ទីប្រឹក្សាប្រធានាធិបតីអ៊ុយក្រែន ថា ការស្លាប់របស់កូនស្រី សម្ព័ន្ធមិត្តលោក ពូទីន គឺជា កម្មពៀរ
27-March-2024 / ព័ត៌មានអន្តរជាតិ
រុស្ស៊ី៖នាង Darya Dugina ដែលជាកូនស្រីរបស់អ្នកជាតិនិយមរុស្ស៊ី និងជាសម្ព័ន្ធមិត្តរបស់លោកប្រធានាធិបតី វ្ល៉ាឌីមៀរ ពូទីន ត្រូវបានសម្លាប់ដោយការបំផ្ទុះគ្រាប់បែកក្នុងរថយន្តនៅខាងក្រៅទីក្រុងមូស្គូ។
ឪពុករបស់នាងដារីយាឌូហ្កីណា( Darya Dugina) គឺលោកអាឡិចសាន់ឌឺរឌូហ្កីន( Alexander Dugin )បានអំពាវនាវជាយូរមកហើយ ឲ្យមានការបង្រួបបង្រួមនៃតំបន់និយាយភាសារុស្សី និងទឹកដីផ្សេងទៀតនៅក្នុងចក្រភពរុស្ស៊ីថ្មីមួយដ៏ធំធេង។ គាត់ចង់បានចក្រភពមួយ ដោយដាក់បញ្ចូលទាំងអ៊ុយក្រែនផងដែរ។តែភាគីរុស្ស៊ីបានបដិសេធព័ត៌មាននេះ ហើយបានទទូចថា លោកDuginមិនដែលកាន់តំណែងសំខាន់ណាមួយក្នុងរដ្ឋាភិបាលឡើយ។
ទាក់ទងនឹងការស្លាប់របស់ នាងដារីយាឌូហ្កីណា( Darya Dugina), លោកស្រីម៉ារៀហ្សាខារ៉ូវ៉ា( Maria Zakharova) អ្នកនាំពាក្យក្រសួងការបរទេសរុស្ស៊ី បាននិយាយថា ប្រសិនបើការស៊ើបអង្កេតករណីឃាតកម្ម រកឃើញថា ជាប់ពាក់ព័ន្ធនឹងអ៊ុយក្រែននោះ វានឹងចង្អុលទៅគោលនយោបាយនៃ “អំពើភេរវកម្មរដ្ឋ” ដែលកំពុងបន្តដោយទីក្រុង កៀវ។ប្រធានាធិបតីរុស្ស៊ីលោកVladimirPutinបានថ្កោលទោសយ៉ាងខ្លាំងចំពោះការវាយប្រហារដែលបានសម្លាប់អ្នកកាសែតរុស្ស៊ីDarya Dugina កូនស្រីរបស់ទស្សនវិទូដ៏ល្បីល្បាញ។”ឧក្រិដ្ឋកម្មដ៏ឃោរឃៅ បានឆក់យកជីវិតរបស់Darya Dugina ដែលជាមនុស្សមានទេពកោសល្យជាមួយនឹងចិត្តល្អស្រឡាញ់ អាណិតនិងបើកចំហ។
ក្នុងនាមជាអ្នកសារព័ត៌មាន អ្នកវិទ្យាសាស្ត្រ ទស្សនវិទូ និងអ្នកឆ្លើយឆ្លងព័ត៌មានសង្គ្រាមលោកស្រីបានបម្រើប្រជាជននិងមាតុភូមិដោយស្មោះត្រង់។ លោកស្រីជាគំរូដ៏ច្បាស់មួយនៃពលរដ្ឋរុស្ស៊ីដែលស្នេហាជាតិម្នាក់» ប្រធានាធិបតីVladimirPutinបានចែករំលែកបន្ទាប់ពីការធ្វើឃាតដែលបានផ្តោតលើអ្នកកាសែត Darya Dugina។សេចក្តីថ្លែងការណ៍របស់លោកPutinបានធ្វើឡើងបន្ទាប់ពីសេវាសន្តិសុខសហព័ន្ធ (FSB) របស់រុស្ស៊ីបានចោទប្រកាន់សេវាស៊ើបការណ៍សម្ងាត់របស់អ៊ុយក្រែនថាមានជាប់ពាក់ព័ន្ធនឹងការស្លាប់របស់ Dugina ។
