រដ្ឋមន្ត្រីការបរទេស៖កម្ពុជាសុំទិញវ៉ាក់សាំងកូវីតពីឥណ្ឌា៥លានដូស!
03-April-2024 / សុខភាពនិងកីឡា
ភ្នំពេញ៖ ប្រមុខការទូតជាន់ខ្ពស់កម្ពុជាលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា ពេលជួបសន្ទនាតាមទូរស័ព្ទជាមួយលោកបណ្ឌិត ស៊ូប្រាម៉ានយ៉ាំ ចៃហ្សានកា រដ្ឋមន្ត្រីការបរ ទេសនៃសាធារណរដ្ឋឥណ្ឌានៅល្ងាច ថ្ងៃទី១៨ ខែកុម្ភៈ ឆ្នាំ ២០២១បានស្នោះសុំទិញវ៉ាក់សាំងបង្ការជំងឺកូវីដ-១៩ ចំនួន ៥លានដូស។
។
លោកឧបនាយករដ្ឋមន្ត្រី បានសាទរចំពោះការខិតខំប្រឹងប្រែងរបស់ប្រទេសឥណ្ឌា ដែលបានអភិវឌ្ឍន៍ វ៉ាក់សាំងបង្ការជំងឺកូវីដ-១៩ ចំនួន ២ ប្រភេទ ប្រកបដោយជោគជ័យ និងបានថ្លែងកោតសរសើរកាយវិការមនុស្សធម៌ជាអន្តជាតិរបស់ឥណ្ឌា ចំពោះការបរិច្ចាគ និងលក់វ៉ាក់សាំងបង្ការជំងឺកូវីដ-១៩ រាប់លានដូសដល់ប្រទេសជាច្រើន។
លោកប្រាក់សុខុនបានថ្លែង អំណរគុណដល់រដ្ឋាភិបាលឥណ្ឌាផងដែរ ដែលបានអនុម័តផ្គត់ផ្គង់វ៉ាក់សាំងបង្ការជំងឺកូវីដ-១៩ ចំនួន ១សែនដូស ដល់កម្ពុជា តាមរយៈវិទ្យាស្ថានសេរ៉ូមនៃប្រទេសឥណ្ឌា ផ្អែកលើកិច្ចសន្យាពាណិជ្ជកម្ម ទោះបីជាមានការប្រកួតប្រជែង និងសំណើជាច្រើនពីប្រទេសដៃគូ និងតម្រូវការក្នុងស្រុកក៏ដោយ។
លោកឧបនាយករដ្ឋមន្ត្រី បានជម្រាបជូនសមភាគីឥណ្ឌាថា កម្ពុជាត្រូវការទិញវ៉ាក់សាំងបង្ការជំងឺកូវីដ-១៩ ចំនួន ៥លានដូស ដោយស្នើសុំឱ្យភាគីឥណ្ឌាផ្គត់ផ្គង់ វ៉ាកសាំងនេះក្នុងដំណាក់កាលដំបូង ចំនួន ១លានដូស។
លោក រដ្ឋមន្ត្រីការបរទេសខ្មែរបានគូសបញ្ជាក់ផងដែរថា សម្តេចតេជោ នាយករដ្ឋមន្ត្រី សម្រេចទិញវ៉ាក់សាំងបង្ការជំងឺកូវីដ-១៩ ពីឥណ្ឌា ដោយសារកម្ពុជា និងឥណ្ឌាមានប្រវត្តិទំនាក់ទំនងយ៉ាងជិតស្និទ្ធ និងម្យ៉ាងទៀតដោយសារប្រជាជនកម្ពុជា ជឿទុកចិត្តលើថ្នាំពេទ្យ និងសេវាសុខភាពរបស់ឥណ្ឌា ដែលមានតម្លៃសមរម្យ និងមានប្រសិទ្ធិភាពខ្ពស់។
រឿងទិញវ៉ាកសាំនេះ លោក ចៃហ្សានកា បានជម្រាបជូន លោកឧបនាយករដ្ឋមន្ត្រី ប្រាក់ សុខុន ថា ដោយសារ សម្តេចតេជោនាយករដ្ឋមន្ត្រី បានដាក់សំណើទៅលោកនាយករដ្ឋមន្ត្រីឥណ្ឌា ណារិនដ្រា ម៉ូឌី ហើយប្រទេសឥណ្ឌាចាត់ទុក សម្តេចតេជោនាយករដ្ឋមន្ត្រី ជាឥស្សរជនដ៏សំខាន់ និងជាថ្នាក់ដឹកនាំដ៏គួរឱ្យគោរព លោក នឹងរាយការណ៍សំណើសុំទិញវ៉ាក់សាំងបង្ការជំងឺកូវីដ-១៩ ចំនួន ៥លានដូស នេះ ជូនលោកនាយករដ្ឋមន្ត្រី ណារិនដ្រា ម៉ូឌី ព្រមទាំងបានសន្យាថា នឹងខិតខំជួយកម្ពុជាឲ្យទទួលបានវ៉ាក់សាំង.។
សូមបញ្ជាកថា៖ឥណ្ឌាក៏បានផ្តល់វ៉ាក់សាំង កូវីដ-១៩ រាប់សែនដូសដល់តំបន់ការីប៊ីន និងប្រទេសក្រីក្រផ្សេងទៀត ដែលជានយោបាយការទូតវ៉ាក់សាំង ប្រកួតប្រជែងជាមួយចិន។ ជាមួយគ្នានេះដែរ ចិនក៏បានផ្តល់វ៉ាក់សាំងដល់បណ្តាប្រទេសក្រីក្រក្នុងតំបន់ផងដែរ។ក្រសួងការបរទេសឥណ្ឌាបានឲ្យដឹងថា ប្រទេសនេះបានផ្តល់វ៉ាក់សាំង ទាំងអស់ដោយអត់គិតថ្លៃដល់ ៤៩ប្រទេសក្នុងតំបន់អាមេរិកឡាទីន ការីប៊ីន ទ្វីបអាស៊ី និងអាហ្វ្រិក ។ មកទល់ពេលនេះ រដ្ឋាភិបាលទីក្រុងញូវដេលីបានផ្តល់ជំនួយវ៉ាក់សាំង ដល់ទៅ២២,៩លានដូស ដែលជាយុទ្ធនាការវ៉ាក់សាំង សម្ពន្ធមិត្ត។
កាលពីថ្ងៃទី ១៨ខែកុម្ភៈ រដ្ឋមន្ត្រីក្រសួងមហាផ្ទៃ Dominica លោកRaquel Pena បានប្រកាសឲ្យដឹងថា ឥណ្ឌាបានផ្តល់ជូនវ៉ាក់សាំងចំនួន ៣ម៉ឺនដូសដល់ប្រទេសនេះបន្ថែមទៀត។ កាលពីដើមខែកុម្ភៈឥណ្ឌាក៏បានផ្តល់វ៉ាក់សាំងចំនួន ៧ម៉ឺនដូសផងដែរ។ ឥណ្ឌាជាប្រទេសដែលផលិតវ៉ាក់សាំងធំបំផុតលើពិភពលោក ហើយពេលនេះឥណ្ឌាកំពុងផលិតវ៉ាក់សាំង របស់ក្រុមហ៊ុនAstraZeneca ។
