នាយនិងនាយរងការិយាល័យ ប្រឆាំងបទល្មើសគ្រឿងញៀន ខេត្ដស្ទឹងត្រែង ៣នាក់ ជាប់ពាក់ព័ន្ធនឹងបទល្មើសចោរកម្ម និងគ្រឿងញៀន
16-April-2026 / សន្តិសុខសង្គម
ស្ទឹងត្រែង៖ជនសង្ស័យ៣នាក់ ម្នាក់មានតួនាទីជា នាយការិយាល័យ និង២នាក់ទៀត ជានាយរងការិយាល័យប្រឆាំងបទល្មើសគ្រឿងញៀន នៃស្នងការដ្ឋាននគរបាលខេត្តស្ទឹងត្រែងត្រូវបានចៅក្រមស៊ើបសួរ នៃសាលាដំបូងខេត្តស្ទឹងត្រែង បានសម្រេចឃុំខ្លួននៅរសៀលថ្ងៃអង្គារទី២៣ ខែកក្កដា ឆ្នាំ២០២៤។
ការសម្រេចឃុំខ្លួនមន្ត្រីនគរបាលជំនាញគ្រឿងញៀនខេត្តស្ទឹងត្រែង ទាំង៣នាក់ របស់ ចៅក្រមស៊ើបសួរ នៃសាលាដំបូងខេត្តស្ទឹងត្រែង បានធ្វើឡើងក្រោយការសាកសួរ បន្ទាប់ពីទទួលបានសំណុំរឿង ចោទប្រកាន់របស់ តំណាងអយ្យការ អមសាលាដំបូងខេត្តស្ទឹងត្រែង និងក្រោយការឃាត់ខ្លួន និងបញ្ជូនសំណុំរឿងពី កម្លាំងកងរាជអាវុធហត្ថខេត្ត ក្រោយប្រតិបត្តិការស៊ើបអង្កេត ចុះឃាត់ខ្លួនជាបន្តបន្ទាប់ ក្នុងករណីពាក់ព័ន្ធជាមួយបទល្មើសគ្រឿងញៀន កាលពីរសៀលថ្ងៃទី២១ កក្កដា ២០២៤ នៅលើផ្លូវទំនប់បេតុង ស្ថិតក្នុងភូមិរាជានុកូល២ សង្កាត់ស្ទឹងត្រែង ក្រុងស្ទឹងត្រែង ខេត្តស្ទឹងត្រែង។
ប្រភពព័ត៌មាន បានឲ្យដឹងថា ជនសង្ស័យ ៣នាក់ ដែលត្រូវឃុំខ្លួន គឺ ១៖ ឈ្មោះ ចែម ផានិត មានឋានៈវរសេនីយ៍ឯក (ស័ក្តិ៥) មានតួនាទីជានាយការិយាល័យនគរបាល ប្រឆាំងបទល្មើសគ្រឿងញៀនខេត្តស្ទឹងត្រែង, ២៖ ឈ្មោះ ចាន់ រដ្ឋា ឋានៈវរសេនីយ៍ត្រី (ស័ក្តិ៤) ជានាយរងការិយាល័យប្រឆាំងបទល្មើសគ្រឿងញៀនខេត្ត និង៣៖ ឈ្មោះ ឃឹម លាងឃាន់ ឋានៈវរសេនីយ៍ត្រី (ស័ក្តិ៤) ជានាយរងការិយាល័យប្រឆាំងបទល្មើសគ្រឿងញៀន នៃស្នងការដ្ឋាននគរបាលខេត្តស្ទឹងត្រែង។
