ណាតូជម្រុញឲ្យកូរ៉េខាងត្បូងជួយអាវុធដល់អ៊ុយក្រែនរុស្ស៊ីថាអាមេរិកចំណេញពីសង្គ្រាមអ៊ុក្រែន
21-September-2026 / ព័ត៌មានអន្តរជាតិ
កូរ៉េខាងត្បូង៖ អគ្គលេខាធិការ NATO លោក ជែន ស្ដូលធិនបឺគ (Jens Stoltenberg) នៅថ្ងៃចន្ទនេះបានជំរុញឱ្យកូរ៉េខាងត្បូងបង្កើនការគាំទ្រផ្នែកយោធាសម្រាប់អ៊ុយក្រែន ជាមួយ ការសង្កត់ធ្ងន់ថាប្រទេសដទៃជាច្រើនបានផ្លាស់ប្ដូរគោលនយោបាយរបស់ពួកគេ ដោយសារតែការឈ្លានពានរបស់រុស្ស៉ីនៅអ៊ុយក្រែន។
ទីភ្នាក់ងារ សារព័ត៌មាន AFP នៅថ្ងៃចន្ទ ទី៣០ ខែមករា ឆ្នាំ២០២៣បានឲ្យដឹងថា៖ក្នុងដំណើរទស្សនកិច្ចមួយដែលរួមបញ្ចូលទាំងប្រទេសជប៉ុនផងដែរ នៅក្នុងជំនួបជាមួយមន្ត្រីជាន់ខ្ពស់កូរ៉េខាងត្បូង លោក ស្ដូលធិនបឺគ បានលើកឡើងថាព្រឹត្តិការណ៍ដែលបានកើតឡើងនៅក្នុងតំបន់អឺរ៉ុប និងអាមេរិកខាងជើង គឺមានទំនាក់ទំនងជាមួយតំបន់ដទៃ ហើយថាបក្សសម្ព័ន្ធយោធា NATO ចង់ជួយគ្រប់គ្រង និងដោះស្រាយការគំរាមកំហែងជាសកល តាមរយៈការពង្រឹងភាពជាដៃគូនៅក្នុងតំបន់អាស៊ី។
ថ្លែងនៅឯវិទ្យាស្ថាន Chey Institute for Advanced Studies ក្នុងទីក្រុងសេអ៊ូល នៅថ្ងៃចន្ទនេះ ប្រមុខ NATO រូបនេះបានអរគុណដល់កូរ៉េខាងត្បូងសម្រាប់ការបញ្ជូនជំនួយដែល មិនមែនជាអាវុធអាចសម្លាប់ជីវិតមនុស្ស ដល់អ៊ុយក្រែន ប៉ុន្តែលោកផ្ទាល់បានជំរុញឱ្យទីក្រុងសេអ៊ូល បង្កើនការគាំទ្រផ្នែកយោធាបន្ថែមទៀត ជាពិសេសនោះគឺតម្រូវការចាំបាច់នូវ គ្រាប់រំសេវ។ លោក ស្ដូលធិនបឺគ បានលើកឡើងពីប្រទេសអាល្លឺម៉ង់ ស៊ុយអែត និងន័រវែស មកធ្វើជាឧទាហរណ៍ដោយបញ្ជាក់ថា ប្រទេសទាំងនេះក៏ធ្លាប់មានគោលនយោបាយដូចជាកូរ៉េខាងត្បូងដែរ តែបច្ចុប្បន្ន ពួកគេបានផ្លាស់ប្ដូររួចទៅហើយដោយបញ្ជូនអាវុធឱ្យអ៊ុយក្រែន។លោកបញ្ជាក់ថា៖ «ប្រសិនបើពួកយើងមិនចង់ឃើញ របបផ្ដាច់ការឈ្នះ នោះអ៊ុយក្រែនត្រូវការអាវុធជាចាំបាច់ ហើយនេះគឺជាការពិត»។
