អង្គភាព CMAC មានផែនការបោសសម្អាតមីនឱ្យបានរួចរាល់នៅខែកក្កដា ឆ្នាំ២០២៥ខាងមុខនេះ
16-September-2024 / សន្តិសុខសង្គម
បាត់ដំបង៖ មន្ត្រីជាន់ខ្ពស់របស់អង្គភាព CMAC លោក ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយក CMAC បានបង្ហាញនូវផែនការសកម្មភាពរបស់ខ្លួននៅចំពោះមុខ ឯកអគ្គរាជទូតជប៉ុនប្រចាំនៅកម្ពុជា លោក UENO Atsushi (យូអិនុ អាស៊ូស្សិ) និងសហការីពាក់ព័ន្ធជាច្រើនទៀតក្នុងការបោសសម្អាតមីនឱ្យបានរួចរាល់នៅខែកក្កដា ឆ្នាំ២០២៥ក្នុងពេលដែលកន្លងមកមានពលរដ្ឋចំនួន១០នាក់ហើយ នៅភូមិអូរសំរិលក្រោម ស្រុកសំឡូត ខេត្តបាត់ដំបង ក្លាយជាជនរងគ្រោះដោយសារគ្រាប់មីន និងសំណល់ជាតិផ្ទុះពីសម័យសង្គ្រាម ។
ឯកអគ្គរាជទូតជប៉ុនប្រចាំនៅកម្ពុជា លោក UENO Atsushi (យូអិនុ អាស៊ូស្សិ) និងសហការីពាក់ព័ន្ធជាច្រើនទៀតបាន ចុះធ្វើទស្សនកិច្ចស្វែងយល់អំពីសកម្មភាពការងារបោសសម្អាតមីន ដែលធ្វើប្រតិបត្តិការដោយកងឯកភាពកំចាត់មីនទី២នៅចម្ការមីន មានទីតាំងឋិតនៅភូមិចម្លងរមាំងក្រោម ឃុំអូសំរិល ស្រុកសំឡូត ខេត្តបាត់ដំបង រយៈពេលមួយថ្ងៃពេញ គឺថ្ងៃទី២៨ ខែសីហា ឆ្នាំ២០២៤ ។
គណៈប្រតិភូទូតជប៉ុន បានស្វែងយល់ពីដំណើរការប្រតិបត្តិការបោសសម្អាតមីនរបស់កងឯកភាពកំចាត់មីនទី២នៃអង្គភាព CMAC រួមមាន ការបោសសម្អាតមីនដោយមនុស្ស ការបោសសម្អាតមីនដោយសុនខហិតមីន ការប្រើប្រាស់ម៉ាស៊ីនរាវមីនប្រភេទ ALIS (អាលីស) ដែលប្រើប្រាស់បច្ចេកវិទ្យាជប៉ុន និងគ្រឿងចក្រវាយកម្ទេចមីនជាដើម ។
ប្រធានស្តីទីកងឯកភាពកំចាត់មីនទី២ លោក ម៉ម វណ្ណារិទ្ធិ បានរាយការណ៍ពីការបោសសម្អាតមីន និងទិន្នផលសម្រេចបាននៅចម្ការមីន ដែលបានចាប់ផ្តើមប្រតិបត្តិការចាប់តាំងពីថ្ងៃទី២៣ ខែសីហា ឆ្នាំ២០២៤ ។ លោក ម៉ម វណ្ណារិទ្ធិបានបញ្ជាក់ថា ភូមិអូរសំរិលក្រោមនេះ ឋិតនៅជាប់ខាងក្រោយភ្នំវាយច្រាបពីទិសស្រុកសំឡូត ដែលមានផ្ទៃដីសរុបជាង ១២០០ហិកតា ក្នុងនោះមានជាង១០០គ្រួសារ ស្នើនឹងមនុស្សរាយជាង៥៦០នាក់កំពុងរស់នៅ ។ ផ្ទៃដីភូមិចំនួនប្រមាណ៦១% ស្មើនឹងជាង៧៦៤ហិកតា មានបញ្ហាគ្រាប់មីន និងគ្រាប់យុទ្ធភណ្ឌមិនទាន់ផ្ទុះ ក្នុងភូមិនេះមានប្រជាពលរដ្ឋចំនួន១០នាក់ បានក្លាយជាជនរងគ្រោះដោយសារគ្រាប់មីន និងយុទ្ធភណ្ឌមិនទាន់ផ្ទុះ សល់ពីសង្គ្រាម ។
