វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 717 នាក់
ម្សិលមិញ 3717 នាក់
សរុប 14149050 នាក់
ភ្នំពេញ៖ ការដ្ឋានស្ថាបនាមហាវិថីថ្មីមួយខ្សែដែល មានទទឹង៣០ម៉ែត្រ និងបណ្តោយផ្លូវជាង៥គីឡូម៉ែត្រដោយចាប់ពីផ្លូវលេខ១០០៣ ផ្លូវបត់ចូលផ្សារទំនើបអេអន ម៉លសែនសុខ ស្របប្រឡាយមេខាងជើងរាជធានីភ្នំពេញ រហូតដល់មហាវិថី ឈ្នះឈ្នះ ក្នុងខណ្ឌ ឫស្សីកែវបានដំណើរបើកការដ្ឋានហើយ នាព្រឹកថ្ងៃទី០៧ ខែកញ្ញា ឆ្នាំ២០២០ នៅលើបណ្តោយផ្លូវនេះ ក្នុងសង្កាត់ស្វាយប៉ាក ខណ្ឌឬស្សីកែវ ក្រោមវត្តមានលោក ឃួង ស្រេង អភិបាលរាជធានីភ្នំពេញនិងមានការចូលរួមពីប្រជាពលរដ្ឋជាច្រើននាក់ដែរ។
មហាវិថីថ្មីនេះ ជាប្រភេទផ្លូវភ្លោះ មានប្រវែង ៥៨៦០ម៉ែត្រ ទទឹង ៣០ម៉ែត្រ ជាផ្លូវបេតុងអារមេរ កម្រាស់ ២០សង់ទីម៉ែត្រ ដែលមានផ្លូវសងខាងចំនួន ១២ម៉ែត្រ សួនកណ្តាល២ម៉ែត្របំពាក់ដោយបង្គោលភ្លើងបំភ្លឺផ្លូវព្រែកជាពីរ និងចិញ្ចើមផ្លូវសងខាង ២ម៉ែត្រ ផ្លូវទ្វេរទិស មាន ៣គន្លងសម្រាប់រថយន្តទៅមក និង១គន្លងសម្រាប់ទោចក្រយានយន្តទៅមក។ ដាក់បណ្តាញលូសងខាងផ្លូវទំហំ ០.៨ម៉ែត្រ ប្រវែង ១១៧២០ម៉ែត្រ និងដាក់លូឆ្លងកាត់ទទឹងផ្លូវ ចំនួន៨ កន្លែង មានការដាំដើមជ្រៃ ដាំស្មៅ ជាមួយនឹងការរៀបការឺឡា រៀបខឿនចិញ្ចើមផ្លូវសងខាង តម្លើងភ្លើងស្តុបចរាចរចំនួន ៤កន្លែង លាបគំនូសចរាចរ និងតម្លើងស្លាកសញ្ញាចរាចរផងដែរ។
លោក ឃួង ស្រេង មានប្រសាសន៍ថា ក្រោមការដឹកនាំរបស់សម្តេចតេជោហ៊ុន សែនបានធ្វើអោយប្រទេសជាតិ មានសន្តិភាពពេញលេញ មានឱកាសក្នុងការអភិវឌ្ឍប្រទេសជាតិអោយរីកចំរើនយ៉ាងឆាប់រហ័ស ។ជាក់ស្តែងកំណាត់ផ្លូវយើងបានស្ថាបនាឡើងជាផ្លូវថ្មី ដែលមានបណ្តោយរហូតជាង៥គីឡូម៉ែត្រ និងមានទទឹង៣០ម៉ែត្រ អាចកាត់បន្ថយការកកស្ទះចរាចរនៅតំបន់ភាគខាងជើងរាជធានីភ្នំពេញ ស្របប្រឡាយមេខាងជើងរាជធានីភ្នំពេញ ចាប់ពីផ្លូវលេខ ១០០៣ (ផ្លូវបត់ចូលផ្សារទំនើបអេអន ម៉ល សែនសុខ) ដល់មហាវិថី ឈ្នះឈ្នះ ក្នុងខណ្ឌឫស្សីកែវ។
លោក ឃួង ស្រេង ក៏បានបញ្ជាក់ថា កំណាត់ផ្លូវនេះ ស្ថាបនាដោយក្រុមហ៊ុនឯកជន តែស្ថិតក្រោមការត្រួតពិនិត្យបច្ចេកទេសពីមន្ទីរសាធារណការនិងដឹកជញ្ជូនរាជធានីភ្នំពេញ។លោកឃួង ស្រេងក៏បានស្នើសុំអោយប្រជាពលរដ្ឋចូលរួមសហការនិងយោគ យល់ចំពោះផលប៉ះពាល់និងការរំខានពីការដ្ឋាននេះ។