គួរបញ្ជាក់ថា ចាប់តាំងពីសង្គ្រាមនៅអ៊ុយក្រែន ផ្ទុះឡើងមក ប្រធានាធិបតីកូរ៉េខាងត្បូង លោក យូន ស៊ុកយុល បានប្រកាន់ជំហរថារដ្ឋាភិបាលរបស់លោកនឹងមិនបញ្ជូនអាវុធដែលអាច សម្លាប់ជីវិតមនុស្សឱ្យអ៊ុយក្រែននោះទេ ដោយសំអាងលើច្បាប់របស់ប្រទេស។ ប៉ុន្តែ ព្រមជាមួយកូរ៉េគ្នាខាងត្បូងបានចុះកិច្ចព្រមព្រៀងលក់អាវុធដូចជារថក្រោះ យន្ដហោះចម្បាំង និងអាវុធដទៃជាច្រើនជាមួយប្រទេសជាសមាជិក NATO ដូចជាប៉ូឡូញជាដើម។ដូច្នោះការជម្រុញនេះក៏ជាឱកាសសម្រាប់បង្ហាញពីសមត្តភាពអាវុធរបស់កូរ៉េខាងត្បូងផងដែរ។
ជាកស្តែងអនុរដ្ឋមន្ត្រីការបរទេសរុស្សី លោក Sergei Ryabkov បាននិយាយថា សហរដ្ឋអាមេរិកទទួលបានផលប្រយោជន៍យ៉ាងច្រើនពីជម្លោះអ៊ុយក្រែន ជាពិសេសពីបណ្តាប្រទេសអឺរ៉ុបដែលផ្គត់ផ្គង់សព្វាវុធដល់ទីក្រុងកៀវ។ លោក Sergei Ryabkov បានមានប្រសាសន៍ថា “សហរដ្ឋអាមេរិកមិនត្រឹមតែដើរតួនាទីបញ្ជាការក្នុងវិបត្តិអ៊ុយក្រែនប៉ុណ្ណោះទេ ថែមទាំងជាអ្នកទទួលផលសំខាន់នៃវិបត្តិនេះផងដែរ។ វ៉ាស៊ីនតោនចាត់ទុកអ៊ុយក្រែនជាកន្លែងសាកល្បងសម្រាប់ផលិតផលឧស្សាហកម្មយោធារបស់ខ្លួន។ ប្រព័ន្ធអាវុធរយៈចម្ងាយឆ្ងាយដ៏ទំនើបកំពុងត្រូវបានសាកល្បង» ។
លោក Sergei Ryabkov បាននិយាយថា សហរដ្ឋអាមេរិកកំពុងបង្ខំឱ្យបណ្តាប្រទេសអឺរ៉ុបចុះហត្ថលេខាលើកិច្ចសន្យាទិញអាវុធបន្ថែមទៀតដែលមានតម្លៃរាប់ពាន់លានដុល្លារពីប្រទេសនេះ ដោយជំរុញឱ្យអឺរ៉ុបបញ្ជូនអាវុធបន្ថែមទៀតទៅកាន់អ៊ុយក្រែន។ លោកបានព្រមានថា ការណ៍នេះនឹងបង្កការលំបាកដល់ប្រទេសដែលផ្តល់ជំនួយយោធាដល់ទីក្រុងកៀវ។បើតាមអនុរដ្ឋមន្ត្រី Sergei Ryabkov ការប្រកាសរបស់ទីក្រុងវ៉ាស៊ីនតោនអំពីការសម្រេចចិត្តរបស់ខ្លួនក្នុងការបញ្ជូនរថក្រោះ Abrams ទៅកាន់អ៊ុយក្រែននឹងធ្វើឱ្យការរំពឹងទុកនៃកិច្ចចរចាសន្តិភាពរវាងទីក្រុងមូស្គូ នឹងទីក្រុងកៀវកាន់តែដាច់ស្រយាល។លោក Ryabkov បាននិយាយថា ការសម្រេចចិត្តបញ្ជូនរថក្រោះប្រយុទ្ធ Abrams ទៅកាន់ទីក្រុង Kiev គឺជា “ជំហានដ៏គ្រោះថ្នាក់” ដែលបានបង្កើនការព្រួយបារម្ភនៅក្នុងសហគមន៍ពិភពលោកអំពីសកម្មភាពរបស់សហរដ្ឋអាមេរិក និងអង្គការណាតូ។
