កម្ពុជា សម្រេចចិត្តដកខ្លួនជាម្ចាស់ផ្ទះ និងលែងប្រកួតក្នុងកម្មវិធី Miss Grand International បន្ទាប់ពីមានការមាក់ងាយ!?
21-September-2026 / សិល្បះនិងប្លែកៗ
ភ្នំពេញ៖ ផេកផ្លូវការរបស់កម្មវិធីលំដាប់ពិភពលោក Miss Grand International បានប្រកាសដំណឹងដ៏គួរឲ្យសោកស្ដាយមួយ ពាក់ព័ន្ធនឹងការផ្លាស់ប្ដូរម្ចាស់ផ្ទះបន្ទាប់ពី ប្រទេសកម្ពុជាលែងធ្វើជាម្ចាស់ផ្ទះនៃកម្មវិធី Miss Grand International ។ចំពោះមូលហេតុនោះ ម្ចាស់កម្មសិទ្ធថៃបានដាក់ថា ក្រុមការងាររបស់ប្រទេសកម្ពុជា គឺមិនបានធ្វើកម្មវិធីនេះបន្ដទៀតនោះទេ ហើយត្រូវដកខ្លួនភ្លាមៗ។ មិនតែប៉ុណ្នោះ គេបានផ្ទេរសិទ្ធធ្វើជាម្ចាស់ផ្ទះនេះ ឲ្យទៅកាន់ប្រទេសថៃវិញ ដែលនឹងប្រារព្ធធ្វើកម្មវិធីចាប់ពីថ្ងៃទី០៧ ខែតុលា ខាងមុខនេះ តទៅ។
ផេកផ្លូវការរបស់ភាគីកម្ពុជាវិញបានប្រកាសដំណឹងថា កម្ពុជាដកខ្លួនចេញ ព្រោះតែខាង MGI មិនគោរពសិទ្ធកម្ពុជាដែលជាម្ចាស់ផ្ទះ ទើបធ្វើឲ្យយើងផ្ដាច់ខ្លួនចេញ លែងប្រកួតតែម្ដង។ផេក Miss Grand Cambodia បានរៀបរាប់ដូចខាងក្រោម៖ពួកយើងមានការសោកស្ដាយ ក្នុងការជូនដំណឹងថា Miss Grand Cambodia បានផ្ដាច់កុងត្រាជាមួយនឹង Miss Grand International ហើយ ដោយយោងតាមក្រុមការងារ Miss Grand International មិនមានការគោរពចំពោះកម្ពុជាដែលជាម្ចាស់ផ្ទះ និងមិនមានការសហការជាមួយក្រុមការងារខាងកម្ពុជាយើង។
គួរបញ្ជាក់ឲ្យដឹងដែរថា លោក Nawat Itsaragrisil គឺជាម្ចាស់កម្មវិធីមួយនេះ ហើយប្រទេសកម្ពុជាគឺជាម្ចាស់ផ្ទះនៅក្នុងឆ្នាំ២០២៤នេះ ផ្ទុយទៅវិញ ក្រុមការងារតំណាងឲ្យកម្ពុជា បានដកខ្លួនចេញពីការប្រារព្ធកម្មវិធីនេះ។ អ្នកនាង អ៊ឹម សុគន្ធា អ្នកទិញសិទ្ធិរៀបចំកម្មវិធី បានបញ្ជាក់ថា “មូលហេតុដែលកម្ពុជាមិនអាចបន្តកម្មវិធីបាន មានរឿងច្រើននិ ងរងសម្ពាធយ៉ាងខ្លាំង”។ ហេតុផលពីក្រោយរឿងនេះ ក៏ដោយសារតែការជជែកញែកមិនត្រូវគ្នា រវាងក្រុមការងាររបស់កម្ពុជា ជាមួយលោក Nawat ស្ថាបនិក Miss Grand International ដែលមិនឲ្យតម្លៃ និងមើលងាយដល់អ្នកនាង ព្រមទាំងក្រុមការងាររៀបចំរបស់កម្ពុជាតែម្តង។
