ប្រធានគណបក្សប្រជាជនជម្រុញឲ្យគណបក្សសម្ពន្ធ័ភាពរួមគ្នាប្រឆាំងចលនាក្បត់៩វិច្ឆិកា
ភ្នំពេញ៖ នាព្រឹកថ្ងៃទី២៥ ខែតុលា ឆ្នាំ២០២៣ ថ្លែងក្នុងពិធីចុះកិច្ចព្រមព្រៀងចងសម្ព័ន្ធភាពរវាងគណបក្សប្រជាជនកម្ពុជា និងគណបក្សនយោបាយចំនួន២៧ផ្សេងទៀត សម្តេចតេជោ ហ៊ុន សែនប្រធានគណបក្សប្រជាជន បានអំពាវនាវឱ្យកម្លាំងគណបក្សនយោបាយ ដែលចូលរួមជាមួយកម្លាំងជាតិនេះ ត្រូវតែការពារសន្តិភាព និងការអភិវឌ្ឍរបស់ជាតិឱ្យបាន។សម្តេចថា «ចលនា៩វិច្ឆិកា វាជាអំពើក្បត់ជាតិដ៏ធំ ដែលយើងមិនអាចអត់ឱនទេ តុលាការនៅតែបន្តកាត់ទោសក្រុមនេះ តើការបំផុសឱ្យមនុស្ស ឱ្យកងកម្លាំងប្រដាប់អាវុធ ផ្តួលរំលំរាជរដ្ឋាភិបាល ហើយឈានមកចាប់នាយករដ្ឋមន្ត្រី តើនេះជាសិទ្ធិបញ្ចេញមតិ ឬជាការប្រកាសសង្គ្រាម?»។
សម្តេចបានបញ្ជាក់ពីបញ្ហាចងសម្ពន្ធ័ភាពនេះថា «ចលនាយើងពេលនេះ ជាចលនាមួយដ៏ខ្លាំង ហើយយើងមិនផ្តល់ឱកាសឱ្យនរណាមួយ ធ្វើសកម្មភាពបំផ្លាញសន្តិភាពនេះទេ គណបក្សប្រជាជនតែឯង មិនគ្រប់គ្រាន់ទេ សម្ធ័នភាពរបស់យើងនេះសំដៅការពារនូវសន្តិភាព ដែលយើងរកបានដោយលំបាក ហើយសន្តិភាពនោះហើយ ដែលផ្តល់ឱកាសសម្រាប់ការអភិវឌ្ឍសេដ្ឋកិច្ចសង្គម»។សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា បានអះអាងថា ការចងសម្ព័ន្ធភាពរវាងគណបក្សប្រជាជនកម្ពុជា ដែលជាគណបក្សកំពុងកាន់អំណាច និងបណ្ដាគណបក្សចំនួន ២៧ ទៀត គឺមិនប៉ះពាល់ដល់ប្រជាធិបតេយ្យឡើយ តែសម្ព័ន្ធភាពនេះ នឹងធ្វើឲ្យប្រជាធិបតតេយ្យនៅកម្ពុជាកាន់តែល្អប្រសើរ។
សម្ដេចតេជោ ប្រធានគណបក្សប្រជាជនកម្ពុជា បានគូសបញ្ជាក់ថា«សម្ព័ន្ធភាពរវាងគណបក្សនយោបាយទាំង២៨នេះ មិនធ្វើប៉ះពាល់ដល់ប្រជាធិតេយ្យរបស់កម្ពុជាឡើយ តែផ្ទុយទៅវិញ សម្ព័ន្ធភាពមួយនេះ នឹងចូលរួមយ៉ាងសកម្មក្នុងការលើកកម្ពស់ប្រជាធិបតេយ្យនៅកម្ពុជាថែមទៀត»។«សម្ព័ន្ធភាពនេះ គឺជាដៃគូកិច្ចសហប្រតិបត្តិការដោយស្មើភាព