រុស្ស៊ីក្តៀនយោបល់រឿងហ្វាំងឡង់ចូលសមាជិកណាតូ
26-March-2024 / ព័ត៌មានអន្តរជាតិ
រុស្ស៊ី៖ ថ្ងៃអង្គារទី៤មេសា ប្រធានាធិបតីរុស្ស៊ី លោក វ្ល៉ាឌីមៀ ពូទីន បានទៅធ្វើទស្សនកិច្ចនៅតំបន់នៃទីក្រុង Tula ស្ថិតនៅទឹកដីភាគខាងលិចរបស់រុស្ស៊ីដើម្បីត្រួតពិនិត្យមើលដំណើរការឧស្សាហកម្មនៅទីនោះចំនិងថ្ងៃតែមួយនៃការប្រកាសចូលជាសមាជិកភាពនៃអង្គការណាតូរបស់ប្រទេសហ្វាំងឡង់ ។
លោកពុទីនបានទៅត្រួតពិនិត្យដំណើរការរោងចក្រផលិតរថភ្លើង និងគ្រឿងបរិក្ខារផ្លូវដែកមួយកន្លែងនៅក្នុងទីក្រុង Tula មុននឹងបន្ដចូលរួមកិច្ចប្រជុំជាមួយមន្ត្រីក្រុមប្រឹក្សារដ្ឋរុស្ស៊ីលើបញ្ហាអភិវឌ្ឍន៍ឧស្សាហកម្មក្នុងស្រុក ក្រោមបរិបទនៃទណ្ឌកម្មរបស់ប្រទេសលោកខាងលិច។ទោះជាយ៉ាងណាក្នុងអំឡុងកិច្ចប្រជុំដ៏ពិសេសនោះដែរ លោកពុទីន និងមន្ត្រីរដ្ឋាភិបាលរបស់លោកដទៃទៀត មិនបាននិយាយពាក់ព័ន្ធនឹងដំណើរការវិវត្តរបស់ប្រទេសហ្វាំងឡង់នៅក្នុងបក្សសម្ព័ន្ធយោធារបស់អង្គការណាតូនោះទេ ដោយលោកគ្រាន់តែផ្តោតការពិភាក្សាតែទៅលើការស្វែងរកដំណោះស្រាយដើម្បីជម្រុញដំណើរការឧស្សាហកម្មរបស់រុស្ស៊ីសម្រាប់ថ្ងៃខាងមុខ។
សូមបញ្ជាក់ថានៅថ្ងៃទី៤មេសានេះ ប្រទេសហ្វាំងឡង់ បានចូលជាសមាជិកពេញសិទ្ធិ ជាផ្លូវការហើយ នៃអង្គការសម្ព័ន្ធភាពអាត្លង់ទិកខាងជើង ហៅកាត់ថា អូតង់ ឬ ណាតូ។ អស់រយៈពេល៣០ឆ្នាំមកហើយ ដែលហ្វាំងឡង់ បានអនុវត្តគោលនយោបាយអព្យាក្រិត្យ មិនចូលបក្សសម្ព័ន្ធណាមួយ ដោយមិនចង់បង្កបញ្ហាឲ្យរុស្ស៊ីខឹងក្រេវក្រោធ។ ក៏ប៉ុន្តែក្រោយការធ្វើសង្គ្រាមឈ្លានពានរបស់រុស្ស៊ី ទៅលើអ៊ុយក្រែន បានធ្វើឲ្យហ្វាំងឡង់ ដែលមានព្រំដែនជាប់រុស្សីជាង១ពាន់គីឡូម៉ែត្រនោះ បានភ្លឺភ្នែកថា ភាពអព្យាក្រិត្យរបស់ខ្លួននឹងមិនអាចទប់មហិច្ឆតារបស់លោកពូទីនបានទេ។
