លោកកែវរ៉េមីបកស្រាយពីសិទ្ធិមនុស្សកម្ពុជា ថាមិនដូចរបាយការណ៍ អាមេរិក និងអឺរ៉ុបទេ!
ភ្នំពេញ៖ ប្រធានគណៈកម្មាធិការសិទ្ធិមនុស្សកម្ពុជា លោកទេសរដ្ឋមន្ត្រី កែវ រ៉េមី បានលើកឡើងថា រាជរដ្ឋាភិបាលកម្ពុជា បានបង្ហាញឆន្ទៈយ៉ាងមុតមាំក្នុងការការពារ និងលើកកម្ពស់សិទ្ធិមនុស្ស និងកិច្ចសហការអន្តរជាតិយ៉ាងល្អ តាមរយៈការផ្តល់សច្ចាប័ន និងការទទួលយកសន្ធិសញ្ញាសិទ្ធិមនុស្សអន្តរជាតិ ដែលធ្វើឱ្យប្រទេសកម្ពុជា ក្លាយជាប្រទេសលេចធ្លោជាង និងឈានមុខគេក្នុងតំបន់ ក្នុងនាមជារដ្ឋភាគីនៃសន្ធិសញ្ញាសិទ្ធិមនុស្សអន្តរជាតិ។ ការលើកឡើងដូចនេះក្នុងសន្និសីទសារព័ត៌មានមួយស្តីពី ស្ថានភាពសិទ្ធិមនុស្ស នៅក្នុងប្រទេសកម្ពុជា នៅព្រឹកថ្ងៃទី៣ ខែឧសភា ឆ្នាំ២០២៤។
លោកទេសរដ្ឋមន្ត្រី កែវ រ៉េមី បានលើកឡើងយ៉ាងដូច្នេះថា៖ «កម្ពុជាបានចូលសូមយ៉ាងសកម្ម និងផ្តល់កិច្ចសហការយ៉ាងល្អជាមួយយន្តការសិទ្ធិមនុស្សនានារបស់អង្គការសហប្រជាជាតិ ហើយកម្ពុជាជាប្រទេសតែមួយគត់ក្នុងតំបន់អាស៊ាន ដែលបានស្វាគមន៍ទាំងវត្តមានអ្នករាយការណ៍ពិសេសទទួលបន្ទុកស្ថានភាពសិទ្ធិមនុស្សក្នុងប្រទេសកម្ពុជា ព្រមទាំងការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា (OHCHR) ដើម្បីត្រួតពិនិត្យស្ថានភាពសិទ្ធិមនុស្សនៅកម្ពុជា។ក្រៅពីនេះកម្ពុជាតែងតែសហការចំពោះដំណើរទស្សនកិច្ចរបស់អ្នករាយការណ៍ពិសេស ព្រមទាំងទទួលបានការកោតសរសើរពីសំណាក់អ្នកជំនាញឯករាជ្យរបស់អង្គការសហប្រជាជាតិផងដែរ ចំពោះកិច្ចខិតខំប្រឹងប្រែងក្នុងការងារលើកកម្ពស់ និងការពារសិទ្ធិមនុស្ស។ កម្ពុជាក៏បានចូលរួមយ៉ាងសកម្ម ក្នុងយន្តការសិទ្ធិមនុស្សក្នុងតំបន់អាស៊ាន ក្នុងនាមជាតំណាងកម្ពុជាប្រចាំគណៈកម្មការអន្តររដ្ឋាភិបាលអាស៊ានទទួលបន្ទុកសិទ្ធិមនុស្ស (AICHR) និងតែងតែចូលរួមក្នុងកិច្ចប្រជុំ ក៏ដូចជាកម្មវិធីសកម្មភាពចម្បងផ្សេងៗផងដែរ។
ចំពោះសិទ្ធិរស់រានមានជីវិត កម្ពុជាបានធានាដោយផ្តើមចេញពីការសង្គ្រោះអាយុជីវិតរបស់ពលរដ្ឋពីរបបប្រល័យពូជសាសន៍ ប៉ុលពត និងការនាំមកនូវសន្តិភាពពេញលេញទូទាំងផ្ទៃប្រទេសតាមរយនយោបាយ ឈ្នះ-ឈ្នះ ហើយដែលសន្តិភាពនេះជាមូលដ្ឋានគ្រឹះនៃសិទ្ធិមនុស្ស ជាពិសេសសិទ្ធិរស់រានមានជីវិត និងការអភិវឌ្ឍលើគ្រប់វិស័យ។ មិនតែប៉ុណ្ណោះរាជរដ្ឋាភិបាលបានបន្តការលើកកម្ពស់សិទ្ធិសេដ្ឋកិច្ច សង្គមកិច្ច និងវប្បធម៌ តាមរយៈកម្មវិធីគោលនយោបាយអាទិភាព ៦ចំណុច ក្នុងយុទ្ធសាស្ត្របញ្ចកោណដំណាក់កាលទី១ ដែលដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាផងដែរ។ ចំពោះសិទ្ធិទទួលព័ត៌មាន គឺត្រូវបានធានានិងការពារ តាមរយៈយន្តការច្បាប់ និងស្ថាប័ន និងការអនុញ្ញាតឱ្យបង្កើត និងដំណើរការស្ថាប័នព័ត៌មានទាំងជាតិ និងអន្តរជាតិនៅកម្ពុជា ដែលធ្វើការផ្សព្វផ្សាយដោយសេរី។ទន្ទឹមនេះប្រព័ន្ធផ្សព្វផ្សាយនៅកម្ពុជាមានជាង ២០០០ស្ថាប័ន និងអ្នកសារព័ត៌មានរាប់ម៉ឺននាក់ ដែលមានទាំងសំឡេងរិះគន់រដ្ឋាភិបាល ហើយបាននឹងកំពុងដំណើរការតាមរបៀបបែបប្រពៃណី និងឌីជីថលដោយគ្មានការត្រួតពិនិត្យជាមុនឡើយ។
លោកទេសរដ្ឋមន្ត្រី កែវ រ៉េមី ក៏បានបញ្ជាក់ដែរថា កម្ពុជាជារដ្ឋអធិបតេយ្យ និងឯករាជ្យ មានសន្តិភាពពេញលេញ មាននីតិរដ្ឋ និងស្ថិរភាពនយោបាយ ដែលមានព្រះមហាក្សត្រទ្រង់ប្រតិបត្តិតាមរដ្ឋធម្មនុញ្ញ និងប្រជាធិបតេយ្យ សេរីពហុបក្ស ការគោរពសិទ្ធិមនុស្ស ស្របតាមបរិបទនៃសង្គមខ្មែរ។ សន្តិភាព ស្ថិរភាពនយោបាយ និងសន្តិសុខ ដែលជាមូលដ្ឋានគ្រឹះសម្រាប់ការអភិវឌ្ឍ សិទ្ធិមនុស្ស និងការរស់នៅប្រកបដោយសុខដុមរមនារបស់ប្រជាពលរដ្ឋ ត្រូវបានការពារយ៉ាងខ្លាំងក្លាពីកម្លាំងជាតិទាំងមូល ដែលរួបរួមគ្នាជុំវិញរាជរដ្ឋាភិបាល។ប្រទេសកម្ពុជាបានប្រែក្លាយពីវាលពិឃាត ពីសមរភូមិនៃសង្គ្រាមរ៉ាំរ៉ៃ ពីការបែកបាក់ជាតិ និងការបែងចែកទឹកដី និងពីទឹកដីដែលសេដ្ឋកិច្ចជាតិត្រូវបានបំផ្លាញ ទៅជាទឹកដីសន្តិភាព ឯកភាព ប្រជាធិបតេយ្យ ការគោរពសិទ្ធិមនុស្ស នីតិរដ្ឋ និងការអភិវឌ្ឍលើគ្រប់វិស័យនាពេលបច្ចុប្បន្ន។
ចំពោះបញ្ហាសិទ្ធិមនុស្សកម្ពុជា ដែលត្រូវបានអ្នករាយការណ៍របស់អឺរ៉ុប និងអាមេរិក តែងតែយកមកវាយតម្លៃថាមិនល្អនោះ លោកទេសរដ្ឋមន្ត្រី កែវ រ៉េមី បានបកស្រាយថា ដោយសារក្រុមអ្នកវាយតម្លៃទាំងនោះចង់ឱ្យមានវត្តមានអតីតគណបក្សសង្គ្រោះជាតិ (CNRP) រស់ឡើងវិញ និងចង់ឱ្យនិន្នាការនយោបាយរបស់កម្ពុជា មានទំនាក់ទំនងល្អជាមួយខ្លួនជាងប្រទេសចិន។ លោកបានលើកឡើងយ៉ាងដូច្នេះថា៖ «ខាងទទួលបន្ទុកសិទ្ធិមនុស្សអឺរ៉ុប អាមេរិក គឺក្តៅជាងគេរឿងទាក់ទងនឹងគណបក្សប្រឆាំង ដែលគាត់វាយតម្លៃរឿងសិទ្ធិមនុស្សកម្ពុជា មិនរឿងតែប៉ុណ្ណឹងទេ បើសិនជាជាឱ្យមាន CNRP រស់ឡើងវិញ វត្តមានលោក សម រង្ស៊ី លោក កឹម សុខា ឬក៏ទាក់ទងភ្លើងទៀន ហើយនិន្នាការជាមួយយើងជាមួយគាត់ កុំទំនាក់ទំនងល្អជាមួយចិនខ្ញុំជឿថារឿងសិទ្ធិមនុស្សគាត់និយាយល្អហ្មង»។