អង្គភាព CMAC បានបោសសម្អាតចម្ការមីន បានចំនួន៣៣ ស្មើនឹង២៥០ហិកតា ផ្ទៃដី ដែលនៅសល់ចំនួនប្រមាណជាង៥០០ហិកតា ហើយអង្គភាព CMAC មានផែនការនឹងធ្វើការបោសសម្អាតគ្រាប់មីនឱ្យបានរួចរាល់នៅខែកក្កដា ឆ្នាំ២០២៥ ។ឯកឧត្តម ឯកអគ្គរាជរដ្ឋទូតជប៉ុនប្រចាំនៅប្រទេសកម្ពុជា UENO Atsushi យូអិនុ អាស៊ុស្សិ បានជម្រាបជូនប្រជាពលរដ្ឋអំពីការពង្រឹងកិច្ចសហប្រតិបត្តិការរវាងរដ្ឋាភិបាលជប៉ុន និងងរាជរដ្ឋាភិបាលកម្ពុជាលើវិស័យសកម្មភាពមីន ជាពិសេសតាមរយ:ដំណើរទស្សនកិច្ចរបស់លោកជំទាវរដ្ឋមន្ត្រីការបរទេសជប៉ុន មកប្រទេសកម្ពុជា កាលពីពេលថ្មីៗនេះ ដែលបានប្រកាសអំពីយុទ្ធសាស្ត្រថ្មីជប៉ុន-កម្ពុជានៃគំនិតផ្តួចផ្តើមសកម្មភាពកម្ចាត់មីន ដែលមានទស្សនៈវិស័យចំនួន៤បានដាក់ចេញ និងខិតខំអនុវត្តរួមគ្នា ។ ជប៉ុន គឺជាប្រទេសផ្តល់ជំនួយដ៏សំខាន់មួយក្នុងវិស័យសកម្មភាពមីន ដែលតែងតែផ្តល់ជំនួយគាំទ្រសកម្មភាពបោសសម្អាតគ្រាប់មីន និងសំណល់យុទ្ធភណ្ឌសង្គ្រាមនៅក្នុងប្រទេសកម្ពុជា ជាពិសេសគាំទ្រសកម្មភាពប្រតិបត្តិការរបស់អង្គភាព CMAC រួមមានសម្ភារបច្ចេកទេស គ្រឿងចក្រវាយកម្ទេចមីន រថយន្ត ម៉ាស៊ីនរាវមីន ព្រមទាំងថវិកាគាំទ្រកិច្ចប្រតិបត្តិការជាច្រើនទៀតផងដែរ។
ទាក់ទងបញ្ហាបោសសម្អាតមីននេះកាលពីខែធ្នូឆ្នាំ២០២២ រាជរដ្ឋាភិបាលកម្ពុជាអាណត្តិទី៦បាន សម្រេចបង្កើត«មូលនិធិកម្ពុជាគ្មានមីនឆ្នាំ២០២៥»ដើម្បីឈានទៅសម្រេចគោលដៅបោសសម្អាតគ្រាប់មីនមិនទាន់ឱ្យអស់នៅត្រឹមឆ្នាំ២០២៥ ក្នុងគោលដៅផ្តល់សុខសុវត្ថិភាព និងលើកកម្ពស់ភាពសុខដុមរមនារបស់ប្រជាពលរដ្ឋគ្រប់លំដាប់ថ្នាក់គ្រប់កាលៈទេសៈ និងគ្រប់ទីកន្លែង។អនុក្រឹត្យស្តីពីការបង្កើតមូលនិធិ ចុះហត្ថលេខាដោយសម្តេចនាយករដ្ឋមន្ត្រី ហ៊ុន សែន ចុះថ្ងៃទី៣ ខែធ្នូ ឆ្នាំ២០២២ បានសម្រេចបង្កើត«មូលនិធិកម្ពុជាគ្មានមីនឆ្នាំ២០២៥»សរសេរជាអក្សរកាត់ «ម.