មាន អ្នកស្ម័គ្រចិត្ត ចំនួនជាង៣.០០០នាក់ ជួយសម្របសម្រួល ដល់កីឡាករ កីឡាការិនី ពិការភាពក្នុងកម្មវិធីអាស៊ានប៉ារ៉ាហ្គេម លើកទី១២ដែលសម្តេចថាបន្សល់ឈ្មោះល្បី
03-April-2024 / សុខភាពនិងកីឡា
ភ្នំពេញ៖ អ្នកស្ម័គ្រចិត្ត ក្នុងព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម លើកទី១២ មានចំនួន៣.២០០នាក់ (១៥នាក់ មកពីបណ្តាប្រទេសអាស៊ាន និង១៥នាក់ទៀត មានពិការភាព) បានចូលរួមការងារ និងលើកទឹកចិត្តដល់កីឡាករ កីឡារិនី មានពិការភាព ដូចជា ជូនដំណើរពួកគាត់ ណែនាំបង្ហាញទីតាំងប្រកួត និងជូនឡើងឡាន និងកន្លែងស្នាក់នៅជាដើម ខណ:ព្រឹត្តិការណ៍អាស៊ានប៉ារ៉ាហ្គេម លើកទី១២ មានចំនួន១៤ ប្រភេទកីឡា។ នេះបើតាម លោក សុខ សប្បាយណា ប្រធានគណៈកម្មការអ្នកស្ម័គ្រចិត្ត ព្រឹត្តិការណ៍ប៉ារ៉ាហ្គេម បានឲ្យដឹងនៅថ្ងៃទី៥ ខែមិថុនា ឆ្នាំ២០២៣នេះ នៅពហុកីឡដ្ឋានជាតិមរតកតេជោបានឲ្យដឹង។
លោក សុខ សប្បាយ បានបញ្ជាក់ថា អ្នកស្ម័គ្រចិត្តសុទ្ធតែមានទឹកចិត្តសប្បាយរីករាយ ក្នុងការចូលរួមបំពេញការងារ ដោយសប្បាយរីករាយ ទោះបីជាហត់ពេលបំពេញការងារ តែសប្បាយចិត្តដោយយទឹកមុខញញឹម ដែលជាតំណាងឲ្យយុវជនស្ម័គ្រចិត្តទាំងអស់។ការបំពេញការងារ ជាអ្នកស្ម័គ្រចិត្តទាំងអស់បង្ហាញនូវទំនាក់ទំនងមិត្តភាព រវាងបណ្តាប្រទេសនៃសមាជិកអាស៊ាន និងជាការចងចាំពីបណ្តាប្រទេសនានាលើពិភពលោក គឺការចង់ចាំព្រឹត្តិការណ៍ស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ដែលកម្ពុជា ធ្វើជាម្ចាស់ផ្ទះ។
សូមបញ្ជាក់ដែរថា នៅក្នុងព្រឹត្តិការណ៍ស៊ីហ្គេម លើកទី៣២ មានអ្នកស្ម័គ្រចិត្ត ចូលរួមសម្របសម្រួលការងារ ចំនួន ៦.០០០នាក់ផងដែរ។កម្មវិធីប្រកួតអាស៊ានប៉ារ៉ាហ្កេមដែលកម្ពុជាធ្វើជាម្ចាស់ផ្ទះរៀបចំបានប្រារព្ធពិធីបើកក្រោមអធិបតីភាពសម្តេចតេជោហ៊ុនសែននិងសម្តេចកិត្តិព្រិទ្ធបណ្ឌឹតប៊ុនរ៉ានីហ៊ុនសែនកាលពីថ្ងៃទី២មិថុនាឆ្នាំ២០២៣នៅពហុកីឡាដ្ឋាមរតកតេជោ.។លោក ហង្សជួន ណារ៉ុនរដ្ឋមន្ត្រីក្រសួងអប់រំយុវជននិងកីឡា បានឲ្យដឹងថា កីឡាប៉ារ៉ាហ្គេម ជាកីឡាដែលមានថាមពលលើកទឹកចិត្តឱ្យជនជាតិកម្ពុជាដែលមានពិការភាពអាចចូលហាត់បាន ដោយពួកគាត់មានទឹកចិត្តល្អ មានក្តីសង្ឃឹម ដោយរំពឹងថា នឹងក្លាយជាកីឡាករកីឡាការិនី ហើយដែលអាចប្រែក្លាយជីវិតពួកគាត់ដែលមានពិការភាពទៅជាមនុស្សដែលមានសក្តានុពលនៅក្នុងសង្គម។ ក្រៅពីនេះក៏នឹងអាចក្លាយជាបុគ្គលដែលគេទទួលស្គាល់ក្នុងសង្គម និងអាចផ្តល់នូវកិត្តិយសដល់សង្គមជាតិថែមទៀត។
លោករដ្ឋមន្ត្រីក្រសួងអប់រំ ក៏បានលើកឡើងដែរថា ក្នុងចំណោមកីឡាអាស៊ានប៉ារ៉ាហ្គេមទាំង១៤កីឡា ដែលថ្មីជាងគេគឺ កីឡាប៉ារ៉ាហ្គេមយូដូ ដែលទទួលបាននូវការបង្វឹកហ្វឺនពីគ្រូជំនាញរបស់ជប៉ុន ជួយបង្ហាត់នៅវិទ្យាស្ថានអប់រំពិសេសជាកន្លែងបង្រៀនសិស្សដែលមានពិការភាពតែម្តង គឺមានបន្ទប់មួយសម្រាប់បង្ហាត់ប៉ារ៉ាយូដូ។ មួយទៀតគឺ កីឡា អ៊ី ស្ពត និងកីឡាទាត់បាល់សម្រាប់ជនពិការភ្នែក ដែលទើបតែទទួលបានការបង្ហាត់រយៈពេល៦ទៅ៧ខែប៉ុណ្ណោះ ប៉ុន្តែពួកគាត់មានលទ្ធភាពចូលរួមប្រកួតក្នុងព្រឹត្តិការណ៍អាស៊ានប៉ារ៉ាហ្គេមពេលនេះដែរ ទាំងនេះជាការប្រកួតនៅពេលនេះក៏ជាលើកដំបូង ដែលជាការដកបទពិសោធន៍ផ្ទាល់សម្រាប់ការទទួលបានជោគជ័យនាពេលក្រោយ។
