ទៀសីហា៖ការផ្ទុះកូវីតនៅនៅស្រុកសូទ្រនិគម និងស្រុកជីក្រែងជាហេតុការណ៍ដែលមិននឹកស្មានដល់!
27-March-2024 / ព័ត៌មានជាតិ
ខេត្តសៀមរាប៖ ការផ្ទុះជំងឺកូវីដ-១៩ នៅស្រុកសូទ្រនិគម និងស្រុកជីក្រែង ថាជាហេតុការណ៍ដែលមិននឹកស្មានដល់ កើតចេញពីការជួបជុំដែលមិនចាំបាច់ ។
នេះជាការវាយតម្លៃរបស់ លោក ទៀ សីហា អភិបាលខេត្តសៀមរាបនាព្រឹកថ្ងៃទី០៨ ខែមិថុនា ឆ្នាំ២០២១ នៅក្នុងកិច្ចប្រជុំពិនិត្យលើបទបង្ហាញ ស្តីពីប្រព័ន្ធចុះឈ្មោះអ្នកដំណើរ «Web App»ជំនាន់ទី២ តាមរយៈនៃការស្កេន QR Code ដែលនឹងត្រូវយកទៅប្រើប្រាស់គ្រប់គ្រងទិន្នន័យនៅតាមបណ្តាច្រកព្រំប្រទល់ខេត្តសៀមរាប។លោក ទៀ សីហា មានប្រសាសន៍ថា «ស្របពេលជាមួយគ្នានឹងការអនុវត្តវិធានការ ៣កុំ និង៣ការពារ ឲ្យមានប្រសិទ្ធភាពរបស់ប្រមុខនៃរាជរដ្ឋាភិបាល និងការណែនាំអនុវត្តផ្សេងៗទៀត ដែលដាក់ចេញដោយក្រសួងសុខាភិបាល ពាក្យថា សោកស្តាយ វាមិនគួរកើតមាននោះទេ នៅក្នុងព្រឹត្តិការណ៍កូវីដ-១៩ បើសិនជាគ្មានការធ្វេសប្រហែសនោះ»។
អភិបាលខេត្តសៀមរាប មានប្រសាសន៍សង្កត់ធ្ងន់ថា «វាជាការព្រួយបារម្ភខ្លាំងណាស់ ដែលនៅមានអ្នកពាក់ព័ន្ធមួយចំនួនក្នុងករណីឆ្លងខាងលើ មិនបង្ហាញខ្លួន យកសំណាកធ្វើតេស្ត ដើម្បីសុវត្តិភាពផ្ទាល់ខ្លួន គ្រួសារ និងសហគមន៍នោះ»។អភិបាលខេត្តសៀមរាបក៏បានអំពាវនាវ សូមឲ្យអ្នកទាំងនោះធ្វើចត្តាឡីស័កនៅផ្ទះ១៤ថ្ងៃ បើមានការប្រែប្រួលសុខភាពមិនប្រក្រតី សូមផ្តល់ព័ត៌មានទៅកាន់ទូរស័ព្ទលេខ ០១២ ៩៥៥ ៤៧៤ និង ០៧៧ ៧៨៩ ០០៧ ដើម្បីក្រុមការងារចាត់វិធានការ យកសំណាកធ្វើតេស្តស្រាវជ្រាវ។
