វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1764 នាក់
ម្សិលមិញ 6359 នាក់
សរុប 14088397 នាក់
ភ្នំពេញ៖ក្រសួងសុខាភិបាលបានប្រកាសរកឃើញវីរុសកូវីដ-១៩ បំប្លែងខ្លួន«ដែលតា» ចំនួន១០៩ករណីថ្មីនៅទូទាំងប្រទេស ខណៈរាជធានីភ្នំពេញមានការរកឃើញវីរុសកូវីដ-១៩ បំប្លែងខ្លួនថ្មី«ដែលតា» ចំនួន៥ករណី។
ក្រសួងសុខាភិបាលប្រកាសឲ្យដឹងថា រកឃើញលើពលករខ្មែរមកថៃម្នាក់ កាលពីថ្ងៃទី៣១កក្កដា និង៤នាក់ផ្សេងទៀត នៅថ្ងៃទី១សីហាម្សិលមិញ តាមរយៈការវិភាគសំណាកដោយវិទ្យាស្ថានប៉ាស្ទ័រកម្ពុជា។ អ្នកទាំង៤រូបថ្មីនេះ រួមមានអ្នកជំងឺម្នាក់នៅមន្ទីរពេទ្យកាល់ម៉ែត បុគ្គលិកអនាម័យនិងអ្នកជំងឺម្នាក់នៅមន្ទីរពេទ្យមិត្តភាពខ្មែរ-សូវៀត និងអ្នកដំណើរបរទេសម្នាក់មកពីប្រទេសម៉ាឡេស៊ី។ ភ្លាមៗក្រោយការរកឃើញអ្នកវិជ្ជមានចំនួន៤ករណីថ្មី ប្រជាពលរដ្ឋរាប់រយនាក់ក្នុងសង្កាត់បឹងសាឡាងខណ្ឌទួលគោក ត្រូវធ្វើតេស្តសំណាក ដើម្បីប្រាកដថាពួកគេមានឆ្លងវីរុសកូវីដ១៩ប្រភេទ«ដែលតា» ឬយ៉ាងណា។
អាជ្ញាធររាជធានីភ្នំពេញ សម្រេចបិទខ្ទប់ច្រកផ្លូវលេខ ៣៧២, ៣៧២Z និងផ្លូវលេខ ៣៦២ ក្នុងភូមិ៥ សង្កាត់បឹងសាឡាង ខណ្ឌទួលគោក ដែលមានការឆ្លងរាលដាលកូវីដ-១៩បំប្លែងខ្លួនថ្មី ប្រភេទដែលតា(Delta) ដើម្បីទប់ស្កាត់ និងកាត់ផ្ដាច់ការឆ្លងរាលដាលនៅក្នុងសហគមន៍ សម្រាប់រយៈពេល ១៤ថ្ងៃ គិតចាប់ពីម៉ោងសូន្យ ថ្ងៃទី៣ ដល់ថ្ងៃទី១៦ ខែសីហា ឆ្នាំ២០២១។
រដ្ឋបាលរាជធានីភ្នំពេញ សម្រេចបិទខ្ទប់កំណាត់ផ្លូវលេខ ៩៣ ក្នុងភូមិផ្សារតូច សង្កាត់ទួលសង្កែទី១ ខណ្ឌឫស្សីកែវ ដែលសង្ស័យពាក់ព័ន្ធមេរោគបំប្លែងថ្មី Delta។ប្រការ១ …ត្រូវបានការបិទខ្ទប់មិនឱ្យមានការចេញ-ចូលចំពោះកំណាត់ផ្លូវលេខ ៩៣ ពីចំណុចសាលាបឋមសិក្សា ពញាក្រែក រហូតដល់ចំណុចផ្ទះលេខ ១១៦ រួមទាំងលំនៅឋានក្នុងបុរី ខេស៊ី (KC) ស្ថិតក្នុងក្រុមទី៤ ភូមិផ្សារតូច សង្កាត់ទួលសង្កែទី១ ខណ្ឌប្ញស្សីកែវ រាជធានីភ្នំពេញ ដែលមានការសង្ស័យជាប់ពាក់ព័ន្ធមេរោគបំប្លែងខ្លួនថ្មី ប្រភេទ ដែលតា (Delta) សម្រាប់រយៈពេល ០៧ (ប្រាំពីរ) ថ្ងៃ គិតចាប់ពីម៉ោងសូន្យ នាថ្ងៃទី៣ ខែសីហា ឆ្នាំ២០២១ ដល់ ថ្ងៃទី៩ ខែសីហា ឆ្នាំ២០២១ រហូតការស្រាវជ្រាវត្រូវបានបិទបញ្ចប់ ដើម្បីទប់ស្កាត់ការឆ្លងរាលដាលនូវមេរោគបំប្លែង ខ្លួនថ្មី ប្រភេទដែលតា (Delta) នៅក្នុងសហគមន៍។
