វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 3252 នាក់
ម្សិលមិញ 10264 នាក់
សរុប 14142434 នាក់
អាមេរិ៖កាលពីថ្ងៃទី២២ ខែមករា ( អាមេរិក) ព្រឹទ្ធសភាអាមេរិកបានចាប់ផ្តើមដំណើរការ ជជែកដេញដោលគ្នា គឺខាងបក្សប្រជាធិបតេយ្យជា ដើមបណ្តឹង និងគណបក្សសាធារណរដ្ឋការពារ ជុំវិញការចោទប្រកាន់ទោស ទៅលើប្រធានាធិបតីដូណាល់ ត្រាំ ។ការជជែកដេញដោលថ្ងៃដំបូង ធ្វើឡើងរហូតដល់ទៅ១៣ម៉ោង ខាងគណបក្ស សាធារណរដ្ឋ ដែលមានសំឡេងភាគច្រើននៅក្នុងព្រឹទ្ធសភាមានប្រៀប ។
ព្រឹទ្ធសភាអាមេរិក បានបោះឆ្នោត ជ្រើសរើសយកនីតិវិធីជំនុំជំរះ បែបឆាប់រហ័ស ដោយមិនបន្លាយពេលយូរ ដើម្បីឈានទៅបោះឆ្នោតសម្រេចចុងក្រោយ ថាតើលោកដូណាល់ ត្រាំ ពិតជាបានធ្វើបំពានអំណាច ហើយសក្តិសមនឹងត្រូវទំលាក់ពីតំណែង ដែរឬទេ ។ នីតិវិធីបែបរហ័សនេះ អ្នកវិភាគជឿថា ព្រឹទ្ធសភាអាមេរិក នឹងប្រហែលជាមិនកោះហៅសាក្សី ឲ្យចូលបំភ្លឺឡើយ ។
លោកមិចម៉ាខលណែល( Mitch McConnel )ប្រធានក្រុមសមាជិកព្រឹទ្ធសភាបក្សសាធារណរដ្ឋ ដែលមានសម្លេងភាគច្រើន បានលើកឡើងថា លោកចង់យកគម្រូនីតិវិធី ដែលធ្លាប់អនុវត្ត ទៅលើករណីបណ្តឹងទំលាក់លោក ប៊ីល គ្លីនតុន ។ ពោលគឺ ភាគីដើមចោទ និងភាគីចុងចោទ មានថេរៈវេលាចំនួនស្មើគ្នា គឺចំនួន២៤ម៉ោង ដើម្បីនិយាយ ធ្វើអំណះអំណាងនៅចំពោះមុខអង្គព្រឹទ្ធិសភា ។ រយៈពេល២៤ម៉ោងនេះ ត្រូវធ្វើក្នុងកំឡុងពេល មិនឲ្យលើសពី៣ថ្ងៃ ។
ភាគីដើមចោទ(គណបក្សប្រជាធិបតេយ្យ) បានចោទប្រកាន់លោកដូណាល់ ត្រាំ លើ២ចំណុច ។
ទីមួយ គេចោទថាលោកដូណាល់ ត្រាំបានបំពានអំណាច ដោយបានដាក់សំពាធ គំរាមប្រធានាធិបតីអ៊ុយក្រែន ឲ្យធ្វើការស៊ើបអង្កេត រករឿងលើកូនប្រុសលោក Joe Biden ដែលរកស៊ីនៅអ៊ុយក្រែន ពុំនោះទេអាមេរិកនឹងដកជំនួយយោធាពីអ៊ុយក្រែន ។ ការចោទប្រកាន់ទីពីរ គឺគេចោទថាលោកដូណាល់ ត្រាំ បានព្យាយាមលាក់ការពិត និងបានរារាំង ការស៊ើបអង្កេត ដែលសភាតំណាងអាមេរិក បានសម្រេច ។
ក្នុងសវនាការនេះក្រុមដើមចោទ មានសមាជិកសភាតំណាង មកពីបក្សប្រជាធិបតេយ្យចំនួន៧រូប មានលោក Adam Schiff ជាប្រធានក្រុម នឹងត្រូវធ្វើបទបង្ហាញអំណះអំណាងដាក់បន្ទុក ទៅលើលោកដូណាល់ ត្រាំ នៅចំពោះមុខអង្គព្រឹទ្ធសភា នៅថ្ងៃពុធនេះ ចាប់ពីម៉ោង១រសៀលទៅ ម៉ោងនៅទីក្រុងវ៉ាស៊ីនតោន ។ ចំណែកភាគីចុងចោទវិញ គឺតំណាងដោយ ក្រុមមេធាវីផ្ទាល់ខ្លួនរបស់លោកដូណាល់ ត្រាំ ដឹកនាំដោយលោក Pat Cipollone ទីប្រឹក្សាច្បាប់នៅសេតវិមាន ដែលនឹងមានពេល២៤ម៉ោងដែរ ដើម្បីឆ្លើយតបទៅនឹងការចោទប្រកាន់ ។
