេលបំពេញការងាររយៈពេលជាង១ឆ្នាំ នៃរាជរដ្ឋាភិបាល អាណត្តិទី៧នេះនិងបានអញ្ជើញលោកជេមសុខឲ្យមកស្រុកខ្មែរពិនិត្យមើលផ្ទាល់សម្តេចចេញលុយ។
ថ្លែងក្នុងពិធីសម្ពោធ វិថីតេជោសន្តិភាពឆ្នេរអង្កោល» តម្លៃជាង១០លានដុល្លារ ជាសមិទ្ធផលថ្មី នៅខេត្តកែប នាព្រឹកថ្ងៃទី១១ ខែវិច្ឆិកា ឆ្នាំ២០២៤នេះ សម្តេចមហាបវរធិបតី ហ៊ុន ម៉ាណែត បានលើកឡើងថា៖ «ខ្ញុំហួសចិត្តដែលគាត់ថា រដ្ឋាភិបាលអត់ធ្វើអ្វីទេប៉ុន្តែដើរសម្ពោធសមិទ្ធផល បើថាសមិទ្ធផលនេះវាដដែលៗចុះ បើខ្ញុំសម្ពោធ ៥ដងហើយនៅតែសម្ពោធទៀត យើងគិតថា(ដដែល) ប៉ុន្តែរាល់ការសម្ពោធសុទ្ធតែសមិទ្ធផលថ្មីទាំងអស់ គាត់ថា "មិនធ្វើអ្វីផងដើរតែសម្ពោធ" ខ្ញុំមិនយល់ដែរ បើអត់ធ្វើអ្វី ម្តេចមានសមិទ្ធផលសម្ពោធ?»។
ចាប់តាំងពីរាជរដ្ឋាភិបាល អាណត្តិទី៧ ត្រូវបានបង្កើតឡើង លោក សុខ សុគន្ធ ហៅជេម សុខ បានបើកការអត្ថាធិប្បាយវាយប្រហារជាបន្តបន្ទាប់។សម្តេចមហាបវរធិបតី បានបញ្ជាក់ថា «នៅមួយចំហៀងផែនដីម្នាក់ ហើយនៅតែក្នុងបន្ទប់ហើយវាយតម្លៃថា មិនដើរទៅមុខ ខ្ញុំសុំអញ្ចេះ តាជេមសុខ ខ្ញុំមានអ្វីប្រឆាំងនឹងគាត់ទេ ការបញ្ចេញមតិរបស់គាត់ជាសិទ្ធិរបស់គាត់ ហើយតាំងខ្លួនជាអ្នកវិភាគដើម្បីស្ថាបនា ខ្ញុំស្វាគមន៍ ប៉ុន្តែសូមឱ្យច្បាស់លាស់ វិភាគបែបវិទ្យាសាស្ត្រ កុំវិភាគបែបស៊ីអារម្មណ៍»។
សម្តេចបន្តថា «ខ្ញុំឧស្សាហ៍និយាយណាស់ វិភាគស៊ីអារម្មណ៍នេះ គឺបង្កើតសមត្តិកម្ម អាក្រក់ហើយ គឺទៅយកភស្តុតាង អ្វីផ្សេងៗមកភ្ជាប់ អ្វីផ្សេងទៀតទាត់ចោលទាំងអស់ បើវិភាគបែបវិទ្យាសាស្ត្រ គេមិនទាន់សន្និដ្ឋានទេ គេប្រមូលទិន្នន័យមកទាំងអស់សិន ប្រមូលឱ្យវាគ្រប់ជ្រុងជ្រោយ»។សម្តេចនាយករដ្ឋមន្ត្រី បានបញ្ជាក់ថា «បើតាសុខ ជាអ្នកវិភាគពិតប្រាកដ ហើយផ្តល់ព័ត៌មានដើម្បីស្ថាបនា ខ្ញុំស្វាគមន៍ ហើយខ្ញុំកាន់តែស្វាគមន៍ទៀតបើតាសុខ មកស្រុកខ្មែរហើយទៅជួបរដ្ឋមន្ត្រីក្រសួងទាំងអស់ ហើយស្តាប់តែម្តង»។
សម្តេចមហាបវរធិបតី ហ៊ុន ម៉ាណែតវាយតម្លៃថាលោក ជេម សុខ កន្លងទៅអាចទទួលបានព័ត៌មានខ្លះពីកម្ពុជា តាមរយៈអ្នកផ្តល់ព័ត៌មានពីស្រុកខ្មែរ ប៉ុន្តែអ្នកដែលផ្តល់ព័ត៌មាននោះ ក៏មិនមានព័ត៌មានគ្រប់ជ្រុងជ្រោយដែរ។ សម្តេចបានបញ្ជាក់ថា ប្រសិនបើ លោក ជែម សុខ មកកម្ពុជា សម្តេចនឹងមិនមាននរណាចាប់នោះទេ ហើយនឹងអនុញ្ញាតឱ្យលោកជួបជាមួយរដ្ឋមន្ត្រីដែលលោកបានរិះគន់ថា ខ្សោយជាងគេ មិនធ្វើសកម្មភាពអ្វីថែមទៀត ហើយបើសិនជាលោកចង់ផ្សាយផ្ទាល់ក្នុងជំនួបនោះ សម្តេចក៏អនុញ្ញាតឱ្យផងដែរ។
