បន្ទាប់ពីរដ្ឋមន្ត្រីសាធារណៈការទៅជួបរដ្ឋមន្ត្រីក្រសួងដឹកជញ្ជូនចិនសម្តេចតេជោប្រកាសដកផ្លូវដែកពីក្រុមហ៊ុនឧកញ៉ាគិតម៉េងមកទុករកថៅកែថ្មីវិញ
ភ្នំពេញ៖ សម្តេចតេជោ ហ៊ុន សែនប្រមុខរាជរដ្ឋាភិបាលកម្ពុជា បានជំរុញឲ្យលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ពន្លឿនការចរចាជាមួយក្រុមហ៊ុន Royal railway របស់អ្នកឧកញ៉ា គិត ម៉េងរឿងដកយកផ្លូវរថភ្លើងមកវិញ និងប្រកាសឲ្យប្រជាពលរដ្ឋខ្មែរ ជិតរថភ្លើងដោយឥតគិតលើផ្លូវរថភ្លើងទាំង២ គឺពីភ្នំពេញទៅកាន់ខេត្តព្រះសីហនុ និងពីភ្នំពេញទៅកាន់ក្រុងប៉ោយប៉ែត ខេត្តបន្ទាយមានជ័យនៅក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ដែលមកដល់ក្នុងរយៈពេលដ៏ខ្លីខាងមុខនេះ។
ក្នុងឱកាសអញ្ជើញជាអធិបតី ក្នុងវេទិការាជរដ្ឋាភិបាល-ផ្នែកឯកជនលើកទី១៨ ដែលប្រារព្ធធ្វើឡើងនៅវិមានសន្តិភាព នៅថ្ងៃទី២៩ ខែមីនា ឆ្នាំ២០១៩នេះ សម្តេចតេជោ ហ៊ុន សែន បានថ្លែងថា «យ៉ាងណាក៏ដោយ ជិតដល់ចូលឆ្នាំខ្មែរហើយ ត្រូវសម្រេចសំណូមពរឲ្យខ្ញុំ ដឹកប្រជាជនទាំង២ទិស ទៅចូលឆ្នាំដោយមិនបង់ប្រាក់ ព្រោះខ្ញុំបានសន្យាជាមួយកម្មករ កម្មការិនី រដ្ឋអត់យកលុយធ្វើដំណើរ»។
សម្តេចតេជោ ហ៊ុន សែន ក៏បានស្នើសុំក្បាលរថភ្លើងឬទូរថភ្លើងតាមរយះឯកអគ្គរដ្ឋទូតចិន វៀតណាម និងជប៉ុន ទោះចាស់ក្តីដល់កម្ពុជា ដើម្បីអាចដាក់ដំណើរការ និងអភិវឌ្ឍន៍ផ្លូវដែករបស់កម្ពុជាដែរ៖«បើមិត្ដវៀតណាម សុំឯកអគ្គរដ្ឋទូតវៀតណាម សល់បំរុងចាស់ៗ ព្រោះផ្លូវរបស់យើងវាប៉ុនគ្នា សុំខ្លះមើល ថៃឲ្យខ្លះហើយ វៀតណាមឲ្យខ្លះមក ហើយឯកអគ្គរដ្ឋទូតចិន នៅឯណា ឯកឧត្ដម Wang Wentian សុំក្បាលរថភ្លើងខ្លះនឹង...មើលអាចាស់ៗ ស្រុករបស់លោកឯង សុំមើល ខ្ញុំត្រូវការពន្លឿនអាហ្នឹង ដឹកតាមរទះភ្លើង ដឹកតាមកប៉ាលមក ខ្ញុំសុំខ្លះមក...ស្រែកសុំពីហ្នឹងតែម៉ង សុំទៅទីក្រុងបាំងកក សុំទៅហាណូយ សុំទៅប៉េកាំង ហើយបើសុំទៅតូក្យូទៀត។ឯកឧត្ដមរដ្ឋទូតជប៉ុន សុំជួយបន្ដិចមើល ឲ្យអាផ្លូវខ្ញុំវារត់ វារត់ហើយ មិនមែនទុកនៅភ្នំពេញនោះទេ គឺរត់កាត់ពីកំពង់សោម ទៅដល់ប៉ោយបែត រត់ពីប៉ោយបែត ចុះទៅកំពង់សោម ហើយមួយថ្ងៃៗ ឲ្យវាមានទៅមានមកៗ»។
សូមបញ្ជាក់ថាក្នុងវេទិកានោះសម្តេចតេជោបានប្រកាសថា រាជរដ្ឋាភិបាលសម្រេចបញ្ចប់ ការធ្វើអាជីវកម្មលើផ្លូវដែករបស់ក្រុមហ៊ុន Royal Railway របស់អ្នកឧកញ៉ា គិត ម៉េង ដោយឲ្យក្រសួងសាធារណការ និងដឹកជញ្ជូន ជាអ្នកគ្រប់គ្រងបណ្តោះអាសន្ន រង់ចាំរកក្រុមហ៊ុនថ្មីមកវិនិយោគ ធ្វើឲ្យផ្លូវដែកកាន់តែប្រសើរ។
