គ្មានចម្លើយពីចិននិងថៃផ្លែមៀនប៉ៃលិនជាង៥ម៉ឺនតោន ខ្វះទីផ្សារតេជោប្រមូលទិញមៀននៅបាត់ដំបង!
05-September-2026 / សេដ្ឋកិច្ច
ប៉ៃលិន៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាឲ្យនាយឧត្តមសេនីយ៍ កិត្តិបណ្ឌិត ហ៊ីង ប៊ុនហៀងនាយករងខុទ្ទកាល័យសម្តេចតេជោ ហ៊ុន សែន ប្រមូលទិញផ្លែមៀនរបស់កសិករ នៅតាមបណ្ដាខេត្តជាប់ព្រំដែនកម្ពុជា-ថៃ ។
លោក សឿម ប៊ុនរិទ្ធិ អភិបាលរងខេត្តនិងជាអ្នកនាំពាក្យរដ្ឋបាលខេត្តបាត់ដំបង បានឲ្យកាសែតដឹងថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន មានទឹកចិត្តគាំទ្រផលិតផលក្នុងស្រុក ដូចជាផ្លែមៀន (តាង៉ែន) ដែលបច្ចុប្បន្នកំពុងជួបនឹងបញ្ហាទីផ្សារក្នុងការលក់ដូរ ជាពិសេសការនាំចេញទៅប្រទេសថៃ ។ សម្តេចនឹងទទួលទិញពីប្រជាកសិករនៅក្នុងខេត្តបាត់ដំបង ដែលផ្លែមៀន(តាង៉ែត)យកទៅផ្គត់ផ្គង់ទីផ្សារក្នុងស្រុក ។
ក្រុមការងារទិញមៀន ដឹកនាំដោយឯកឧត្តមនាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង នាយករងខុទ្ទកាល័យសម្តេចតេជោ ហ៊ុន សែន រង់ចាំទទួលទិញពីប្រជាកសិករ ដែលមានទីតាំងស្ថិតនៅក្នុងបរិវេណទីលានបាល់ទាត់វាលបែកចាន ជាប់នឹងទីបញ្ជាការដ្ឋានយោធភូមិភាគទី៥ ស្ថិតនៅភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង ចាប់ពីថ្ងៃទី១៨ ខែសីហា ឆ្នាំ២០២១នេះតទៅ ។លោក ឈឹម វជិរ៉ា ប្រធានមន្ទីរកសិកម្មរុក្ខាប្រម៉ាញ់ និងនេសាទខេត្តបាត់ដំបង បានផ្តល់ព័ត៌មានមកកាសែតថា ដំណាំមៀន (តាង៉ែន) នៅខេត្តបាត់ដំបង ប្រជាកសិករបានប្រមូលលើកទី១ ប្រមាណ១ម៉ឺនតោន គឺនៅមានចំនួនប្រមាណ ៧ម៉ឺនតោនទៀត ត្រូវប្រមូលផលបន្ដបន្ទាប់ទៀត ព្រោះថា មៀន មួយដើម មានបរិមាណផ្លែពី២០០ទៅ២៥០គ.ក្រ គឺកាត់ម្តង ពី៥០ទៅ៦០គ.ក្រ ទៅលើផ្លែមៀនទុំ ។
ឆ្នាំ២០២១នេះប្រជាកសិករនៅខេត្តបាត់ដំបងបន្ទាយមានជ័យប៉ៃលិនសម្រេចដាំដុះដំណាំមៀន (តាង៉ែន) បានចំនួន ៦ ០៥០ហ.ត ហើយផ្ទៃដីដែលអាចប្រមូលផលបានគឺ ៥ ២៩៤ ហ.ត បើប្រៀបធៀបនឹងឆ្នាំចាស់គឺមានការកើនឡើងជាង៧០ហ.ត ហើយបរិមាណប្រមូលផលមានជិត៨ម៉ឺនហ.ត ។
ដោយឡែកក្រៅពីផ្លែមៀនបាត់ដំបងដែលសម្តេចតេជោប្រមូលទិញនៅប៉ៃលិនសហគមន៍កសិកម្មមៀនប៉ៃលិន ក៏ កំពុងប្រឈមនឹងការខូចខាត ព្រោះមិនអាចនាំចេញបាន។លោក តំ សុភ័ណ្ឌ រដ្ឋបាលសហគមន៍កសិកម្មមៀនប៉ៃលិន បានប្រាប់កាសែតកាលពីថ្ងៃទី១២ ខែសីហានេះថា ផ្ទៃដីដាំដុះមៀនប៉ៃលិនរបស់កសិករ ជាសមាជិកមានចំនួន២៩០០ហិកតា នៅខេត្តប៉ៃលិន បាត់ដំបង និងបន្ទាយមានជ័យ ចាប់ផ្តើមដល់រដូវកាលប្រមូលផលហើយ នៅខែសីហានេះ ដែលអាចនឹងប្រមូលផលបានប្រមាណជាង៥ម៉ឺនតោន។
លោកបន្តថា នៅពេលនេះបញ្ហារបស់សហគមន៍មៀនប៉ៃលិន គឺគ្មានទីផ្សារសម្រាប់នាំចេញបាន ដោយកន្លងទៅពឹងផ្អែកលើការនាំចេញទៅថៃ ហើយថៃនាំចេញបន្តទៅចិន។ ប៉ុន្តែពេលនេះ មិនអាចនាំចេញទៅប្រទេសថៃបានឡើយ។ កន្លងទៅសហគមន៍កសិកម្មមៀនប៉ៃលិន ធ្លាប់បានស្នើទៅរដ្ឋមន្ត្រីក្រសួងកសិកម្ម ឲ្យជួយដល់កសិករផងដែរ តែមិនទាន់មានដំណោះស្រាយឡើយ ហើយរដ្ឋមន្ត្រីកសិកម្ម ក៏ធ្លាប់បានអញ្ជើញទៅដល់សហគមន៍ដោយផ្ទាល់ផងដែរ។
ពាក់ព័ន្ធនឹងបញ្ហាលក់មៀនមិនចេញនេះ ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី១២ ខែសីហានេះ បានចេញប្រកាសព័ត៌មានមួយ ដោយជំរុញអ្នកនាំចេញបង្វែរទិសដៅពីប្រទេសថៃ ទៅប្រទេសវៀតណាមវិញ។
ជុំវិញការបង្វែរនាំចេញទៅប្រទេសវៀតណាមនេះ លោក តំ សុភ័ណ្ឌ រដ្ឋបាលសហគមន៍កសិកម្មមៀនប៉ៃលិន បានឲ្យដឹងថា ទំនងជាមិនអាចទៅរួចទេ ព្រោះតែមិនទាន់ឃើញក្រុមហ៊ុនណាមួយទាក់ទងមកផ្ទាល់ ដើម្បីទិញផ្លែមៀនសម្រាប់នាំចេញនៅឡើយទេ ហើយពេលនេះផ្លែមៀនរបស់កសិករ ដល់ពេលប្រមូលផលទៀត។សូមបញ្ជាក់ថាឆ្នាំ២០២១នេះប្រទេសកម្ពុជានិងប្រទេសចិនបានែកភាពគ្នាពាណិជ្ជកម្មសេរីជាមួយគ្នាដែលសង្ឃឹមថាកម្ពុជានឹងមានទីផ្សារកសិកម្មក្នុងពេលដែលជញ្ជីងពាណិជ្ជកម្មរវាងចិននិងកម្ពុជាកើនដល់ជាហ៥ពាន់លានដុល្លារអាមេរិកតែភាគច្រើនកម្ពុជានាចូលពីស្រុកចិន!៕
