សម្តេចធិបតី ហ៊ុន ម៉ាណែតបើកការដ្ឋានសាងសង់ស្ពានឆ្លងកាត់ទន្លេបាសាក់”ចាក់អង្រែក្រោម - ព្រែកប្រា”
03-April-2024 / សេដ្ឋកិច្ច
ភ្នំពេញ៖សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជារួមជាមយយឯកឧត្តម វ៉ាង វិនធានឯកអគ្គរដ្ឋទូតចិនប្រចាំកម្ពុជាបានអញ្ជើញជាអធិបតីបើកការដ្ឋានសាងសង់ស្ពានឆ្លងកាត់ទន្លេបាសាក់”ចាក់អង្រែក្រោម - ព្រែកប្រា”មានតម្លៃជាង៦០លានដុល្លារអាមេរិកនាព្រឹកថ្ងៃទី១៩ ខែ កុម្ភៈ ឆ្នាំ២០២៤។ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានស្នើរដ្ឋាភិបាលចិន និងក្រុមហ៊ុនវិនិយោគរបស់ចិន បន្តជួយ និងមកបណ្តាក់ទុនវិនិយោគលើគម្រោងសាងសងហេដ្ឋារចនាសម្ព័ន្ធធំៗ បន្តទៀតនៅកម្ពុជា ដូចជាគម្រោងផ្លូវល្បឿនលឿន គម្រោងផ្លូវនាវាចរណ៍ព្រែកជីកតេជោ-ហ្វូណន គម្រោងផ្លូវរថភ្លើងធន់ស្រាល និងរថភ្លើងក្រោមដីទាំងនៅរាជធានីភ្នំពេញ និងខេត្តសៀមរាប។
សម្តេចធិបតីបានគូសបញ្ជាក់ថា មិត្តចិនតែងតែបានយកចិត្តទុកដាក់ក្នុងការជួយស្តារ និងអភិវឌ្ឍន៍ហេដ្ឋារចនាសម្ព័ន្ធផ្លូវស្ពានទាំងនៅក្នុងទីប្រជុំជន តំបន់ព្រំដែន តំបន់ដាច់ស្រយ៉ាល និងតំបន់ដែលមានភាពស្មុគ្រស្មាញ និងកក់ស្ទះចរាចរណ៍ ដើម្បីបម្រើដល់ការដឹកជញ្ជូន ការផ្សារភ្ជាប់ទំនាក់ទំនងរបស់ប្រជាពលរដ្ឋទៅដល់គ្រប់ទីកន្លែង និងការតភ្ជាប់ប្រទាក់ក្រឡាគ្នា នៅទូទាំងប្រទេស ព្រមទាំងតភ្ជាប់ផងដែរនូវផ្លូវជាមួយបណ្តាប្រទេសជិតខាងតាមតម្រូវការ និងរីកចម្រើននៃប្រទេសជាតិ។ជាក់ស្តែង មកទល់បច្ចុប្បន្ននេះសាធារណរដ្ឋប្រជាមានិតចិនបានជួយសាងសង់ស្ពាននៅកម្ពុជាបានសរុប១៦ ខណៈស្ពានចាក់អង្រែ ព្រែកប្រានេះ គឺជាស្ពានទី១៦ ដែលបានសាងសង់ដោយក្រុមហ៊ុនសំណង់ សៀងហៃ ដែលក្រុមហ៊ុនចិននេះ បានសាងសង់ស្ពានធំៗចំនួន១៤ ក្នុងចំណោមស្ពានធំៗទាំង១៦នេះ ។
សម្តេចធិបតីបានបន្ថែមថា «ការជួយជ្រំជ្រែង និងការជួយឧបត្ថម្ភគាំទ្រទាំងនេះ បានធ្វើឱ្យមិត្តចិនក្លាយជាប្រទេសលំដាប់ទីមួយដែលបានផ្តល់ឥណទានសម្បទាន និងជំនួយជាច្រើនសម្រាប់ការកសាងអភិវឌ្ឍន៍ និងការកសាងហេដ្ឋារចនាសម្ព័ន្ធដឹកជញ្ជូននៅកម្ពុជា។ តាមរយៈឯកអគ្គរាជទូតចិន សូមជួយលើកទឹកចិត្តក្រុមហ៊ុនវិនិយោគចិនឱ្យបន្តទុកចិត្តលើរាជរដ្ឋាភិបាល និងចូលរួមបណ្តាក់ទុនវិនិយោគលើគម្រោងហេដ្ឋារចនាសម្ព័ន្ធធំៗ បន្តទៀតនៅកម្ពុជា ដូចជាគម្រោងផ្លូវល្បឿនលឿន គម្រោងផ្លូវនាវាចរណព្រែកជីកតេជោ-ហ្វូណន ណន គម្រោងផ្លូវរថភ្លើងធន់ស្រាល និងរថភ្លើងក្រោមនៅរាជធានីភ្នំពេញ និងខេត្តសៀមរាប រួមទាំងគម្រោងអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់សំខាន់ៗដទៃទៀតផងដែរ»។
ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងថា “ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) ជាប្រភេទ ស្ពានបេតុងភ្លោះ មានប្រវែងជាង៨៤៥ម៉ែត្រ មានចំណុចចាប់ផ្តើមពីត្រើយខាងលិចទន្លេបាសាក់ ស្ថិតក្នុង សង្កាត់ចាក់អង្រែក្រោម ខណ្ឌមានជ័យ និងចំណុចបញ្ចប់នៅត្រើយខាងកើតទន្លេបាសាក់ ស្ថិតក្នុងសង្កាត់ ព្រែកប្រា ខណ្ឌច្បារអំពៅ ក្នុងភូមិសាស្ត្ររាជធានីភ្នំពេញ។ស្ពានបេតុងភ្លោះនេះ មានទទឹងប្រវែងសរុប ២៧ម៉ែត្រ ដោយស្ពាននីមួយៗមានមុខកាត់ទទឹង ១៣,២៥ម៉ែត្រ ត្រូវអ៊ុតបេតុងកៅស៊ូ AC ផ្ទៃខាងលើកម្រាស់ ១០សង់ទីម៉ែត្រ ហើយមានគម្លាតពីគ្នា កន្លះ ម៉ែត្រ។ ស្ពាននីមួយៗ មានគន្លងផ្លូវសម្រាប់រថយន្តចរាចរណ៍ចំនួន ២គន្លង ប្រវែង ៧ម៉ែត្រ គន្លងផ្លូវ សម្រាប់ ទោចក្រយានមានចំនួន ១គន្លង ប្រវែង ២,៥ម៉ែត្រ ផ្លូវថ្មើរជើងមានចំនួន ១គន្លង ប្រវែង ២ម៉ែត្រ បង្កាន់ដៃស្ពានសងខាងសរុបប្រវែង ១,២៥ម៉ែត្រ គម្លាតសុវត្ថិភាពប្រវែង កន្លះម៉ែត្រ និងមានទំហំឆ្លង កាត់ សម្រាប់នាវាចរផ្នែកខាងក្រោមស្ពាន ៩០ម៉ែត្រ x ១១,៥ម៉ែត្រ”។
ចំពោះផ្លូវតភ្ជាប់ក្បាលស្ពាន មានប្រវែងសរុប ៨០៤,៣មែត្រ តភ្ជាប់ពីក្បាលស្ពានទាំងសងខាងទៅ មហា វិថី សំខាន់ៗនៅក្នុងភូមិសាស្ត្ររាជធានីភ្នំពេញ។រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងបន្តថា” គម្រោងនេះនឹងត្រូវអនុវត្ដការសាងសង់ដោយក្រុមហ៊ុនសំណង់សៀងហៃ និងត្រួត ពិនិត្យបច្ចេកទេសដោយក្រុមហ៊ុនទីប្រឹក្សាបច្ចេកទេសក្វាងចូវវ៉ានអាន ប្រើប្រាស់រយៈពេលសាងសង់ចំនួន ៤២ខែ នឹងបញ្ចប់នៅក្នុងអំឡុងឆ្នាំ២០២៧ ដោយគ្រោងចំណាយថវិកាសរុបប្រមាណ ៦០,២លាន ដុល្លារអាម៉េរិក ដែលជាឥណទានសម្បទានពីរដ្ឋាភិបាលចិន រួមជាមួយនឹងថវិកាបដិភាគរបស់រាជ រដ្ឋា ភិបាល កម្ពុជា សម្រាប់ការដោះស្រាយផលប៉ះពាល់ ការបោសសម្អាតគ្រាប់មីន យុទ្ធភ័ណ្ឌមិនទាន់ផ្ទុះ និងពន្ធអាករផ្សេងៗ”។
ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) គឺជាគម្រោងយុទ្ធសាស្ត្រមួយ យ៉ាងសំខាន់ សម្រាប់ តភ្ជាប់ និងសម្រួលការធ្វើដំណើររបស់ប្រជាពលរដ្ឋ។ ជាពិសេស កាត់បន្ថយការកកស្ទះចរាចរណ៍ នៅលើស្ពាន ព្រះមុនីវង្ស។សូមបញ្ជាក់ថា ស្ពានឆ្លងកាត់ទន្លេក្នុងភូមិសាស្ត្ររាជធានីភ្នំពេញ កំពុងដំណើរការនាពេល បច្ចុប្បន្ន មាន ចំនួន ៧ រួមមាន ៖ ស្ពានមិត្តភាពកម្ពុជា-ជប៉ុន ជ្រោយចង្វារ,ស្ពានមិត្តភាពកម្ពុជា-ចិន ជ្រោយចង្វារ, ស្ពានព្រះមុនីវង្សច្បារអំពៅ (ទី១), ស្ពានព្រះមុនីវង្សច្បារអំពៅ (ទី២), ស្ពានបេតុងខ្សែកាប្លិ៍ ឆ្លងទន្លេសាប ប្ញស្សីកែវ, ស្ពានបេតុងខ្សែកាប្លិ៍ តភ្ជាប់តំបន់អភិវឌ្ឍន៍កោះនរា និងតំបន់អភិវឌ្ឍន៍កោះពេជ្រ និង ស្ពានព្រែកព្នៅ៕
