សភាពាណិជ្ជកម្មកម្ពុជា ចេញសេចក្តីប្រកាសព័ត៌មានពីការដោះស្រាយបញ្ហាជូនវិស័យឯកជន
21-September-2026 / សេដ្ឋកិច្ច
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្តី នៃកម្ពុជា ក្នុងពិធី «អបអរសាទរខួប ២០ឆ្នាំ នៃកម្ពុជាចូលជាសមាជិកអង្គការពាណិជ្ជកម្ម ពិភពលោក» នាថ្ងៃទី១៤ ខែតុលា ឆ្នាំ២០២៤ បានថ្លែងថា «សភាពាណិជ្ជកម្មកម្ពុជាត្រូវធ្វើជាតំណាងវិស័យឯកជន ធ្វើការជាមួយរាជរដ្ឋាភិបាល បើវិស័យឯកជនមានបញ្ហា គឺត្រូវដោះស្រាយតាមរយៈសភាពាណិជ្ជកម្មកម្ពុជា»។
សេចក្តីប្រកាសព័ត៌មានចេញនៅថ្ងៃទី១៩ ខែតុលា ឆ្នាំ២០២៤នេះ សភាពាណិជ្ជកម្មកម្ពុជាដឹកនាំដោយលោកឧកញ៉ាគិតម៉េង សូមជម្រាបជូនដល់លោកអ្នកឧកញ៉ា អ្នកឧកញ៉ា ឧកញ៉ា លោកជំទាវ លោក លោកស្រី អ្នកនាង កញ្ញា ដែលជាអាជីវករ ពាណិជ្ជករ ម្ចាស់សហគ្រាស និងក្រុមហ៊ុន នៅទូទាំងរាជធានី-ខេត្ត និងសមាគមធុរកិច្ចជាតិ និងអន្តរជាតិ មេត្តាជ្រាបថា សភាពាណិជ្ជកម្មកម្ពុជា គឺជាស្ថាប័នតែមួយគត់ ដែលតំណាងឱ្យ វិស័យឯកជន ក្នុងការសម្របសម្រួល និងដោះស្រាយបញ្ហានានា តាមរយៈយន្តការវេទិការាជរដ្ឋាភិបាល-ផ្នែកឯកជន ដែលមានក្រុមការងារទាំង១៦ និងក្រុមការងារបច្ចេកទេសទាំង៨។
សភាពាណិជ្ជកម្មកម្ពុជា បានស្វែងរកដំណោះស្រាយរាល់បញ្ហាប្រឈមនានា និងលើកស្ទួយសកម្មភាព អាជីវកម្ម ធុរកិច្ច និងវិនិយោគ របស់វិស័យឯកជនទាំងក្នុង និងក្រៅព្រះរាជាណាចក្រកម្ពុជា ប្រកបដោយប្រសិទ្ធភាព និងខិតខំកាន់តែល្អ ប្រសើរលើកិច្ចសហការសម្របសម្រួលក្នុងភាពជាដៃគូ សន្ទនាគ្រប់ជ្រុងជ្រោយ ជាមួយក្រសួង-ស្ថាប័នរដ្ឋ ក្រោមយន្តការនៃវេទិការាជរដ្ឋាភិបាល-ផ្នែកឯកជន នឹងបង្កើនកិច្ច សហប្រតិបត្តិការស្អិតល្មួត និងវប្បធម៌សន្ទនារវាង ផ្នែកឯកជន ជាមួយ រដ្ឋាភិបាល និងរួមគ្នាដោះស្រាយបញ្ហាប្រឈម និងកង្វល់របស់ធុរជន និងវិនិយោគិន ក្នុងគោលដៅជំរុញការអភិវឌ្ឍវិស័យឯកជន និងរដ្ឋ តាមរយៈការផ្ដល់កិច្ច សម្រួលនានា ដែលរួមចំណែកក្នុងការធ្វើ ឱ្យប្រសើរឡើងនូវបរិយាកាសធុរកិច្ច និងវិនិយោគ នៅកម្ពុជា។