សូមជម្រាបថាតាមសេចក្តីប្រកាសជាបន្តបន្ទាប់របស់រដ្ឋបាលខេត្តសៀមរាប បានឲ្យដឹងថា ចាប់ពីថ្ងៃទី៤ ខែមិថុនាកន្លងមក ត្រឹមតែរយៈពេល៤ថ្ងៃប៉ុណ្ណោះ ស្រុកសូទ្រនិគម និងស្រុកជីក្រែង បានរកឃើញអ្នកវិជ្ជមានកូវីដ-១៩ ប្រមាណជា៨០នាក់ ដែលបណ្តាលមកពីការជួបជុំមិនចាំបាច់ បំពានលើវិធានការទប់ស្កាត់របស់រាជរដ្ឋាភិបាល។ ការរកឃើញក្នុងចំនួននេះ វាមិនធ្លាប់មានទេសម្រាប់ខេត្តសៀមរាប។ ក្នុងនោះជាអាទិមានមេនិងកូនចៅនៅអធិការដ្ឋាននគរបាលស្រុកសូទ្រនិគម ខេត្តសៀមរាបជាង១០នាក់មានវិជ្ជមានមេរោគកូវីដ១៩ដោយសារការជប់លាង។
តាមប្រភពពីមន្ត្រីនគរបាលនៃអធិការដ្ឋាននគរបាលស្រុកសូទ្រនិគម សុំមិនបញ្ចេញឈ្មោះ បានឲ្យដឹងថា ការណ៍ដែលនាំឲ្យការចម្លងនៅក្នុងជួរថ្នាក់ដឹកនាំនគរបាលស្រុកសូទ្រនិគម ដោយសារតែកាលពីថ្ងៃទី២៩ខែឧសភាឆ្នាំ២០២១កន្លងទៅនៅផ្ទះរបស់លោក ទេព ចាន់ណា អធិការស្រុកសូទ្រនិគម បានរៀបចំកម្មវិធីស៊ីផឹកហ៊ឹកហ៊ាក់ ហើយក៏មានអ្នកវិជ្ជមានជំងឺកូវីដ១៩ ចូលរួមទើបបណ្តាលឲ្យឆ្លងរាលដាលបែបនេះ។
សេចក្តីប្រកាសព័ត៌មានរបស់រដ្ឋបាលខេត្តសៀមរាប នៅថ្ងៃទី០៥ ខែមិថុនា ឆ្នាំ២០២១ឲ្យដឹងថារដ្ឋបាលខេត្ត បានរកឃើញអ្នកវិជ្ជមានជំងឺកូវីដ-១៩ ថ្មី ចំនួន២៣នាក់ក្នុងនោះមានរាយនាមខាងក្រោម៖
១- ឈ្មោះ ទេព ចាន់ណា ភេទប្រុស អាយុ៥៥ឆ្នាំ អាសយដ្ឋាននៅភូមិបន្ទាយស្រី ឃុំដំដែក ស្រុកសូទ្រនិគម មុខរបរ អធិការ នៃអធិការដ្ឋាននគរបាលស្រុកសូទ្រនិគម។២- ឈ្មោះ ដួង សុផាន់ណា ភេទប្រុស អាយុ៣៣ឆ្នាំ អាសយដ្ឋាននៅភូមិសំរោងជើង ឃុំសំរោង ស្រុកសូទ្រនិគម មុខរបរ អធិការរង នៃអធិការដ្ឋាននគរបាលស្រុកសូទ្រនិគម។៣- ឈ្មោះ ជា ចាន់ឌី ភេទប្រុស អាយុ៣៥ឆ្នាំ អាសយដ្ឋាននៅភូមិបន្ទាយស្រី ឃុំដំដែក ស្រុក-សូទ្រនិគម មុខរបរ អធិការរង នៃអធិការដ្ឋាននគរបាលស្រុកសូទ្រនិគម។
៤- ឈ្មោះ អ៊ូ ចាន់ធី ភេទប្រុស អាយុ៥២ឆ្នាំ អាសយដ្ឋាននៅភូមិដូនហុង ឃុំដំដែក ស្រុកសូទ្រនិគម មុខរបរ អធិការរង នៃអធិការដ្ឋាននគរបាលស្រុកសូទ្រនិគម។៥- ឈ្មោះ សូត្រ សំ ភេទប្រុស អាយុ៤៨ឆ្នាំ អាសយដ្ឋាននៅភូមិត្របែក ឃុំដំដែក