បែកធ្លាយឯកសារលិខិតឆ្លងដែនរបស់ជនជាតិថៃឆ្លងចូលដីខ្មែរ តាមច្រកព្រំដែនអន្តរជាតិអូរស្មាច់ មិនមានបោះត្រាកម្ពុជា !?
28-April-2024 / ព័ត៌មានជាតិ
ខេត្តឧត្តរមានជ័យ : ថ្មីៗនេះ មានការបែកធ្លាយនូវឯកសារ លិខិតឆ្លងដែន ឬ បរដឺផាស ( ប័ណ្ណឆ្លងព្រំដែន ) ចេញ-ចូល តាមច្រកទ្វារព្រំដែនអន្តរជាតិ អូរស្មាច់-ឆងចម របស់ជាតិថៃ ដែលធ្វើដំណើរឆ្លងដែន ចេញ-ចូលមកក្នុងទឹកដីខ្មែរ ពុំមានវាយត្រា របស់ប៉ូលីសអន្តោប្រវេសន៍របស់កម្ពុជាទេ ។
តាមប្រភពព័ត៌មាន ពីភ្ញៀវទេសចរ ដែលធ្លាប់ចេញ ចូលលេងល្បែងកំសាន្តក្នុងកាសុីណូ អូរស្មាច់រីសតនៅជាប់មាត់ច្រកទ្វារព្រំដែនអន្តរជាតិអូរស្មាច់ ស្ថិតក្នុងស្រុកសំរោង ខេត្តឧត្តរ មានជ័យ បានប្រាប់តាមទូរស័ព្ទ មកការិយាល័យនិពន្ធ គេហទំព័រ មាតុភូមិ www.meatophoum.com អោយដឹងថា : ក្នុង១ថ្ងៃៗមានភ្ញៀវទេសចរជនជាតិថៃចំនួនពី ៤០០នាក់ទៅ៥០០នាក់ បានឆ្លងព្រំដែន ចូលដីខ្មែរ ក្នុងចំណោមនោះភ្ញៀវខ្លះប្រហែលពី៣០នាក់ទៅ៤០នាក់ត្រូវបាន គេដឹកតាមរថយន្តទេសចរណ៍លំដាប់ VIP ចេញពីទឹកដីថៃ ឆ្លងចូលទឹកដីខ្មែរ តាមច្រកទ្វារអន្តរជាតិព្រំដែនអូរស្មាច់ ដោយពុំមានការត្រួតពិនិត្យឆែកឆេរ ពីសំណាក់សមត្ថកិច្ចខ្មែរនៅតាមមាត់ច្រកទ្វារព្រំដែនអន្តរជាតិអូរស្មាច់ឡើយ ហើយឆ្ពោះចូលទៅក្នុងកាសុីណូអូរស្មាច់រីសត និងរ៉ូយ៉ាល់ហៀលយ៉ាងរលូនជារៀងរាល់ថ្ងៃ ។
ដោយឡែក មន្ត្រីសមត្ថកិច្ចថ្នាក់តូចតាចម្នាក់ នៅមាត់ច្រកព្រំដែនអន្តរជាតិ អូរស្មាច់បានលួចប្រាប់ភ្នាក់ងារគេហទំព័រមាតុភូមិ អោយដឹងថា: ករណី លិខិតឆ្លងដែន ឬ ប័ណ្ណព្រំដែន សំរាប់ឆ្លងកាត់ព្រំដែនចេញ-ចូលក្នុងទឹកដីខ្មែរ របស់ជនជាតិថៃ មានវាយត្រាអន្តោប្រវេសថៃ តែខាងខ្មែរពុំមានការវាយត្រារបស់នគរបាលអន្តោ ប្រវេសន៍កម្ពុជាទេ ។ ករណី លិខិតឆ្លងដែនឬប័ណ្ណឆ្លងព្រំដែន របស់ជនជាតិថៃឆ្លងចូលទឹកដីកម្ពេុជានេះកើតមានយូរយារណាស់មក ហើយ តាំងពីមេៗប៉ូលីសអន្តោប្រវេសន៍ជំនាន់មុនៗបានផ្លាស់ប្តូរតំណែងជាច្រើននាក់មកហើយ មុននឹងធ្លាក់មក ដល់វេនលោក វរសេនីយ៍ឯក ស្រេង ធារី នាយប៉ុស្តិ៍នគរបាលអន្តោ ប្រវេសន៍ច្រកទ្វារព្រំដែនអន្តរជាតិអូរស្មាច់ សព្វថ្ងៃនេះ ។
