វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 3088 នាក់
ម្សិលមិញ 10264 នាក់
សរុប 14142270 នាក់
ភ្នំពេញ៖ក្រសួងមហាផ្ទៃបានចេញសេចក្តីជូនដំណឹងមួយឲ្យដឹងថាដោយមានធុរៈផ្ទាល់ខ្លួននិងបានទទួលការអនុញ្ញាតដ៏ខ្ពង់ខ្ពស់ពី សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា សម្ដេចក្រឡាហោមសខេងឧបនាយករដ្ឋមន្តីរដ្ឋមន្ត្រីក្រសួងមហាផ្ទៃបានអញ្ជើញធ្វើដំណើរទៅកាន់សាធារណរដ្ឋបារាំង ចាប់ពីថ្ងៃទី ២២ ខែ សីហា រហូតដល់ថ្ងៃទី ០៥ ខែកញ្ញា ឆ្នាំ២០២១ ។
ដោយសារសម្តេចក្រឡាហោមសខេងជាអនុប្រធានគណបក្សនិងជាបេក្ខចននាយករដ្ឋមន្ត្រីស្តីទីពេលអវត្តមាននាយករដ្ឋមន្ត្រីការចាកចេញពីប្រទេសទៅកាន់ប្រទេសនៅសហគមន៍អ៉ឺរ៉ុបលើកនេះបង្កឲ្យមានការចាប់អារម្មណ៍និងវិភាគខុសគ្នាទាក់ទងនិងរឿងនយោបាយក្នុងស្រុក។បើតាមសារព័ត៌មាន VOD ក៏ដូចជាវិទ្យុអាស៊ីសេរីជាដើមបានផ្សព្វផ្សាយថា ក្រុមលោក សម រង្ស៉ី មានបំណងជួបជាមួយ សម្តេចក្រឡាហោម ស ខេង អំឡុងពេលសម្តេចមានវត្តមាននៅប្រទេសបារាំង ដើម្បីរកដំណោះស្រាយនយោបាយសម្រាប់ពួកគេ ហើយថាពួកគេស្វាគមន៍បើសិនជាសម្តេចក្រឡាហោម បើកភ្លើងខៀវឱ្យមានជំនួបក្រៅផ្លូវការណាមួយ។
តែរឿងនេះអ្នកនាំពាក្យក្រសួងមហាផ្ទៃលោក ខៀវ សុភ័ក បានបដិសេធភ្លាមៗនិង បានបញ្ជាក់ជាថ្មីថា ការធ្វើដំណើរទៅកាន់ប្រទេសបារាំង របស់លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ គឺដោយសារធុរៈផ្ទាល់ខ្លួន ហើយគ្មានកម្មវិធីផ្សេងក្រៅពីនេះឡើយ។ឯលោក កែវ រ៉េមី រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានគណៈកម្មាធិការសិទ្ធិមនុស្សកម្ពុជា នៅថ្ងៃទី២៤ ខែសីហា ឆ្នាំ២០២១នេះ បានស្នើដល់ក្រុមអ្នកនយោបាយ និងអ្នកវិភាគមួយចំនួន កុំឱ្យលាបពណ៌ និងព្យាយាមកេងចំណេញពីដំណើរឯកជនរបស់ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ទៅកាន់ប្រទេសបារាំង លើកនេះផងដែរ។
លោក កែវ រ៉េមី បានគូសបញ្ជាក់បន្ថែមទៀតថា៖ «ខ្ញុំសង្កេតឃើញ ឥរិយាបទ អត្តចរិក សម្តេចក្រឡាហោម លោកជាមនុស្សម្នាក់ ដែលមិនចូលចិត្តនិយាយច្រើនទេ អញ្ចឹងការដែលគាត់មិនចូលចិត្តនិយាយច្រើន ខ្ញុំតាមដានប្រព័ន្ធ Online ឃើញមានការមួលបង្កាច់ ហើយលាបពណ៌គាត់ច្រើនណាស់...! ហើយនយោបាយលាបពណ៌នេះ ជានយោបាយគ្រោះថ្នាក់បំផុត ដែលខ្មែរយើងពីអតីតកាល យើងគួរគប្បីរៀនសូត្រ ដែលយើងវិនាសអន្តរាយប្រជាជនខ្មែរស្លាប់អស់ជាង ៣លាននាក់ ក្នុងសម័យ ប៉ុល ពត គឺដោយសារការលាបពណ៌នេះឯង»។
ប្រធានគណៈកម្មាធិការសិទ្ធិមនុស្សកម្ពុជារូបនេះ ក៏បានរំឮកឡើងវិញថា កាលនៅក្នុងរបបដឹកនាំដោយក្រុមខ្មែរក្រហម គឺអ្នកនយោបាយបានលាបពណ៌ទៅលើមនុស្សផ្សេងទៀតដែលគេសង្ស័យ ឬមិនពេញចិត្តថាជា CIA របស់អាមេរិកាំង, KGB របស់រុស្ស៉ី ជាអ្នកយកការណ៍ ឬចារកម្មរបស់វៀតណាមជាដើម។ល។ ការលាបពណ៌នេះហើយ គឺបានសម្លាប់ខ្មែរគ្នាឯងយ៉ាងច្រើនផងដែរ។«នយោបាយលាភពណ៌ គឺបានធ្វើឱ្យអន្តរាយដល់ប្រទេសជាតិ យើងបានឆ្លងកាត់បទពិសោធន៍ដ៏មហាអាក្រក់ នៅក្នុងសម័យ១៩៧៥ ដល់១៩៧៩ នៃរបបអាវខ្មៅ អញ្ចឹងខ្ញុំគ្រាន់តែជម្រាបជូនថាយើងគួរកែទម្លាប់ ហើយកុំឱ្យបទពិសោធន៍ អាក្រក់នៃអតីតកាលហ្នឹងវាត្រឡប់មកវិញ ហើយគួរគប្បីធ្វើនយោបាយដោយសុច្ចរិត យុត្តិធម៌ សេចក្តីថ្លៃថ្នូរ ការវិភាគក៏វិភាគទៅតាមហេតុផល ទៅតាមអ្វីដែលខ្លួនមើលឃើញនៅក្នុងកម្រិតមួយដែលជៀសវាងការវិភាគចេះតែប៉ាតណាប៉ាតណី ឱ្យបានតែនិយាយ អាហ្នឹងដល់ពេលគេមើលមកវាបាត់តម្លៃនៃការវិភាគ ឬសំណេររបស់ខ្លួន»។ នេះជាការគូសបញ្ជាក់បន្ថែមរបស់លោក កែវ រ៉េមី។