មហាជនរង់ចាំមើល ការប្តេជ្ញាចិត្តរបស់ ថ្នាក់ដឹកនាំខេត្តបន្ទាយមានជ័យក្នុងការអនុវត្តន៍ តាមបទបញ្ជាលេខ ០១ បប របស់នាយករដ្ឋមន្ត្រី អាណត្តិទី៧ មាន ប្រសិទ្ធភាពដែរឬក៏អត់..?
03-April-2024 / ព័ត៌មានជាតិ
បន្ទាយមានជ័យ : ព្រឹកថ្ងៃទី ៧ ខែមីនា ឆ្នាំ២០២៤ នៅរដ្ឋបាលខេត្ត បន្ទាយមានជ័យ បានបើកកិច្ចប្រជុំ សាមញ្ញលើកទី៥៧ អាណត្តិទី៣របស់ ក្រុមប្រឹក្សាខេត្តបន្ទាយមានជ័យ ក្រោម អធិបតីភាពឯកឧត្តម អ៊ុំ រាត្រី អភិបាលខេត្តបន្ទាយមានជ័យ លោក ប្លែក វ៉ារី ប្រធានក្រុមប្រឹក្សាខេត្ត អភិបាលរងខេត្ត ប្រធានមន្ទីរ អង្គភាពនានាជុំវិញខេត្ត ជាច្រើននាក់ ។
ឯ.ឧ អ៊ុំ រាត្រី បានថ្លែងថា: រាជរដ្ឋា ភិបាលកម្ពុជា បានដាក់ចេញបទបញ្ជា លេខ០១.បប យ៉ាងហ្មឺងម៉ាត់ដល់ រាជធានី ខេត្ត ក្នុងការប្រយុទ្ធប្រឆាំងគ្រឿងញៀនខុសច្បាប់នៅតាមក្រសួងស្ថាប័ន និងរដ្ឋបាលថ្នាក់ក្រោមជាតិ ល្បែងសុីសងខុសច្បាប់គ្រប់ប្រភេទ តាមអនឡាញ និងក្មេងទំនើង ដែលបង្កការអុកឡុកនៅតាមសហគមន៍ សម្រាប់នីតិកាលទី៧ នៃរដ្ឋសភានេះ ត្រូវបង្ក្រាបជាដាច់ខាត ។ឯកឧត្តម អ៊ុំ រាត្រី បានមានប្រសាសន៍ទៀតថា ឧក្រិដ្ឋជនកំពុងធ្វើអាជីវកម្ម គ្រឿង ញៀនយ៉ាងសកម្ម នៅក្នុងប្រទេកម្ពុជាយើងនេះ ដើម្បីស្វែងរកប្រាក់ ចំណូលរបស់ពួកគេ ដោយបានអូសទាញស្មារតីមនុស្ស អូសទាញជនស្លូតត្រង់ ជាពិសេស ក្នុងស្រទាប់យុវវ័យ ឲ្យហ៊ានសាកល្បងឲ្យហ៊ាន ប្រព្រឹត្ត ដោយចាប់ ផ្ដើមដំបូងពីការប្រើប្រាស់ រហូតឈានទៅដល់ការប្រព្រឹត្តអំពើ នៃការចាក់ចែងការរក្សាទុក ការដឹកជញ្ជូន និងការជួញដូរដោយខុសច្បាប់នូវសារធាតុគ្រឿងញៀន ដែលជាប្រភព នៃការឈានទៅប្រព្រឹត្តបទល្មើសមជ្ឈឹមផ្សេងៗទៀត ដូចជាឃាតកម្ម ចាប់ជំរិត ចាប់រំលោភ លួច ឆក់ ប្លន់ ទ្រព្យ សម្បត្តិ ក្រុមបងតូចបងធំ ឈានទៅដល់ អំពើហឹង្សាក្នុងគ្រួសារជាដើម ដែលបង្កនូវអសន្តិសុខធ្ងន់ធ្ងរជាច្រើន ដល់សង្គមជាតិទៀតផង ។
ឯ.ឧ អ៊ុំ រាត្រី បានមានប្រសាសន៍បន្តទៀតថា : បញ្ហាល្បែងស៊ីសងគ្រប់ប្រភេទ ក្នុងនោះ ក៏មានលេងតាមអនឡាញ ជិត ១០០ទីតាំងក្នុងខេត្តបន្ទាយមានជ័យ ត្រូវបានបង្ក្រាបអស់ហើយ តែបើម្ចាស់ល្បែងនៅតែបើកលេងបន្ត ប្រជាពលរដ្ឋត្រូវតែរាយការណ៍មកសមត្ថកិច្ច ឲ្យចុះបង្ក្រាបភ្លាម តែបើករណីមិនរាងចាលត្រូវបញ្ជូនទៅតុលាការចាត់ការទៅតាមនិតិវិធី ។ចំណែកក្មេងទំនើង ចូលចិត្តបង្កការអុកឡុក នៅតាមសហគមន៍
ពិសេស ក្មេងនំនើងណា ដែលចូលចិត្តផឹកស៊ីស្រែកឡូឡា ដល់ពេលយប់ រំខានដល់ផ្ទះអ្នកជិតខាង ចាប់យកមកអប់រំ តែ បើអប់រំមិនស្តាប់ ត្រូវឃាត់ខ្លួន បញ្ជូនទៅតុការការដាក់ទោសទៅតាមនិតិវិធី របស់តុលាការ ។ ក្នុងឱកាសនោះដែរ ឯ.ឧ អភិបាលខេត្ត ក៏បានលើកយកបញ្ហា ធ្វើ ស្រែប្រាំងខ្វះទឹក បញ្ហាអសន្តិសុខ និងបញ្ហានៅតាមមន្ទីររ អង្គភាពមួយចំនួនទៀតផង ។