បន្ទាប់ពីបានប្រគល់ឯកសារផ្លូវការ ជូនលោកអង់តូនី ប្លីងកិន រដ្ឋមន្ត្រីការបរទេសអាមេរិក ដែលមានតួនាទីជាឆ្មាំការពារសន្ធិសញ្ញាសម្ព័ន្ធភាពអាត្លង់ទិកខាងជើង ទង់ជាតិហ្វាំងឡង់ នឹងត្រូវគេបង្ហូតឡើង នៅចន្លោះទង់ជាតិបារាំង និង អេស្តូនី នៅទីលានខាងមុខទីស្នាក់ការកណ្តាលរបស់អូតង់ ក្នុងទីក្រុងព្រុចសែល វេលាម៉ោង ១និង៣០នាទីម៉ោងសកល។ហ្វាំងឡង់ក្លាយជាប្រទេសសមាជិកទី៣១ នៃអង្គការអូតង់ នៅថ្ងៃទី៤មេសា ថ្ងៃខួបនៃការបង្កើតសម្ព័ន្ធភាពនេះ ៤ មេសា ១៩៤៩។ សង្គ្រាមឈ្លានពានរបស់រុស្ស៊ីនៅអ៊ុយក្រែន បានធ្វើឲ្យក្រឡាប់ចាក់ដល់ស្ថិរភាពសន្តិសុខអឺរ៉ុប ហើយបានជំរុញទឹកចិត្ត ហ្វាំងឡង់ ក៏ដូចជាស៊ុយអែត ឲ្យងាកទៅសុំចូលជាសមាជិកអូតង់។ លោក Jens Stoltenberg អគ្គលេខាធិការអូតង់បានលើកឡើងថា “ពូទីនបានប្រើកម្លាំងឈ្លានពានអ៊ុយក្រែន ក្នុងកម្មវត្ថុធំបំផុត គឺគំរាមធ្វើឲ្យអូតង់ចុះខ្សោយ។ តែលទ្ធផល គឺបានផ្ទុយទាំងស្រុង ព្រោះពេលនេះ អូតង់កាន់តែរីកធំ។”
សូមបញ្ជាក់ថា ជាមួយនឹងសមាជិកភាពរបស់ហ្វាំងឡង់ ព្រំដែនដោយផ្ទាល់រវាងអូតង់ និងរុស្ស៊ី នឹងកើនប្រវែងទ្វេដង។ ហ្វាំងឡង់នឹងទទួលបានការការពារ ដោយមាត្រា៥នៃសន្ធិសញ្ញា ពោលគឺក្នុងករណីមានការវាយប្រហារមកលើហ្វាំងឡង់ គឺសមាជិកអូតង់នឹងរួមកម្លាំងគ្នាជួយប្រយុទ្ធការពារហ្វាំងឡង់។ តែយ៉ាងណា សម្រាប់ពេលនេះ ហ្វាំងឡង់អះអាងថា ខ្លួនមានសមត្ថភាពពេញលេញ ក្នុងការការពារព្រំដែនដែលខ្លួនមានជាមួយរុស្ស៊ី ប្រវែង១៣០០គីឡូម៉ែត្រ។ មន្ត្រីទូតតំណាងប្រទេសសមាជិកអូតង់ម្នាក់ បានលើកឡើងថា ហ្វាំងឡង់ មិនទាន់អនុញ្ញាតជាផ្លូវការ ថានឹងឲ្យកងទ័ពសម្ព័ន្ធមិត្តអូតង់ ទៅឈរជើងនៅលើទឹកដីខ្លួនទេ តែទៅថ្ងៃខាងមុខ គឺមើលមិនឃើញទេ ប្រសិនបើរុស្ស៊ីចល័តទ័ពនឹងសព្វាវុធខ្លាំងនៅតាមបណ្តោយព្រំដែន។
គួរបញ្ជាក់ដែរថា គិតត្រឹមពេលនេះ ពាក្យស្នើសុំចូលជាសមាជិកអូតង់ របស់ស៊ុយអែត ត្រូវបានហុងគ្រី និងតួកគី បដិសេធមិនគាំទ្រ។ តែទន្ទឹមគ្នានេះ លោកអគ្គលេខាធិការអូតង់ បានអះអាងថា លោកមានជំនឿចិត្ត ថាស៊ុយអែត ក៏នឹងក្លាយជាសមាជិកពេញសិទ្ធិរបស់អូតង់នៅថ្ងៃខាងមុខ។ ដូចគ្នាដែរ លោកបានអះអាងថា គោលជំហរអូតង់គឺមិនបានផ្លាស់ប្តូរទេ គឺគាំទ្រចង់ឲ្យអ៊ុយក្រែនក្លាយជាសមាជិកផ្លូវការរបស់អូតង់ដែរ។ គ្រាន់តែថា អាទិភាពពេលនេះ គឺជាការការពារអធិបតេយ្យភាព ឯករាជ្យភាព និងបូរណភាពដែនដីអ៊ុយក្រែនជាមុនសិន៕
