ការបែកបាក់ដណ្តើមឥទ្ធីពលផ្ទៃក្នុងធ្វើឲ្យសន្តិសុខប្រទេសសេរីលង្កាចុះខ្សោយ!?
03-April-2024 / ព័ត៌មានអន្តរជាតិ
សេររីលង្កា ៖ មានករណីផ្ទុះកើតឡើងនៅស្រីលង្កាទៀតហើយនៅថ្ងៃទី២៥មេសា ខណៈដែលសន្តិសុខកំពុងត្រូវបានរឹតបន្តឹងខ្លាំងបំផុត ហើយប្រធានាធិបតី បង្ខំអោយមេទ័ព និងមេប៉ូលីសចុះចេញពីតំណែងនោះ។សំឡេងផ្ទុះត្រូវបានលាន់ឮចេញពី ដីវាលមួយកន្លែងនៅពីក្រោយអគារតុលាការ ក្នុងទីក្រុងភូហ្គោដា (Pugoda) ដែលមាន ចម្ងាយ ៤០គីឡូម៉ែត្រពីភាគខាងកើតទីក្រុងកូឡុំបូ។ នេះបើតាមការចេញផ្សាយនៅមុននេះ បន្តិចដោយទីភ្នាក់ងារព័ត៌មាន Reuters នារសៀលថ្ងៃព្រហស្បតិ៍ ទី២៥ ខែមេសា ឆ្នាំ២០១៩។
កាលពីថ្ងៃទី២១មេសាភេរវកម្មបំផ្ទុះគ្រាប់បែកជាច្រើនកន្លែងនៅស្រីលង្កា បណ្តាលឲ្យមានមនុស្សស្លាប់ ប្រមាណ៣៦០នាក់ ហើយរងរបួសជាង៥០០នាក់។ នៅស្រីលង្កា ប៉ូលិសអាំងទែរប៉ូល បានឆ្លើយតបជាវិជ្ជមាន ទៅនឹងសំណើសុំជំនួយរបស់អាជ្ញាធរក្រុងកូឡុំបូ។ អាំងទែរប៉ូល បានសម្រេចពង្រឹងកម្លាំង និងផ្តើមបញ្ជូនក្រុមអ្នកអង្កេតឱ្យចុះទៅកន្លែងកើតហេតុ។ នេះបើតាមសេចក្តីជូនដំណឹងរបស់អង្គការប៉ូលិសអន្តរជាតិប្រឆាំងឧក្រិដ្ឋកម្ម ឬអាំងទែរប៉ូល។
មូលហេតុដែលបណ្តាលឲ្យរងគ្រោះថ្នាក់យ៉ាងធ្ងន់ធ្ងរបែបនេះ ត្រូវគេបន្ទោសទៅលើថ្នាក់ដឹកនាំប្រទេស ដែលបែកបាក់គ្នា និងធ្វើការមិនចុះសម្រុងគ្នា ពិសេសគឺការប្រកាន់បក្សពួក រវាងនាយករដ្ឋមន្ត្រី Ranil Wickremesinghe និងប្រធានាធិបតីស្រីលង្កាបង្កឲ្យមានការមើលបំណាំគ្នាខាងសន្តិសុខ។ មួយទៀត គឺដោយសារតែជម្លោះសាសនាផងដែរ។
មន្ត្រីជាន់ខ្ពស់របស់ក្រសួងការពារជាតិស្រីលង្កា ធ្លាប់លើកឡើងថា ការបំផ្ទុះគ្រាប់បែកលើវិហារគ្រិស្តសាសនានិងសណ្ឋាគារនៅស្រីលង្កា ជាការសងសឹក ចំពោះការវាយប្រហារលើវិហារអ៊ីស្លាម នៅនូវែលហ្សេឡង់ កាលពីខែមុន។ នៅថ្ងៃពុធ ទី២៤មេសា ប៉ូលីសបានចាប់ខ្លួន ជនសង្ស័យចំនួន១៨នាក់បន្ថែមទៀត គឺបន្ទាប់ពីបានឃាត់ខ្លួន មនុស្ស ៤០ នាក់រួចហើយ តាំងពីថ្ងៃកើតហេតុ ថ្ងៃអាទិត្យនោះមក។
អាជ្ញាធរស្រីលង្កា បានតម្រុយច្រើន និងបានសន្និដ្ឋានចំពោះក្រុមឧទ្ទាមភេរវនិយម អ៊ីនធីជេ NTJ ។ គេរកឃើញសាកសពបុរសម្នាក់ ដែលគេស្គាល់ថា ជាបក្សពួករបស់ក្រុម អ៊ីនធីជេ នេះឯង។ប៉ុន្តែ ក្រុមអ៊ីស្លាមជ្រុលនិយមនេះ គ្មានបានចេញមុខមកអះអាងថាការបំផ្ទុះគ្រាប់បែក ពីថ្ងៃទី២១មេសានោះ ថាជាស្នាដៃរបស់ក្រុមខ្លួនទៅវិញ។ ក្រុមអង្គការរដ្ឋជីហាត ដែលប្រភពធំនៅស៊ីរី និងអ៊ីរ៉ាក់ឯណោះ បានប្រកាសទទួលស្គាល់ថាជាទង្វើរបស់ខ្លួន ហើយថែមទាំងបានផ្សព្វផ្សាយរូបថតនៃវីរជនក្រុមខ្លួនចំនួន ៨ នាក់ផង។