ក្នុងកិច្ចប្រជុំសាមញ្ញលើកទី១៣របស់ក្រុមប្រឹក្សាខេត្តនេះដែរ បានលើកយកចំណុចសំខាន់ៗ ដែលមន្ទីរអង្គភាពបានអនុវត្តបានកន្លងមក ដើម្បីកសាងផែនការនិងលើកទិសដៅ ប្រចាំខែប្រចាំឆ្នាំរបស់ខេត្ត មន្ទីរនិងអង្គភាពទទួលបានលទ្ធផលល្អ សមត្ថកិច្ចក្នុងខេត្ត ត្រូវថែរក្សាសណ្តាប់ធ្នាប់សាធារណៈ រក្សាបាននូវសុខសន្តិភាពបង្កលក្ខណៈឲ្យប្រជាពលរដ្ឋសម្បូ រសប្បាយ ធ្វើឲ្យប្រទេសជាតិមានការអភិវឌ្ឍបានមួយកំរិត អប់រំណែនាំប្រជាពលរដ្ឋឲ្យបានយល់ដឹងពីគ្រោះថ្នាក់នៃគ្រឿងញៀន និងចៀសឲ្យឆ្ងាយពីគ្រឿងញៀន ល្បែង ស៊ីសងគ្រប់ប្រភេទ ពិសេស ល្បែងតាមអនឡាញ ក្មេងទំនើងជាដើម ដើម្បីឈានទៅលុបបំបាត់ ដែលកើតមានឡើងនៅក្នុងខេត្តយើងនេះ ដើម្បីពង្រឹងសាមគ្គីភាពផ្ទៃក្នុងខេត្តឲ្យបានល្អបន្តទៀត ។ សូមបញ្ជាក់ថា: ក្នុងកិច្ចប្រជុំនោះ សមាជិក សមាជិការអង្គបហរជុំ ក៏បានបញ្ចេញមតិពិគ្រោះយោបល់ជាមួយក្រុមប្រឹក្សាខេត្ត យ៉ាងច្រើន ដើម្បីកែលំអរនូវប្រព័ន្ធអភិបាលកិច្ចល្អ នៅតាមថ្នាក់រដ្ឋបាលនានា ដើម្បីជំរុញដល់ការគោរពសិទ្ធិសេរីភាព និងលទ្ធិប្រជាធិបតេយ្យនៅក្នុងភូមិដ្ឋាន ។
ប៉ុន្តែ បើយោងតាមប្រភពព័ត៌មានពីមន្ត្រី រាជការមួយចំនួនតូចដែលបានចូលរួមក្នុង កិច្ចប្រជុំនេះ បានលួចបង្ហើបប្រាប់មក ការិយាល័យនិពន្ធ គេហទំព័រ មាតុភូមិ បានអោយដឹងថា : គេគ្មានជំនឿលើការ លើកឡើងនូវយន្តការ ឬការប្តេជ្ញាចិត្តរបស់ ថ្នាក់ដឹកនាំខេត្តបន្ទាយមានជ័យ ក្នុងការ អនុវត្តន៍តាមបទបញ្ជាលេខ០១.បប របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា អោយទទួលបានជោគជ័យ មានប្រសិទ្ធភាព និងទទួលបានការគាំទ្រ ឬយកបេះដូងរបស់ប្រជាជនដែលរស់នៅ ទូទាំងខេត្តបន្ទាយមានជ័យបាននោះទេ។ ព្រោះសព្វថ្ងៃនេះ បញ្ហាបនល្បែងស៊ីសង ឬទីតាំងល្បែងស៊ីសងខុសច្បាប់គ្រប់ប្រភេទ ទាំងតាមអនឡាញ ឬនៅតាម មូលដ្ឋាននានា ក្នុងអាណាចក្រខេត្តបន្ទាយមានជ័យ ហាក់ពុំបានថមថយចុះនោះទេ ។
ជាក់ស្តែងថ្មីៗនេះ កាលពីថ្ងៃទី ២ ខែមីនា ២០២៤ មានករណីឈ្មោះ សុខ អាង ម្ចាស់បនល្បែងសុីសងខុស ច្បាប់១កន្លែង នៅក្នុងសង្កាត់ផ្សារកណ្តាល ក្រុងប៉ោយប៉ែត បាននាំគូកនព្រួតគ្នាវាយ ប្រើហឹង្សារយ៉ាងឃោរឃៅ លើអ្នកកាសែត ចំនួន៣នាក់ បង្កអោយរងរបួសធ្ងន់ធ្ងរ និងខូចខាតសំភារ: ទ្រព្យសម្បត្តិ ជាច្រើន គ្រាន់តែអ្នកកាសែតចុះទៅយកព័ត៌មានពិតជាក់ស្តែងអំពីទីតាំងបនល្បែងស៊ីសង ខុសច្បាប់ បើកលេង ប្រឆាំងនឹង បទបញ្ជា៕
