បន្ទាប់ពីបញ្ជាឲ្យការពារព្រៃឡង់សម្តេចធិបតីប្រកាសបញ្ញ្ឈប់រោងចក្រអគ្គិសនីប្រើធ្យូងថ្ម
17-December-2025 / សេដ្ឋកិច្ច
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី៣០ ខែវិច្ឆិកា ឆ្នាំ២០២៣ក្នុងឱកាសអញ្ជើញជាអធិបតីក្នុងពិធីបិទស្ទឹងសាងសង់ទំនប់វារីអគ្គិសនីស្ទឹងតាតៃលើ ស្ថិតក្នុងស្រុកថ្មបាំង ខេត្តកោះកុង បានប្រកាសពីការសម្រេចបញ្ឈប់ គម្រោងអភិវឌ្ឍរោងចក្រផលិតអគ្គិសនីដុតធ្យូងថ្ម អានុភាព ៧០០ មេហ្កាវ៉ាត់ នៅស្រុកបុទុមសាគរ ខេត្តកោះកុង។ដោះស្រាយបញ្ហាគឺក្រសួងរ៉ែ និងថាមពល ពិភាក្សាជាមួយក្រុមហ៊ុនវិនិយោគ ពិនិត្យលទ្ធភាពប្តូរគម្រោងវិនិយោគផលិតអគ្គិសនីដុតធ្យូងថ្មនេះ ទៅជាគម្រោងផលិតអគ្គិសនីដុតឧស្ម័ន LNG ដែលបំភាយឧស្ម័នកាបូនតិចតួចវិញ។
សម្តេចបានថ្លែងយ៉ាងដូច្នេះថា «សុំប្រកាសឱ្យហើយ បើសិនជានរណាចង់ធ្វើការវិនិយោគ ធ្វើរោងចក្រផលិតអគ្គិសនីដើរដោយធ្យូងថ្មនៅកម្ពុជា កុំមកនាំតែខាតលុយជិះយន្តហោះមកទេ។ យើងបានប្រកាសហើយ នៅក្នុងសន្និសីទរបស់អង្គការសហប្រជាជាតិ COP 26 នៅចក្រភពអង់គ្លេស កាលពីខែវិច្ឆិកា ឆ្នាំ២០២១ថា កម្ពុជាមិនអភិវឌ្ឍរោងចក្រផលិតអគ្គិសនីដុតធ្យូងថ្មទៀតនោះទេ ហើយនៅថ្ងៃទី២ ខែវិច្ឆិកា ឆ្នាំ២០២៣នេះ ខ្ញុំបានសម្រេចបញ្ឈប់គម្រោងអភិវឌ្ឍរោងចក្រផលិតអគ្គិសនីដុតធ្យូងថ្ម អានុភាព ៧០០ មេហ្កាវ៉ាត់ នៅស្រុកបុទុមសាគរ ខេត្តកោះកុងយើងនេះ ដែលមានការសិក្សាច្រើនហើយក្នុងការធ្វើ ប៉ុន្តែឥឡូវការប្តេជ្ញាចិត្តរបស់យើងអត់ចាំពេលណាទេ ខ្ញុំបានសម្រេចឱ្យបញ្ឈប់ ហើយបានឱ្យពិភាក្សាពិនិត្យប្តូរលទ្ធភាពគម្រោងនេះ ពីការផលិតអគ្គិសនីដោយធ្យូងថ្ម ទៅជាជាគម្រោងផលិតអគ្គិសនីដុតឧស្ម័ន LNG វិញ»។