ទាក់ទងនិងការធ្វើជាម្ចាស់ផ្ទះរៀបចំការប្រកួតនេះសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានលើកឡើងថា កេរ្តិ៍ឈ្មោះរបស់កម្ពុជា ក្នុងការរៀបចំព្រឹត្តិការណ៍ស៊ីហ្គេម លើកទី៣២ (32nd SEA Games 2023) និងការប្រកួតកីឡាជនមានពិការភាព អាស៊ានប៉ារ៉ាហ្គេមលើកទី១២ ចាយមិនអស់ទេ ហើយបន្សល់ទុកឲ្យកូនខ្មែរ រាប់រយឆ្នាំទៅមុខទៀត។
សម្ដេចតេជោ ហ៊ុន សែន បានបញ្ជាក់យ៉ាងដូច្នេះថា «ខ្ញុំសូមបញ្ជាក់ថា លុយអាចចាយអស់ ប៉ុន្ដែកេរ្ដិ៍ឈ្មោះ ចាយមិនអស់នោះទេ កេរ្ដិ៍ឈ្មោះ ដែលកម្ពុជាធ្វើស៊ីហ្គេម និងប៉ារ៉ាហ្គេម ឆ្នាំ២០២៣ ទុកបន្សល់ឲ្យកូនចៅយើង រាប់រយឆ្នាំតទៅទៀត»។សម្ដេចតេជោ នាយករដ្ឋមន្ដ្រី បានលើកឡើងថា កម្ពុជាជាប្រទេសក្រ ប៉ុន្ដែបេះដូងធំ ហើយសម្ដេចតេជោ បានប្រាប់ថា ធ្វើជាមនុស្សកុំចាំបាច់ ធ្វើជាមនុស្សមុខលុយខ្លាំងពេក លុយចាយអស់ ក៏ប៉ុន្ដែកិត្ដិយសចាយអត់អស់ទេ ហើយកត់ត្រាចំណាំ។
សម្តេចតេជោ ហ៊ុន សែន បានថ្លែងថា ពិធីបើកអាស៊ានប៉ារ៉ាហ្គេម មិនចាញ់ការបើកស៊ីហ្គេមនោះឡើយ។ ស៊ីហ្គេម មនុស្សហោះតែម្នាក់ អាស៊ានប៉ារ៉ាហ្គេម មនុស្សហោះរហូតដល់ទៅ ១០នាក់។ សម្តេចតេជោ បន្ដថា ការរៀបចំប្រកួតស៊ីហ្គេម និងអាស៊ានប៉ារ៉ាហ្គេម បានរួមចំណែកពង្រឹងសាមគ្គីភាព និងមិត្តភាពប្រជាជាតិអាស៊ីអាគ្នេយ៍ជាង ៦០០លាននាក់។
សម្ដេចតេជោ បានថ្លែងថា «យើងមិនមែនធ្វើម្ចាស់ផ្ទះ ត្រឹមតែសម្រាប់ប្រជាជនខ្លួនឯង ត្រឹម១៧លាននាក់នោះទេ យើងមានភារកិច្ច ធ្វើការសម្របសម្រួល និងទំនាក់ទំនង ជាមួយនឹងប្រជាជនជាង៦០០លាននាក់ របស់អាស៊ាន»។ សម្ដេចតេជោ ហ៊ុន សែន បានគូសបញ្ជាក់ថា អ្នកខ្លះគេថាកម្ពុជា ចាយលុយខ្ចះខ្ចាយ មិនគិតយកលុយ ដែលធ្វើស៊ីហ្គេមនោះមកធ្វើអ្វីផ្សេង បែរជាមកធ្វើស៊ីហ្គេម ប៉ុន្ដែសម្ដេចបញ្ជាក់ថា ស៊ីហ្គេម គឺជាកាត្វកិច្ចរបស់សមាជិកអាស៊ាន។
សម្ដេចតេជោ ហ៊ុន សែន ឲ្យដឹងថា ព្រឹត្ដិការណ៍ស៊ីហ្គេម និងអាស៊ានប៉ារ៉ាហ្គេម ដែលកម្ពុជាធ្វើជាម្ចាស់ផ្ទះ នៅឆ្នាំ២០២៣នេះ គឺជាលើកដំបូង នៅក្នុងប្រវត្ដិសាស្ដ្រ ស៊ីហ្គេម និងអាស៊ានបារ៉ាហ្គេម ដែលកម្ពុជា មិនយកថ្លៃទាំងអស់ រាប់ទាំងថ្លៃស្នាក់នៅ ហូបចុក និងប្រព័ន្ធផ្សព្វផ្សាយ។ ការលើកឡើងបែបនេះ ធ្វើឡើងក្នុងឱកាសដែល សម្ដេចតេជោ ហ៊ុន សែន អញ្ជើញជាអធិបតីភាព ក្នុងពិធីប្រគល់សញ្ញាបត្រ ជូននិស្សិតបញ្ចប់ការសិក្សា ពីសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ចសរុបជិត ៦ពាន់នាក់ នាព្រឹកថ្ងៃទី០៥ ខែមិថុនា ឆ្នាំ២០២៣នេះ។
