អាជ្ញាធរនិងសិស្សរងគ្រោះនិយាយខុសគ្នាករណីយ៍គ្រូវិទ្យាល័យម្លូទាត់សិស្សបណ្តាលឱ្យបាក់កជើង

ពោធិសាត់៖រដ្ឋបាលស្រុកបាកាន នៅថ្ងៃទី១៧កុម្ភៈ បានចេញសេចក្តីបំភ្លឺករណីការចុះផ្សាយថាគ្រូទាត់សិស្ស មួយទំហឹងពីក្រោយ ធ្វើឱ្យបាក់ជើងបង្កជាខ្ទុះ ត្រូវចូលពេទ្យវះកាត់សង្គ្រោះបន្ទាន់ ដោយសារមូលហេតុមិនមានស្បែកជើងប៉ាតាពាក់ទៅរៀន។ 

រដ្ឋបាលស្រុកបាកាន បានឱ្យដឹងថា ការពិតគឺ ករណីសិស្សឈ្មោះ លី សុវណ្ណរាជ រៀនថ្នាក់ទី៧ “C” នៃវិទ្យាល័យព្រះម្លូរ បានលេងទាត់បាល់ជាមួយមិត្តភ័ក្ត ឈឺជើងឆ្វេងរួចមកហើយតាំងពីមុនថ្ងៃទី២ ខែធ្នូ ឆ្នាំ២០២៥ ដែលជាថ្ងៃកើតហេតុ។ ដោយសិស្ស លី សុវណ្ណរាជ បានដាក់ជើងឈឺស្រាប់ដែលបណ្តាលមកពីគ្រិច និងមុតអំបែងកែវលើបង់ ពេលលោកគ្រូ សេន សុថៃ កំពុងអប់រំណែនាំ និងមិនបានដឹងពីអាការរបស់សិស្ស ទើបយកជើង ឆ្លុះទម្លាក់ពីលើបង់ ដែលបណ្តាលឱ្យមានការចោទប្រកាន់ថា បានទាត់បាក់ជើង។

រដ្ឋបាលស្រុកបាកាន បំភ្លឺបន្តថា រហូតមកដល់ថ្ងៃទី៦ ខែធ្នូ ឆ្នាំ២០២៥ សិស្សខាងលើ មានអាការក្តៅខ្លួនខ្លាំង ទើបលោកគ្រូ កូវ ដារ៉ា និងអ្នកគ្រូ កែវ សុខឃឹម បាននាំ មកមន្ទីរពេទ្យបង្អែកបាកាន ឃុំបឹងខ្នារ ស្រុកបាកាន ខេត្តពោធិ៍សាត់ ។ តាមការបញ្ជាក់ពីម្តាយកូនសិស្សបានឱ្យដឹងថា ឈ្មោះ លី សុវណ្ណរាជ មានជំងឺគ្រុនឈាម ដោយបន្ថែមថាពេទ្យព្យាបាលជំងឺគ្រុនឈាមមុនសិន ទើបព្យាបាលជើងតាមក្រោយ ។ នៅថ្ងៃទី១១ ខែធ្នូ ឆ្នាំ២០២៥ លោកនាយក នាយករង និងលោកគ្រូ តាន់ ពិសិដ្ឋ បានទៅសួរសុខទុក្ខនិងតាមដានអាការ របស់សិស្សនៅមន្ទីរពេទ្យជាមួយម្តាយរបស់គាត់។

ក្នុងកំឡុងរយៈពេល៣ថ្ងៃក្រោយមក ទើបអាណាព្យាបាលសិស្សបានមកស្នើសុំច្បាប់ ដើម្បីយកកូនទៅព្យាបាលនៅរាជធានីភ្នំពេញ ។ តាំងពីពេលនោះមកក៏មិនមានដំណឹង និងមិនបានទាក់ទងគ្នាដែរ ទើបតែដល់ថ្ងៃទី១៦ ខែកុម្ភៈ ឆ្នាំ២០២៦ មានការបង្ហោះតាមបណ្តាញសង្គមគណនីឈ្មោះ កា ទ្រីត និងមានការចែករំលែកជាបន្តបន្ទាប់ ធ្វើឱ្យសាធារណជនមានការ ភ័ន្តច្រឡំ។ នេះជាការបញ្ជាក់របស់រដ្ឋបាលស្រុកបាកាន។

ចំណែក ករណីដែលបានលើកឡើងថាគ្រូពិន័យ ដែលសិស្សនោះមិនមានឯកសណ្ឋាន (ទ្រនាប់ជើងប៉ាតា) គឺមិនពិតនោះទេ ប៉ុន្តែសាលានៅតែលើកទឹកចិត្តសិស្សានុសិស្សទាំងអស់ឱ្យគោរពវិន័យសាលា ។ ជាមួយគ្នា គណៈគ្រប់គ្រងសាលា រង់ចាំទទួលការចូលខ្លួនមកបំភ្លឺ និងដោះស្រាយចំពោះអាណាព្យាបាលសិស្ស តែមកដល់ពេល នេះមិនមានសាច់ញាតិណាមកទំនាក់ទំនងដោះស្រាយ ព្រមទាំងអាជ្ញាធរស្រុក និងមន្ទីរអប់រំខេត្តបានព្យាយាមទំនាក់ ទំនងម្ចាស់គណនីឈ្មោះ កាទ្រីត ប៉ុន្តែទាក់ទងមិនបាន ហើយនៅតែបន្តចែករំលែកក្នុងបណ្តាញសង្គម ។

រដ្ឋបាលស្រុកបាកាន បានអំពាវនាវដល់សាធារណជន និងអ្នកនិយមលេងបណ្តាញសង្គមមេត្តាជ្រាប និងបញ្ឈប់ការចែក រំលែកព័ត៌មាននេះ ដែលធ្វើឱ្យប៉ះពាល់ដល់កិត្តិយស សេចក្តីថ្លៃថ្នូរ របស់គ្រូបង្រៀន និងពាក់ព័ន្ធនឹងបទបរិហាកេរ្តិ៍។ ប្រសិនបើបន្តចែករំលែក ព័ត៌មានមិនពិតនេះទៀត នឹងប្រឈមក្នុងការទទួលខុសត្រូវចំពោះមុខច្បាប់ជាធរមាន។ផ្ទុយពីការបំភ្លឺរបស់អាជ្ញាធរស្រុកបាកានផ្ទុយពីសិស្សរងគ្រោះដែលបាននិយាយអះអាថាគ្រូពិតជាបានធាក់ជើងគាត់បាក់ពិតប្រាកដមែន។សិស្សរូបនេះនិយាយថាគ្រូដែលលើកជើងគាត់ដាក់លើបង់ហើយធាក់គឺកាចសាហាវ។