វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1910 នាក់
ម្សិលមិញ 6677 នាក់
សរុប 14149486 នាក់
ប្រទេសថៃ៖ រដ្ឋាភិបាលថៃ កំពុងពិចារណាលើការហាមប្រាមការនាំចូលពោតពីប្រទេសជិតខាងរួមទាំងកម្ពុជា ឡាវ និងមីយ៉ាន់ម៉ា នៅឆ្នាំក្រោយនេះ ដើម្បីដោះស្រាយការបំពុលខ្យល់ដោយភាគល្អិតធូលី PM2.5 ដែលកំពុងកើនឡើងនៅភាគខាងជើង។ អាជ្ញាធរថៃបានអះអាងថា ការបំពុលនេះ គឺបណ្តាលមកពីកសិករដុតកាកសំណល់កសិកម្ម និងព្រៃសម្រាប់ដាំដុះថ្មី។ នេះបើយោងតាមការចេញផ្សាយរបស់កាសែតបាងកកប៉ុស្តិ៍។
ការគម្រាមបែបនេះកើតឡើងពេលលោកនាយករដ្ឋមន្ត្រីថៃ សេដ្ឋា ថាវីស៊ីន កាលពីថ្ងៃសៅរ៍បានធ្វើទស្សនកិច្ចទៅទីក្រុងឈៀងម៉ៃ ដើម្បីតាមដានវិធានការបង្ការ និងរបាយការណ៍របស់ភ្នាក់ងាររដ្ឋអំពីភ្លើងឆេះព្រៃ និងការបង្ការផ្សែងអ័ព្ទ។ លោក សេដ្ឋា បានប្រាប់អ្នកសារព័ត៌មានថា ប្រទេសថៃបានពិភាក្សាអំពីបញ្ហានេះជាមួយក្រសួងនានាក្នុងប្រទេសកម្ពុជា និងឡាវ ក៏ដូចជា អគ្គមេបញ្ជាការកងទ័ពមីយ៉ាន់ម៉ាផងដែរ។
លោកបានលើកឡើងថា យើងមិនអាចជ្រៀតជ្រែកជាមួយអធិបតេយ្យភាពរបស់ប្រទេសដទៃបានទេ ប៉ុន្តែមានរឿងគួរឱ្យព្រួយបារម្ភ។ តើយើងអាចធ្វើអ្វីដើម្បីបញ្ឈប់អ្នកជិតខាងរបស់យើងពីការដុតនេះ?។ លោកបន្តថា បញ្ហានេះមិនអាចដោះស្រាយបានទេលុះត្រាតែការនាំចូលពោតពីប្រទេសជិតខាងត្រូវបានហាមឃាត់ក្នុងអំឡុងរដូវប្រមូលផល។ លោកនាយករដ្ឋមន្ត្រីថែមទាំងបានផ្ដួចផ្ដើមគំនិត ឱ្យមានការដំឡើងពន្ធផងដែរ។ តែលោកថា ទីភ្នាក់ងាររដ្ឋនានា ដែលពាក់ព័ន្ធប្រហែលជាគិតថា វាគ្រាន់តែជាការនិយាយប៉ុណ្ណោះ។លោកបានថ្លែងថា ប៉ុន្តែយើងពិតជាត្រូវយកចិត្តទុកដាក់យ៉ាងខ្លាំង នៅពេលនេះ។ នៅឆ្នាំក្រោយចាប់ពីខែមករាដល់ខែមេសា ការនាំចូលពោតនឹងត្រូវបានហាមឃាត់។
លោកនាយករដ្ឋមន្ត្រី មានបន្ថែមទៀតថា មិនអាចប្រកែកបានទេថា បញ្ហាធូលី PM2.5 គឺបណ្តាលមកពីបញ្ហាសេដ្ឋកិច្ច ដោយការដុតកាកសំណល់កសិកម្ម ដើម្បីសម្អាតផ្ទៃដីសម្រាប់ការដាំដុះជាថ្មី។ អ្នកភូមិជនបទខ្លះថែមទាំងដុតព្រៃទៀតផង ដើម្បីចាប់សត្វព្រៃធ្វើជាចំណី។កាលពីខែកុម្ភៈ កន្លងទៅនេះ ក្រសួងបរិស្ថានកម្ពុជា ក៏បានចេញមកច្រានចោលការចោទប្រកាន់ថា នៅកម្ពុជាមានការបំពុលខ្យល់ខ្លាំងដែលបង្កជាផលប៉ះពាល់ដល់សុខមាលភាពពលរដ្ឋ និងការបំភាយទៅប្រទេសជិតខាង។ តាមក្រសួងបរិស្ថាន ការបំពុលខ្យល់នៅកម្ពុជា គឺមានកម្រិតតូចជាងកម្រិតស្តង់ដារដែលកំណត់ដោយអង្គការសុខភាពពិភពលោក។
ក្រសួងបរិស្ថាន បានចាត់វិធានការទប់ស្កាត់ភ្លើងឆេះព្រៃ និងវិធានការប្រើប្រាស់ប្រេងឥន្ទនៈស្តង់ដា EURO 4 និង EURO 5 ដែលបានកាត់បន្ថយការសាយភាយសារធាតុបំពុលខ្យល់ចូលទៅក្នុងបរិយាកាសច្រើន។ ចំណែកចំនួនភ្លើងឆេះព្រៃវិញ ក្រសួងបរិស្ថានអះអាងថា មានការថយចុះច្រើនដែរ បើធៀបនឹងឆ្នាំ២០១៩ និង២០២០ ខណៈកម្រិតការបំពុលខ្យល់ដោយភាគល្អិតនិចល PM2.5 ក៏មានការថយចុះស្ថិតក្រោមកម្រិតស្តង់ដារដែរ។ការបំភ្លឺរបស់ក្រសួងបរិស្ថានកម្ពុជានេះ គឺធ្វើឡើងស្របពេលកាសែតថៃ បានចុះផ្សាយថា បញ្ហាបំពុលខ្យល់នៅក្នុងប្រទេស គឺបង្កឡើងមកពីការដុតព្រៃ សំណល់កសិកម្ម ឬដុតសំរាមក្នុងទីវាលចំហរបស់ប្រជាជិតខាង ក្នុងនោះរួមទាំងប្រទេសកម្ពុជាផងដែរ៕