សាមគ្គីភាព គោរពសិទ្ធិ និងស្វ័យភាពរបស់គណបក្សនីមួយៗ ដើម្បីជាផលប្រយោជន៍ជាតិ និងប្រជាជនកម្ពុជា»។ នេះជាប្រសាសន៍របស់សម្ដេច ហ៊ុន សែន។សម្ដេចតេជោ បានលើកឡើងថា សម្ព័ន្ធភាពរវាងគណបក្សប្រជាជនកម្ពុជា ដែលជាគណបក្សកាន់អំណាច ជាមួយគណកប្សនយោបាយស្ទើរជាងពាក់កណ្ដាលនៃបក្សដែលមាននៅកម្ពុជានេះ ក៏មិនបានធ្វើឡើងដើម្បីលុបបំបាត់សំឡេងប្រឆាំងនោះឡើយ ខណៈក្រុមប្រឆាំង ក៏កំពុងបង្កើតសម្ព័ន្ធភាពមួយ ដើម្បីប្រឆាំងផងដែរ។សូមបញ្ជាក់ថាកាលពីថ្ងៃទី១១តុលា២០២៣កន្លងមកនេះគណបក្សភ្លើងទៀនដែលខ្ខានមិនអាចចូលរួមបោះឆ្នោតជាតិសម្រាប់អាណត្តិទី៧បានក៏បានចងសម្ពន្ធ័ភាពជាមួយគណបក្ស៣ផ្សេងទៀតផងដែរ។
សម្ដេចតេជោ បានបន្តថា កិច្ចព្រមព្រៀងដែលបណ្តាបក្សនយោបាយទាំង ២៨ បានស្ម័គ្រចិត្ត ធ្វើកិច្ចសហប្រតិបត្តិការនិងចងសម្ព័ន្ធភាព នៅថ្ងៃនេះមានចំនួន ៨ ចំណុចរួមមាន ការពង្រឹងនូវកិច្ចសហប្រតិបត្តិការល្អ ជាមួយគ្នាដោយស្មើភាព ស្មើសិទ្ធិ គោរពនូវឯករាជ្យ និងស្វ័យភាព របស់គណបក្សនីមួយៗ ដើម្បីផលប្រយោជន៍ជាតិ និងប្រជាជន។១- ពង្រឹងកិច្ចសហប្រតិបត្តិការល្អជាមួយគ្នាដោយស្មើភាព ស្មើសិទ្ធិ គោរពនូវឯករាជ្យ និងស្វ័យភាពរបស់ គណបក្សនីមួយៗ ដើម្បីផលប្រយោជន៍ជាតិ និងប្រជាជនកម្ពុជា ។
២- ប្តេជ្ញាគោរព ប្រតិបត្តិ ការពាររដ្ឋធម្មនុញ្ញនៃព្រះរាជាណាចក្រកម្ពុជា ការពាររបបរាជានិយមអាស្រ័យ ដោយរដ្ឋធម្មនុញ្ញ លើកកម្ពស់លទ្ធិប្រជាធិបតេយ្យសេរីពហុបក្ស ធានាសិទ្ធិមនុស្ស ការគោរពច្បាប់ និងយុត្តិធម៌សង្គម ពង្រឹងធ្លុងសាមគ្គីជាតិ ដើម្បីកសាងប្រទេសកម្ពុជាមួយឯករាជ្យ សន្តិភាព សេរីភាព ប្រជាធិបតេយ្យ អព្យាក្រឹត និងវឌ្ឍនភាពសង្គម ស្របតាមបាវចនា ជាតិ សាសនា ព្រះមហាក្សត្រ ។៣- ប្ដេជ្ញាការពារឯករាជ្យ អធិបតេយ្យ និងបូរណភាពទឹកដីនៃព្រះរាជាណាចក្រកម្ពុជាឲ្យបានគង់វង្ស ការពារសន្តិភាព ស្ថិរភាពនយោបាយ និងសន្តិសុខសណ្តាប់ធ្នាប់សង្គម ដើម្បីធានាដំណើរការអភិវឌ្ឍសេដ្ឋកិច្ច សង្គមដោយចីរភាព និងលើកកម្ពស់ជីវភាពរស់នៅរបស់ប្រជាជនគ្រប់រូបប្រកបដោយភាពសុខដុមរមនាក្នុងសង្គម ។