ជុំវិញរឿងរ៉ាវនេះ អ្នកទិញសិទ្ធិរៀបចំកម្មវិធីឱ្យកម្ពុជាធ្វើម្ចាស់ផ្ទះ បានសម្តែងការសោកស្តាយជាខ្លាំង និងលើកឡើងនូវចំណុចមិនអាចទទួលយកបានមួយចំនួន ទាក់ទងនឹងទង្វើរបស់ថ្នាក់ដឹកនាំក្រុមហ៊ុន MGI (Miss Grand International) ដែលហាក់ផ្ទុយនឹងកិច្ចសន្យារវាងគ្នា។ក្នុងនោះ អ្នកទិញសិទ្ធិរៀបចំកម្មវិធីឱ្យកម្ពុជាធ្វើម្ចាស់ផ្ទះ MGI និងក្រុមការងារបានគូសបញ្ជាក់ហេតុផលមិនសមស្រប ជាច្រើនដែល MGI ទាមទារខាងកម្ពុជា មាន៥ចំណុចធំៗ រួមមាន៖
១. មុនដំណើររបស់បវរកញ្ញាទាំង ៧៤ ប្រទេសមកដល់ទីក្រុងភ្នំពេញ MGI និងក្រុមការងាររៀបចំកម្មវិធីខាងកម្ពុជា បានឯកភាពគ្នានូវលក្ខខណ្ឌមួយចំនួនរួចហើយ មិនថា artwork កម្មវិធី; ដំណើរទៅកាន់ទីណាខ្លះ; ការស្នាក់នៅ; ការទទួលទាន និងធ្វើដំណើរនោះឡើយ។ ប៉ុន្តែនៅពេលដែលក្រុមការងារ MGI មកដល់កម្ពុជាជាក់ស្តែង តែងតែធ្វើការ ផ្លាស់ប្តូរភ្លាមៗតាមចិត្តរបស់ខ្លួន ដោយមិនបានទុកពេលសមស្របសម្រាប់ក្រុមការងារខាងកម្ពុជាឡើយ។
២. MGI បានចោទបុគ្គលិករៀបចំខាងកម្ពុជាថា “មិនបានរៀបចំអ្នកគាំទ្រ ឱ្យមកទទួលក្រុមបវរកញ្ញាទាំង ៧៤ប្រទេស” ដោយទាមទារ Fan ចំនួន ៥០០នាក់ភ្លាមៗ ដោយតម្រូវឱ្យបដារ និង poster ដើម្បីទទួលក្រុមបវរកញ្ញា ហើយថែម ទាំងគំរាមថា “នឹងមិនរៀបចំកម្មវិធីនៅកម្ពុជា” ដោយទុកពេលឱ្យកម្ពុជា ២-៣ម៉ោងប៉ុណ្ណោះ។ ខណៈកម្ពុជា បានពន្យល់ពី ផលលំបាករបស់ខ្លួន និងមូលហេតុទាក់ទងនឹង ពិធីបុណ្យជាតិដ៏ធំរបស់កម្ពុជា ជាហេតុធ្វើឱ្យមនុស្សម្នា ចាកចេញទៅ ស្រុកកំណើត ខ្លះក៏ធ្វើដំណើរកម្សាន្ត ជាហេតុដែលក្រុងភ្នំពេញស្ងាត់ និងមិនមានការរៀបចំអ្នកគាំទ្រ។