យោងតាមប្រភពព័ត៌មានពីមន្ត្រីនគរបាលថ្នាក់ទាប បានប្រាប់អោយភ្នាក់ងារមាតុភូមិដឹងថា : ចាប់តាំងពេលដែលលោក ស្រង ធារី ចូលមកកាន់តំណែងជានាយប៉ុស្តិច្រកទ្វារព្រំដែនអន្តរជាតិអូរស្មាច់ ក្រោមអធិបតី ភាពលោកឧត្តមសេនីយ៍ឯក សុខ វាសនា អគ្គនាយក នៃអគ្គនាយកដ្ឋានអន្តោប្រវេសន៍ រហូតមកដល់ពេលនេះ ក៏គ្មានអ្វី កែប្រែផ្លាស់ប្តូរទម្លាប់ចាស់ទេ នៅ តែបន្តអនុវត្តនូវរូបមន្ត ឬគោល ការណ៍ចាស់បន្តដដែល គឺនៅស្ងៀមស្ងាត់ធ្វើមិនដឹងមិនឮ មើលមិនឃើញពីករណីជនជាតិថៃ ឆ្លងចូលមកក្នុងទឹកដីខ្មែរទាំងឡានៗ ក្នុង១ថ្ងៃៗ មិនក្រោមពី ៤០០ទៅ៥០០នាក់ទេ ដោយពុំ ត្រូវបានធ្វើការត្រួតពិនិត្យ ឬឆែកឆេរលើលិខិតឆ្លងដែន ឬ ប័ណ្ណព្រំដែនរបស់ជនជាតិថៃ ទាំងនោះទេ ព្រោះពុំមានឃើញបោះត្រាខ្មែរ លើលិខិតឆ្ងងដែន ឬប័ណ្ណព្រំដែនរបស់ជនជាតិថៃដែលត្រួវបានគេដឹកជញ្ជូនតាមរថយន្ត ចូលទៅក្នុងបរិវេណអាគារកាស៊ីណូ អូរស្មាច់រីសត ឬកាសុីណូរ៉ូយ៉ាល់ហៀល ដែលមានទីតាំងនៅជាប់មាត់ច្រក ព្រំដែន ។
ដោយឡែក តាមប្រភព ពីមន្ត្រីរាជការធ្វើការងារ នៅក្នុងសាលាខេត្តឧត្តរមានជ័យ បានលួចប្រាប់មក ការិយាល័យ មាតុភូមិ អោយដឹងថា : ករណី ជនជាតិថៃដែលចូលមកលេងល្បែងក្នុងកាសុីណូ អូរស្មាច់ រីសត ឬកាសុីណូរ៉ូយ៉ាល់ហៀល ក្នុង១ថ្ងៃៗ៤០០ ទៅ៥០០នាក់ ហើយពុំមានការបោះត្រាខ្មែរលើ លិខិតឆ្លងដែន ឬ ប័ណ្ណព្រំដែន ពីមន្ត្រីនគរបាលអន្តោប្រវេសន៍ច្រកទ្វារព្រំដែនអន្តរជាតិអូរស្មាច់នេះ គឺត្រូវបានថៅកែក្រុមហ៊ុនកាស៊ីណូគេចាត់ចែងរៀបចំបែបបទ កញ្ចប់ស្រោមសំបុត្រពិសេសជាមួយមេៗ ថ្នាក់ដឹកនាំ តាមឋានានុក្រមតាំងពីថ្នាក់ខេត្តរហូតដល់ប៉ុស្តិមាត់ច្រកទ្វារនិងសមត្ថកិច្ចពាក់ព័ន្ធទាំងអស់ជាប្រចាំខែយ៉ាងរលូន ទើបគ្មានការរំខានដល់ភ្ញៀវទេសចរជន ជាតិថៃមកលេងល្បែងស៊ីសងក្នុងកាស៊ីណូ បែបនេះ ។ មន្ត្រីប៉ូលីសអន្តោប្រវេសន៍ចូលនិវត្តន៍ ម្នាក់បានប្រាប់តាមទូរស័ព្ទ ថា : ជាទូទៅមន្ត្រីប៉ូលីសអន្តោប្រវេសន៍នៅមាត់ច្រកទ្វារព្រំដែនអន្តរជាតិទាំងអស់ មិន ថា ច្រកទ្វារព្រំដែនគោក ព្រំដែនទឹក ឬច្រកទ្វារព្រលានយន្តហោះអន្តរជាតិភ្នំពេញទេ គឺត្រូវតែធ្វើការត្រួតពិនិត្យយ៉ាងល្អិតល្អន់ លើលិខិតឆ្លងដែន ឬប័ណ្ណព្រំដែនគ្រប់ជាតិសាសន៍ បើឆ្លងដែនពីប្រទេសចូលទៅប្រទេស១ទៀតគឺត្រូវតែ វាយប្រថាប់ត្រានៅប៉ុស្តិប៉ូលីសអន្តោប្រវេសន៍មាត់ច្រកព្រំដែនជាច់ខាត មិនអាចអត់បោះត្រាបានទេ បើគ្មានបោះត្រាខ្មែរចូល ដូចលិខិតឆ្លងដែនរបស់ជនជាតិថៃមួយចំនួនដែលចូលមកក្នុងដីខ្មែរតាមច្រកអូរស្មាច់នេះ គឺជា រឿងខុសច្បាប់ហើយ ។
មន្ត្រីដដែលបានបន្តថា: ចុះបើមានជនជាតិថៃណាមួយ ជាចារកម្ម ហើយគេចូលមកតាមរយ:ជាភ្ញៀវ មកលេងល្បែងសុីសងក្នុងកាសុីណូ ហើយពុំមានការត្រួតពិនិត្យលើលិខិតឆ្លងដែនពីសមត្ថកិច្ចខ្មែរយើងនៅតាមច្រកទ្វារព្រំដែនបែបនេះពួកគេងាយស្រួលក្នុងការធ្វើសកម្មភាពផ្សេងៗ ហើយគេចខ្លួនបានយ៉ាងមានសុវត្ថិភាព ។ ជុំវិញ ការបែកធ្លាយនូវឯកសារ លិខិតឆ្លងដែនឬ ប័ណ្ណព្រំដែនរបស់ជនជាតិថៃដែលចូលមកក្នុងទឹកដីខ្មែរ ហើយគ្មានបោះត្រា ខ្មែរនេះ ភ្នាក់ងារយកព័ត៌មាន គេហទំព័រ មាតុភូមិ ប្រចាំខេត្តឧត្តរមានជ័យ បានព្យាយាមសុំ ជួប និងសុំការបំភ្លឺ ពីលោកវរសេនីយ៍ឯក ស្រេង ធារី នាយ ប៉ុស្តិ អន្តោប្រវេសន័ ច្រកទ្វារអន្តរជាតិអូរស្មាច់ តាម ទូរស័ព្ទដែរ តែលោកពុំលើកទូរស័ព្ទ ។ ករណីខាងលើនេះ ប្រជាពលរដ្ឋ និងមន្ត្រីរាជការ ក្នុងខេត្តឧត្តរមានជ័យ បានសំណូមពរ ដល់ លោកឧត្តមសេនីយ៍ឯក សុខ វាសនា អគ្គនាយក នៃអគ្គនាយកដ្ឋានអន្តោប្រវេសន៍ និងឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ពិសេសប្រមុខដឹកនាំប្រទេស សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា មេត្តាពិនិត្យ និងស្រាវជ្រាវមានវិធានការទប់ស្កាត់ ឬ ដាក់ ទោស ទណ្ឌលើមន្ត្រីអនុវត្តច្បាប់ ដែល មិនយកចិត្តទុកដាក់ក្នុងតួនាទី ភារកិច្ច លើការងាររបស់ខ្លួន ៕ ដោយ: ស៊ុន សុផល និង ពិទូ
