វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1133 នាក់
ម្សិលមិញ 8227 នាក់
សរុប 14128014 នាក់
ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃនៅថ្ងៃទី២ ខែមីនា ឆ្នាំ២០២២ ក្នុងនាមរាជរដ្ឋាភិបាលកម្ពុជា បានធ្វើការអំពាវនាវទៅប្រទេសជាសមាជិកអាស៊ានទាំងអស់ ឱ្យរួមគ្នាទប់ស្កាត់បញ្ហាឧក្រិដ្ឋកម្មឆ្លងដែន ដោយមិនមានការរើសអើងគ្នា រួមទាំងការផ្ដល់នូវបទពិសោធឱ្យគ្នាទៅវិញទៅមក និងការពង្រឹងផ្នែកធនធានមនុស្សជាដើម។
ថ្លែងក្នុងកម្មវិធីបើកសន្និសីទអាស៊ានណាប៉ូលលើកទី៤០ សម្តេចក្រឡាហោមបានលើកឡើងថា បច្ចុប្បន្នមានការប្រយុទ្ធប្រឆាំងយ៉ាងតឹងតែងលើបទឧក្រិដ្ឋមិនប្រពៃណី និងបទឧក្រិដ្ឋប្រពៃណី រួមទាំងវិបត្តិជាបន្តបន្ទាប់ ដែលបង្កឡើងដោយជំងឺរាតត្បាត ក៏ដូចជាគ្រោះធម្មជាតិ និងបម្រែបម្រួលធាតុអាកាស។ ក្នុងស្ថានភាពដែលពោរពេញដោយសម្ពាធអវិជ្ជមានបែបនេះ អាស៊ានចាំបាច់ត្រូវតែបន្តលើកកម្ពស់ស្មារតីសាមគ្គីភាព និងត្រូវធ្វើការជាមួយគ្នា ដើម្បីសម្របសម្រួលឆ្លើយតបជាសកល ចំពោះបញ្ហាដែលកំពុងកើតឡើងនេះ។
កងកម្លាំងនគរបាលនៃប្រទេសសមាជិកអាស៊ាន មានភារកិច្ច ចាំបាច់ក្នុងការបង្កើតនូវបរិស្ថានសន្តិសុខល្អប្រសើរ ដែលជាបង្អែកយ៉ាងរឹងមាំគាំពារដល់កិច្ចដំណើរការអភិវឌ្ឍលើគ្រប់វិស័យនៃប្រទេសនីមួយៗ និងត្រូវពង្រឹងពង្រីកវិសាលភាពកិច្ចសហប្រតិបត្តិការក្នុងក្របខណ្ឌទ្វេភាគី ពហុភាគី ក្នុងតំបន់ និងអន្តរតំបន់ ជួយគ្នាទៅវិញទៅមកដោះស្រាយបញ្ហានានា ប្រយុទ្ធប្រឆាំងនូវបទឧក្រិដ្ឋឆ្លងដែនគ្រប់ប្រភេទ ប្រកៀកស្មាគ្នាដោយគ្មានការរើសអើង។
សម្ដេចក្រឡាហោម ស ខេង ក៏បានជំរុញដល់គណៈកម្មការក្នុងសន្និសីទណាប៉ូលនេះផងដែរ ឱ្យមានកិច្ចពិភាក្សារិះរកនូវមធ្យោបាយ ឬវិធីសាស្ត្រសំដៅលើកកម្ពស់ ប្រយុទ្ធប្រឆាំងបទល្មើសឆ្លងដែនគ្រប់ប្រភេទ គ្រប់ទម្រង់ និងគ្រប់រូបភាព ដើម្បីរក្សាស្ថិរភាព សន្តិសុខ និងសុវត្ថិភាពសង្គម នាំមកនូវវិបុលភាពសម្រាប់សហគមន៍ ពិសេសបង្កើតនូវបរិយាកាសអំណោយផលគាប់ប្រសើរ សម្រាប់គាំទ្រក្នុងការស្ទុះងើបឡើងនៃប្រទេសនីមួយៗ ក៏ដូចជាតំបន់ទាំងមូលបន្ទាប់ពីញុំាញីដោយជំងឺកូវីដ-១៩៕