អាស្រ័យហេតុនេះ សូម អាជីវករ ពាណិជ្ជករ ម្ចាស់សហគ្រាស និងក្រុមហ៊ុន នៅទូទាំងរាជធានី-ខេត្ត និង សមាគមធុរកិច្ចជាតិ និងអន្តរជាតិ ដែលមាន បញ្ហាប្រឈម សំណូមពរ ធាតុចូល និងអនុសាសន៍ផ្សេងៗ សូមមេត្ត បញ្ជូនមក សភាពាណិជ្ជកម្មកម្ពុជា ដើម្បីចូលរួមដោះស្រាយ ឱ្យមានប្រសិទ្ធិភាព ក្នុងនាមដៃគូរជាមួយក្រសួង-ស្ថាប័ នពាក់ព័ន្ធរបស់រាជរដ្ឋាភិបាល ក្រោមយន្តការនៃវេទិការាជរដ្ឋាភិបាល-ផ្នែកឯកជន។សភាពាណិជ្ជកម្មកម្ពុជា សូមថ្លែងអំណរគុណអាជីវករ ពាណិជ្ជករ ម្ចាស់សហគ្រាស និងក្រុមហ៊ុន នៅ ទូទាំងរាជធានី-ខេត្ត និងសមាគមធុរៈ កិច្ចជាតិ និងអន្តរជាតិ ដែលតែងតែចូលរួមជាមួយសភាពាណិជ្ជកម្មកម្ពុជា ក្នុង ការជួយលើកស្ទួយ វិស័យឯកជន និងសេដ្ឋកិច្ចជាតិ
បើតាមសាររបស់ប្រធានសភាពាណិជ្ចកម្មបានឲ្យដឹងថា៖សភាពាណិជ្ជកម្មកម្ពុជា គឺជាសភាពាណិជ្ជកម្មថ្នាក់ជាតិតែមួយគត់និងដំបូងបង្អស់ ក្នុងការតំណាងការពារផលប្រយោជន៍ដល់វិស័យឯកជន។ អនុលោមតាមអនុក្រឹត្យលេខ១៦អនក្រ.បក ចុះថ្ងៃទី០៧ ខែកុម្ភ: ឆ្នាំ២០១៧ ស្ដីពី ការរៀបចំនិងការប្រព្រឹត្ដិរបស់សភាពាណិជ្ជកម្ម កម្ពុជា ភារកិច្ចសំខាន់របស់សភាពាណិជ្ជកម្មកម្ពុជា គឺជាដៃគូសន្ទនាជាមួយរាជរដ្ឋាភិបាល និងផ្តល់យោបល់ស្តីពីព័ត៌មានសេដ្ឋកិច្ច និងវិនិយោគ។ សភាពាណិជ្ជកម្មកម្ពុជា គឺជាលេខាធិការដ្ឋាន នៃក្រុមការងារផ្នែកឯកជននៃវេទិការាជរដ្ឋាភិបាល-ផ្នែកឯកជន ដែលជាយន្តការដ៏ជោគជ័យបំផុតមួយក្នុងពិភពលោក សម្រាប់ការអភិវឌ្ឍក្នុងវិស័យឯកជន។
ស្ថិតនៅក្នុងក្របខណ្ឌនៃវេទិកានេះ ច្បាប់និងបទប្បញ្ញត្ដិជាច្រើនត្រូវបានធ្វើវិសោធនកម្ម ដើម្បីបង្កភាពងាយស្រួល និងល្អប្រសើរសម្រាប់កិច្ចការធុរកិច្ច និងការវិនិយោគ។ ទន្ទឹមនឹងនេះផងដែរ សភាពាណិជ្ជកម្មកម្ពុជា បានធ្វើការយ៉ាងជិតស្និទ្ធជាមួយដៃគូអន្តរជាតិ ដើម្បីតភ្ជាប់កម្ពុជាជាមួយពិភពលោក។ គិតមកត្រឹមខែឧសភា ឆ្នាំ២០២១ សភាពាណិជ្ជកម្មកម្ពុជា បានចុះអនុស្សារណៈយោគយល់ ស្តីពីកិច្ចសហប្រតិបត្តិការបានចំនួន ១៣០ ជាមួយដៃគូនៅទូទាំងតំបន់ និងពិភពលោក។ សភាពាណិជ្ជកម្មកម្ពុជា ចូលរួមសហការយ៉ាងសកម្មជាមួយ ក្រុមប្រឹក្សាពិគ្រោះយោបល់ធុរកិច្ចអាស៊ាន ក្រុមប្រឹក្សាអាស៊ីខាងកើត ក្រុមប្រឹក្សាធុរកិច្ចមហាអនុតំបន់ទន្លេមេគង្គ ក្រុមប្រឹក្សាធុរកិច្ចអេកមិច ក្រុមប្រឹក្សាធុរកិច្ចមេគង្គឡាងឆាង ក្រុមប្រឹក្សាធុរកិច្ចមេគង្គកូរ៉េ ក្រុមប្រឹក្សាធុរកិច្ចអាស៊ានកូរ៉េ និងបណ្តាផលិតករអាស៊ាន។ល។សភាពាណិជ្ជកម្មកម្ពុជា រង់ចាំស្វាគមន៍ធុរជន និងវិនិយោគិន ទូទាំងពិភពលោក មកស្វែងរកកាលានុវត្តភាពនៅកម្ពុជា។
.jpg&h=97&w=146)
