ផ្ទះគំរូដែលអាជ្ញាធរអប្សារាអនុញ្ញាតិឲ្យសាងសង់ក្នុងតំបន់អង្គរក្នុងពេលរដ្ឋដាក់ផែនការបង្កើតក្រុងសៀមរាបថ្មី!
15-March-2026 / ទេសចរណ៏និងវប្បធម៌
សៀមរាម៖ អាជ្ញាធរជាតិអប្សរាបានដាក់ចេញនូវគោលការណ៍គំរូសាងសង់លំនៅដ្ឋានបែបខ្មែរបុរាណដល់អ្នកស្រុកអង្គរ។ ផ្ទះបែបបុរាណខ្មែរ ជាប្រភេទផ្ទះបានកសាងខ្ពស់ផុតពីដី ជាប្រភេទសំណង់ស្រាល គ្មានការជីកគ្រឹះជ្រៅទៅក្នុងដី និងមានទម្រង់៥ប្រភេទ ដោយប្រភេទនីមួយៗមានភាពខុសគ្នាត្រង់រចនាបថនៃដំបូល ។
អាជ្ញាធរជាតិអប្សរាបានអនុញ្ញាតឱ្យអ្នកស្រុកអង្គរ ជួសជុលផ្ទះចាស់ទ្រុឌទ្រោម ឬសាងសង់ផ្ទះថ្មីជំនួសផ្ទះចាស់ ក្នុងនោះដែរ ផ្ទះដែលត្រូវបានអនុញ្ញាតឱ្យសាងសង់ គឺជាប្រភេទផ្ទះដែលមានរចនាបថបែបខ្មែរ មានចំនួន៥ប្រភេទ គឺប្រភេទផ្ទះខ្មែរ ឬកឹង ប្រភេទផ្ទះរោង(ផ្ទះកន្តាំង) ប្រភេទផ្ទះរោងដោល ប្រភេទផ្ទះរោងឌឿង និងប្រភេទផ្ទះប៉ិត។ ប្រភេទផ្ទះផ្សេងក្រៅពីនេះ មិនត្រូវបានអនុញ្ញាតឡើយ ដូចជាផ្ទះតៀម ផ្ទះល្វែងមួយជាន់ ឬច្រើនជាន់ ឬសំណង់ទាំងឡាយណាដែលមានការជីកគ្រឹះជ្រៅទៅក្នុងដី និងមានលក្ខណៈទំនើបកម្ម។
អាជ្ញាធរជាតិអប្សរក៏បានគិតគូដល់ថ្នាំពណ៌ផ្ទះ ដំបូលត្រូវធ្វើអំពីក្បឿងប្រើពណ៌ដីដុត ឬពណ៌ស៊ីម៉ងត៍ ហ្វ៊ីប្រូ ឬស័ង្កសីត្រូវប្រើពណ៌ក្រហម ឬពណ៌បៃតង ជញ្ជាំងឥដ្ឋខាងក្រោមអាចលាបពណ៌ស៊ីម៉ងត៍ ឬពណ៌ដីលែង ឱ្យស្រគាំទៅនឹងពណ៌ឈើ ចំណែកឯជញ្ជាំង ទ្វារ បង្អួច ដែលធ្វើអំពីឈើត្រូវទុកសាច់ឈើធម្មជាតិ ឬក៏លាបពណ៌ដូចឈើធម្មជាតិ។ ពណ៌ក្រៅពីនេះដែលមានសភាពស្រស់ឆើតឆាយ ត្រូវបានហាមឃាត់ ពុំអនុញ្ញាតឡើយ។
ប្រជាពលរដ្ឋដែលបានរស់នៅក្នុងតំបន់១ និងតំបន់២ អាចរុះរើ ជួសជុលផ្ទះចាស់ទ្រុឌទ្រោម ឬសាងសង់ផ្ទះថ្មីជំនួសផ្ទះចាស់បាន ត្រូវមានលិខិតអនុញ្ញាតពីអាជ្ញាធរជាតិអប្សរាជាមុន ដូចមានចែងក្នុងព្រះរាជក្រឹត្យ នស/រកត/០១៩៩/១៩ ចុះថ្ងៃទី២២ ខែមករា ឆ្នាំ១៩៩៩ និងបទបញ្ជារបស់រាជរដ្ឋាភិបាល លេខ០២ បប ចុះថ្ងៃទី២៣ ខែមិថុនា ឆ្នាំ២០០៤ ព្រមទាំងសេចក្តីសម្រេចរបស់រាជរដ្ឋាភិបាល លេខ ៧០ សសរ ចុះថ្ងៃទី១៦ ខែវិច្ឆិកា ឆ្នាំ២០០៤។