៤- រួមសហការគ្នាដើម្បីទប់ស្កាត់ និងកំចាត់ចោលនូវនយោបាយជ្រុលនិយមចេញផុតពីព្រះរាជាណាចក កម្ពុជា ។ ប្រឆាំងដាច់ខាតចំពោះឧបាយកល និងសកម្មភាពរបស់មជ្ឈដ្ឋានណាក៏ដោយ ដែលព្យាយាមបំផ្លាញ ឯកភាពជាតិ បង្កអស្ថិរភាពក្នុងសង្គម បំផ្លាញលទ្ធិប្រជាធិបតេយ្យ ប៉ុនប៉ងធ្វើឲ្យមានការផ្លាស់ប្តូរណាមួយ ដែលផ្ទុយ ពីរដ្ឋធម្មនុញ្ញ និងច្បាប់ជាធរមាន ។៥- សហប្រតិបត្តិការល្អជាមួយគ្នា ដើម្បីធ្វើឲ្យដំណើរការបោះឆ្នោតតាមគោលការណ៍នៃលទ្ធិប្រជាធិបតេយ្យ សេរីពហុបក្ស ទាំងនៅថ្នាក់ជាតិ និងថ្នាក់ក្រោមជាតិ ទាំងសកល និងអសកល បានប្រព្រឹត្តទៅត្រឹមត្រូវ ទៀងទាត់ តាមការកំណត់នៃរដ្ឋធម្មនុញ្ញ និងច្បាប់ជាធរមាន ប្រកបដោយលក្ខណៈសេរី ត្រឹមត្រូវ យុត្តិធម៌ និងមានសុវត្ថិភាព ។
៦- គោរពអនុវត្តដោយស្មោះត្រង់ និងយកផលប្រយោជន៍ជាតិជាធំ នូវគោលការណ៍សម្ព័ន្ធភាព និងកិច្ច សហប្រតិបត្តិការជួយគាំទ្រគ្នា មិនធ្វើការប្រឆាំងគ្នាដោយប្រការណាមួយ រួមទាំងការមិនធ្វើការឃោសនាប្រឆាំង គ្នាក្នុងពេលយុទ្ធនាការបោះឆ្នោត និងមិនធ្វើសម្ព័ន្ធភាពជាមួយគណបក្សនយោបាយ ឬក្រុមនយោបាយណា ដែល ប្រឆាំងចំពោះដៃគូក្នុងសម្ព័ន្ធភាពរបស់ខ្លួន ។៧- កសាងពង្រឹងទំនាក់ទំនងសហប្រតិបត្តិការ ដើម្បីអនុវត្តឲ្យបានសម្រេចលទ្ធផលល្អតាមខ្លឹមសារន កិច្ចព្រមព្រៀងនេះ ។ ក្នុងករណីមានបញ្ហាចោទឡើង ត្រូវចាត់តាំងតំណាងឲ្យជួបពិភាក្សារួមគ្នាដោះស្រាយបញ្ហា ដោយសន្តិវិធី ។៨- បើកទូលាយសម្រាប់គណបក្សនយោបាយស្របច្បាប់ផ្សេងទៀត ដែលគាំទ្រ និងមានបំណងចង់ចូល រួមសហប្រតិបត្តិការ និងសម្ព័ន្ធភាពរវាងបណ្ដាគណបក្សនយោបាយនៅកម្ពុជា តាមស្មារតីនៃកិច្ចព្រមព្រៀងនេះ ៕
