មន្ត្រីរាជរដ្ឋាភិបាលព្រួតគ្នាសំពងនិងបន្សាបឥទ្ធិពលលោកសមរង្ស៊ីដែលប្រកាសដាក់ជីវិតចូលស្រុកខ្មែរវិញ!
21-September-2026 / សន្តិសុខសង្គម
ភ្នំពេញ៖ថ្លែងក្នុងវេទិកាមួយដែលរៀបចំដោយរាជបណ្ឌឹត្យសភាកម្ពុជាលោកផៃស៊ីផានរដ្ឋមន្ត្រីប្រតិភូអមនាយករដ្ឋមន្ត្រីនិងជាអ្នកនាំពា្យរាជរដ្ឋាភិបាលបានអះអាង ថា “ជារួម លោក សម រង្ស៊ី គឺមិនមានលទ្ធភាពត្រឡប់មកវិញទេ គ្រាន់តែយុទ្ធនាការប្រមូលលុយ និងរក្សាកម្លាំងគាំទ្រតែប៉ុណ្ណោះ ដែលការរៃអង្គាសលុយនេះ គឺខុសច្បាប់នៅសហរដ្ឋអាមេរិក” ។
ឧបសគ្គដែលលោក សម រង្ស៊ី មិនមានលទ្ធភាពត្រឡប់មកវិញនោះ ត្រូវបានលោកផៃស៊ីផានបង្ហើបប្រាប់ថា រួមមាន ៖ ១.ប្រឈមនឹងផ្លូវច្បាប់ ,២.គោលការណ៍នៃការ ប្រើប្រាស់ធ្វើដំណើរតាមយន្តហោះ ជាមួយនឹងទិដ្ឋាការ , ៣. កិច្ចប្រឆាំង លោក សម រង្ស៊ី ពីសំណាក់ក្រុម លោក កឹម សុខា , ៤. ឆន្ទៈប្រជាពលរដ្ឋ៨៣% ចេញទៅបោះឆ្នោត មិនស្ដាប់បង្គាប់លោក សម រង្ស៊ី , ៥. ឯកភាព សាមគ្គីភាពកងប្រដាប់អាវុធ គ្រប់អង្គភាពប្ដេជ្ញាការពារសន្តិភាព ស្ថិរភាពនយោបាយ សណ្ដាប់ធ្នាប់សាធារណៈនិងស្ថិតក្រោម បញ្ជាសម្តេចតេជោ និងការពារនាយករដ្ឋមន្ត្រីពេញច្បាប់របស់មហាជន , ៦. មានតែនាយករដ្ឋមន្ត្រី មួយគត់ ដែលមានបុព្វសិទ្ធ ក្នុងកិច្ចស្នើសុំព្រះរាជប្រោសប្រទានទោស បន្ទាប់ពីសាលក្រមសា្ថពរ ហេតុនេះ លោក សម រង្ស៊ី មិនយកអន្ទាក់ពាក់នឹងកខ្លួននោះទេ។
ឯអ្នកនាំពាក្យ គណបក្សប្រជាជនកម្ពុជា(ប្រ.ជ) សុខ ឥសានវិញ បានថ្លែងតាមរយៈ បណ្ដាញសង្គមតេឡេក្រាមថា៖ លោក សម រង្ស៊ី និយាយញុះញង់ ប្រៀបសភាពការណ៍នៅកម្ពុជា ទៅនឹងប្រទេសវេណេហ្ស៊ុយអេឡា គឺជាទាល់ច្រកនិងអស់សង្ឃឹមជាខ្លាំង ចំពោះជោគវាសនាអនាគតរបស់ខ្លួន ។ “ការសរសេរជាភាសារខ្មែរ និងជាភាសារអង់គ្លេសខុសគ្នាយ៉ាងនេះ ឆ្លុះបញ្ចាំងឲ្យឃើញថា ទណ្ឌិតរូបនេះ មានក្តីអស់សង្ឃឹមខ្លាំងណាស់ ចំពោះជោគវាសនាអនាគតរបស់ខ្លួន ដែលកំពុងស្ថិតនៅក្នុងវាលវដ្តសង្សារ គ្មានទិសដៅ ប្រៀបបាននិងកំពុង នៅកណ្តោចកណ្តែង កណ្តាលមហាសាគរ ដ៏ធំល្វឹងល្វើយគ្មានកោះត្រើយ” ។
