ក្រុមអនាធិបតេយ្យមកបោះបង្គោលទន្ទ្រានយកដីពលរដ្ឋ បង្កហិង្សា ហើយប្តឹងម្ចាស់ដីទៀតឮថាមានអ្នកធោមនៅពីក្រោយចាំមើលតុលាការគិតម៉េច?
03-April-2024 / ព័ត៌មានជាតិ
ខេត្តព្រះសីហនុ ៖ កាលពីរសៀលថ្ងៃទី២ ខែធ្នូ ឆ្នាំ ២០២០ វេលាម៉ោង ៣និង ៤៦នាទី មានករណីផ្ទុះហិង្សាមួយប្រាវ ពីរនាក់ប្ដីប្រពន្ធត្រូវបានមេខ្លោង ៤នាក់ ដែលជាជនខិលខូច បានដឹកនាំមនុស្សចំនួនជិត ៣០នាក់ យកបង្គោលរបងមកលួចបោះ នៅលើទីតាំង ដីចំការ និងផ្ទះ របស់ប្រជាពលរដ្ឋ មួយកន្លែងមានទីតាំងស្ថិតនៅ ក្នុងភូមិ ១ ឃុំអូរត្រេះ ស្រុកស្ទឹងហាវ ខេត្តព្រះសីហនុ។
អ្នកភូមិ ដែលកំពុងរស់នៅទីនោះ បានឲ្យដឹងថា៖ មេខ្លោងទាំង ៤នាក់នោះរួមមាន ៖ទី១-ឈ្មោះ មាន កាន, ទី២-ង៉ាន គង់ , ទី៣-សៀន សារ៉ាន,ទី៤-អេង បញ្ញា ទាំង៤នាក់នេះបានដឹកនាំ បក្សពួករបស់ខ្លួន ដែលមានគ្នា ជិត ៣០នាក់ ដឹកបង្គោល ហ៊ុព័ទ្ធ របង នៅលើដីរបស់ប្រជាពលរដ្ឋ ដែលបានកាប់ឆ្ការព្រៃរានដីធ្វើចំការដាំដំណាំ អាស្រ័យផល និងធ្វើផ្ទះសម្បែងតាំងពីឆ្នាំ១៩៩៨ រហូតដល់បច្ចុប្បន្ននេះ។
ជនរងគ្រោះ ឈ្មោះ ខៀវ វណ្ណៈ បានឲ្យដឹងថា៖ មុនពេលកើតហេតុ ផ្ទះរបស់ខ្លួនត្រូវ បានឪពុកក្មេក មកលេង នៅពេលដែលលោកឪពុកក្មេកត្រូវចេញដំណើរត្រឡប់ទៅផ្ទះរបស់គាត់វិញ ចេញមកក្រៅ ឪពុកក្មេករបស់លោក ខៀវ វណ្ណៈ បានឃើញបក្សពួករបស់ឈ្មោះ មាន កាន, ង៉ាន គង់ , -សៀន សារ៉ាន,ឈ្មោះ-អេង បញ្ញា ដែលមានគ្នាប្រហែល ជាជិត ៣០នាក់ បានដឹកបង្គោលរបងឈើចំនួន ១គោយន្ត សំរុកមកធ្វើសកម្មភាពលួចដាំលើដីរបស់ខ្លួន (ខៀវ វណ្ណៈ)។ ឪពុកក្មេករបស់លោក ខៀវ វណ្ណៈ ឃើញសកម្មភាពយ៉ាងដូច្នេះ លោកក៏បានស្រែកហៅកូនប្រសារឈ្មោះ ខៀវ វណ្ណៈ ឲ្យមកមើល ពេលនោះលោកខៀវ វណ្ណៈ និងភរិយា បានមកដល់កន្លែងកើតហេតុ ក៏បានស្រែកសួរទៅក្រុមជនដែលកំពុងតែដាំបង្គោល របង ទាំងនោះ ។ពេលដែលលោក ខៀវ វណ្ណៈ ស្រែកសួរទៅពួកគេ (អ្នកដាំបង្គោល) ស្រាប់តែ ជនម្នាក់ដោះអាវ ដោយ មិនស្គាល់ឈ្មោះ នោះចេញមុខមកឆ្លើយថាមេជាអ្នកឱ្យមកដាំ ។