នៅក្នុងសេចក្តីថ្លែងការណ៍មួយកាលពីថ្ងៃទី២២ខែសីហា FSB បាននិយាយថា ជនសង្ស័យនៅក្នុងការបំផ្ទុះរថយន្តដែលបានសម្លាប់Darya Duginaនៅទីក្រុងម៉ូស្គូកាលពីចុងសប្តាហ៍មុនគឺ Natalya Vovk – ពលរដ្ឋអ៊ុយក្រែនកើតនៅឆ្នាំ១៩៧៩។ “អត្តសញ្ញាណរបស់ជនសង្ស័យក្នុងឃាតកម្មលើ Darya Dugina ត្រូវបានបញ្ជាក់។ សេចក្តីថ្លែងការណ៍បាននិយាយថា នេះជាមនុស្សរបស់កងកម្លាំងពិសេសអ៊ុយក្រែន។ លើសពីនេះទៀត FSB ក៏ជឿថា Vovk គឺជាសមាជិកនៃកងវរសេនាតូច Azov នៃកងទ័ពអ៊ុយក្រែន។បច្ចុប្បន្ន Natalya Vovk ត្រូវបានគេនិយាយថាបានភៀសខ្លួនទៅកាន់ប្រទេស Estonia ហើយកំពុងត្រូវបានស្វែងរកយ៉ាងសកម្មដោយអាជ្ញាធររុស្ស៊ី។
ជនរងគ្រោះនាង Dugina អាយុ៣០ឆ្នាំត្រូវបានសម្លាប់បន្ទាប់ពីរថយន្តដែលលោកស្រីកំពុងបើកបរបានផ្ទុះនៅលើផ្លូវហាយវេប្រហែល៣០គីឡូម៉ែត្រពីកណ្តាលទីក្រុងម៉ូស្គូកាលពីថ្ងៃទី២១/៨ខែមករា។នៅពេលនោះលោកកស្រីDuginaកំពុងធ្វើដំណើរត្រឡប់មកផ្ទះវិញដើម្បីចូលរួមកម្មវិធីអធិប្បាយរបស់ឪពុកលោកស្រី។ប៉ូលីសក្រុងម៉ូស្គូបានទៅដល់កន្លែងកើតហេតុ ហើយបានប្រកាសថា Dugina ត្រូវបានធ្វើឃាតដោយគ្រាប់បែកផលិតនៅផ្ទះដែលមានផ្ទុក TNT ទម្ងន់៤០០ ក្រាមដាក់នៅក្រោមរថយន្ត។ ខាងអ៊ុយក្រែន មន្ត្រីអ៊ុយក្រែនបានបដិសេធរាល់ការចោទប្រកាន់រុស្ស៊ីពីការចូលរួមយោធាអ៊ុយក្រែនក្នុងការធ្វើឃាតអ្នកកាសែត Dugina។
ប៉ុន្តែសម្រាប់លោកមីខៃឡូប៉ូដូលយ៉ាក( Mykhailo Podolyak) ទីប្រឹក្សាប្រធានាធិបតីអ៊ុយក្រែន បានបដិសេធថា ប្រទេសរបស់លោក មិនជាប់ពាក់ព័ន្ធក្នុងការសម្លាប់នេះទេ។ និយាយតាមទូរទស្សន៍ជាតិលោកថា “យើងមិនមែនជារដ្ឋឧក្រិដ្ឋកម្មឡើយ មិនដូចរុស្ស៊ីទេ ហើយច្បាស់ជាមិនមែនជារដ្ឋភេរវករ”។ លោកបានស្តីបន្ទោសទៅលើការតស៊ូអំណាចផ្ទៃក្នុងរវាង បក្សពួកនយោបាយផ្សេងៗ នៅប្រទេសរុស្ស៊ីសម្រាប់ការវាយប្រហារនេះ ហើយបានលើកឡើងថា ឧបទ្ទវហេតុនេះគឺជាកម្មពៀរ ចំពោះអ្នកគាំទ្រសកម្មភាពរបស់រុស្ស៊ីនៅអ៊ុយក្រែន៕ប្រភព៖ Sky