ស្រុកសូទ្រនិគម មុខរបរ នាយផ្នែក នៃអធិការដ្ឋាននគរបាលស្រុកសូទ្រនិគម។៦- ឈ្មោះ ចន ចៅចិត្ត ភេទប្រុស អាយុ៣២ឆ្នាំ អាសយដ្ឋាននៅភូមិត្របែក ឃុំដំដែក ស្រុកសូទ្រនិគម មុខរបរ នាយករងផ្នែក នៃអធិការដ្ឋាននគរបាលស្រុកសូទ្រនិគម។៧- ឈ្មោះ ពៅ ពន ភេទប្រុស អាយុ៣២ឆ្នាំ អាសយដ្ឋាននៅភូមិបែកសំភ្លើង ឃុំចាន់ស ស្រុក-សូទ្រនិគ មុខរបរ នាយករងផ្នែក នៃអធិការដ្ឋាននគរបាលស្រុកសូទ្រនិគម។
៨- ឈ្មោះ អ៊ីវ ង៉ា ភេទប្រុស អាយុ៤៨ឆ្នាំ អាសយដ្ឋាននៅភូមិថ្នល់ចែក ឃុំកៀនសង្កែ ស្រុកសូទ្រនិគម មុខរបរ នាយករងផ្នែក នៃអធិការដ្ឋាននគរបាលស្រុកសូទ្រនិគម។៩- ឈ្មោះ ទេព សំណាង ភេទប្រុស អាយុ២៧ឆ្នាំ អាសយដ្ឋាននៅភូមិបន្ទាយស្រី ឃុំដំដែក ស្រុកសូទ្រនិគម មុខរបរ នាយករងផ្នែក នៃអធិការដ្ឋាននគរបាលស្រុកសូទ្រនិគម។១០-ឈ្មោះ ទុយ អ៊ឹង ភេទប្រុស អាយុ៤៨ឆ្នាំ អាសយដ្ឋាននៅភូមិផ្សារកំពង់ឃ្លាំង ឃុំកំពង់ឃ្លាំង ស្រុកសូទ្រនិគម មុខរបរ នាយរងប៉ុស្តិ៍នគរបាលរដ្ឋបាលឃុំកំពង់ឃ្លាំង ស្រុកសូទ្រនិគម ។១១-ឈ្មោះ គង់ សុហេង ភេទប្រុស អាយុ២៥ឆ្នាំ អាសយដ្ឋាននៅភូមិស្ពានត្នោត២ ឃុំស្ពានត្នោត ស្រុកជីក្រែង មុខរបរ មន្ត្រីប៉ុស្តិ៍នគរបាលរដ្ឋបាលឃុំកំពង់ឃ្លាំង ស្រុកសូទ្រនិគម។ក្រៅពីនចំនួន១២នាក់ទៀតជាប្រជាពលរដ្ឋ។
បើតាមការប្រកាសដដែលបានឲ្យដឹងថាពីករណីទី១ ដល់ទី២០ គឺមានទំនាក់ទំនងគ្នាជាមួយឈ្មោះ អ៊ូ សេង ឈ្មោះ ឃៀន សុឃី និងឈ្មោះ ភន់ សុភា ដែលវិជ្ជមានជំងឺកូវីដ-១៩ កាលពីថ្ងៃទី០៤ ខែមិថុនា ឆ្នាំ២០២១ ដែលករណីនេះ ជាករណីឆ្លងក្នុងសហគមន៍ ហើយក្រុមការងារពុំទាន់សន្និដ្ឋានកំណត់មុខសញ្ញាពីប្រភពចម្លងនៅឡើយ។ព្រឹត្តិការណ៍សហគមន៍២០កុម្ភៈឆ្នាំ២០២០ មកទល់ពេលនេះមានរយៈពេលជាង១៧ខែហើយ ខេត្តសៀមរាមរកឃើញអ្នកវិជ្ជមាន ២២៩ករណី ព្យាបាលជាសះស្បើយ៨៤ករណី ស្លាប់០២ករណី និងកំពុងព្យាបាល១៤៣នាក់៕