លោក ខៀវ វណ្ណៈ បានបន្តសំណួរ ទៀតថា៖ តើមេមួយណាជាអ្នកបញ្ជាឱ្យពួកអស់លោកមកដាំបង្គោលរបងនៅលើដីរបស់ខ្ញុំ ? ស្រាប់តែ មិនស្គាល់ឈ្មោះ ដដែល បានលោតមកវ៉ៃលោក ខៀវ វណ្ណៈ និងភរិយាទាំងកម្រោល តែម្តង។ក្រោយពេលបញ្ចប់ការវាយដំគ្នាយ៉ាងខ្លាំងដូច្នេះ លោក ខៀវ វណ្ណៈ បានរាយការណ៍ទៅប្តឹង រដ្ឋបាលស្រុកស្ទឹងហាវ ដើម្បីយកវត្ថុតាង គោយន្ត យកទៅរក្សាទុកនៅ ឯសាលាស្រុកស្ទឹងហាវ។
ក្រោយពីមានពាក្យបណ្ដឹងផ្ទាល់មាត់យ៉ាងដូច្នេះ អភិបាលស្រុកស្ទឹងហាវ លោក ឆាយ សុគន្ធដា បានបញ្ជាកម្លាំងសមត្ថកិច្ចអធិការស្រុកចុះមកធ្វើអន្តរាគមន៍ភ្លាមៗ រួចបាននាំយកវត្ថុតាងមានគោយន្ត ១គ្រឿង និង រណាយន្ត ១មួយគ្រឿង រួមនិង បង្កោលរបងរបស់ជនខិលខូចទាំងនោះយកទៅរក្សាទុកនៅ បរិវេណសាលាស្រុក ដើម្បីធ្វើការសម្របសម្រួលដោះស្រាយបញ្ចប់រឿង។
ទោះជាយ៉ាងនេះក្តី លោក ខៀវ វណ្ណៈ និងប្រពន្ធរបស់ខ្លួន ធ្វើការអំពាវនាវសូមឲ្យអាជ្ញាធរគ្រប់លំដាប់ ថ្នាក់ជាពិសេសគឺស្ថាប័នតុលាការ មេត្តាជួយរកយុត្តិធម៌ជូនពួកគាត់ផង ព្រោះពួកគាត់ត្រូវបានជនបង្ក កែនបក្សពួកមកវាយធ្វើបាបលោក (ខៀវ វណ្ណ:) និងប្រពន្ធរបស់លោក ហើយជនបង្កប្ដឹងលោក និងប្រពន្ធរបស់លោកថា ជាអ្នកប្រើប្រើហិង្សាទៅវិញ។ម្យ៉ាងវិញទៀត ពួកជនបង្កយកគោយន្តមួយគ្រឿងដឹក បង្គោលរបងឈើមកបោះនៅលើដី ដែលជាសកម្មភាពរដ្ឋរបស់លោក ខៀវ វណ្ណៈ នៅពេលដែលលោក ខៀវ វណ្ណៈ រាយការណ៍ទៅសមត្ថកិច្ចដើម្បីនាំយកវត្ថុតាងគោយន្ដទៅរក្សាទុកនៅឯណាសាលាស្រុក បែរជាក្រុមជនបង្ក និងបក្សពួកដាក់ពាក្យបណ្ដឹងថា លោក ខៀវ វណ្ណៈ ជាអ្នកបង្ខាំងទុកគោយន្តរបស់ពួកគេទៅវិញ។
ជុំវិញរឿងនេះដែរ អភិបាលស្រុកស្ទឹងហាវ លោក ឆាយ សុគន្ធដា បានមានប្រសាសន៍ឲ្យដឹងថា ៖ បញ្ហាដីទំនាស់ ដែលនៅកន្លែងកើតហេតុនេះ កន្លងមកមានប្រជាពលរដ្ឋចំនួន ២២ គ្រួសារ បានមកកាប់ឆ្ការទន្ទ្រានព្រៃយកដីធ្វើចំការច្បារដំណាំ អាស្រ័យផល និងសង់ផ្ទះសម្បែង នៅទីនេះយូរណាស់មកហើយ។ លោកថា ប្រជាពលរដ្ឋទាំងនេះធ្លាប់បានរដ្ឋបាលព្រៃឈើខេត្តព្រះសីហនុ ដាក់ពាក្យបណ្ដឹងទៅតុលាការ ពីបទកាប់រានទន្ទ្រានព្រៃរបស់រដ្ឋយកធ្វើជាកម្មសិទ្ធិផងដែរ។ ប៉ុន្តែក្រោយមក នៅថ្ងៃទី៤ ខែ កក្កដា ឆ្នាំ២០១៦ ត្រូវបានសាលាដំបូងខេត្តព្រះសីហនុ កាត់ក្តីឲ្យប្រជាពលរដ្ឋទាំង២២គ្រួសារនេះ ឈ្នះ ហើយរដ្ឋបាលខេត្តធ្លាប់បានបង្កើតគណៈកម្មការ ខេត្តចុះទៅវាស់វែង កាត់ឆ្វៀលដីដែលពលរដ្ឋរស់នៅសព្វថ្ងៃនេះជូនពលរដ្ឋរស់នៅដោយស្របច្បាប់។