ក្រៅពីការអារអភិរក្ស័ការពារតំបន់បេតិកភណ្ឌ័ជាតិ រាជរដ្ឋាភិបាលកម្ពុជា គ្រោងសាងសង់ទីក្រុងសៀមរាបថ្មីមួយ ដែលមានចម្ងាយប្រមាណ ៦០គីឡូម៉ែត្រ ពីទីក្រុងសៀមរាបបច្ចុប្បន្ននេះ។ នេះបើតាមលើកឡើងដោយលោក ថោង ខុន រដ្ឋមន្ត្រីក្រសួងទេសចរណ៍ ក្នុងកិច្ចប្រជុំអន្តរក្រសួង កាលពីថ្ងៃទី១៦ ខែកញ្ញា ក្នុងខេត្តសៀមរាប។
លោករដ្ឋមន្ត្រី បានឲ្យដឹងថា ដើម្បីត្រៀមខ្លួនទទួលវត្តមានភ្ញៀវទេសចរ ដែលនឹងមានការកើនឡើងនាពេលខាងមុខនោះ គណៈកម្មការអន្តរក្រសួងនេះ ក៏មានគម្រោងសិក្សាបង្កើតក្រុងសៀមរាបថ្មីមួយផងដែរ។
ក្នុងកិច្ចប្រជុំនោះ ក៏បានប្រកាសដាក់ចេញផែនការយុទ្ធសាស្ត្រជាចាំបាច់នេះ ត្រូវបានធ្វើឡើងនាឱកាសកិច្ចប្រជុំលើកទី៣ របស់គណៈកម្មការអន្តរក្រសួង ដើម្បីរៀបចំផែនការមេអភិវឌ្ឍន៍ទេសចរណ៍ នៅខេត្តសៀមរាប។ ដោយដាក់ចេញគម្រោងផែនការមេ សម្រាប់អភិវឌ្ឍន៍វិស័យទេសចរណ៍ខេត្តសៀមរាប និងផែនការសកម្មភាពការងារអនុវត្តន៍ ចំពោះមុខរយៈពេលខ្លី ឆ្នាំ២០១៩-២០២០ ក្រោមទិសស្លោក «ប្រែក្លាយបញ្ហាប្រឈមទៅជាឱកាស»។
ក្រៅពីផែនការបង្កើតក្រុងថ្មីគម្រោងដាក់ភ្លើងបំភ្លឺពេលយប់( Angkor Night) គឺជាគំនិតផ្តួចផ្តើមមួយក្នុងចំណោមគំនិតផ្តួចផ្តើមចំនួន៤ សម្រាប់ដាក់បញ្ចូលក្នុងផែនការចំពោះមុខ ដើម្បីដោះស្រាយបន្ទាន់នូវបញ្ហាធ្លាក់ចុះនៃចំនួនភ្ញៀវទេសចរមកលេងខេត្តសៀមរាបផងដែរ។ គម្រោងដាក់បញ្ចាំងអំពូលភ្លើងហ្វាតាមប្រាសាទអង្គរវត្តនេះធ្លាប់ត្រូវបានដាក់ចេញម្តងហើយតែ ត្រូវបានផ្អាកទៅវិញកាលពីខែឧសភា ឆ្នាំ២០០៩ បន្ទាប់ពីមានការរិះគន់ថាធ្វើឲ្យប៉ះពាល់ដល់ប្រាសាទ។ ការសិក្សា ដាក់ឱ្យដំណើរការគម្រោងទស្សនាប្រាសាទអង្គរពេលរាត្រីតាមរយៈការបញ្ចាំងភ្លើង និងការទស្សនាក្រៅប្រាសាទនោះ គឺត្រូវតែការពារសុវត្ថិភាពប្រាសាទ និងវត្ថុបុរាណ ព្រមទាំងសុវត្ថិភាពរបស់ភ្ញៀងទេសចរផងដែរ។
លោក ថោង ខុន រដ្ឋមន្ត្រីក្រសួងទេសចរណ៍បានអះអាងថាចំនួនភ្ញៀវទេសចរទៅលេងខេត្តសៀមរាបបានធ្លាក់ចុះរង្វង់៩%និយាយជារួម។ និយាយដោយឡែកចំនួនអ្នកទេសចរចិនក៏ធ្លាក់ចុះ៨% ខណៈភ្ញៀវទេសចរជនជាតិកូរ៉េក៏ធ្លាក់ចុះពី២០%ទៅ៣០%។ ប៉ុន្តែចំនួនភ្ញៀវទេសចរមកទស្សនាកម្ពុជានៅទូទាំងប្រទេសបែរជាមានការកើនឡើងជាពិសេសនៅទីក្រុងភ្នំពេញតែម្តង។