លោកបន្ថែមថា ចំណែកការញុះញង់ ពីក្រៅប្រទេសឲ្យប្រជាជន និងកងទ័ពបះបោរប្រឆាំង នឹងរាជរដ្ឋាភិបាលកម្ពុជា ក៏គ្មានអ្នកណាឈឺក្បាលវិលមុខជាមួយដែរ កាន់តែធ្វើឲ្យទណ្ឌិត ធ្លាក់ទឹកចិត្តកាន់តែខ្លាំងឡើងៗ ចំពោះជោគវាសនាអនាគតរបស់ខ្លួន ដែលសង្ឃឹមថា នឹងចងកធ្វើអត្តឃាដ នៅថ្ងៃណាមួយជាមិនខាន ។
នៅឯព្រៃវែងឯនុះនៅព្រឹកថ្ងៃទី១ ខែកុម្ភៈ ឆ្នាំ២០១៩ក្នុងពិធីផ្ទេរតំណែងស្នងការនគរបាលខេត្តព្រៃវែង លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ បានលើកឡើងថា ករណីលោក សម រង្ស៊ី លោក មានសំណុំរឿង៣ស្ថិតនៅក្នុងដៃ ដែលតុលាការបានបញ្ជូនមក ដើម្បីចាត់វិធានការណ៍លើអតីតមេបក្សប្រឆាំងរូបនេះ នៅពេលត្រឡប់ចូលស្រុកវិញ។
លោក នាយឧត្តមសេនីយ៍ នេត សាវឿនថ្លែងថា ពលរដ្ឋដែលមាននិន្នាការប្រឆាំងរាជរដ្ឋាភិបាលកម្ពុជាទាំងនៅក្នុងប្រទេស ក៏ដូចជាក្រៅប្រទេសកំពុងតែបំពុលព័ត៌មានជាខ្លាំង ដោយពួកគេបានធ្វើសង្គ្រាមចិត្តសាស្ត្រមកលើថ្នាក់ដឹកនាំកំពូលរបស់កម្ពុជា។ ជាក់ស្តែងការបំពុលព័ត៌មានករណីលោក សម រង្ស៊ីវិលចូលស្រុកវិញនៅឆ្នាំ២០១៩នេះ។
លោកអគ្គស្នងការនគរបាលជាតិចាត់ទុកពត៍មាន លោក សម រង្ស៊ីវិលចូលស្រុកវិញនេះ គឺជាព័ត៌មានបំពុលមួយខ្លាំង តែកងកម្លាំងមានសមត្ថកិច្ចត្រូវតែធ្វើទៅតាមច្បាប់ជាកំណត់ ព្រោះលោកមានបណ្តឹង៣ ស្ថិតនៅក្នុងដៃនគរបាល មិនរាប់ទាំងបទល្មើសផ្សេងទេ។“ចឹងខ្ញុំយល់ថា សភាពការណ៍ទាំងអស់នេះ យើងត្រូវត្រៀមខ្លួនជាស្រេច ជាពិសេសស្នងការដែលតួនាទីជាបញ្ជាការឯកភាព ត្រូវមានផែនការលំអិតជូនបញ្ជាការឯកភាព ដើម្បីប្រើកំលាំងរួមដោះស្រាយបញ្ហាការពារសេចក្តីសុខជូនប្រជាពលរដ្ឋ”។
សូមបញ្ជាក់ដែរថា៖តាមរយៈអត្ថបទបញ្ចេញមតិមួយចុះផ្សាយនៅលើទំព័រសារព័ត៌មានបារាំង Libération កាលពីថ្ងៃទី ៣១ មករាលោក សម រង្ស៊ី បានអំពាវនាវឲ្យបណ្តាប្រទេសប្រជាធិបតេយ្យក្នុងលោក ប្រឆាំងនឹងរដ្ឋអំណាចលោក ហ៊ុន សែន ដូចដែលពួកគេកំពុងប្រឆាំងនឹងរបបលោកនីកូឡាស់ម៉ាឌូរ៉ូ( Nicolas Maduro )នៅVenezuela អីចឹងដែរ។
លោក សម រង្ស៊ី បានស្នើសុំឲ្យសហគមន៍អន្តរជាតិ ប្រកាសថា របប ហ៊ុន សែន មិនមានភាពស្របច្បាប់នោះទេ ពីព្រោះការបោះឆ្នោតនៅកម្ពុជា ក្នុងឆ្នាំ ២០១៨ កន្លងទៅក៏មិនមានភាពស្របច្បាប់ដែរ។
