បុគ្គលឹកវៀតណាម៦០នាក់នៅកាស៊ីណូបាវិតម៉ុកបាយរត់ចែកជើងគ្នា?
21-September-2026 / ព័ត៌មានជាតិ
ស្វាយរៀង៖ជនជាតិវៀតណាមជាង៦០នាក់បានព្យាយាមរត់គេចពីកាស៊ីណូមួយក្នុងក្រុងបាវិត កាលពីថ្ងៃសៅរ៍ ទី១៧ ខែកញ្ញា ឆ្នាំ២០២២ក្នុងពេលមានសេចក្តីរាយការណ៍ពីការចាប់ខ្លួន និងការឆ្មក់ចូលបង្ក្រាបទាក់ទងនឹងកាងារដោយបង្ខំ និងប្រតិបត្តិការឆបោកនៅក្នុងប្រទេសកម្ពុជា។
អធិការនគរបាលក្រុងបាវិត លោក ឯម សុវណ្ណារិទ្ធ បានប្រាប់ កាសែត ថា ជនជាតិវៀតណាមជាង៦០នាក់បានរត់ចេញពីកាស៊ីណូ ម៉ុកបាយ នៅក្រុងបាវិត កាលពីរសៀលថ្ងៃសៅរ៍ ទី១៧ ខែកញ្ញា ឆ្នាំ២០២២ ក្នុងនោះមានស្ត្រីប្រមាណ១០នាក់។លោក សុវណ្ណារិទ្ធ បាននិយាយថា រហូតមកដល់ពេលនេះ មនុស្សប្រហែល៤០នាក់ត្រូវបាននគរបាលកម្ពុជាសាកសួរ។ តាមការសាកសួរបានឱ្យដឹងថា(មូលហេតុ) ក្រុមហ៊ុនមិនបើកប្រាក់ឈ្នួលឱ្យពួកគេ ហើយអ្នកខ្លះព្រួយបារម្ភបន្ទាប់ពីបានឮអំពីការបង្ក្រាបរបស់រដ្ឋាភិបាលលើការងារខុសច្បាប់នៅកាស៊ីណូ។លោកថា «មានមនុស្សពីរបីនាក់ក្នុងចំណោមពួកគេបានចែកចាយព័ត៌មានមួយចំនួននៅក្នុងការជជែកតាមបណ្ដាញតេឡេក្រាមថាក្រុមហ៊ុនក្ស័យធន ដូច្នេះពួកគេចាប់ផ្ដើមភ័យស្លន់ស្លោ ហើយចាប់ផ្តើមចាកចេញ ហើយអ្នកផ្សេងទៀតធ្វើតាម»។លោកបន្ថែមថា បុគ្គលិកទទួលបានប្រាក់ខែចុងក្រោយ នៅថ្ងៃទី១២ ខែកញ្ញា ឆ្នាំ២០២២។
លោក សុវណ្ណារិទ្ធ បានថ្លែងថា បុគ្គលិកទាំងនោះមិនត្រូវបានបង្ខំឱ្យធ្វើការឬត្រូវបានបង្ខាំងឡើយ។វីដេអូអំពីការរត់គេចខ្លួនកាលពីថ្ងៃសៅរ៍ ទី១៧ ខែកញ្ញា ឆ្នាំ២០២២ ដែលទទួលបានដោយទីភ្នាក់ងារសារព័ត៌មានវៀតណាម VnExpress បង្ហាញពីមនុស្សមួយក្រុមដែលកំពុងរត់កាត់អគារពណ៌ទឹកក្រូចមួយ ដោយមានមនុស្សម្នាក់ត្រូវបានសន្តិសុខចាប់និងវាយ។ម្នាក់ក្នុងចំណោមអ្នករត់គេចខ្លួន បានប្រាប់ VnExpress ថាគាត់ត្រូវបានគេឆបោកឱ្យមកធ្វើការនៅក្នុងកាស៊ីណូនៅកម្ពុជាកាលពីបីខែមុន ហើយគាត់មិនត្រូវបានអនុញ្ញាតឱ្យចេញទៅក្រៅឡើយ។ម្នាក់ទៀតនិយាយថា ពួកគេមានគម្រោងរត់គេចខ្លួន ព្រោះពួកគេបានឮថានគរបាលនឹងមកពិនិត្យកាស៊ីណូ ហើយពួកគេខ្លាចថានឹងត្រូវបានគេលក់។