លោក ឆាយ សុគន្ធដា បានបន្តថា៖ ក្រោយមកស្រាប់តែមានឈ្មោះ ប៉ែន រ៉ានី និង ឈ្មោះ អ៊ីវ សុខខេង បានកាន់ឯកសារដើរមកចង្អុល ហើយអះអាងថា៖ ខ្លួន និងបក្សពួកមានដីទំហំ ២០ហិកតា នៅទីនេះ ។ ឮយ៉ាងដូច្នេះរដ្ឋបាលស្រុកស្ទឹងហាវបានបង្កើតគណៈកម្មការចុះមកធ្វើការវាស់វែង ដើម្បីរកទីតាំងដី ដែលបុគ្គលរូបនេះថា មានដីនៅទីនេះដែរ តែដល់ ក្រុមការងារចុះវាស់វែង ទៅគឺមានដីទំហំតែ១១ហិកតា ប៉ុណ្ណោះទេ ហើយទំហំដីនេះគឺមិនពាក់ព័ន្ធជា មួយ នឹងដីដែលមានទំនាស់នោះដែរ។ ចំណែកឯជនបង្កកែនបក្ខពួកមកបោះរបងនៅលើដីកម្មសិទ្ធិរបស់ប្រជាពលរដ្ឋស្របច្បាប់នៅទីនោះ ក៏មិនត្រូវដែរ ។
លោក ឆាយ សុគន្ធដា បន្តទៀតថា ៖ ក្នុងពេលថ្មីៗនេះ សមាជិកក្រុមការងារមកពីរដ្ឋសភា បានលើកយកបញ្ហានេះយកមកសម្របសម្រួល និងដោះស្រាយឲ្យដែរ ។ ប៉ុន្តែលទ្ធផលមិនទាន់បានចេញជាផ្លែផ្កានោះទេ លុះដល់ចុងខែកុម្ភៈ ឆ្នាំ ២០២១ នេះ ទើបក្រុមការងាររដ្ឋបាលស្រុកបង្កើតគណៈកម្មការចុះទៅពិនិត្យមើលដីដែលមានទំនាស់នេះសាជាថ្មីម្ដងទៀត។យ៉ាងដូច្នេះ វាមិនត្រឹមត្រូវទេ ម្យ៉ាងវិញទៀត ពួកជនខិលខូចទាំងនេះ លួចបោះរបងនៅលើដីគេហើយថែមទាំងវ៉ៃម្ចាស់ដី និងថែមទាំងដាក់ពាក្យបណ្ដឹងប្ដឹងជនរងគ្រោះជាម្ចាស់ដី ទៅសាលាដំបូងខេត្តព្រះសីហនុ ទៀតផង។
នៅក្នុងរឿងនេះដែរមាន ប្រភពព័ត៌មានដែលបានផ្ដល់ឱ្យដោយបុរសម្នាក់ ក្នុងចំណោមបក្សពួកជិត ៣០ នាក់ដោយ ស្នើ សុំមិនបញ្ចេញឈ្មោះ និងអត្តសញ្ញាណបានឲ្យដឹងថា៖ ព្រឹត្តិការណ៍ ដែលបានកើតឡើងនេះ ត្រូវបានអ្នកមានលុយនិងមានអំណាចម្នាក់ ជាអ្នកនៅពីក្រោយ ហើយជាអ្នកបញ្ជាឲ្យបង្កើតនូវព្រឹត្តិការណ៍ទាំងនេះឡើង បើមានរឿងអ្វី ខ្លួនគេជាអ្នករត់ការធ្វើអន្តរាគមន៍ មិនឱ្យជនបង្កទាំង ៤នាក់នោះមានរឿងហេតុអ្វីកើតឡើងឡើយ ព្រោះខ្លួនជាអ្នកមានទ្រព្យធនសន្ធឹកសន្ធាប់ហើយមានបុណ្យស័ក្តិ មានឋានៈខ្ពង់ខ្ពស់ទៀតផង។
ករណីយ៍នេះ ប្រជាពលរដ្ឋរស់នៅស្រុកស្ទឹងហាវ ជាច្រើនរយនាក់ កំពុងតែតាមដានមើលចំណាត់ការរបស់តុលាការ ទៅលើជនខិលខូចដែលបង្កឲ្យមានចលាចលដើរលួចបោះបង្គោលលើដីស្របច្បាប់របស់ពលរដ្ឋស្លូតត្រង់ ហើយ បានវាយមកលើពលរដ្ឋដែលជាម្ចាស់ដីទាំងនោះទៀត ដោយចោទថា ជាអ្នកប្រើអំពើហិង្សា ទៅវិញ ៕
