ប្រជាពលរដ្ឋទាមទារចង់ឲ្យក្រុមហ៊ុនដីមាសសងលុយវិញមិនចង់បានភាគលាភស្អីណាទៀតទេ!
03-April-2024 / ព័ត៌មានជាតិ
កំពត៖ នៅព្រឹកថ្ងៃទី២៦ ខែមិថុនា ឆ្នាំ២០២៣ ក្រុមហ៊ុនពិភពដីមាស បានចាត់តំណាងឱ្យចូលមកស្នងការនគរបាលខេត្តកំពតដើម្បីឆ្លើយបំភ្លឺតបតាមបណ្ដឹងប្រជាពលរដ្ឋជាង ៤៨០គ្រួសារ ពាក់ព័ន្ធនឹងការចោទប្រកាន់ពីប្រជាពលរដ្ឋក្នុងបទឆរបោក។ ទោះបីជាមានការសន្យាបន្តបង់លុយភាគលាភឲ្យក៏ដោយតែប្រជាពលរដ្ឋបានបដិសេធមិនទទួលយកការសន្យាដដែលៗ ហើយទាមទារជួបប្រធានក្រុមហ៊ុនផ្ទាល់ដើម្បីដោះស្រាយឱ្យជ្រះស្រឡះ។
ក្នុងជំនួបជាមួយតំណាងក្រុមហ៊ុន ប្រជាពលរដ្ឋភាគច្រើនបានទាមទារឱ្យក្រុមហ៊ុនពិភពដីមាសសងប្រាក់ដើមគ្រប់ចំនួនមកវិញ ដោយមិនចាំបាច់បង់ប្រាក់ភាគលាភរយៈពេល៣ទៅ ៤ខែកន្លងមកក៏បាន។ ពួកគាត់បានបញ្ជាក់មូលហេតុថា ជារៀងរាល់ខែខាងធនាគារតែងតាមទារបំណុលរហូតអ្នកខ្លះគេចមិនហ៊ាននៅផ្ទះទេដោយសារតែការវិនិយោគជាមួយក្រុមហ៊ុនពិភពដីមាសនេះធ្វើឱ្យអ្នកខ្លះកើតជម្លោះរវាងប្តីប្រពន្ធ ឪពុកម្ដាយ បងប្អូន និងអ្នកជិតខាងក៏មាន។
លោក ប្រាក់ ពិន តំណាងក្រុមហ៊ុនពិភពដីមាសបានរៀបរាប់ថា ក្រុមហ៊ុនមានគោលការណ៍ដោះស្រាយជូនអតិថិជនជានិច្ច។ ការខកខានមិនបានផ្ដល់ជូនប្រាក់ចំណេញចំពោះអតិថិជនមួយចំនួននារយៈពេលប៉ុន្មានខែចុងក្រោយនេះដោយសារបញ្ហាវិបត្តិសេដ្ឋកិច្ច។ ដូច្នេះក្រុមហ៊ុននឹងបូកសរុប រួចផ្តល់ប្រាក់ភាគលាភជូនអតិថិជននាពេលខាងមុខ។
លោក ប្រាក់ ពិន បានលើកឡើងថា ក្រុមហ៊ុនមិនបានបង្ខិតបង្ខំ(ប្រជាពលរដ្ឋ)ទេគឺស្ម័គ្រចិត្តទិញដីដោយខ្លួនឯងក្នុងតម្លៃ១ឡូតិ៍ ១៦.០០០ដុល្លារ និងមានកិច្ចសន្យាសម្រាប់រយៈពេល២៤ខែ។ ប្រសិនបើត្រូវការលក់វិញត្រូវជូនដំណឹងនៅខែទី២១ ដើម្បីក្រុមហ៊ុនរៀបចំឯកសារ។ លោកមិនអាចនិយាយខុសពីគោលការណ៍ឡើយរាល់អ្វីដែលទាមទារ លោកនឹងនាំយកទៅឆ្លងប្រធានក្រុមហ៊ុន។ចំពោះការបកស្រាយនេះបានធ្វើឱ្យប្រជាពលរដ្ឋផ្ទុះការតវ៉ាពេញសាលប្រជុំដោយបដិសេធមិនទទួលយកការបកស្រាយរបស់តំណាងក្រុមហ៊ុនរូបនេះឡើយ។ ប្រជាពលរដ្ឋបានបញ្ជាក់ថា ការសន្យាបែបនេះបានធ្វើឡើងជាញឹកញយមកហើយពេលដែលប្រជាពលរដ្ឋនាំគ្នាទៅជួបនៅក្រុមហ៊ុនកន្លងមក។
ដូច្នេះពួកគាត់ទាមទារឱ្យប្រធានក្រុមហ៊ុនជួបដោះស្រាយផ្ទាល់ដើម្បីបញ្ចប់បញ្ហា។ លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពតដែលជាអ្នកកោះហៅក្រុមហ៊ុននិងប្រជាពលរដ្ឋឲ្យមកជួបគ្នា បានឲ្យដឹងថា ដោយសារប្រជាពលរដ្ឋមិនអាចទទួលយកបានលោកបាន ឱ្យតំណាងក្រុមហ៊ុនវិលត្រឡប់ទៅវិញ ហើយប្រាប់ប្រធានក្រុមហ៊ុនឱ្យកំណត់ថ្ងៃជួបជាមួយប្រជាពលរដ្ឋផ្ទាល់។ ក្នុងនាមស្នងការនគរបាល លោកនឹងអញ្ជើញលោកអភិបាលខេត្តកំពត ដើម្បីចូលរួមរកដំណោះស្រាយតាមវិធានការ ឈ្នះ ឈ្នះ ទាំងអស់គ្នា និងសង្ឃឹមថា ក្រុមហ៊ុននឹងខកខានដែលនាំឱ្យស្នងការដ្ឋាននគរបាលខេត្តកំពតចេញលិខិតកោះហៅជាលើកទី២ឡើយ។
បើ គិតពីថ្ងៃទី២៦ ខែឧសភា រហូតដល់ថ្ងៃទី២៣ ខែមិថុនា ឆ្នាំ២០២៣ ស្នងការដ្ឋាននគរបាលខេត្តកំពតបានទទួលពាក្យបណ្ដឹងរបស់ប្រជាពលរដ្ឋចំនួន ៤៨៤បណ្តឹងដែលចោទប្រកាន់ក្រុមហ៊ុនពិភពដីមាសពីបទបទឆបោក។ ប្រជាពលរដ្ឋបានអះអាងថា ចំនួនប្រាក់ដែលដាក់វិនិយោគជាមួយក្រុមហ៊ុនពិភពដីមាសមានចំនួន ៩.១៥៣.៦០០ដុល្លារ។ការកោះហៅរបស់នគរបាលខេត្តកំពត់បានថ្វើឲ្យឧកញ៉ាថៅកែក្រុមហ៊ិដីមាសចោទថាបង្កការរំខាននិងធ្វើឲ្យក្រុមហ៊ុនអាប់អោនកិត្តិយសព្រោះក្រុមហ៊ុនកំពុងដោះស្រាយឲ្យបហរជាពលរដ្ឋតើ?៕