បុគ្គលិកខ្លះដែលបានធ្វើការឱ្យក្រុមហ៊ុនចន្លោះពី៨ទៅ១៨ខែ ត្រូវបានឃាត់ខ្លួននៅច្រកព្រំដែន ហើយមន្ត្រីច្រកព្រំដែនរង់ចាំការណែនាំពីថ្នាក់លើ។កាស៊ីណូបាវិត-ម៉ុកបាយ មាននាយក៥នាក់ មានដើមកំណើតមីយ៉ាន់ម៉ា។ ពួកគេទទួលបានសញ្ជាតិខ្មែរ។ អាសយដ្ឋានអ៊ីម៉ែល និងលេខទូរសព្ទរបស់ក្រុមហ៊ុនត្រូវគ្នានឹងគណនីហ្វេសប៊ុកឈ្មោះ Wei Maly ដែលបានបង្ហោះរូបថតជាច្រើនសន្លឹកថតជាមួយនាយឧត្តមសេនីយ៍ គន់ គីម ក៏ដូចជាមេបញ្ជាការកងរាជអាវុធហត្ថលើផ្ទៃប្រទេស លោក សៅ សុខា និងក្មួយប្រុសលោកនាយករដ្ឋមន្ត្រី ហ៊ុន សែន គឺលោក ហ៊ុន តូ ផងដែរ។
ប្រធានក្រុមប្រឹក្សាភិបាលរបស់កាស៊ីណូនេះ គឺលោក អ៊ូ វ៉ាង យួង (U Wang Young) បានបរិច្ចាគប្រាក់រាប់ម៉ឺនដុល្លារដល់កាកបាទក្រហមកម្ពុជា ។ នេះបើយោងតាមអត្ថបទព័ត៌មានរបស់រដ្ឋាភិបាល។
ទាក់ទងនិងកាស៊ីណូនេះដែរនគរបាលឃុំបានប្រាប់កាសែត កាលពីខែកក្កដា ថាបុរសជនជាតិចិនម្នាក់បានសម្លាប់អ្នកស្នាក់នៅក្នុងកាស៊ីណូម៉ុកបាយ ដោយសារជំពាក់បំណុលខ្លួនជាង៣ ០០០ដុល្លារ។
មន្ត្រីស្ថានអគ្គកុងស៊ុលវៀតណាមប្រចាំខេត្តព្រះសីហនុ ឈ្មោះ វូ ង៉ុកលី (Vu Ngoc Ly) បានប្រាប់ទីភ្នាក់ងារសារព័ត៌មាន VnExpress ថា នាយកដ្ឋានរបស់ខ្លួនបានធ្វើការជាមួយអាជ្ញាធរខេត្ត ក្នុងការជួយសង្គ្រោះមនុស្សប្រមាណ៦០០នាក់ចាប់តាំងពីដើមឆ្នាំមក។ គ្រួសារជនជាតិវៀតណាមជាច្រើន និយាយថា ពួកគេរងសម្ពាធពីថៅកែក្រុមហ៊ុនឆបោកឱ្យបង់ប្រាក់ ដើម្បីធានាថាកូនរបស់ពួកគេមិនត្រូវបានធ្វើទារុណកម្ម ដោយពេលខ្ លះពួកគេត្រូវខ្ចីប្រាក់គេយកមកបង់។ នេះបើយោងតាមទីភ្នាក់ងារសារព័ត៌មាន VnExpress។