អ្នកជំនាញផ្សេងទៀត ដូចជាលោក វីក្រាម រាជាកុមារ Vikram Rajakumar ជាអ្នកប្រឹក្សាខាងសន្តិសុខនិងខាងទប់ស្កាត់ភេរវកម្ម លោកបានស្រាវជ្រាវ ស្គាល់បុរសម្នាក់ នៅក្នុងចំណោមមនុស្សទាំង៨នាក់ ដែលក្រុមអង្គការរដ្ឋជីហាត បង្ហោះផ្សាយរូបថតនោះ។ តាមអ្នកជំនាញដដែល, បុរសម្នាក់នោះឈ្មោះ ហ្ស៉ាហ្រាម ហាស្ស៊ីន Zahram Hashim គឺជាសមាជិករបស់ក្រុម អ៊ីនធីជេ ដែលរូបគេនេះមានប្រជាប្រិយភាពខ្លាំងណាស់ជាមួយក្មេងៗនិងយុវជនអ៊ីស្លាម។ បុរសនេះ អាចអូសទាញនិងបំពាក់បំប៉នយុវជនឲ្យល្លង់ជឿ ហើយនឹងអាចជំរុញឲ្យយុវជនធ្វើអ្វីៗ ដែលគេហៅថា «ដើម្បីការពារសាសនាអ៊ីស្លាម»ថែមទៀតផង។
អ្នកជំនាញដដែល បញ្ជាក់ថា ក្រុមភេរវជននិយម អ៊ីនធីជេ NTJ មានខ្សែបណ្តាញនៅច្រើនប្រទេស ដូចជា នៅឥណ្ឌា នៅអារ៉ាបីសាអូឌីត និងនៅស្រីលង្កាជាដើម ដែលក្រុមនេះ អះអាងខ្លួនឯងថា មានគោលដៅការពារ និងមើលការខុសត្រូវ ចំពោះជនអ៊ីស្លាមលើពិភពលោក។
សូមបញ្ជាក់ថា៖កំណត់ហេតុរបស់ប៉ូលិសស្រីលង្កា នៅថ្ងៃទី ៤មេសា បានសរសេរថា ភ្នាក់ងារស៊ើបការណ៍សម្ងាត់បរទេស (ឥណ្ឌា និងអាមេរិក)បានជូនដំណឹង ប្រាប់ចារកិច្ចស្រីលង្កាពីលទ្ធភាពកើតមានភេរវកម្មអត្តឃាត ប្រឆាំងព្រះវិហារ កន្លែងទេសចរណ៍។ ៥ថ្ងៃក្រោយ ក្រសួងការពារជាតិបានបញ្ជូនដំណឹងនេះ ទៅមេប៉ូលិសស្រីលង្កា ដោយភ្ជាប់ទៅជាមួយ ឯកសារមានឈ្មោះ ជនសង្ស័យ និងឈ្មោះក្រុមដែលរៀបគម្រោងធ្វើភេរវកម្ម គឺក្រុមអ៊ីស្លាមជ្រុលនិយម NTJ។
តាមអ្នកនាំពាក្យរបស់រដ្ឋាភិបាល លោក Rajitha Senaratne នៅក្នុងកំណត់ហេតុមួយទៀត ចុះនៅថ្ងៃទី ១១មេសា មេប៉ូលិសស្រីលង្កា បានផ្សព្វផ្សាយដំណឹង នៅក្នុងចំណោម មន្ត្រីសន្តិសុខ និងក្រសួងមួយចំនួនរបស់រដ្ឋាភិបាល។ នៅប៉ុន្មានម៉ោងមុន ភេរវករចូលទៅចុចបំផ្ទុះគ្រាប់បែកអត្តឃាត ភ្នាក់ងារចារកម្មឥណ្ឌា នៅបានទាញសញ្ញាអាសន្ន ប្រាប់ភាគីស្រីលង្កា ពីលទ្ធភាព កើតមានភេរវកម្ម សម្លាប់មនុស្សនៅស្រីលង្កា។តែ នាយករដ្ឋមន្ត្រី ស្រីលង្កា លោក Ranil Wickremesingheបាននិយាយថា លោកមិនបានទទួលដំណឹងនេះពីមុនមកទេ។
តាមអ្នកនាំពាក្យរបស់រដ្ឋាភិបាល លោកនាយករដ្ឋមន្ត្រី Ranil Wickremesinghe ត្រូវបានគេទុកដាក់ចោល មួយកន្លែង ឲ្យទទួលរាល់ដំណឹងទាក់ទងនឹងបញ្ហាសន្តិសុខជាតិ។