៣. សម្រាប់ការដឹកនាំក្រុមបវរកញ្ញាទៅកាន់តំបន់នានា នៅព្រះរាជាណាចក្រកម្ពុជា MGI មិនបានធ្វើតាមការវិភាគរៀបចំ របស់ក្រុមការងារនៅកម្ពុជាឡើយ ដោយតែងតែផ្លាស់ប្តូរទីតាំង ឬទាមទារអ្វីភ្លាមៗតាមការចង់បានរបស់ខ្លួន ផ្ទុយពីលក្ខខណ្ឌដែលបានជជែកគ្នា។ត្រង់ចំណុចនេះ ក្រុមការងារអ្នកទិញសិទ្ធិរៀបចំកម្មវិធី បានលើកឡើងបពាក់ព័ន្ធនឹងការទទួលក្រុមបវរកញ្ញា ទាំង ៧៤ ប្រទេស ដោយបញ្ជាក់ថាMGI បានទាមទារឱ្យក្រុមការងារខាងកម្ពុជា រៀបចំការទទួលទានអាហារពេលល្ងាចនៅលើទូក ខណៈខាងកម្ពុជាបានទទូចមិនយល់ស្រប ព្រោះតែអំឡុងខែនេះជារដូវភ្លៀងធ្លាក់ វាអាចមិនមានសុវត្ថិភាព។ ប៉ុន្តែទោះជាបែបនេះ MGIភាគីថៃ នៅតែទាមទារថា ត្រូវតែធ្វើតាមការចង់បានរបស់ខ្លួនដាច់ខាត។ ជាក់ស្តែង ដោយសារតែ បញ្ហាភ្លៀងផង តម្រូវឱ្យក្រុមការងារត្រូវរូតរះរើចុះឡើង និងជូតសម្អាត ដើម្បីធានាសុវត្ថិភាពក្រុមបវរកញ្ញាផង ក្រែងមាន ឧបទវហេតុណាមួយ ជាហេតុធ្វើឱ្យ MGI មានឱកាសជាថ្មីចោទកម្ពុជាថា “យឺតយ៉ាវ” និងទាមទារផ្លាស់ប្តូរទូកភ្លាមៗ ហើយថែមជាទូកដែលមិនមែនខាងកម្ពុជា ជាអ្នករៀបចំទៀតផង។
៤. MGI ទាមទារអាហារជប៉ុនភ្លាមៗ តែនៅពេលដែលកម្ពុជាធ្វើតាមសំណើរហើយ បែរជាប្រកែកមិនទទួលយក ដោយលើកហេតុផលថា “ហាងអាហារជប៉ុន តែជនជាតិខ្មែរជាអ្នកធ្វើ” ។៥. MGI គ្រប់គ្រងកម្ពុជា សូម្បីតែការរៀបចំឆាក និងតុកម្មវិធីទទួល បើទោះជាបានឯកភាពគ្នាលើ artwork ដែលដាក់ទៅខាង MGI រួចហើយក៏ដោយ។ ប៉ុន្តែនៅពេលដែលរៀបចំជាក់ស្តែង MGI តែងបង្ហាញការមិនពេញចិត្តនឹង ការរៀបចំរបស់ កម្ពុជា និងទាមទារផ្លាស់ប្តូរភ្លាមៗជានិច្ច។
ម្ចាស់ក្រុមហ៊ុន HK7 និងជាអ្នកគ្រប់គ្រងកម្មវិធី Miss Grand Cambodia អ្នកនាង អ៊ឹម សុគន្ធា សង្កត់ធ្ងន់ថា ហេតុការណ៍នេះវាកើតឡើងភ្លាមៗ ទើបធ្វើឲ្យក្រុមការងារមានការខកចិត្តនិ ងស្ទើរទទួលយកពុំបានឡើយ។ អ្នកនាង បន្តទៀតថា “ដើមឡើយ យើងបានព្យាមយាមជជែករកដំណោះស្រាយដែរ តែក្រោយមក ស្រាប់តែឃើញផេករបស់លោក MGI ប្រកាសបញ្ចប់កម្ពុជាជាម្ចាស់ផ្ទះនៃកម្មវិ ធី Miss Grand International 2024 ជាមួយនឹងហេតុផលមិនអាចទទួលយកបាន។
