រឿងពលករនៅអារ៉ាប៊ីសាអូឌីតក្រសួងការងារថាស្រាវជ្រាវតែក្រុមហ៊ុនថាត្រូវការពេលវេលាច្រើនដើម្បីសម្របសម្រួលសិន
26-December-2024 / ព័ត៌មានជាតិ
ភ្នំពេញ៖ដើម្បីឱ្យពលករនៅប្រទសអារ៉ាប៊ីសាអូឌីតអាចមកកម្ពុជាវិញ ក្រុមហ៊ុន ហ្វាទីណា មេនផៅវ័រ ឯ.ក នៅថ្ងៃអាទិត្យទី០៥ ខែឧសភា ឆ្នាំ២០២៤ បានចេញសេចក្តីប្រកាសព័ត៌មាន ដោយបញ្ជាក់ថា ក្រុមហ៊ុនបាននិងកំពុងសម្របសម្រួលជាមួយក្រុមហ៊ុនទទួលលើនីតិវិធីរៀបចំឯកសារ ដើម្បីទទួលបានការអនុញ្ញាតឱ្យចាកចេញពីប្រទេសអារ៉ាប៊ីសាអូឌីតដោយស្របច្បាប់ ដែលត្រូវប្រើពេលដើម្បីទទួលបានការអនុញ្ញាតពីអាជ្ញាធរនៃប្រទេសអារ៉ាប៊ីសាអូឌីត។
ក្រុមហ៊ុនបានសហការជាមួយក្រសួងការងារ និងបណ្ដុះបណ្ដាលវិជ្ជាជីវៈ ក្រសួងការបរទេស និងសហប្រតិបត្តិការអន្តរជាតិ និងស្ថានឯកអគ្គរាជទូតកម្ពុជាប្រចាំប្រទេសអារ៉ាប៊ីសាអូឌីត ដែលមាននិវេសនដ្ឋាននៅទីក្រុងគែរ ប្រទេសអេហ្ស៊ីប បានរៀបចំកន្លែងស្នាក់នៅជាបណ្ដោះអាសន្នជុំគ្នា និងផ្តល់អាហារប្រចាំថ្ងៃ ជូនដល់បងប្អូនទាំងអស់ភ្លាមៗ។ នេះបើតាមការបញ្ជាក់របស់ក្រុមហ៊ុនខាងលើ។គួរបញ្ជាក់ថា គិតមកដល់ពេលនេះ មានពលករខ្មែរដែលទៅធ្វើការនៅប្រទេសអារ៉ាប៊ីសាអ៊ូឌីតចំនួន២៨នាក់បានវិលត្រឡប់មកប្រទេសកម្ពុជាវិញដោយសុវត្ថិភាពរួចហើយ ក្រោមការសម្របសម្រួលរបស់ក្រសួងការងារ និងបណ្តុះបណ្តាលវិជ្ជាជីវៈ ក្រសួងការងារបរទេស និងតំណាងស្ថានទូតខ្មែរប្រចាំអារ៉ាប៊ីសាអូឌីត។
បើតាមក្រសួងការងារកម្ពុជាបានឲ្យដឹងក្រោយពីមានការអំពាវនាវសុំជួយសង្គ្រោះថា មានពលករខ្មែរសរុបចំនួន ៧៨នាក់ដែលចាញ់បោកមេខ្យល់នាំទៅធ្វើការនៅប្រទេសអារ៉ាប៊ីសាអ៊ូឌីតបានស្នើសុំជំនួយអន្ដរាគមន៍ឱ្យជួយសង្គ្រោះពួកគេពីអារ៉ាប៊ីសាអ៊ូឌីតមកប្រទេសកម្ពុជាវិញ។ ក្នុងចំណោមពលករទាំង ៧៨នាក់ មាន ២៩នាក់នឹងត្រូវបញ្ជូនមកកម្ពុជានៅថ្ងៃសុក្រ ទី១៩ មេសានេះ ពលករចំនួន ២៧នាក់នឹងត្រូវបញ្ជូនមកកម្ពុជានៅថ្ងៃទី២០ ខែមេសា ហើយពលករដែលនៅសល់ចុងក្រោយចំនួន ២២នាក់នឹងត្រូវបញ្ជូនមកកម្ពុជានៅថ្ងៃទី២១ ខែមេសា។
