តារាថៃ ៣នាក់ ត្រូវបានចាប់ខ្លួន ពាក់ព័ន្ធនឹងបទឆបោក ក្នុងទម្រង់វិនិយោគស្រដៀងស្រុកខ្មែរ !
15-March-2026 / សិល្បះនិងប្លែកៗ
ប្រទេសថៃ៖ ប៉ូលិសថៃ បានចាប់ខ្លួនមនុស្សចំនួន ១៨នាក់ ក្នុងនោះមានតារា ៣នាក់ ដោយបានដកហូតនូវរថយន្តស្ព័រទំនើបៗ និងលុយជិត ៤លានដុល្លារ ពាក់ព័ន្ធនឹងការឆបោកជាលក្ខណៈប្រព័ន្ធ តាមរយៈការលក់អាហារបំប៉នសុខភាព។ ក្នុងចំណោមសិល្បករទាំងបីរូប រួមមាន ពេជ្រឆាយ៉ា វ៉ាតាណាម៉ុនទ្រី (Pechaya Wattanamontri) ឬមេមីន (Boss Min), កាន កាន់តាថាវ៉ុន (Kan Kantathavorn) ឬមេកាន (Boss Kan), និងយូរ៉ាណាន ប៉ាម៉ុមម៉ុនទ្រី (Yuranan Pamornmontri) ឬ មេសាម (Boss Sam) ។
ទីភ្នាក់ងារសារព័ត៌មាន បារាំងAFP នៅថ្ងៃព្រហស្បតិ៍ ទី១៧ ខែតុលា ឆ្នាំ ២០២៤បានឲ្យដឹងថា៖ការចាប់ខ្លួននេះធ្វើឡើង បន្ទាប់ពីមនុស្សជាង ១,០០០នាក់ ដាក់ពាក្យប្តឹងក្រុមហ៊ុន iCon Group ដោយនិយាយថា ក្រុមហ៊ុននេះ បានទាក់ទាញពួកគេឱ្យទិញផលិតផល និងចុះកុងត្រាបន្តការទិញ។ ស្ថាបនិក និងជានាយកប្រតិបត្តិរបស់ iCon Group លោក Warathaphon Waratyaworrakul ហៅ Boss Paul ត្រូវបានឃុំខ្លួនកាលពីថ្ងៃពុធសប្តាហ៍នេះ ជាមួយពិធីករទូរទស្សន៍ល្បីម្នាក់ និងតារាសម្តែងម្នាក់ ក្រោមការចោទប្រកាន់ថា បានជួយបញ្ចុះបញ្ចូលជនរងគ្រោះ ឱ្យចូលរួមក្នុងគម្រោងនេះ។
អាជ្ញាធរនិយាយថា ពួកគេត្រូវបានបង្កកលុយចំនួន ១២៥លានបាត ឬស្មើនឹង ៣.៨លានដុល្លារ ដែលរក្សាទុកក្នុងគណនីធនាគារ CEO ៤នាក់ ហើយដកហូតបានរថយន្តប្រណីត រួមទាំងរថយន្ត Porsches និង Ford Mustangs ផងដែរ។ មេប៉ូលិសថៃ លោក Kitrat Phanphet បានប្រាប់អ្នកសារព័ត៌មានថា ប៉ូលិសកំពុងតាមដានរកគណនីធនាគារ និងការផ្ទេរសាច់ប្រាក់ពាក់ព័ន្ធជាមួយជនសង្ស័យ ដើម្បីរកឱ្យឃើញថាតើនៅមានមនុស្សផ្សេងទៀតទេ ពាក់ព័ន្ធក្នុងរឿងនេះ។
ថ្លែងទៅកាន់អ្នកសារព័ត៌មាន មេនគរបាលថៃ គីតរ៉ាត់ ផាន់ផេត (Kitrat Phanphet) ប្រាប់ថា មន្ត្រីនគរបាលថៃ កំពុងស្វែងរកមើលគណនីធនាគារ និងប្រតិបត្តិការផ្ទេរសាច់ប្រាក់ដែលមានភ្ជាប់ជាមួយជនសង្ស័យ ដើម្បីរកមើលថាតើមានមនុស្សប៉ុន្មាននាក់ផ្សេងទៀត មានជាប់ពាក់ព័ន្ធឬអត់ ។ក្រុមហ៊ុន The iCon Group ត្រូវបានចោទប្រកាន់ថាបានបោកបញ្ឆោតជនរងគ្រោះ ក្រោមរូបភាពផ្តល់ជូននូវវគ្គបណ្តុះបណ្តាលលក់អនឡាញក្នុងតម្លៃធូរថ្លៃ។ នៅពេលជនរងគ្រោះបានចុះឈ្មោះរួចរាល់ ក្រុមហ៊ុន បានព្យាយាមល្បួងឱ្យជនរងគ្រោះធ្វើការទិញផលិតផលបន្ថែម បូករួមទាំងការប្តេជ្ញាចិត្តផ្នែកហិរញ្ញវត្ថុចាប់ពី ២,៥០០ បាត ដល់ ២៥០,០០០ បាតនៃរូបិយប័ណ្ណថៃ ដែលជាយុទ្ធសាស្ត្រប្រើប្រាស់ដើម្បីផ្សព្វផ្សាយទាក់ទាញឱ្យមានអ្នកចូលរួមថ្មីៗបន្ថែមទៀត ។
យោងតាមប្រព័ន្ធផ្សព្វផ្សាយក្នុងស្រុក បានឱ្យដឹងថា ជនរងគ្រោះមួយចំនួន រាប់ចាប់ពីកម្មករដែលទទួលបានប្រាក់ចំណូលទាប រហូតដល់កីឡាករបាល់ទាត់ដែលអាចរកប្រាក់ចំណូលខ្ពស់ បានបង់ប្រាក់ជាង ៦០០,០០០ បាតដល់ក្រុមហ៊ុន។ នៅខណៈនេះ សមត្ថកិច្ចថៃ នៅមិនទាន់បានកំណត់ចំនួនទឹកប្រាក់សរុប ដែលត្រូវបានបោកប្រាស់នៅឡើយទេ ។ដោយឡែក នៅក្នុងប្រទេសឡាវ ឯណោះវិញ ក្រុមហ៊ុន The iCon Group ត្រូវគេរាយការណ៍ថា បានជ្រើសរើសសមាជិកជាង ១,០០០ នាក់ រួមទាំងសិល្បករ និងតារាល្បីៗនៅក្នុងប្រទេសនោះ។ តារាថៃល្បីៗ ចំនួនបីរូប ត្រូវបានផ្សព្វផ្សាយជាសាធារណៈក្នុងនាមជាបណ្ដាញប្រធានក្រុមហ៊ុន The iCon Group នៅក្នុងប្រទេសកម្ពុជា និងមីយ៉ាន់ម៉ា ព្រមទាំងបានអញ្ជើញពលរដ្ឋនៃប្រទេសទាំងពីរនេះ ឱ្យទៅបណ្តាក់ទុននៅក្នុងប្រទេសថៃឡង់ដ៍ ដើម្បីក្លាយជាតំណាងចែកចាយរបស់ក្រុមហ៊ុនថែមទៀតផង ។
ជាមួយគ្នានេះដែរ ស្ត្រីជនជាតិថៃម្នាក់ នៅឯប្រទេសជប៉ុន បានអះអាងថា ខ្លួនត្រូវគេបញ្ចុះបញ្ចូលឱ្យធ្វើជាប្រធានបណ្តាញ ក្រោមការដឹកនាំរបស់ The iCon Group ហើយបន្ទាប់មកទៀត ខ្លួនបានណែនាំអាជីវកម្មនេះទៅកាន់ជនជាតិថៃជាច្រើននាក់ទៀតនៅទីនោះ (ជប៉ុន) ប៉ុន្តែចុងក្រោយ ការវិនិយោគរបស់ពួកគេទាំងប៉ុន្មានត្រូវខាតបង់ ។ស្ត្រីជនជាតិថៃរូបនេះ បានបន្ថែមទៀតថា មនុស្សជាច្រើន ទទួលបានប្រាក់ត្រឡប់មកវិញត្រឹមតែ ៤ពាន់បាតប៉ុណ្ណោះ បន្ទាប់ពីបណ្ដាក់ទុនចំនួន ២៥ម៉ឺនបាត ក្នុងម្នាក់ៗ ក្នុងនាមជាតំណាងចែកចាយសម្រាប់ក្រុមហ៊ុន The iCon Group ។គួររម្លឹកថា ជុំវិញករណីបោកប្រាស់ជាសាធារណៈនៅក្នុងប្រទេសថៃឡង់ដ៍ នេះ កាលពីឆ្នាំមុន គម្រោងបោកប្រាស់វិនិយោគ “Forex 3D” បានបោកបញ្ឆោតជនរងគ្រោះរាប់ពាន់នាក់ ឱ្យចូលរួមវិនិយោគនៅក្នុងវេទិកាជួញដូររូបិយប័ណ្ណបរទេសក្លែងក្លាយ ៕ប្រភព៖ AFP/ The Nation Thailand