ក.គ.ម-២០២៥» សម្រាប់គ្រប់គ្រងថវិកាក្នុងការបោសសម្អាតមីន និងគ្រាប់មិនទាន់ផ្ទុះ ព្រមទាំងរំដោះផ្ទៃដីសង្ស័យមានមីន និងគ្រាប់មិនទាន់ផ្ទុះ ដើម្បីចូលរួមគាំទ្រគោលដៅកម្ពុជាអស់មីនឆ្នាំ២០២៥។
ក្នុងអនុក្រឹត្យដែលមានចែង ៨មាត្រា បានឱ្យដឹងថា «ម.ក.គ.ម-២០២៥»មានប្រភពធនធានពីវិភាគទានដំបូងពីថវិការដ្ឋចំនួន ១២៣ ១៨០លានរៀល (៣០ លានដុល្លារអាមេរិក)។វិភាគទានថវិការដ្ឋនេះសម្រាប់ឆ្នាំ២០២៣-២០២៤ និង ២០២៥ តាមការចាំបាច់ជាក់ស្តែង និងវិភាគទានពីប្រភពស្របច្បាប់ផ្សេងទៀត។អនុក្រឹត្យដដែល បន្តថា វិភាគទានរដ្ឋត្រូវកត់ត្រានៅក្នុងកញ្ចប់ថវិការបស់ក្រសួងសេដ្ឋកិច្ច និងហិរញ្ញវត្ថុ ហើយរដ្ឋមន្ត្រីក្រសួងនេះគឺលោក អូន ព័ន្ធមុនីរ័ត្ន ជាអ្នកទទួលខុសត្រូវ ក្នុងការគ្រប់គ្រង ប្រើប្រាស់ និងចាត់ចែង ដោយមានអគ្គនាយកដ្ឋានថវិកាជាលេខាធិការដ្ឋាន។ ធនធានហិរញ្ញវត្ថុរបស់ ម.ក.គ.ម-២០២៥ ត្រូវរក្សាទុកក្នុងគណនីប្រាក់បញ្ញើនៅរតនាគារជាតិ ឬគណនីធនាគារជាតិកម្ពុជា ហើយ ម.ក.គ.ម-២០២៥ អាចមានគណនីនៅធនាគារពាណិជ្ជ ដើម្បីប្រើប្រាស់តាមការសម្រេចរបស់រដ្ឋមន្ត្រីក្រសួងសេដ្ឋកិច្ច និងហរិញ្ញវត្ថុ។
ក្នុងអនុក្រឹត្យដដែល គូសបញ្ជាក់ថា ៖«អាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន ត្រូវរៀបចំផែនការសកម្មភាពការងារ ដែលត្រូវប្រើប្រាស់ប្រភពមូលនិធិ ម.ក.គ.ម-២០២៥ ដោយមានបញ្ជាក់ពីទីតាំង ទំហំផ្ទៃដីដែលត្រូវបោសសម្អាត និងប្រតិទិនការងារ ព្រមទាំងរបាយការណ៍សមិទ្ធកម្ម នៃការអនុវត្តសកម្មភាពការងារ»។ផែនការសកម្មភាពនេះ ជាកម្មវត្ថុនៃការសម្រេចរបស់នាយករដ្ឋមន្ត្រី តាមសំណើរបស់អាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន។បន្ទាប់ពីទទួលបានការអនុម័តពីនាយករដ្ឋមន្ត្រី អាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន ត្រូវរៀបចំគម្រោងស្នើសុំថវិកាទៅក្រសួងសេដ្ឋកិច្ច និងហិរញ្ញវត្ថុ ដើម្បីពិនិត្យ និងផ្តល់ជូនតាមការជាក់ស្តែង។
