វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 6710 នាក់
ម្សិលមិញ 8227 នាក់
សរុប 14133591 នាក់
វៀតណាម៖ ចាប់ពីខែមករា ដល់ខែកញ្ញា ឆ្នាំ ២០១៩នេះប្រទេសវៀតណាមនាំចេញអង្ករជិត ៧លានតោន ដែលមានតម្លៃសរុបជាង ២.២០០ លានដុល្លារអាមេរិក ។ នេះបើយោងតាមការចេញផ្សាយរបស់ សារព័ត៌មានក្នុងស្រុកវៀតណាម។
ទោះជាយ៉ាងណាប្រទេសវៀតណាម កំពុងតែជួបប្រទះនឹងបញ្ហាលំបាក ក្នុងការនាំចេញអង្ករ ដោយសារតែតម្លៃអង្ករវៀតណាម នៅលើទីផ្សារអន្តរជាតិ មានការធ្លាក់ចុះ ។ ចំណែកទីផ្សារសំខាន់ៗ ដែលធ្លាប់តែបញ្ជាទិញអង្ករវៀតណាមនោះ ចាប់ផ្តើមរួមតូចទៅៗ ដូចជាទីផ្សារចិន និងហ្វីលីពីន ជាដើម ដោយសារតែពួកគេ អាចផលិតអង្ករបានដោយខ្លួនឯង។ការនាំចេញអង្ករវៀតណាម ទៅកាន់ចិន បន្តធ្លាក់ចុះខ្លាំង ដោយសារតែ ការរឹតបន្តឹងលើ លក្ខខណ្ឌនាំចូល និងការគ្រប់គ្រងគុណភាពផលិតផល ហើយចិន ថែមទាំងបានទម្លាក់ កូតានាំចូល រហូតដល់ទៅ ៩០% ឯណោះ ធៀបនឹងឆ្នាំ ២០១៨កន្លងទៅ។
ក្រសួងកសិកម្ម និងអភិវឌ្ឍន៍ជនបទវៀតណាម បានបញ្ជាក់ឲ្យដឹងថា ទីផ្សារសំខាន់ៗផ្សេងទៀតដូចជា ឥណ្ឌូនេស៊ី និងបង់ក្លាដេស បានកាត់បន្ថយការនាំចូលអង្ករវៀតណាម ដោយសារតែសេដ្ឋកិច្ចសកល ដើរយឺតជាងមុន ធ្វើឲ្យមានតម្រូវការទាប។បច្ចុប្បន្ន ប្រទេសហ្វីលីពីន កាន់កាប់ចំណែកទីផ្សារទិញអង្ករវៀតណាមច្រើនជាងគេបង្អស់ រហូតដល់ទៅ ៥៩០លានដុល្លារអាមេរិក ដែលស្មើនឹង ៣៤% នៃចំណែកទីផ្សារសរុប។ យ៉ាងណាមិញ ប្រទេសហ្វីលីពីន មានការកំណត់ជាក់លាក់មួយ ដែលបង្កជាផលលំបាក មិនអាចនាំចូលអង្កររបស់វៀតណាម បន្ថែមបាន។
ទោះបីជាយ៉ាងណា វៀតណាម នៅមានទីផ្សារសហភាពអឺរ៉ុប ជាទីផ្សារនាំចេញអង្ករសំខាន់មួយទៀត ដែលរំពឹងនឹងមានកំណើនខ្ពស់ នាពេលខាងមុខ បន្ទាប់ពី កិច្ចព្រមព្រៀងពាណិជ្ជកម្មសេរី ចូលជាធរមាន ពីព្រោះ វៀតណាម នឹងទទួលបានកូតា នាំចេញអង្ករ ៨ម៉ឺនតោន ក្នុងមួយឆ្នាំ ជាមួយអត្រាពន្ធសូន្យ ប្រសើរជាងពេលបច្ចុប្បន្ន ដែលមានកូតាត្រឹមតែ ២ម៉ឺនតោន ជាមួយអត្រាពន្ធចន្លោះពី ៧០ដុល្លារ ដល់ ២៣០ដុល្លារអាមេរិក ក្នុងមួយតោន។
កាលពីឆ្នាំ ២០១៨ ប្រទេសវៀតណាមបាននាំចេញអង្ករជាង ៦លានតោន តែរកចំណូលបានជាង ៣ពាន់លានដុល្លារអាមេរិក និងមានប្រទេសចិន ជាទីផ្សារនាំចេញធំជាងគេ ដែលកាន់កាប់ ២៤ភាគរយនៃការនាំចេញអង្ករសរុប។