មិនស្របច្បាប់ព្រោះគណបក្សប្រឆាំងមិនមានវត្តមានក្នុងការបោះឆ្នោត គឺដូចករណី នៅវ៉េណេស៊ុយអេឡា (Venezuela) ដែលប្រទេសប្រជាធិបតេយ្យទាំងអស់ក្នុងពិភពលោក បានដកភាពស្របច្បាប់ពីរបប លោក នីកូឡា ម៉ាឌូរ៉ូ (Nicolas Maduro) ដែលបានរារាំងមិនឲ្យគណបក្សប្រឆាំង ចូលរួមក្នុងការបោះឆ្នោតក្នុងឆ្នាំ ២០១។ ។ លើសពីប្រទេសវ៉េណេស៊ុយអេឡា (Venezuela) ទៅទៀត គឺប្រទេសកម្ពុជាមានកិច្ចព្រមព្រៀងសន្តិភាពទីក្រុងប៉ារីស ឆ្នាំ ១៩៩១ ដែលតម្រូវឲ្យមានការបោះឆ្នោតត្រឹមត្រូវ ដោយសេរី និងយុត្តិធម៌ ហើយឲ្យមានប្រព័ន្ធប្រជាធិបតេយ្យ សេរីពហុបក្ស គឺមិនមែនដូចរបបផ្តាច់ការបក្សតែមួយ ដែលមានសព្វថ្ងៃនេះទេ។ នេះបើតាមសំណេរបន្ថែមរបស់លោក សម រង្ស៊ី នៅលើទំព័រហ្វេសបុករបស់លោក នៅថ្ងៃទី ០១ ខែកុម្ភៈនេះ។
សូមបញ្ជាក់ដែរថាពីប្រទេសអាមេរិកលោក សម រង្ស៊ីបានប្រកាសដាក់ជីវិតដើម្បីចូលស្រុកខ្មែរវិញនាឆ្នាំ២០១៩នេះតែមិនប្រាកដថានៅថ្ងៃណានោះទេ ។តែបើតាមការប៉ានស្មានក្រៅពីការបញ្ចុះបញ្ចូលបរទេសឲ្យដាក់គំនាបឲ្យដោះលែងលោកកឹមសុខាលោកសមរង្ស៊ីដែលប្រកាសថាជាប្រធានស្តីទីអតីតគណបក្សសង្គ្រោះជាតិក៏សង្ឃឹមលើការគាំទ្រពីសហគមន៍អន្តរជាំតិដើម្បីគាត់អាចចូលស្រុកខ្មែរធ្វើនយោបាយវិញដែរ។សូមបញ្ជាក់ថាលោកសមរង្ស៊ីបានប្រកាសដាក់ជីវិតដើម្បីចូលស្រុកខ្មែរវិញតែសម្តេចហ៊ុនសែនបានប្រកាសកាត់ដៃចោលបើលោកស៊ីញ៉េសុំលើកលែងទោសឲ្យលោកសមរង្ស៊ីម្តងទៀត!។បើដាច់ខាតចឹងគិតម៉េចវិញទៅ?។
ទាក់ទងសភាពការណ៍ វិបត្តិនយោបាយនៅប្រទេសវ៉េណេស៊ុយអេឡាបច្ចុប្បន្នកំពុងបន្តពុះចែកសហគមន៍អន្តរជាតិជាពីរ ។ម្ខាងមាន សហរដ្ឋអាមេរិក កាណាដា អូស្ត្រាលី អ៊ីស្រាអែល និងប្រទេសមួយចំនួនទៀតនៅអាមេរិកឡាទីនគាំត្រ លោក ហ័ន ហ្កាយដូអាយុ៣៦ឆ្នាំ ប្រធានគណបក្សប្រឆាំង ជាប្រធានាធិបតីស្តីទី។ ចំណែកនៅម្ខាងទៀត មានរុស្ស៊ី ចិន ឬតួកគីគុយបា ជាដើម បានបន្តគាំទ្រលោក នីកូឡា ម៉ាឌូរ៉ូ ខណៈដែលប្រទេសបារាំង អេស្ប៉ាញ អង់គ្លេស អាល្លឺម៉ង់ និងបែលហ្សិកជាដើម បានប្រកាសជំហរដាក់ឱស្សានុវាទទៅរដ្ឋាភិបាលលោក នីកូឡា ម៉ាឌូរ៉ូ ត្រូវតែប្រកាសរៀបចំការបោះឆ្នោតជាថ្មី ក្នុងរវាង៨ថ្ងៃទៀត បើពុំដូច្នោះទេ ប្រទេសទាំងនេះ នឹងប្រកាសទទួលស្គាល់រដ្ឋាភិបាលបណ្តោះអាសន្នរបស់លោក ហ័ន ហ្កាយដូ ថែមទៀត។