សម្តេចតេជោ៖ «ដើម្បីទទួលបានជោគជ័យក្នុងការគ្រប់គ្រងប្រព័ន្ធផ្លូវដែក របស់យើងរាជរដ្ឋាភិបាល សម្រេចបញ្ចប់ការធ្វើអាជីវកម្មរបស់ក្រុមហ៊ុន Royal Railway Cambodia ក្នុងប្រតិបត្តិការផ្លូវដែក។ រាជរដ្ឋាភិបាលសម្រេចប្រគល់ ការគ្រប់គ្រងផ្លូវដែក ទៅឲ្យក្រសួងសាធារណការ និងដឹកញ្ជូនជាបណ្តោះអាសន្ន ដើម្បីរៀបចំនីតិវិធីគ្រប់គ្រងដំណើរការឡើងវិញ មុននឹងឈានដាក់ឲ្យដេញថ្លៃជាសាធារណៈ ជ្រើសរើសក្រុមហ៊ុនដែលមានសមត្ថភាព និងបទពិសោធន៍គ្រប់គ្រាន់ មកសហការជាមួយរាជរដ្ឋាភិបាលសំដៅធ្វើឲ្យប្រព័ន្ធផ្លូវដែកកម្ពុជា ប្រកបដោយស្តង់ដារអន្តរជាតិ មានលក្ខណៈទំនើបជឿនលឿនក្នុងការដឹកជញ្ជូនទំនិញ អ្នកដំណើរប្រកបដោយជឿជាក់»។
សម្តេចតេជោ «ខ្ញុំសុំបញ្ជាក់បន្តិចដើម្បីជៀសវាងការភាន់ច្រឡំ ណាមួយទៅលើឧកញ៉ា គិត ម៉េង ។ រឿងនេះវាដូច្នេះ អ្វីដែល ហ៊ុន សែន សង្ស័យគឺវាកើតឡើងពិតមែន [...] ខ្ញុំឃើញផ្លូវវាមិនទៅមុខ។ ពីមុនទោះមានការដាច់ក្តី ដោយ ប៉ុល ពត ក្តីក៏នៅដំណើរការ ប៉ុន្តែដល់ប្រទេសសន្តិភាពបែរជាដំណើរការអត់បាន។ ខ្ញុំសួរថា មូលហេតុអី? គ្រាន់តែចរចាចាប់ផ្តើម ហើយយើងទទួលចេញខាងក្នុង១ឆ្នាំ ២លានដុល្លារស្រេចទៅហើយ គ្មាននរណាគេរកស៊ីអីចឹងទេ។ លុបកុងត្រាចោល ហើយសងលុយទៅធនាគារអភិវឌ្ឍន៍អាស៊ីវិញ»។
ទន្ទឹមនិងការប្រកាសដកផ្លូវរថភ្លើងពីក្រុមហ៊ុកឧកញ៉ាគិតម៉េងដែល១០ឆ្នាំជាងអត់បានធ្វើអីសោះនោះកាលពី ថ្ងៃទី២៧ ខែមីនា ឆ្នាំ២០១៩ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជួន បានដឹកនាំគណៈប្រតិភូក្រសួងសាធារណការ និងដឹកជញ្ជួន កម្ពុជា ចូលជួបពិភាក្សាការងារជាមួយឯកឧត្ដម លី ស៊ាវប៉េង (Li Xiaopeng) រដ្ឋមន្ត្រី ក្រសួងដឹកជញ្ជូន សាធារណរដ្ឋប្រជាមានិតចិននៅ ទីក្រុងប៉េកាំង នៃសាធារណរដ្ឋប្រជាមានិតចិន។
ជំនួបពិភាក្សាការងារនេះបានផ្តោតជាសំខាន់លើកិច្ចសហប្រតិបត្តិការរវាងកម្ពុជា-ចិន លើវិស័យហេដ្ឋា រចនាសម្ព័ន្ធដឹកជញ្ជូន និងកិច្ចសហប្រតិបត្តិការក្នុងក្របខណ្ឌ នៃគំនិតផ្តួចផ្តើមផ្លូវមួយខ្សែក្រវ៉ាត់មួយ (One Belt and One Road Initiative) និងធនាគារវិនិយោគហេដ្ឋារចនាសម្ព័ន្ធអាស៊ី (AIIB)។
