វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1883 នាក់
ម្សិលមិញ 10264 នាក់
សរុប 14141065 នាក់
ភ្នំពេញ៖អគារសាលាយុត្តិធម៌ថ្មីមួយ មានកម្ពស់៧ជាន់ និងមានផ្ទៃក្រឡាសរុបជិត២ម៉ឺនម៉ែត្រការ៉េ លើផ្ទៃដីទំហំជាង៩,៤ពាន់ម៉ែត្រការ៉េ ស្ថិតក្នុងតំបន់អភិវឌ្ឍន៍ OICC នៅសង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញនឹងត្រូវកសាងថ្មីដោយក្រុមហ៊ុន លី ឈួង សំណង់ & អាហរ័ណ-នីហរ័ណជាថ្នូរនិងទីតាំងអគារសាលាដំបូងរាជធានីភ្នំពេញបូកនិងលុយ៣លានដុល្លារអាមេរិកទៀត។
ការសម្រេចដូរសាលាដំបូងរាជធានីភ្នំពេញ-អយ្យការអមសាលាដំបូងរាជធានីភ្នំពេញ និងសាលាឧទ្ធរណ៍ភ្នំពេញ-មហាអយ្យការអមសាលាឧទ្ធរណ៍ភ្នំពេញ ទៅទីតាំងថ្មីនៅឯសង្កាត់ព្រែកលៀប(OCIC) គឺធ្វើឡើងតាមរយៈសេចក្តីជូនដំណឹង (សជណ) របស់ទីស្តីការគណៈរដ្ឋមន្ត្រី នៅថ្ងៃទី៣១ ខែសីហា ឆ្នាំ២០២០ ជូនទៅលោក អូន ព័ន្ធមុន្នីរ័ត្ន រដ្ឋមន្ត្រីក្រសួងសេដ្ឋកិច្ច លោក ជា សុផារ៉ា រដ្ឋមន្ត្រីក្រសួងរៀបចំដែនដី និង លោក កើត រិទ្ធ រដ្ឋមន្ត្រីក្រសួងយុត្តិធម៌។
សជណ បង្ហាញថា ដី សម្រាប់សាងសង់អគារសាលាយុត្តិធម៌ថ្មីនេះ គឺជាដីរបស់រដ្ឋ ដែលមានទំហំជាង៩,៤ពាន់ម៉ែត្រការ៉េ។ ក្រុមហ៊ុន លី ឈួង ចំណាយលើការសាងសង់អគារសាលាយុត្តិធម៌ ហើយនឹងទទួលបានទីតាំងចាស់នៃសាលាដំបូងរាជធានីភ្នំពេញ-អយ្យការអមសាលាដំបូងរាជធានីភ្នំពេញ ដែលមានផ្ទៃដីជាង១,៧ពាន់ម៉ែត្រការ៉េ ស្ថិតនៅទាល់មុខពហុកីឡដ្ឋានជាតិអូឡាំពិក តាមបណ្តោយផ្លូវលេខ២១៧ សង្កាត់វាលវង់ ខណ្ឌ៧មករា រាជធានីភ្នំពេញហើយរាជរដ្ឋាភិបាលថែមឲ្យ៣លានដុល្លារអាមេរិកទៀត។«ដោះដូរទីតាំងសាលាដំបូងរាជធានីភ្នំពេញនិងអយ្យការអមសាលាដំបូងរាជធានីភ្នំពេញ...ជាថ្នូរនឹងការសាងសង់សាលាយុត្តិធម៌ថ្មី...»។
សជណ បានឲ្យដឹងទៀតថា ទីតាំងចាស់នៃសាលាឧទ្ធរណ៍ភ្នំពេញ ដែលស្ថិតក្នុងបរិវេណក្រសួងយុត្តិធម៌ នៅមុខប៉ែកខាងត្បូងនៃព្រះបរមរាជវាំង សង្កាត់ចតុមុខ ខណ្ឌដូនពេញ រាជធានីភ្នំពេញ ត្រូវប្រគល់ឲ្យក្រសួងយុត្តិធម៌ នៅពេលណា សាលាយុត្តិធម៌ថ្មី ត្រូវបានកសាងរួច ហើយសាលាឧទ្ធរណ៍ ត្រូវរើទៅសាលាយុត្តិធម៌ថ្មីនោះ។
សជណបញ្ជាក់ថា រដ្ឋាភិបាល ផ្តល់ថវិកា៣លានដុល្លារ សម្រាប់ចំណាយលើការបំពាក់សម្ភារបរិក្ខានិងគ្រឿងសង្ហារឹម ក្នុងសាលាយុត្តិធម៌ថ្មី។ សជណ បន្ថែមថា ថវិកានេះ រដ្ឋាភិបាល នឹងទូទាត់ជូនក្រុមហ៊ុន លី ឈួង នៅពេលការសាងសង់អគារសាលាយុត្តិធម៌ រួមទាំងការបំពាក់សម្ភារបរិក្ខារ និង គ្រឿងសង្ហារឹម បានបញ្ចប់ជាស្ថាពរ។
យ៉ាងណា គេ មិនទាន់ដឹងថា សាលាយុត្តិធម៌ថ្មីនៅព្រែកលៀប នឹងត្រូវសាងសង់រួចនៅពេលណាឡើយ។ គេ ក៏មិនទាន់ដឹងដែរថា សាលាដំបូងរាជធានីភ្នំពេញ-អយ្យការអមសាលាដំបូងរាជធានីភ្នំពេញ និងសាលាឧទ្ធរណ៍ភ្នំពេញ-មហាអយ្យការអមសាលាឧទ្ធរណ៍ភ្នំពេញ នឹងត្រូវរើទៅសាលាយុត្តិធម៌ថ្មីនៅពេលណា។
កម្ពុជា មានសាលាឧទ្ធរណ៍៤តំបន់ហើយ គឺសាលាឧទ្ធរណ៍ភ្នំពេញ សាលាឧទ្ធរណ៍តំបន់ព្រះសីហនុ សាលាឧទ្ធរណ៍តំបន់បាត់ដំបង និង សាលាឧទ្ធរណ៍តំបន់ត្បូងឃ្មុំ។