អ្នកនាង អ៊ឹម សុគន្ធា បានបន្ថែមថា មកពីគេមើលងាយយើងខ្លាំងពេកទើបទប់មិនជាប់ក៏កើតមាន រឿងនេះឡើង ព្រោះគាត់មើលងាយមកលើកម្ពុជាយើងខ្លាំងណាស់ ពោលគឺចាប់តាំងពីដំបូងមកម្ល៉េះ។ អ្នកនាង អ៊ឹម សុគន្ធា និយាយដែរថា សម្រាប់ក្រុមការងារអ្នករៀបចំ MGI 2024 នៅលើទឹកដីកម្ពុជាគឺម្នាក់ៗ បានខិតខំប្រឹងប្រែងធ្វើ អស់ពីកម្លាំងកាយចិត្ត ទៅតាមការទាមទារគ្រប់ពេលរបស់ MGI បើទោះជាគេធ្វើឱ្យក្រុមការងារកម្ពុជា ពិបាកយ៉ាងណាក៏ដោយ។ការផ្អាកនេះបានធ្វើឲ្យបវរកញ្ញាដែលគ្រងមកុដ តំណាងឲ្យប្រទេសកម្ពុជានៅក្នុង ឆ្នាំ២០២៤ នេះគឺ កញ្ញា ប៊ី សុធារី ដែលរូបនាងមានរូបសម្បត្តិស្រស់ស្អាត និងសមត្ថភាពគ្រប់គ្រាន់ ត្រូវទៅប្រកួតដណ្ដើមយកមកុដជា Miss Grand International នៅប្រទេសថៃ លែងចូលរួមប្រកួតតទៅទៀតហើយ។ការផបង្កការលំបាកដែលបង្ខំឲ្យភាគិកម្ពុជាត្រូវផ្អាកលែងធ្វើជាម្ចាស់ផ្ទះភ្លាមៗបង្កឲ្យមានការចាប់អារម្មណ៍និងរិះគន់លេចចេញជាបន្តបន្ទាប់ក្នុងបណ្តាញសង្គម។
បវរកញ្ញាវ័យក្មេង ជូរី ល្អហួស ដែលត្រូវជាម្ចាស់មកុដ Miss Preteen Junior Idol World 2024 បានចេញមុខមកបង្ហោះរូបជាមួយ ND Miss Grand Cambodia អមជាមួយសំណេរចាក់ដោត ដែលមានខ្លឹមសារថា “ធ្វើល្អអស់មួយគំនរនៅតែគេមើលមិនឃើញគេរង់ចាំតែចាប់កំហុស ហើយគេមកជិះជាន់យើង តែអំពើល្អរបស់កម្ពុជា ព្រះប្រាកដជាមើលឃើញ”។ លើសពីនោះ ល្អហួស ក៏បានបន្ថថា “នាងខ្ញុំហ៊ាននិយាយថា ប្រទេសកម្ពុជាគឺជាប្រទេសមួយដែលប្រជាជនមានបេះដូងល្អ ប្រជាជនមានភាពរួសរាយរាក់ទាក់ មានភាពស្មោះត្រង់ មានភាពទំនួលខុសត្រូវ ទីកន្លែងណាគេមិនឲ្យតម្លៃយើង ដើរចេញពីទីនោះ នៅមានកន្លែងជាច្រើនទៀត គេរង់ចាំនិងផ្តល់តម្លៃឲ្យយើង។ ក្រៅពីលើកឡើងគំនិត និងឧត្ដមកិត្តិរបស់ខ្លួនរួចហើយបវរកញ្ញាវ័យក្មេងរូបនេះក៏បានលើកទឹកចិត្តលោកស្រី អឹម សុគន្ធា ថា “Mommy ធ្វើបានល្អហើយ Mommy លះបង់ច្រើនហើយដើម្បីកម្ពុជា”។ប្រភព៖ Miss Grand International