លោកទេសរដ្ឋមន្ត្រី កែវ រ៉េមី ក៏បានលើកឡើងដែរថា ចំណុចដែលបណ្តាប្រទេសមួយចំនួនតូចបានប្រើរបាយការណ៍សិទ្ធិមនុស្សរបស់ខ្លួនវាយតម្លៃលើប្រទេសកម្ពុជាថា មិនមានភាពល្អប្រសើរនេះ គឺខុសពីស្ថានភាពិតនៅកម្ពុជា។ ដូច្នេះ ការវាយតម្លៃតាមរយៈរបាយការណ៍កន្លងមក ផ្ទុយស្រឡះពីរូបភាពជាក់ស្តែងនៅកម្ពុជា ខណៈប្រទេសកម្ពុជា ជារដ្ឋអធិតេយ្យមានសិទ្ធិគ្រប់គ្រាន់ ដើម្បីអនុវត្តច្បាប់ចំពោះបុគ្គលទាំងឡាយណាដែលប្រព្រឹត្តផ្ទុយនឹងច្បាប់ដែលបានចែង។លោកបានបន្ថែមថា៖ «រដ្ឋាភិបាល យើងដឹងថាយើងធ្វើអី ហើយយើងបាននិងកំពុងធ្វើអីទៀតជាពិសេសផ្ដោតទៅលើផលប្រយោជន៍សុខទុក្ខរបស់បងប្អូនប្រជាពលរដ្ឋគឺជំរុញសិទ្ធិសេដ្ឋកិច្ច សង្គមកិច្ច និងវប្បធម៌ សិទ្ធិទទួលបាននូវការរស់រានមានជីវិត សិទ្ធិពលរដ្ឋ សិទ្ធិនយោបាយទាំងអស់ហ្នឹងត្រូវបានធានាដោយរដ្ឋាភិបាលដោយច្បាប់រដ្ឋធម្មនុញ្ញ និងច្បាប់បទដ្ឋានគតិយុទ្ធទាំងអស់ដែលមានជាធរមាននៅកម្ពុជា។ ម្យ៉ាងវិញទៀត របាយការណ៍ទាំងនោះមិនបានឆ្លុះបញ្ចាំងពីសិទ្ធិមនុស្សជាក់ស្ដែងនៅកម្ពុជាទេ ដោយសារតែពួកគេធ្វើតាមរបៀបវារៈនយោបាយរបស់ពួកគេ»។
ពាក់ព័ន្ធនឹងរបាយការណ៍របស់អ្នករាយការណ៍អឺរ៉ុប និងអាមេរិកនេះ លោកទេសរដ្ឋមន្ត្រី កែវ រ៉េមី បានឆ្លើយតបថា ជាទម្លាប់អាក្រក់ នៅពេលដែលគាត់មានសត្រូវនៃប្រទេសណាមួយគាត់ចង់ឱ្យយើងធ្វើសត្រូវជាមួយសត្រូវគាត់ដែរហើយកម្ពុជាមានផលប្រយោជន៍អ្វីទៅដើរធ្វើសត្រូវជាមួយសត្រូវរបស់គាត់។ រឿងគាត់ជារឿងរបស់គាត់ រឿងកម្ពុជាជារឿងរបស់កម្ពុជា។ អ្វីដែលសំខាន់ គឺកម្ពុជា មានភាពច្បាស់លាស់ លើការគោរពសិទ្ធិមនុស្សរបស់ខ្លួន និងការបន្តការងារទៅមុខទៀត ដើម្បីបម្រើផលប្រយោជន៍ជូនជាតិ និងប្រជាជន ក្រោមដំបូលសន្តិភាព និងការគោរពច្បាប់រដ្ឋ។កម្ពុជាគ្មានទោសប្រហាជីវិតទេ ខណៈប្រទេសកុម្មុយនីស្ត មានទោសប្រហាជីវិត និងឯកបក្សខ្លះ អាមេរិកមិនដែលនិយាយអាក្រក់ទាល់តែសោះ។ ដូចនេះមិនបាច់ឆ្ងល់ទេ ដោយសារតែកម្ពុជាគ្មានផលប្រយោជន៍ឱ្យខ្លួន បានជាគេនិយាយពីកម្ពុជាមិនល្អដូចនេះ៕
