ចាប់បានហើយអ្នកបើកឡានបុកស្លាប់ក្មេងស្រីនៅផ្លូវហុកសិបជាជនជាតិចិន
03-April-2024 / សន្តិសុខសង្គម
ភ្នំពេញ៖ទីបំផុតបុរសជនជាតិចិនឈ្មោះ HUANG PENG ដែលបើកបររថយន្តបង្កគ្រោះថ្នាក់ចរាចរណ៍នៅផ្លូវ៦០ម៉ែត្រស្លាប់ក្មេងស្រីម្នាក់ ត្រូវសមត្ថកិច្ចឃាត់ខ្លួនបានហើយនៅថ្ងៃទី១៣ ខែកុម្ភៈ ឆ្នាំ២០២៤ វេលាម៉ោង១១និង១០នាទី ។បុរសជនជាតិចិនដែលឃាត់ខ្លួននេះមានមុខរបរជាអ្នកត្រួតពិនិត្យបច្ចេកទេសយានយន្តនៅម្ដុំអូឡាំផ្ចារ ខណ្ឌ៧មករា នៅចំណុចបុរី R & F ផ្លូវ៦០ម៉ែត្រ សង្កាត់ចាក់អង្រែលើ ខណ្ឌមានជ័យ ។
លោកវរសេនីយ៍ឯក សំ វិច្ឆិកា អ្នកនាំពាក្យស្នងការនគរបាលរាជធានីភ្នំពេញ បានឱ្យដឹងនៅរសៀលនេះថា ដោយអនុវត្តតាមបទបញ្ជារបស់ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ នៅព្រឹកម៉ោង១១ ថ្ងៃទី១៣ ខែកុម្ភៈ ឆ្នាំ២០២៤ សមត្ថកិច្ចបានធ្វើការឃាត់ខ្លួនបុរសដែលបើករថយន្តបុកម៉ូតូម៉ាក HONDA CUB ពណ៌ខៀវ បណ្ដាលឱ្យរងរបួសស្រាលចំនួន ២នាក់ និងស្លាប់ក្មេងស្រីម្នាក់បានហើយ។
កាលពីយប់ថ្ងៃទី១១ ខែកុម្ភៈ ឆ្នាំ២០២៤ វេលាម៉ោង ២១:៣០នាទី ជនបង្កបានបើករថយន្តបុកម៉ូតូម៉ាក HONDA CUB ពណ៌ខៀវបណ្ដាលឱ្យរងរបួស ស្រាល ចំនួន២នាក់ និងស្លាប់ក្មេងស្រីម្នាក់ក្រោយមកជនបង្កបានចតរថយន្តប្លុងចោលនៅមុខអាគារ បុរី អ & អេហ្វ (R&F) ស្ថិតនៅលើផ្លូវ ៦០ម៉ែត្រ សង្កាត់ចាក់អង្រែលើ ខណ្ឌមានជ័យ ត្រូវបានសមត្ថកិច្ចស្រាវជ្រាវរកឃើញនៅព្រឹកមិញនេះ និងស្រាវជ្រាវឈានទៅចាប់ខ្លួននៅរសៀលថ្ងៃដដែល។
សូមបញ្ជាក់ថា ៖ បុរសជាឪពុកម្នាក់ជិះម៉ូតូអាគុបស៊េរីចាស់ ដឹកកូនប្រុសស្រី២នាក់ ទៅយកប្រពន្ធចេញពីធ្វើការនៅផ្សារទំនើបAEON-3 តែមិនទាន់ដល់ផង ត្រូវរថយន្តមួយបាំងកន្លះពណ៍ស(មិនចាំស្លាកលេខ) បើកលឿនដូចហោះ បុកពីក្រោយម៉ូតូរបស់ជនរងគ្រោះបេីងខ្ទាតបោកនឹងថ្នល់ និងអូសទាំងមនុស្សនិងម៉ូតូឡើងចិញ្ចើមផ្លូវ បណ្ដាលឲ្យរបួសកូ.នស្រីធ្ងន់ធ្ងរនិងស្លា.ប់ពេលបញ្ជូនទៅមន្ទីរពេទ្យ រីឯឪពុករងរបួសធ្ងន់ និងកូនប្រុសតូចរបួសមធ្យម ចំណែករថយន្តមិនបន្ថយល្បឿនកិនអូសម៉ូតូទៅកល់ជាប់ពំនូកខ្សាច់ខ្ទេចខ្ទីស្ទើរទាំងស្រុង ហើយបន្ថែមល្បឿនបេីករត់បាត់ ហេតុការណ៍ដ៏រន្ធត់នេះស្ថិតនៅតាមបណ្ដោយមហាវិថីសម្ដេចតេជោហ៊ុនសែន ហៅផ្លូវ៦០ម៉ែត្រ ត្រង់ចំណុចមុខបង្គោលគីឡូម៉ែត្រលេខ៧(ខាងកើតថ្នល់) ក្នុងសង្កាត់ជើងឯក ខណ្ឌដង្កោ រាជធានីភ្នំពេញ ។
ជនរងគ្រោះទាំងបីនាក់ត្រូវបានប្រជាពលរដ្ឋហៅកង់បីដឹកទៅពេទ្យ ព្រោះខ្លាចគ្រោះថ្នាក់ដល់អាយុជីវិត ចំណែកក្មេងស្រីរងគ្រោះបានបញ្ជូនទៅសង្គ្រោះបន្ទាន់នៅឯមន្ទីរពេទ្យគន្ធបុប្ផាដែរ ក្រុមគ្រូពេទ្យក៏បានព្យាយាមសង្គ្រោះតាមលទ្ធភាពដែរ តែអកុសលដោយស្ថានភាពរបួសធ្ងន់ធ្ងរពេកបានផុតដង្ហេីមស្លាប់ទៅហេីយ មិនអាចជួយសង្គ្រោះជីវិតបានទេ ។បុរសជាឪពុកឈ្មោះ សោម សីហាក់ អាយុ៣៥ឆ្នាំ រងរបួសធ្ងន់ ជាអ្នកបេកម៉ូតូអាគប់ CUP-50 ស៊េរីចាស់ ពណ៍ទឹកប៊ិចចាស់ ពាក់ស្លាកលេខភ្នំពេញ 1AV-8317 ដឹកកូនប្រុសម្នាក់ជិះខាងមុខឈ្មោះ សោម សុវណ្ណបញ្ញា អាយុ៤ឆ្នាំ រងរបួសបែកក្បាល និងពកក្បាលពីក្រោយ ចំណែកកូនស្រីម្នាក់ទៀតជិះឱបចង្កេះពីក្រោយឈ្មោះ សោម បញ្ញាលីកា អាយុ១១ឆ្នាំ ស្លាប់ពេលបញ្ជូនទៅសង្គ្រោះនៅឯមន្ទីរពេទ្យ ។សពតម្កល់ធ្វើបុណ្យតាមប្រពៃណី នៅផ្ទះរបស់ក្រុមគ្រួសារជនរងគ្រោះ ស្ថិតនៅភូមិក្រពើហា សង្កាត់ព្រែកឬស្សី ក្រុងតាខ្មៅ ខេត្តកណ្តាល ក្រុមគ្រួសារពុំសូវមានលទ្ធភាពធ្វើបុណ្យទេ បាន ញាតិជិតខាង និងសប្បុរសជនជួយ ៕