សម្តេចធិបតី ហ៊ុន ម៉ាណែត ក៏បានអនុញ្ញាតជាគោលការណ៍ឱ្យក្រសួងរ៉ែ និងថាមពល ពិនិត្យលទ្ធភាពអំពីការឈានមួយជំហានទៀត ឆ្ពោះទៅរកការសាកល្បងដាក់ឱ្យរោងចក្រផលិតអគ្គិសនីដុតធ្យូងថ្ម ដែលមានស្រាប់បញ្ឈប់ដំណើរការមុនកាលកំណត់ផងដែរ។ដើម្បីបញ្ហាបរិស្ថានសម្តេចធិបតី ហ៊ុន ម៉ាណែត ក៏បានសម្រេចមិនឱ្យមានការពង្រីកអាជីវកម្មរ៉ែ និងការរុករករ៉ែក្នុងតំបន់ដែនជម្រកសត្វព្រៃ ព្រៃឡង់ ទៀតទេ ដោយដាក់តំបន់ព្រៃឡង់ជាតំបន់ក្រហម និងមិនឱ្យមានការចេញអាជ្ញាប័ណ្ណថ្មីក្នុងការរុករកធនធានរ៉ែ និងការពង្រីកផ្ទៃដីបន្ថែមទៀតឡើយ។
លោក កែវ រតនៈ រដ្ឋមន្ត្រីក្រសួងរ៉ែ និងថាមពលបានឲ្យដឹងរឿងនេះ កាលពីថ្ងៃទី ២១ វិច្ឆិកា ឆ្នាំ ២០២៣ នាវេទិកាពិភាក្សាស្តីពី «គោលនយោបាយរ៉ែ និងថាមពលនៅកម្ពុជា» ដែលរៀបចំដោយក្លិបអ្នកកាសែតកម្ពុជា សហការជាមួយក្រសួងរ៉ែ និងថាមពល។ ។លោកកែវរតនៈថ្លែងថា៖ «សម្តេចធិបតីផ្អែកទៅលើសំណើរបស់ក្រសួងចុះថ្ងៃទី ២ ខែវិច្ឆិកា ឆ្នាំ ២០២៣ លោកបានឯកភាពនៅថ្ងៃទី ២ ដដែលនោះដែរ ដែលនេះបញ្ជាក់ពីឆន្ទៈរបស់សម្តេចបវរធិបតី ហ៊ុន ម៉ាណែត ដោយសម្តេចសម្រេចចាត់ទុកតំបន់ព្រៃឡង់ជាតំបន់ក្រហម»។
លោកបន្ថែមថា៖ «សម្តេចបានសម្រេចដោយទី១ មិនចេញអាជ្ញាប័ណ្ណធនធានរ៉ែគ្រប់ប្រភេទបន្ថែមទៀតទេ លើកលែងតែក្រុមហ៊ុនចំនួន ២ ដែលមានគោលការណ៍ពីអាណត្តិមុនមករួចហើយ។ ទី២ ពិនិត្យលទ្ធភាពកាត់បន្ថយផ្ទៃដីដែលសិក្សារួច និងមិនមានសក្តានុពលសម្រាប់ធ្វើអាជីវកម្មធនធានរ៉ែ។ចំណែកទី៣ មិនអនុញ្ញាតឱ្យមានការពង្រីកផ្ទៃដីអាជ្ញាប័ណ្ណបន្ថែមទៀតសម្រាប់អាជ្ញាប័ណ្ណដែលមានស្រាប់»។ រដ្ឋមន្ត្រីក្រសួងរ៉ែ ក៏បានលើកឡើងដែរថា នៅក្នុងតំបន់ព្រៃឡង់មានការសិក្សាច្រើនពីក្រុមហ៊ុនដែលមានអាជ្ញាប័ណ្ណចំនួន ១៣ ដែលមានទាំងក្រុមហ៊ុនខ្មែរ ចិន ជប៉ុន ជាដើមចាប់តាំងពីឆ្នាំ ២០០៨ រហូតមកដល់បច្ចុប្បន្ននេះ។
ក្នុងចំណោមអាជ្ញាប័ណ្ណចំនួន ១៣ នោះ មានក្រុមហ៊ុន ៣ នៅខេត្តកំពង់ធំ មានអាជ្ញាប័ណ្ណស្វែងរុករក ហើយនិងអាជ្ញាប័ណ្ណស្វែងរុករកមាសមួយផងដែរ។ ចំណែកនៅខេត្តក្រចេះមានអាជ្ញាប័ណ្ណចំនួន ៧ ដែលជាក្រុមហ៊ុនសិក្សាស្រាវជ្រាវរុករកនៅឡើយទេ និងនៅខេត្តព្រះវិហារមានក្រុមហ៊ុន ២ កំពុងរុករកផងដែរ ហើយនៅខេត្តស្ទឹងត្រែងមានក្រុមហ៊ុន ១ កំពុងរុករក។
