មន្ត្រីរ៉ែនិងថាមពលខេត្តក្រចេះលួចនាំគ្នាចុះទៅមើលរណ្តៅរ៉ែមាសខុសច្បាប់នៅឃុំក្បាលដំរីរួចស្ងាត់ឈឹង!?
11-March-2026 / ព័ត៌មានជាតិ
ខេត្តក្រចេះ ៖ កាលពីព្រឹកថ្ងៃទី១៦ ខែតុលាឆ្នាំ២០១៨ មន្ត្រីជំនាញនៃមន្ទីររ៉ែ និង ថាមពលខេត្តក្រចេះ បានដឹកនាំកម្លាំងចុះទៅដល់ទីតាំង រណ្តៅរ៉ែមាសខុសច្បាប់ នៅចំណុចអូរត្រូន ឃុំក្បាលដំរី ស្រុកសំបូរ ខេត្តក្រចេះ ។ ពាក់ពន្ឋ័បញ្ហានេះអាជ្ញាធរស្រុកសំបូរ បានអោយដឹងថា ចំពោះករណីចុះពិនិត្យទីតាំងរ៉ែមាសចំណុចខាងលើ ស្រុកអត់បានដឹងទេ ពីព្រោះពាក់ពន្ឋ័ និងតំបន់នោះខាងមន្ទីជំនាញគេចុះធ្វើការជំនាញរបស់គាត់ គេអត់ប្រាប់ផងហើយលើកមុនក៏អត់ ដែលបានទៅដែរ ។
ការចុះពិនិត្យទីតាំងខាងលើ បានធ្វើឡើងបន្ទាប់ពីមាន កាផ្សាយពត៌មាន ជាបន្តបន្ទាប់នៅតាមបណ្តាញផ្សព្វផ្សាយ ជាច្រើន ។ ដោយឡែកចំពោះលទ្ឋផលនៃកាចុះពិនិត្យ ទីតាំងខាងលើ មិនទាន់មានការបញ្ជាក់ពីមន្ត្រីជំនាញបាននៅឡើយទេ ។ លោកសុខ គីរីរត្ន័ ប្រធានមន្ទីររ៉ែ និងថាមពលខេត្តក៏មិនអាចទំនាក់ទំនង សុំការបញ្ជាក់ពីលទ្ឋផល នៃចុះពិនិត្យទីតាំងរណ្តៅរ៉ែមាសខាងលើនេះ បាននៅឡើយទេ ។
ប្រជាពលរដ្ឋនិយាយថា៖ ទីតាំងរណ្តៅធំៗចំនួន៥កន្លែងដែលក្នុងនោះមាន ២កន្លែងស្ថិត នៅកន្លែងរណ្តៅដែលបង្កអោយមានកម្មករស្លាប់ពីឆ្នាំ២០១៧កន្លង ទំនងជាមិនអាចបិទបានទេមើលទៅ ព្រោះទោះរណ្តៅរ៉ែអត់ច្បាប់មួយនេះ មានបញ្ហាបង្កអោយមនុស្សស្លាប់ជាច្រើននាក់ ហើយត្រូវស្ថាប័នអយ្យកា ចេញលិខិតបិទអាជីវកម្មទាំងស្រុងក៏ដោយ តែក្រោយមកម្ចាស់រណ្តៅមួយនេះ នៅតែបន្តអាជីវរកម្ម បានធម្មតាវិញដដែល ធ្វើអោយគេជឿងថាពិតជា មានអ្នកនៅពីក្រោយខ្នងក្រាស់ បានជាគាត់ មិនញញើតចំពោះច្បាប់បែបនេះ ។
មជ្ឍដ្ឋានមួយចំនួនកំពុងរង់ចាំមើល ថាតើលើកនេះ មន្ត្រីជំនាញនៃមន្ទីររ៉ែ និងថាមពល អាចបិទអាជីវកម្មខុសច្បាប់ទាំងនេះ បានទាំងស្រុងដែរ ឬយ៉ាងណា ? ។ លោក សុខ គិរីរ័ត្ន ប្រធានមន្ទីររ៉ែនិងថាមពលខេត្តក្រចេះ ត្រូវបានមន្ត្រីក្នុងមន្ទីរនេះមួយចំនួនបង្ហើបឲ្យដឹងថា គិតតែពីរឿងផលប្រយោជន៍ផ្ទាល់ខ្លួនទើបក្រុមឈ្មួញអាចធ្វើអាជីវកម្មរ៉ែមាសខុសច្បាប់នៅភូមិអូរត្រូន យ៉ាងរលូន។ ប្រជាពលរដ្ឋរស់នៅក្នុងឃុំក្បាលដំរី ស្រុកសំបូរ ខេត្តក្រចេះ បានអំពាវនាវឲ្យលោក ស៊ុយ សែម រដ្ឋមន្ត្រី ក្រសួងរ៉ែនិងថាមពល ចាត់វិធានការទប់ស្កាត់អាជីវកម្មរ៉ែមាសខុសច្បាប់ដែលកំពុងកើតឡើងយ៉ាងរាលដាលនៅក្នុងមូលដ្ឋានពួកគាត់ជាបន្ទាន់។
ប្រជាពលរដ្ឋបានលើកឡើងថា ប្រសិនបើគ្មានការឃុបឃិតបើកដៃពីសំណាក់លោក សុខ គិរីរ័ត្ន ប្រធានមន្ទីររ៉ែនិងថាមពលខេត្តក្រចេះ ព្រមទាំងមន្ត្រីក្រោមឱវាទទេនោះគឺអាជីវកម្មរ៉ែមាសខុសច្បាប់ក្នុងឃុំក្បាលដំរី ស្រុកសំបូរ ខេត្តក្រចេះ មិនអាចកើតឡើងរាលដាលដូចសព្វថ្ងៃនេះទេ។ ប្រជាពលរដ្ឋក្នុងភូមិអូរត្រូន បានឲ្យដឹងថា សកម្មភាពរុករករ៉ែមាសនៅក្នុងមូលដ្ឋានពួកគាត់ គឺក្រុមឈ្មួញបានប្រើប្រាស់សារធាតុគីមីនិងប្រើប្រាស់រំសេវដើម្បីបំផ្ទុះយកថ្មរ៉ែមាសក្នុងរណ្ដៅរ៉ែធំៗ ហើយទម្លុះជម្រៅរាប់រយម៉ែត្រទៀតផង។
សូមបញ្ជាក់ថានៅឃុំកន្ទួត ស្រុកចិត្របុរី អាណាចក្រខេត្តក្រចេះកន្លងមកនេះមានប្រជាពលរដ្ឋ១០នាក់បានស្លាប់និងជាង៥០នាក់ពុលដោយសាពុលទឹកដែលអ្នកជំនាញមួយចំនួនរកឃើញថាមកពីជាតិពុលដែលចេញពីការកែច្នៃរករ៉ែមាស។តែរដ្ឋាភិបាលបានបន្លប់រឿងនេះថាពុលថ្នាំសម្លាប់ស្មៅទៅវិញដោយគ្មានសំណងដល់គ្រួសារជនរងគ្រោះម៉ាសែនឡើយ៕
