គណៈសង្ឃនាយកបំភ្លឺរឿងជន្លៀសសង្ឃចេញពីវត្តពោធិលង្កាទោះបីមានការអង្វរក៏ដោយ
07-May-2026 / ព័ត៌មានជាតិ
សៀមរាប៖ គណៈសង្ឃនាយក នៃព្រះរាជាណាចក្រកម្ពុជា បានអះអាងថាការបិទវត្តពោធិលង្កា កាលពីពេលថ្មីៗនេះ បណ្តាលមកពីការដឹកនាំ គ្រប់គ្រងគណៈសង្ឃក្នុងនេះ មិនមានសាមគ្គីភាព បង្កជាក្រុមបក្ខពួក អនាធិបតេយ្យ មិនគោរពធម៌វិន័យបាត់បង់សណ្តាប់ធ្នាប់និងអភិសមាចារធ្វើឱ្យប៉ះពាល់ដល់តម្លៃនិងសេចក្ដីថ្លៃថ្នូរព្រះពុទ្ធសាសនា ដែលជាសាសនារបស់រដ្ឋ។
សេចក្តីបំភ្លឺរបស់គណៈសង្ឃនាយក នៃព្រះរាជាណាចក្រកម្ពុជា ចុះថ្ងៃទី២២ ខែវិច្ឆិកា ឆ្នាំ២០២៣ មានខ្លឹមសារថា ករណីវត្តពោធិលង្កាគឺ គណៈសង្ឃនាយក នៃព្រះរាជាណាចក្រកម្ពុជាបាន ចេញសេចក្តីសម្រេចលេខ ១០៧/២៣ ស.ន.ក.ជ.ចុះថ្ងៃទី២៧ខែកញ្ញា២០២៣ ស្តីពីការបញ្ចប់មុខដំណែងគណៈសង្ឃវត្តពោធិលង្កា(ពោធិ៍លើ)សង្កាត់ស្លក្រាម ក្រុងសៀមរាប ខេត្តសៀមរាប។ និងសេចក្តីជូនដំណឹងរបស់សាលាគណខេត្តសៀមរាបលេខ០៨០/២៣ ស.ជ.ណ. ចុះថ្ងៃទី ១៣ ខែវិច្ឆិកា ឆ្នាំ ២០២៣ ស្ដីពីការអនុវត្ត សេចក្តីសម្រេចរបស់គណៈសង្ឃនាយកនៃព្រះរាជាណាចក្រកម្ពុជាខាងលើ។
ទាក់ទងរឿងនេះ គណៈសង្ឃនាយក និងក្រសួងធម្មការនិងសាសនា សូមបញ្ជាក់ពីមូលហេតុជូនសាធារណមតិ និងអ្នកប្រើប្រាស់បណ្តាញសង្គម ក៏ដូចជាក្រុមអ្នកសារពត៌មានឱ្យបានជ្រាបថា កន្លងមកការដឹកនាំ គ្រប់គ្រងគណៈសង្ឃក្នុងវត្តពោធិលង្កានេះ មិនមានសាមគ្គីភាព បង្កជាក្រុមបក្សពួក អនាធិបតេយ្យ មិនគោរពធម៌វិន័យបាត់បង់សណ្តាប់ធ្នាប់និងអភិសមាចារធ្វើឱ្យប៉ះពាល់ដល់តម្លៃនិងសេចក្ដីថ្លៃថ្នូរព្រះពុទ្ធសាសនា ដែលជាសាសនារបស់រដ្ឋ។ ទោះបី មានការអប់រំទូន្មានច្រើនលើកច្រើនសារយ៉ាងណាក៏ដោយ នៅតែប្រព្រឹត្តមិនបានត្រឹមត្រូវតាមវត្តប្រណិប័តន៍ ថែមទាំងបង្កជាជម្លោះ និងបង្កើតនូវទោសបញ្ញត្តិធ្ងន់ធ្ងរក្នុងផ្លូវវិន័យព្រះពុទ្ធសាសនាថែមទៀតផង។
គណសង្ឃបញ្ជាក់ថា៖ដើម្បីពង្រឹងការគ្រប់គ្រង និងការប្រតិបត្តិធម៌វិន័យឱ្យបានល្អប្រសើរ និងបំពេញសទ្ធាជ្រះថ្លា សមជាស្រែ បុណ្យដ៏ប្រពៃរបស់ពុទ្ធបរិស័ទ ចាំបាច់ត្រូវរៀបចំរដ្ឋបាលគ្រប់គ្រងវត្តឡើងវិញ ស្របតាមពុទ្ធានុញ្ញាតនិងពុទ្ធប្បញ្ញត្តិ ធ្វើយ៉ាងណាឱ្យវត្តនេះក្លាយទៅជាបូជនីយដ្ឋាន គួរជាទីគោរពបូជា ទើបតម្រូវឱ្យមានការនិមន្ត និងអញ្ជើញ ព្រះសង្ឃ អាចារ្យ និងដូនជីទៅស្នាក់អាស្រ័យនៅតាមបណ្តាវត្តផ្សេងៗជាបណ្ដោះអាសន្ន ក្រោយពីបញ្ចប់សង្ឃកម្មនិងកិច្ចការរដ្ឋបាលរួចរាល់ ទើបអនុញ្ញាតឱ្យចូលមកស្នាក់អាស្រ័យនៅជាប្រក្រតីឡើងវិញ ។
ដូច្នេះសូមសាធារណមតិទាំងក្នុងនិងក្រៅប្រទេស កុំមានការយល់ច្រឡំ ឬក៏បំភ្លៃខុសពីការពិតខាងលើ។ មិនតែប៉ុណ្ណោះសូមចូលរួមផ្សព្វផ្សាយសេចក្តីសម្រេច របស់គណៈសង្ឃឱ្យបានជ្រួតជ្រាបនិងទូលំទូលាយ ដើម្បីចៀសវាងការយល់ច្រឡំនិងទប់ស្កាត់អតតិជនមួយចំនួនយកបញ្ហានេះសម្រាប់កេងចំណេញផលប្រយោជន៍ផ្ទាល់ ខ្លួន ឬបម្រើផលប្រយោជន៍ខាងផ្នែកនយោបាយ.
សូមបញ្ជាក់ថា៖ ព្រះសង្ឃប្រមាណ១៤០អង្គគង់នៅវត្តពោធិលង្កា រួមនឹងអ្នកស្នាក់អាស្រ័យនៅវត្តជាច្រើននាក់ផ្សេងទៀត ត្រូវបានអាជ្ញាធរជន្លៀសចេញពីវត្តកាលពីថ្ងៃទី១៣វិច្ឆិកាកន្លងទៅ។ ភ្លាមៗក្រោយពីចេញសេចក្ដីប្រកាសរបស់សាលាគណខេត្តសៀមរាបបណ្តេញចៅអធិការនិងគ្រូសូត្រឆ្វេងស្តាំចោល គេឃើញអាជ្ញាធរមានសមត្ថកិច្ច ដូចជាប៉ូលីស និងសន្តិសុខ បានចុះទៅរៀបចំសណ្ដាប់ធ្នាប់នៅទីនោះភ្លាមៗផងដែរបើទោះបីមានការអង្វរកពីព្រះសង្ឃទាំងជាង១០០អង្គថាសុំឲ្យដាក់ថ្នាក់ដឹកនាំសង្ឃថ្មីមកកុំបណ្តេញព្រះអង្គដែលគ្មានកំហុសដូចរបបប៉ុលពតក៏ដោយ៕