លោកហេង សួរ រដ្ឋមន្ដ្រីក្រសួងការងារពីមុនជាអ្មកនាំពាក្យបានអះអាងថា ពលករទាំង៧៨នាក់បានស្ថិតនៅទីតាំងមួយដែលមានសុវត្ថិភាព និងរង់ចាំសំបុត្រយន្ដហោះត្រឡប់មកកម្ពុជាវិញ។ ចំណែកអ្នកនាំពាក្យក្រសួងការងារ លោកកត្តា អ៊ន បានបញ្ជាក់ថា ក្រសួងការងារនឹងបើកការស៊ើបអង្កេតទៅលើក្រុមហ៊ុនដែលបានបញ្ចូនពលករឲ្យទៅធ្វើការនៅអារ៉ាប៊ីសាអ៊ូឌីត។ តាមលោកកត្តា អ៊ន ក្នុងករណីដែលរកឃើញក្រុមហ៊ុនមិនគោរពតាមនីតិវិធីច្បាប់ មិនធានាលក្ខខណ្ឌការងារ និងមិនគោរពសិទ្ធិការងារដល់ពលករ ក្រសួងនឹងចាត់វិធានការលើក្រុមហ៊ុននោះ។
តែក្រសួងនៅមិនទាន់កំណត់ថាជាក្រុមហ៊ុនមួយណាពិតប្រាកដនៅឡើយទេ ខណៈដែលមានក្រុមហ៊ុនច្រើនបានទទួលសិទ្ធិជ្រើសរើស និងនាំពលករចេញទៅធ្វើការនៅក្នុងប្រទេសនានានៅតំបន់ដើមបូព៌ា។ តែបើតាមការបញ្ជាក់របស់ពលករនៅក្នុងវីដេអូខ្លីបដែលបង្ហោះតាមហ្វេសប៊ុក ក្រុមហ៊ុនដែលល្បួងពលករទៅធ្វើការនៅប្រទេសអារ៉ាប់ប៊ីសាអូឌីតមានឈ្មោះ ហ្វាទីណា មេនផៅវ័រ និងក្រុមហ៊ុនBAB។ ទោះយ៉ាងណា និងក្នុងពេលរង់ចាំការត្រឡប់របស់ពលករទាំង ៧៨នាក់មកកម្ពុជាវិញ ឯកអគ្គរាជទូតកម្ពុជាប្រចាំអារ៉ាប៊ីសាអ៊ូឌីតបានធ្វើការសម្របសម្រួលបន្ថែមជាមួយមន្ត្រីអន្តោប្រវេសន៍អារ៉ាប៊ីសាអូឌីតដើម្បីបំពេញឯកសារផ្សេងៗ សម្រួលលើការហូបចុក និងការស្នាក់នៅរបស់ពួកគេ។
សូមបញ្ជាក់ថា ក្នុងចំណោមពលករខ្មែរទាំង៧៨នាក់នោះ មាន៥១នាក់កំពុងស្ថិតនៅក្នុងទីក្រុង Jeddah ១៥នាក់ស្ថិតនៅក្នុងរាជធានី Riyadh និង១២នាក់កំពុងស្ថិតនៅក្នុងទីក្រុង Dammam នៃប្រទេសអារ៉ាប៊ីសាអូឌីត។គេនៅចាំបានថាមន្ត្រីនាំពាក្យនៃក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ ក្នុងកម្មវិធីវេទិកាអ្នកស្ដាប់វិទ្យុអាស៊ីសេរី កាលពីយប់ថ្ងៃទី១៨ ខែវិច្ឆិកា ឆ្នាំ២០១៤បានឲ្យដឹងថា ក្រសួងការងារ និងបណ្ដុះបណ្ដាលវិជ្ជាជីវៈ កំពុងរៀបចំក្រុមការងារបច្ចេកទេសតាក់តែងនូវលក្ខខណ្ឌច្បាប់ និងផែនការមួយចំនួនផ្សេងទៀត ទាក់ទងនឹងគម្រោងនាំពលករខ្មែរចេញទៅធ្វើការស្របច្បាប់នៅប្រទេសប្រទេសអារ៉ាប៊ីសាអ៊ូឌីត (SAUDI ARABIA)។ មន្ត្រីសង្គមស៊ីវិលដែលធ្វើការឃ្លាំមើលបញ្ហាពលករចំណាកស្រុក ចង់ឲ្យរដ្ឋាភិបាលសិក្សាពីបញ្ហានេះ ឲ្យបានច្បាស់ដោយដកស្រង់បទពិសោធន៍ពីប្រទេសដែលមានបញ្ហាប្រឈមកន្លងមកមុននឹងសម្រេចចិត្តបញ្ជូនពលករចេញទៅក្រៅប្រទេសនោះ។
កាលនោះក្រសួងការងារ និងបណ្ដុះបណ្ដាលវិជ្ជាជីវៈមិនទាន់ហ៊ានប្រកាសជ្រើសរើសពលករខ្មែរឲ្យទៅធ្វើការងារស្របច្បាប់នៅប្រទេសប្រទេសអារ៉ាប៊ីសាអ៊ូឌីត នោះនៅឡើយទេរហូតមកដល់ពេលនេះ បើទោះបីរដ្ឋាភិបាលនៃប្រទេសទាំងពីរបានចុះកិច្ចព្រមព្រៀង (MOU) ជាមួយគ្នារួចហើយក្ដី។ មន្ត្រីនាំពាក្យនៃក្រសួងការងារកម្ពុជា លោក ហេង សួរ មានប្រសាសន៍កាលពីថ្ងៃសុក្រ ទី១៩ ខែកុម្ភៈ ថា ក្រសួងត្រូវការពេលវេលាច្រើនក្នុងការរៀបចំរចនាសម្ព័ន្ធការងារគ្រប់គ្រង បណ្ដុះបណ្ដាល លក្ខខណ្ឌ និងឯកសារផ្លូវការនានាដែលធានាដល់ការធ្វើចំណាកស្រុកដោយស្របច្បាប់ សុវត្ថិភាព និងស្របទៅតាមច្បាប់ការងារនៃប្រទេសទាំងពីរផង៖ «នេះគ្រាន់តែជាកិច្ចព្រមព្រៀងបើកផ្លូវ ហើយយើងនឹងត្រូវបង្កើតឲ្យមានក្រុមការងារបច្ចេកទេស ដើម្បីពិនិត្យទៅលើលក្ខខណ្ឌ ពិនិត្យទៅលើយន្តការ ការពារសិទ្ធិ និងផលប្រយោជន៍ដល់អ្នកដែលចង់ទៅធ្វើការងារនៅទីនោះ នៅពេលដែលការងារទាំងនេះមិនទាន់បានសម្រេច គឺយើងមិនទាន់គិតពីបញ្ហាបញ្ជូនពួកគាត់ទៅ ឬប្រកាសជ្រើសរើសនោះទេ»។
លោក ហេង សួរ បញ្ជាក់ថា ប្រទេសកម្ពុជា និងប្រទេសអារ៉ាប៊ីសាអ៊ូឌីត បានចុះកិច្ចព្រមព្រៀង ជាមួយគ្នាក្នុងនាមប្រទេសបញ្ជូន និងទទួល ឬការផ្លាស់ប្ដូរកម្លាំងពលកម្មជាមួយគ្នាកាលពីថ្ងៃទី១២ ខែកុម្ភៈ ក្នុងអំឡុងដំណើរទស្សនកិច្ចរបស់រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក អ៊ិត សំហេង នៅទីនោះ។កាលនោះប្រធានអង្គការខារ៉ាមកម្ពុជា លោក យ៉ា ណាវុធ សំដែងការគាំទ្រចំពោះកិច្ចសហប្រតិបត្តិការនេះ ប៉ុន្តែលោកនៅតែបារម្ភចំពោះសុវត្ថិភាពពលករខ្មែរ។ លោកថា ការរំលោភសិទ្ធិការងារ ស្ថានភាពរស់នៅ និងបញ្ហាប្រឈមដទៃទៀតនឹងអាចកើតមាន