ក្រៅពីរាជធានីភ្នំពេញ អ្នកវិជ្ជមានកូវីដ១៩«ដែលតា» តាមបណ្តាខេត្តចំនួន១១ផ្សេងទៀត រួមមានកណ្តាល កំពង់ចាម ព្រៃវែង ត្បូងឃ្មុំ បាត់ដំបង បន្ទាយមានជ័យ ឧត្តរមានជ័យ ប៉ៃលិន និងសៀមរាប ក្នុងចំនួនសរុប១០៩ករណី។ នេះបើតាមសេចក្តីជូនដំណឹងរបស់ក្រសួងសុខាភិបាលនៅយប់ថ្ងៃចន្ទទី០១សីហាម្សិលមិញ។ ដូច្នេះមកដល់ពេលនេះ កម្ពុជាបានរកឃើញអ្នកឆ្លងវីរុសកូវីដ-១៩«ដែលតា» សរុប២២៣ករណីហើយ ។
ក្រសួងសុខាភិបាលកម្ពុជាថា កូវីដ-១៩បំប្លែងខ្លួន«ដែលតា» មានសមត្ថភាពឆ្លងរីករាលលឿនជាងមុន និងបង្ករជាជំងឺកូវីដ-១៩ធ្ងន់ធ្ងរជាងមុន។ ដែលទាមទារឲ្យមានការចូលរួមខ្លាំងបំផុតដើម្បីកាត់ផ្តាច់ខ្សែចម្លងជំងឺកូវីដ-១៩ និងទប់ស្កាត់ការធ្លាយចូលទៅក្នុងសហគមន៍នូវវីរុសកូវីដ-១៩ប្រភេទ«ដែលតា»នេះ។
ជាវិធានការនៃការទប់ស្កាត់ការឆ្លងវីរុសកូវីដ-១៩ប្រភេទ«ដែលតា» ចូលទៅក្នុងសហគមន៍ ប្រមុខរដ្ឋាភិបាលកម្ពុជា កាលពីថ្ងៃពុធសប្តាហ៍កន្លងទៅ បានសម្រេចបិទខ្ទប់ខេត្តចំនួន៨ដែលមានព្រំប្រទល់ជាប់នឹងប្រទេសថៃ ចំនួន២សប្តាហ៍ ដោយសារមានការរកឃើញករណីឆ្លងជំងឺកូវីដ-១៩ប្រភេទ«ដែលតា» លើពលករខ្មែរជាច្រើនករណី។ បន្ថែមពីនេះប្រមុខរដ្ឋាភិបាលកម្ពុជា ក៏សម្រេចឲ្យអាជ្ញាធររាជធានីភ្នំពេញ-ខេត្ត ដាក់ចេញបម្រាមគោចរចន្លោះពីម៉ោង៩យប់ ដល់ម៉ោង៣ទៀបភ្លឺ សំដៅការទប់ស្កាត់ការរាលដាលវីរុសកូវីដ-១៩ប្រភេទ«ដែលតា» ចូលសហគមន៍ដូចគ្នា។
យ៉ាងណាមិញនៅថ្ងៃនេះ ក្រសួងសុខាភិបាលកម្ពុជាក៏បានប្រកាសឲ្យដឹងពីករណីវិជ្ជមានកូវីដ១៩ថ្មីចំនួន៥៦០នាក់បន្ថែមទៀត ខណៈអ្នកជាសះស្បើយថ្មីមាន៧៦៣នាក់ និងស្លាប់២២នាក់។ ជាតុល្យការត្រឹមថ្ងៃទី០២សីហា កម្ពុជាមានអ្នកឆ្លងជំងឺកូវីដ-១៩សរុបនៅទូទាំងប្រទេសកើនដល់៧៨,៤៧៤៧នាក់ អ្នកជាសះស្បើយ៧១,៥១៧នាក់ និងស្លាប់១៤៤២នាក់៕