សូមបញ្ជាក់ថា នៅខែធ្នូកន្លងទៅ ទៅតាមការបញ្ជារបស់តុលាការ កំពូល លោកប្រធានាធិបតីស្រីលង្កា ដែលបានសម្រេចអត្តនោម័ត ដកតំណែងនាយករដ្ឋមន្ត្រី ត្រូវបង្ខំចិត្ត តែងតាំង លោក Wickremesinghe ឲ្យធ្វើជានាយករដ្ឋមន្ត្រីឡើងវិញ។ ប៉ុន្តែ នៅពេលនោះ លោកប្រធានាធិបតី Sirisena បានសម្រេច ដកយក ស្ថាប័នប៉ូលិស និងក្រសួងសន្តិសុខជាតិ មកកាន់កាប់ក្នុងដៃរបស់លោកវិញ។ មានន័យថា ក្រុមប្រឹក្សាសន្តិសុខជាតិ ដែលមានតាំងប៉ូលិស និងភ្នាក់ងារស៊ើបការណ៍សម្ងាត់ស្ថិតនៅក្រោមអំណាចរបស់ប្រធានាធិបតី មិនមែននាយករដ្ឋមន្ត្រីនោះទេ។
នៅថ្ងៃ អាទិត្ទី២១មេសា ដោយសារអវត្តមានរបស់ប្រធានាធិបតី នាយករដ្ឋមន្ត្រីស្រីលង្កា បានកោះប្រជុំ ក្រុមប្រឹក្សាសន្តិសុខជាតិ ប៉ុន្តែ គ្មានសមាជិកណាម្នាក់បង្ហាញមុខនោះទេ។ នៅពេលត្រលប់ចូលប្រទេស កាលពីថ្ងៃចន្ទ លោកប្រធានាធិបតី Sirisenaបានបញ្ជាឲ្យបង្កើតគណៈកម្មការពិសេសមួយ ក្រោមការដឹកនាំរបស់ចៅក្រមតុលាការកំពូល ដើម្បីស៊ើបអង្កេតទៅលើភាពថ្លោះធ្លោយ របស់ប៉ូលិសលើកនេះ។
នៅពេលដែលកំណត់ហេតុរបស់ប៉ូលិសបញ្ជាក់ថា គេបានជូនដំណឹងរួចហើយ ពីគម្រោងធ្វើភេរវកម្មទៅមន្ត្រីជាន់ខ្ពស់ដែលស្ថិតនៅក្រោមអំណាចរបស់លោកប្រធានាធិបតីយ៉ាងដូច្នេះ លោកប្រធានាធិបតី ស្រីលង្កា ពិបាកនឹងនិយាយដោះសារថា លោកមិនបានដឹងរឿងអ្វីណាស់។ បើសិនលោកដឹង ប៉ុន្តែ ហេតុអ្វីបានលោកមិនចាត់វិធានការ អ្វីសោះ ដើម្បី ទប់ស្កាត់កុំឲ្យមានភេរវកម្មបង្ហូរឈាម សម្លាប់មនុស្ស យ៉ាងដូច្នេះ។
សូមបញ្ជាក់ថា កាលពីថ្ងៃទី ២៦តុលា ប្រធានាធិបតីស្រីលង្កា លោក Maithripala Sirisena បានសម្រេចជាអត្តនោម័តិដកលោក Ranil Wickremesinghe ចេញពីតួនាទីនាយករដ្ឋមន្ត្រី ហើយដាក់អ្នកជាតិនិយមលោក ម៉ាហ៊ិនដា រ៉ាចាប៉ាក់សេ ជំនួសវិញ។ ប៉ុន្តែដោយគ្មានសម្លេងភាគច្រើនដាច់ខាតនៅក្នុងរដ្ឋសភា និងប្រឈមនឹងការបដិសេធរបស់បក្សប្រឆាំង និងការបដិសេធរបស់តុលាការស្រីលង្កា ទើបលោកប្រធានាធិបតីក៏សុខចិត្តដកថយ នាពេលនេះ។ ថ្ងៃអាទិត្យទី ១៦ធ្នូ លោកបានប្រកាសទទួលស្គាល់ និងតែងតាំងលោក Ranil Wickremesinghe ជានាយករដ្ឋមន្ត្រីជាថ្មី ដោយអះអាងថា លោកនៅតែមិនចង់តែងតាំងលោក Wickremesinghe ជាប្រមុខរដ្ឋាភិបាលថ្មីដដែល ប៉ុន្តែលោកគ្មានជម្រើសអ្វីក្រៅអំពីទទួលព្រមស្តាប់សំឡេងភាគច្រើននៅក្នុងរដ្ឋសភា៕