សម្តេចបានលើកឡើងថា លោក ជេម សុខ បានរិះគន់អត្រាភ្ញៀវទេសចរមកទស្សនាកម្ពុជាអំឡុងរដូវខ្សត់ភ្ញៀវទេស (Low season) តែស្ងាត់មាត់មិននិយាយអ្វីទាំងអស់ នៅរដូវមានភ្ញៀវទេសចរ (High season) ទៅវិញ។ សម្តេចបានចេញមុខការពារក្រសួងទាំងអស់ ហើយចាត់ទុកថា ការវាប្រហាររបស់ លោក ជេម សុខ ចំពោះសមិទ្ធផលក្រសួងមួួយមិនមែនត្រឹមតែរិះគន់ចំពោះរដ្ឋមន្ត្រីទេ តែជាការវាយប្រហារលើថ្នាក់ដឹកនាំមន្ត្រីទាំងអស់ ដែលបានខិតខំធ្វើសកម្មភាពរហូតមក។ សម្តេចបានចាត់ទុកថា លោក ជេម សុខ មិនមានទិន្នន័យច្បាស់លាស់ឡើយ។
សម្តេចបានរិះគន់លោក ជេម សុខ ថាមិនបានយកភ្នែកមើលនូវរបាយការណ៍ដែលបង្ហាញដោយរាជរដ្ឋាភិបាល អំពីសមិទ្ធផលរយៈពេល១ឆ្នាំកន្លងមក។ សម្តេចបានប្រកាសថា សម្តេចក៏ធានាចេញថ្លៃចំណាយសម្រាប់លោក ជេម សុខ មកកម្ពុជាផងដែរ និងឲ្យដើរមើលស្រុកទេសគ្រប់កន្លែងឱ្យច្បាស់អំពីសមិទ្ធផលរបស់រាជរដ្ឋាភិបាល និងក្រសួងស្ថាប័ន ក្នុងរយៈពេលជាង១ឆ្នាំកន្លងទៅនេះ។
ក្រៅពីរឿងលោកជេមសុខសម្តេចមហាបវធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអំពាវនាវប្រជាពលរដ្ឋត្រូវបដិសេធរាល់ការអំពាវនាវដែលនាំឱ្យសង្គមកើតចលាចល ឬបាត់បង់អស្ថិរភាពសង្គម ហើយចូលរួមថែរក្សាការពារឱ្យ បាននូវសុខសន្តិភាពជាដាច់ខាត។សម្ដេចបវរធិបតី ហ៊ុន ម៉ាណែត បានរំឭកដល់ទង្វើក្រុមប្រឆាំងដែលបានញុះញង់បំផុសបំផុលកៀរគរមនុស្សឱ្យធ្វើចលនាហិង្សា ដែលល្មើសច្បាប់ធ្ងន់ធ្ងរ គំរាមកំហែងដល់សេចក្ដីសុខប្រជាពលរដ្ឋ តួយ៉ាងដូច្នេះករណីថ្ងៃ៩ វិច្ឆិកា ២០១៩ និងថ្ងៃ១៨ សីហា ឆ្នាំ២០២៤អូសទាញឱ្យប្រជាពលរដ្ឋធ្វើសកម្មភាពហិង្សា ដើម្បីប្រឆាំងរដ្ឋាភិបាល ផ្ដួលរំលំតាមរូបមន្តមិនប្រជាធិបតេយ្យ ខុសពីរដ្ឋធម្មនុញ្ញ»។
សម្ដេចបវរធិបតីបានបន្តថា ប្រសិនបើក្រុមណាមួយអនុវត្តសិទ្ធិរបស់ខ្លួនខុសច្បាប់ហើយ រាជរដ្ឋាភិបាលគ្មានជម្រើសក្រៅពីការអនុវត្តច្បាប់ ដើម្បីថែទាំស្ថិរភាព ឯកភាពជាតិ និងសន្តិភាពនោះទេ។ នេះជាអ្វីដែលរាជរដ្ឋាភិបាល បានប្ដេជ្ញាចិត្តជាមួយប្រជាពលរដ្ឋ ១៧លាននាក់ ក្នុងការការពារសន្តិសុខ សន្តិភាព ស្ថិរភាពឱ្យខាងតែបាន។ រាជរដ្ឋាភិបាលប្ដេជ្ញាមិនឱ្យមនុស្សមួយចំនួនមកបំផ្លាញសុខសន្តិភាព យករឿងមិនពិតមកបំផុស ពិសេសមកជំរុញឱ្យប្រជាពលរដ្ឋមកធ្វើសកម្មភាពហិង្សា ឬសកម្មភាពខុសច្បាប់ដូចថ្ងៃ១៨ សីហា ឆ្នាំ២០២៤ កន្លងទៅនោះទេ។
សម្ដេចបវរធិបតីនាយករដ្ឋមន្ត្រី បានអំពាវនាវដល់ប្រជាពលរដ្ឋសាជាថ្មីថា ប្រសិនជាមានការអំពាវនាវ ការបំផុសឱ្យធ្វើសកម្មភាពជ្រុលនិយម ធ្វើសកម្មភាពហិង្សា ធ្វើឱ្យបាត់បង់សេចក្ដីសុខប្រទេសជាតិ សូមប្រជាពលរដ្ឋរួមគ្នា ប្រឆាំងនូវការញុះញង់ទាំងនោះ តាមរយៈការមិនចូលរួមជាមួយការអំពាវនាវនោះ ឬតាមរយៈការរួមគ្នាថែរក្សាជីវភាពរស់នៅ ស្ថិរភាព ឯកភាពក្នុងប្រទេសរបស់យើង។
