សម្តេចតេជោនិទស្សន៍ថានៅឆ្នាំក្រោយ ការនាំអង្ករអាចបាន ១លានតោន
11-February-2026 / សេដ្ឋកិច្ច
តាកែវ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងថា ការនាំអង្ករឱ្យបាន១ លានតោន អាចនឹងសម្រេចបាន នៅឆ្នាំ ២០២១ ឬឆ្នាំ ២០២២ ។
នៅក្នុងពេលដែលសម្តេចអញ្ជើញទស្សនា បង្ហាញទំនើបកម្មផលិតកម្មដំណាំស្រូវ និងសំណេះសំណាលជាមួយប្រជាកសិករ នៅស្រុកព្រៃកប្បាស ខេត្តតាកែវ នៅព្រឹកថ្ងៃទី ២១ ខែកក្កដា ឆ្នាម ២០២០ប្រមុខដឹកនាំរដ្ឋាភិបាលកម្ពុជា ថាបច្ចុប្បន្នរាជរដ្ឋាភិបាលកម្ពុជា ខិតខំជម្រុញការវិនិយោគ ដោយធ្វើឃ្លាំងស្តុក ធ្វើម៉ាស៊ីនកិនស្រូវ ធ្វើឡសម្ងួត ដើម្បីលើកទឹកចិត្តឱ្យតម្លៃបន្ថែមនៅក្នុងប្រទេស។
បច្ចុប្បនរាជរដ្ឋាភិបាល បានបើកផ្លូវឱ្យក្រុមហ៊ុនមកពីក្រៅប្រទេសដោយផ្តល់ឱកាស ឱ្យក្រុមហ៊ុនវិនិយោគ។ បើធ្វើដូច្នេះបានតម្លៃស្រូវ អាចធាបានល្អ ដោយយើងមានម្ចាស់ការច្រើន។សម្តេចតេជោ ថ្លែងទៀតថា ការនៅសល់ស្រូវ និងអង្ករនៅកម្ពុជា ដោយសារតែល្បឿននៃការជម្រុញការផលិតស្រូវ ដើរលឿនហួសពីការកែច្នៃ និងការនាំចេញ។ ម្យ៉ាងទៀត ការនាំចេញ ត្រូវសម្រិតសំរាង គុណភាព មិនធ្វើឱ្យរួចពីដៃនោះទេ។
សម្តេចតេជោ បន្តថាបច្ចុប្ប នៅកម្ពុជា មានសក្តានុពលដែលកំពុងបញ្ចេញ និងសក្តានុពលដែលនឹងបន្តបញ្ចេញ ដោយរាជរដ្ឋាភិបាល ប្តូរទិសដោយផ្ទេរពីការអភិវឌ្ឍតាមបែបបើកទូលាយ ទៅជាកាអភិវឌ្ឍតាមបែបស៊ីជម្រៅ មានន័យថា យើងត្រូវពង្រីកសមត្ថភាពចិញ្ចឹមលើផ្ទៃដីដែលមានសម្រាប់ ដែលសម្តេចអះអាងថា សម្តេចធ្លាប់ធ្វើនៅតំបន់ក្រាំងយ៉ូវ តាំងពីមុនឆ្នាំ ២០០០។សម្តេចលើកឧទាហរណ៍ថា«ពីដើមដី១ហិចតាយើងចិញ្ចឹមបានមនុស្ស ៥ នាក់ ប៉ុន្តែឥលូវយើងត្រូវធ្វើដី ១ ហិចតា អោយចិញ្ចឹមមនុស្សបានច្រើនជាងមុន ១០ ទៅ ២០ ឬ ៣០ នាក់ ដោយត្រូវវិនិយោគជាកញ្ចប់ដើម្បីបម្រើឱ្យវិស័យកសិកម្ម មានប្រព័ន្ធធារាស្ត្រ ម៉ាស៊ីនកិនស្រូវ អគ្គិសនីសម្រាប់បម្រើឱ្យការចិញ្ចឹម»។
សម្ដេចតេជោ ហ៊ុន សែន បានមានប្រសាសន៍យ៉ាងដូច្នេះថា «យើងស្ថិតក្នុងស្ថានភាពមានមាសតែខ្វះក្រដាសខ្ចប់។ នេះជាចំណុចដែលយើងកំពុងប្រឹង [...]។ ខ្ញុំទទួលស្គាល់នូវកំហុសទៅចុះ នៅពេលដែលគេងតិះដៀលចំពោះខ្ញុំ យើងផលិតបានស្រូវ ប៉ុន្ដែទីចុងបំផុតទីផ្សារយើងនៅឯណា។ ងាកមកខ្លួនឯងខ្វះម៉ាស៉ីនកិនស្រូវ ខ្វះឃ្លាំងស្ដុកស្រូវ ខ្វះអ្នកប្រមូលទិញ ចឹងនាំចេញខ្លួនឯងបានប្រហែលកន្លះលានតោនប៉ុណ្ណោះនាពេលកន្លងទៅ»។នាយករដ្ឋមន្ដ្រីកម្ពុជា បានឲ្យដឹងថា កម្ពុជាយកទុន ៤០០លានដុល្លារ ពីប្រទេសចិន ដើម្បីសាងសង់កន្លែងស្តុកស្រូវនៅតាមខេត្ត ខណៈបច្ចុប្បន្ននេះ ទិន្នផលស្រូវបានដើរលើសលទ្ធភាពកែច្នៃក្នុងការនាំចេញ។
ប្រមុខនៃរាជរដ្ឋាភិបាលកម្ពុជា ក៏បានណែនាំឲ្យមន្ដ្រីជំនាញ ត្រូវបង្កើនការអភិវឌ្ឍប្រព័ន្ធធារាសាស្ដ្របន្ថែមទៀត ដើម្បីបំពេញតម្រូវការរបស់ប្រជាកសិករ ពោលត្រូវយកស្រុកព្រៃកប្បាស ខេត្តតាកែវ ជាគំរូ ក្នុងការកសាងប្រព័ន្ធធារាសាស្ដ្រនេះនៅតាមតំបន់កសិកម្មផ្សេងៗទៀត។តាមតួលេខដែលបង្ហាញដោយក្រសួងកសិកម្ម កម្ពុជាបាននាំចេញអង្ករបាន ៦២ម៉ឺនតោន (តួលេខផ្លូវការ) ខណៈការនាំចេញស្រូវក្រៅផ្លូវការ នៅឆ្នាំ២០១៩ ទៅកាន់ប្រទេសវៀតណាម ចំនួនជាង ២លានតោន តាមខេត្តជាប់ព្រំដែនដូចជា តាកែវ ព្រៃវែង ស្វាយរៀង កណ្តាល និងកំពត។ដោយឡែក រយៈពេល៦ខែ ឆ្នាំ២០២០នេះ ស្រូវប្រមាណ ១លានតោន ត្រូវបាននាំចេញកំពត តាកែវ កណ្តាល ព្រៃវែង និងស្វាយរៀង ទៅប្រទេសវៀតណាម។ រីឯអង្ករជាង ៤០ម៉ឺនតោន ត្រូវបាននាំទៅកាន់ប្រទេសទីផ្សារគោលដៅប្រមាណ ៥៦ប្រទេស៕