ប្រសិនបើរដ្ឋាភិបាលកម្ពុជា មិនបានសិក្សាបញ្ហានេះឲ្យបានដិតដល់។ លោកចង់ឲ្យមានការបើកទូលំទូលាយ ក្នុងការចូលរួមពីអង្គការមិនមែនរដ្ឋាភិបាលដែលមានពិសោធន៍ច្រើនក្នុងកិច្ចការនេះ និងបញ្ហាដែលធ្លាប់កើតមានក្នុងប្រទេសថៃ និងម៉ាឡេស៊ីនោះ៖ «ខ្ញុំយល់ថា សូម្បីតែប្រទេសថៃ ដែលមានទំនៀមទម្លាប់ប្រហាក់ប្រហែលគ្នាក៏នៅតែមានបញ្ហាច្រើនសម្រាប់ពលករខ្មែរនៅទីនោះ ចុះទម្រាំតែប្រទេសមួយដែលឆ្ងាយដែលយើងមិនមានទំនាក់ទំនងជាពិសេសមិនទាន់មានស្ថានទូតនៅនោះ តើពេលមានបញ្ហាអីពួកគាត់ទៅរកឲ្យអ្នកណាជួយអន្តរាគមន៍នោះ»។លោក ហេង សួរ កាលនោះបញ្ជាក់ថា ការងារជាអាទិភាពនៅអារ៉ាប៊ីសាអ៊ូឌីត នោះ មានដូចជា ការងារតាមផ្ទះ និងវិស័យសំណង់ជាដើម។ កិច្ចព្រមព្រៀងបញ្ជូនពលករនេះ ជាការបើកទីផ្សារថ្មីសម្រាប់តម្រូវការផ្នែកបុគ្គលិករបស់អារ៉ាប៊ីសាអ៊ូឌីត និងពង្រឹងកិច្ចសហប្រតិបត្តិការនៃវិស័យការងាររវាងប្រទេសទាំងពីរ៕
សូមបញ្ចាក់ថា៖ប្រទេសអារ៉ាប៊ីសាអ៊ូឌីត (ភាសាអារ៉ាប់៖ السعودية) ដោយមានឈ្មោះជាផ្លូវការថា ព្រះរាជាណាចក្រអារ៉ាប៊ីសាអ៊ូឌីត (អារ៉ាប់៖ المملكة العربية السعودية) គឺជាប្រទេសមួយស្ថិតនៅតំបន់អាស៊ីខាងលិច។ ប្រទេសនេះមានទឹកដីគ្របដណ្តប់លើឧបទ្វីបអារ៉ាប់មួយភាគធំដោយមានក្រឡាផ្ទៃសរុប ២,១៥០,០០០ គីឡូម៉ែត្រការ៉េ។ អារ៉ាប៊ីសាអ៊ូឌីតគឺជាប្រទេសធំបំផុតនៅមជ្ឈិមបូព៌ា និងប្រទេសធំបំផុតទីពីរនៅពិភពអារ៉ាប់។ វាមានព្រំប្រទល់ជាប់នឹងប្រទេសហ្សកដានីនិងអ៊ីរ៉ាក់នៅភាគខាងជើង គុយវ៉ែតនៅភាគឥសាន្ត ប្រទេសកាតា បារ៉ែននិងអេមីរ៉ាតអារ៉ាប់រួមនៅភាគខាងកើត ប្រទេសអូម៉ង់នៅភាគអាគ្នេយ៍ និងប្រទេសយេម៉ែននៅភាគខាងត្បូង។ អារ៉ាប៊ីសាអ៊ូឌីតគឺជាប្រទេសតែមួយគត់ដែលមានព្រំដែនជាប់នឹងសមុទ្រក្រហមផងនិងឈូងសមុទ្រពែក្សផង ហើយផ្ទៃដីប្រទេសនេះភាគច្រើនមានលក្ខណៈជា វាលលំហស្ងួត វាលទំនាបលាយលំជាមួយវាលស្មៅ និងតំបន់ភ្នំ។ រីយ៉ាដគឺជារាជធានី និងទីក្រុងធំបំផុត រីឯមេក្កា និងមេឌីណាដើរតួជាមជ្ឈមណ្ឌលវប្បធម៌ និងសាសនាយ៉ាងសំខាន់។
