វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 4606 នាក់
ម្សិលមិញ 4292 នាក់
សរុប 14114305 នាក់
ស្រីលង្កា៖ លោកប្រធានាធិបតីស្រីលង្កា ហ្គោតាបាយ៉ា រាជបស្សៈ(Gotabaya Rajapaksa)បានប្រកាសលាលែងចេញពីតំណែងជាប្រធានាធិបតីហើយ បន្ទាប់ពីហ្វូងបាតុករសម្រុកចូលដល់និវេសនដ្ឋានរបស់លោកកាលពីរសៀលថ្ងៃសៅរ៍ ទី៩ក្កដា។ បណ្តាញផ្សព្វផ្សាយរបស់ប្រទេសអង់គ្លេស ប៊ីប៊ីស៊ី បានរាយការណ៍ឱ្យដឹងនៅព្រឹកថ្ងៃអាទិត្យ ទី១០ ខែកក្កដានេះថា ទាំងលោកប្រធានាធិបតី និងលោកនាយករដ្ឋមន្ត្រីគេមិនដឹងថាតើពេលបាតុករសម្រុកចូលទៅដល់នោះ អ្នកទាំងពីរស្ថិតនៅក្នុងនិវេសនដ្ឋានដែរឬទេ? ដែលតាមរបាយការណ៍ខ្លះថា លោកប្រធានាធិបតីបានគេចខ្លួនចេញមុនបន្តិច។
ស្ថិតនៅក្នុងបរិការណ៍នៃសម្ពាធពីហ្វូងបាតុករផ្ទុះឡើងនិងឡោមព័ទ្ធផ្ទះនេះ ការិយាល័យរបស់លោកប្រធានាធិបតីស្រីលង្កា Gotabaya Rajapaksa បានឱ្យដឹងថា លោកប្រធានាធិបតីនឹងចុះចេញពីដំណែងនៅថ្ងៃទី១៣ ខែកក្កដាខាងមុខនេះហើយ។ឯលោកនាយករដ្ឋមន្ត្រីស្រីលង្កាលោក Ranil Wickremesinghe បានយល់ព្រមលាលែងពីតំណែង បន្ទាប់ពីមេដឹកនាំគណបក្សនៅក្នុងសភាបានទាមទារឲ្យទាំងលោក និងប្រធានាធិបតីដែលមានជម្លោះចុះចេញពីតំណែងនៅថ្ងៃដែលក្រុមបាតុករបានសម្រុកចូលវិមាន និងការិយាល័យរបស់ប្រធានាធិបតី ។
អ្នកនាំពាក្យរបស់នាយករដ្ឋមន្ត្រីលោក Dinouk Colambage បាននិយាយថា លោក Wickremesinghe បានប្រាប់មេដឹកនាំគណបក្សថា លោកនឹងលាលែងពីតំណែង នៅពេលដែលភាគីទាំងអស់បានយល់ព្រមលើការបង្កើតរដ្ឋាភិបាលថ្មី ។គួររំលឹកផងដែរថា កាលពីរសៀលថ្ងៃសៅរ៍ម្សិលមិញ មានក្រុមបាតុករប្រមាណជា ១សែននាក់បានសម្រុកចូលទៅឡោមព័ទ្ធនិវេសនដ្ឋានរបស់លោកប្រធានាធិបតីដើម្បីទាមទារឱ្យចុះចេញពីដំណែង រហូតដល់មានការប៉ះទង្គិចគ្នារវាងសមត្ថកិច្ច និងក្រុមបាតុករ មិនតែប៉ុណ្ណោះកាលពីរាត្រីថ្ងៃសៅរ៍ អាជ្ញាធរស្រីលង្កាបានប្រកាសដាក់បំរាមគោចរ ក្នុងគោលដៅដើម្បីកុំឱ្យមានការជួបជុំ និងរក្សាសណ្តាប់ធ្នាប់សង្គមជាដើម។គួរបញ្ជាក់ផងដែរថា វិបត្តិសេដ្ឋកិច្ចនៅក្នុងប្រទេសមួយនេះ បង្កឱ្យមានវិបត្តិសង្គម និងនយោបាយផងដែរ៕