ទាក់ទងនិងជំនួយដោះមីនលោក ហេង រតនា នាយកមជ្ឈមណ្ឌលសកម្មភាពកំចាត់មីនកម្ពុជាហៅកាត់ថា ស៊ីម៉ាក់ បានប្រាប់ឱ្យដឹងនៅថ្ងៃទី៤ ខែធ្នូ ថាមូលនិធិនេះ មានសារៈសំខាន់ ដើម្បីរំដោះប្រទេសជាតិដែលខ្លោចផ្សា ដោយសារសំណល់ជាតិផ្ទុះសង្គ្រាមត្រូវបានបញ្ចប់ ប៉ុន្តែការខិតខំរបស់កម្ពុជារយៈពេល ៣០ឆ្នាំ មកនេះ នៅតែជួបបញ្ហា ព្រោះនៅការគំរាមកំហែងដល់ដីធ្លី សុខសុវត្ថិភាពប្រជាជន។
លោកថា៖«ឯដៃគូរបស់យើងបានជួយកម្ពុជារយៈពេល ៣០ឆ្នាំ ហើយរាជរដ្ឋាភិបាលបានខិតខំ ចូលរួមជាមួយដៃគូ ប៉ុន្តែរយៈពេលចុងក្រោយនេះ ដៃគូរបស់យើងមួយចំនួន កាន់តែបន្ថយនូវលទ្ធភាពជួយមកកម្ពុជា»។លោកបន្តថាដូច្នេះការបញ្ចប់អនុសញ្ញាអន្តរជាតិត្រឹមឆ្នាំ២០២៥ ខាងមុខមានកត្តាសំខាន់ជាមូលដ្ឋាន មិនត្រឹមតែសម្រាប់កម្ពុជា ក៏សម្រាប់អន្តរជាតិក្នុងនាមជាប្រទេសដែលទទួលរងគ្រោះ គឺយល់ពីសារៈសំខាន់នៃការសម្រេចបាននូវអនុសញ្ញាអន្តរជាតិដ៏សំខាន់មួយនេះ ក្នុងការហាមប្រាមប្រើប្រាស់គ្រាប់មីន។
គិតត្រឹមខែធ្នូ ឆ្នាំ២០២២ លោក ហេង រតនា បានថ្លែងក្នុងក្របខ័ណ្ឌអង្គភាពស៊ីម៉ាក់ គឺសម្រេចបានខេត្ដមួយចំនួនដែលអស់មីន រួមមានខេត្តកែប កំពត តាកែវ ព្រះសីហនុ កំពង់ឆ្នាំង ស្វាយរៀង និងខេត្តកំពង់ចាម ខណៈលោកថា នៅចុងឆ្នាំ ២០២២ ខេត្តចំនួន១១ គ្រោងប្រកាសអស់មីន។សម្តេចនាយករដ្ឋមន្ត្រី ហ៊ុន សែន កាលពីថ្ងៃទី១ ខែធ្នូ២០២២ បានឱ្យដឹងថា ថវិកាចំនួន ១៨ ៤៧៣ ៥៧០ដុល្លារ ដែលចេញពីព្រះរាជអំណោយរបស់ព្រះមហាក្សត្រ និងសម្តេចម៉ែ និងសប្បុរសជន សម្រាប់ការដោះមីនត្រូវចំណាយអស់នៅត្រឹមព្រឹកថ្ងៃ១ធ្នូ២០២២នេះ។ ជាមួយគ្នានោះ លោកបានអំពាវនាវដល់សប្បុរសជនបន្តចូលរួមឧបត្ថម្ភទៅតាមលទ្ធភាព។មកទល់ពេលនេះអាណ្ត្តិទៅ៧មិនដឹងថាតើមុនិធិនេះនៅដំណើរការបន្តទៀតដែរឬអត់នោះទេ?