បន្ទាប់មកទៀត ក្រុមសមាជិកព្រឹទ្ធសភា មានពេល១៦ម៉ោង ដើម្បីរៀបចំជាសំណួរ សរសេរជាលាយលក្ខណ៍អក្សរ សម្រាប់សុំឲ្យភាគីទាំងសងខាង ឆ្លើយលំអិត ។ សំណួរទាំងនោះ នឹងត្រូវបានអានដោយផ្ទាល់មាត់ ពីសំណាក់ លោក John Roberts ចៅក្រមតុលាការកំពូលអាមេរិក ដែលនឹងមកធ្វើជាប្រធានអង្គជំនុំជំរះពិសេសនេះ នៅព្រឹទ្ធសភា ។ភាគីនីមួយៗ មានពេលតែ២ម៉ោងទេ ក្នុងការសម្រេច យល់ព្រម ឬមិនយល់ព្រម ក្នុងការសុំឲ្យបង្ហាញឯកសារបន្ថែម ឬកោះហៅសាក្សីបន្ថែម ឲ្យចូលមកបំភ្លឺ ។ កាលពីដំបូង ក្រុមដើមចោទ មានបំណងចាប់បង្ខំ ឲ្យសេតវិមាន ក្រសួងការពារជាតិ និងក្រសួងការបរទេស ត្រូវតែបញ្ជូនសាក្សី និងឯកសារនានា ដែលពាក់ព័ន្ធនឹងសំណុំរឿងនេះ ។ ក៏ប៉ុន្តែ ចំណុចទាំងអស់នេះ ត្រូវបានព្រឹទ្ធសភាបោះឆ្នោតបដិសេធហើយ កាលពីយប់ថ្ងៃអង្គារ៍ ។
ភាគីដើមចោទ អាចមានសិទ្ធិស្នើសុំ ឲ្យគេបញ្ជូនឯកសារបំភ្លឺបន្ថែម ដូចជា ឯកសារសំងាត់ ចំណារ កំណត់ហេតុ សារអ៊ីម៉ែល ជាដើម និងអាចសុំស្តាប់សាក្សីឆ្លើយបំភ្លឺ ។ សាក្សីនោះ បើតាមការស្មាន គឺអាចជា លោកMick Mulvaney ប្រធានខុទ្ទកាល័យបច្ចុប្បន្ន របស់លោកដូណាល់ ត្រាំ និងលោក John Bolton អតីតទីប្រឹក្សាផ្នែកសន្តិសុខ របស់លោកដូណាល់ ត្រាំ ។
ភាគី ដែលការពារលោកដូណាល់ ត្រាំ ក៏អាចសុំកោះហៅសាក្សីដែរ ដើម្បីអាចមានប្រៀប ។ សាក្សី ដែលក្រុមលោកដូណាល់ ត្រាំ ចង់ហៅមកសួរចម្លើយនោះ គឺមានលោក Hunter Biden កូនប្រុសលោក Joe Biden និងមនុស្សម្នាក់ទៀត ដែលជាអ្នកទម្លាយ ឯកសារខ្សែអាត់សម្លេងទូរស័ព្ទ រវាងលោកដូណាល់ ត្រាំ និងលោកប្រធានាធិបតីអ៊ុយក្រែន ដែលជាប្រភពបង្ករឿងអាស្រូវនេះ ។ក៏ប៉ុន្តែយ៉ាងណា រាល់សំណើសុំឯកសារ ឬសុំកោះហៅសាក្សី គឺត្រូវឆ្លងកាត់ ការបោះឆ្នោតសម្លេងភាគច្រើន ៥០ បូក១ នៃសមាជិកព្រឹទ្ធសភា ទាំង១០០នាក់ ។ មានន័យថា គេត្រូវការយ៉ាងហោច៥១នាក់យល់ព្រម ។ សមាជិកព្រឹទ្ធសភាបក្សប្រជាធិបតេយ្យ គឺមានគ្នាតែ៤៧នាក់ទេ ខណៈក្រុមសាធារណរដ្ឋ មានគ្នាដល់ទៅ៥៣នាក់ ។ដូច្នោះគេជឿថាសវនាការនេះមិនអាចធ្វើអីលោកប្រធានាធិបតីត្រាំបានទេលើកលែងតែមានសមាជិកព្រឹទ្ធសភាខ្លះក្បត់?ដាច់ខាតមិនហ៊ានទេ៕