ប្រភពព័ត៌មានពីសមត្ថកិច្ច បានបង្ហើបឲ្យដឹងថា នៅក្នុងប្រតិបត្តិការចុះឡោមព័ទ្ធផ្ទះ និងការឃាត់ខ្លួនមន្ត្រីនគរបាលប្រឆាំងគ្រឿងញៀនខេត្តទាំង ៣នាក់នោះ គឺ ផ្អែកតាមការទទួលបាន ចម្លើយសារភាពរបស់ជនសង្ស័យ ក្នុងសំណុំរឿងចោរកម្ម លួចកាត់ខ្សែភ្លើង និងការប្រើប្រាស់គ្រឿងញៀន ដែលកម្លាំងកងរាជអាវុធហត្ថខេត្ត បានបង្ក្រាប និងចាប់ខ្លួនបាន កាលពីថ្ងៃទី១៧-១៨កក្កដា២០២៤ កន្លងទៅនេះ។ នៅក្នុងការឃាត់ខ្លួន នាយ និងនាយរងការិយាល័យប្រឆាំងគ្រឿងញៀនខេត្ត នាពេលនោះ គឺ កម្លាំងកងរាជអាវុធហត្ថខេត្ត បានបើកការស៊ើបអង្កេត ស្រាវជ្រាវហ្មត់ចត់បំផុត ដោយធ្វើឡើងក្នុងរយៈពេល ៣ថ្ងៃ ព្រោះត្បិតសុទ្ធសឹងតែជាអ្នកមានឋានៈ និងតួនាទីខ្ពស់ ក្នុងជួរកងកម្លាំង។ក្រោយការស៊ើបអង្កេតយ៉ាងល្អិតល្អន និងឈានដល់ការឃាត់ខ្លួន មន្ត្រីនគរបាលប្រឆាំងគ្រឿងញៀនខាងលើនោះ កម្លាំងកងរាជអាវុធហត្ថខេត្ត បានបញ្ជូនជនសង្ស័យទាំង៣នាក់ ទៅកាន់អយ្យការ និងសាលាដំបូងខេត្ត។
ជុំវិញការចេញដីកាសម្រេចឲ្យឃុំខ្លួនបណ្តោះអាសន្ន លើជនត្រូវចោទទាំង ៣នាក់ ខាងលើ នេះស្នលោកឧត្តមសេនីយ៍ទោ អូត ស៊ីវុត្ថាងការនគរបាលខេត្តស្ទឹងត្រែង បានប្រាប់អ្នកសារព័ត៌មាន តាមប្រព័ន្ធតេឡេក្រាម នាថ្ងៃទី២៤ ខែកក្កដា ឆ្នាំ២០២៤នេះ ឲ្យដឹងថា នេះគ្រាន់តែជាចម្លើយសារភាពអាចោរលួចខ្សែភ្លើង ដែលវាប្រើប្រាស់គ្រឿងញៀនទេ បើភស្តុតាងពិតមិនពិតអាហ្នឹងអត់ទាន់មានទេ អញ្ចឹងបើមានភស្តុតាងពិត អាហ្នឹងធ្វើតាមច្បាប់ចុះមានតែប៉ុនហ្នឹងទេ។ មន្ត្រីនាំពាក្យសាលាដំបូងខេត្តស្ទឹងត្រែង លោក ឈុំ ស៊ាងហាក់ បានប្រាប់អ្នកសារព័ត៌មានឲ្យដឹង នៅថ្ងៃពុធទី២៤ ខែកក្កដា ឆ្នាំ២០២៤នេះដែរថា ក្នុងសំណុំរឿងខាងលើនេះ ព្រះរាជអាជ្ញា នៃអយ្យការអមសាលាដំបូងខេត្ត និងចៅក្រមស៊ើបសួរ នៃសាលាដំបូងខេត្តស្ទឹងត្រែង បានចោទប្រកាន់រួចរាល់ និងចេញដីកាឃុំខ្លួនរួចហើយ។ វត្ថុតាងដែលរឹបអូសបាន រួមមាន៖ ប្រាក់ដុល្លារសុទ្ធចំនួន ៤ម៉ឺនដុល្លារ, ប្រាក់ដុល្លារក្លែងក្លាយ ចំនួន១៧៨,១០០ដុល្លារ គ្រឿងញៀនមានទម្ងន់៣,១៧ក្រាម ទូរស័ព្ទ ៥គ្រឿង រថយន្តម៉ាកហាយឡិនឌ័រ ១គ្រឿង អាវុធខ្លី១ដើម និងគ្រាប់មានចំនួន ៣៤គ្រាប់ ផងដែរ៕
