ក្រុមលេខាធិការគណៈកម្មាធិការព្រំដែនយោធភូមិភាគកម្ពុជា-ថៃ ជួបប្រជុំក្រៅផ្លូវការនៅច្រកជាំ-សាង៉ាំ ដើម្បីពិភាក្សាពីការជំរុញការអនុវត្តកិច្ចព្រមព្រៀងពាក់ព័ន្ធ និងការសម្របសម្រួលការងារតាមព្រំដែន

ឧត្តរមានជ័យ៖ ក្រុមលេខាធិការនៃគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) យោធភូមិទី៤ កម្ពុជា និងកងទ័ពភូមិភាគទី២ ថៃ បានជួបប្រជុំក្រៅផ្លូវការ ដើម្បីពិភាក្សាពីការជំរុញការអនុវត្តកិច្ចព្រមព្រៀងពាក់ព័ន្ធ និងការសម្របសម្រួលការងារតាមព្រំដែននៅវេលាម៉ោង ១១:០០នាទីព្រឹក ថ្ងៃទី២៩ ខែកញ្ញា ឆ្នាំ២០២៦ នៅច្រកអន្តរជាតិជាំ-សាង៉ាំ ស្រុកអន្លង់វែង ខេត្តឧត្តរមានជ័យ ។ 

ប្រតិភូយោធាកម្ពុជាដឹកនាំដោយ ឧត្តមសេនីយ៍ត្រី និត ណារ៉ុង ប្រធានលេខាធិការ RBC ភាគីកម្ពុជា និងគណៈប្រតិភូយោធាថៃដឹកនាំដោយ ឧត្តមសេនីយ៍ត្រី កាំផាក់ណាត វ៉ាផាន់ស៊ុ ប្រធានលេខាធិការ RBC ភាគីថៃ។កិច្ចប្រជុំនេះធ្វើឡើងតបតាមការអញ្ជើញរបស់ក្រុមលេខាធិការ RBC យោធភូមិទី៤ កម្ពុជា និងមានការចូលរួមសង្កេតការណ៍ពីក្រុមអ្នកសង្កេតការណ៍អាស៊ាន (AOT) ប្រចាំរបស់ភាគីទាំងពីរ។

ក្នុងជំនួបក្រៅផ្លូវការនេះ ភាគីទាំងពីរបានពិភាក្សាអំពីការបន្តជំរុញការអនុវត្តឱ្យបានពេញលេញ និងប្រកបដោយប្រសិទ្ធភាព នូវខ្លឹមសារនៃសេចក្តីប្រកាសរួមនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅកម្ពុជា-ថៃ (GBC) ចុះថ្ងៃទី២៧ ខែធ្នូ ឆ្នាំ២០២៥។ក្នុងនោះ ក៏បានពិភាក្សាអំពីការងារសម្របសម្រួលប្រតិបត្តិការ និងការដោះស្រាយបញ្ហានានាដែលកើតមាន ដើម្បីបន្តកសាងទំនុកចិត្ត និងសហប្រតិបត្តិការរវាងភាគីទាំងពីរ។

សម្រាប់កម្ពុជា រាជរដ្ឋាភិបាល និងក្រសួងការពារជាតិកម្ពុជា បានបញ្ជាក់ពីការប្តេជ្ញាចិត្តក្នុងការគោរព និងអនុវត្តយ៉ាងពេញលេញ និងខ្ជាប់ខ្ជួននូវសេចក្តីប្រកាសរួមនៃកិច្ចប្រជុំពិសេសលើកទី៣ របស់ GBC ថ្ងៃទី២៧ ខែធ្នូ ឆ្នាំ២០២៥ សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជា និងថៃ ថ្ងៃទី២៦ ខែតុលា ឆ្នាំ២០២៥ និងកិច្ចព្រមព្រៀងពាក់ព័ន្ធផ្សេងទៀត។ការប្តេជ្ញាចិត្តនេះមានគោលដៅចូលរួមជំរុញការធ្វើឱ្យស្ថានការណ៍ប្រសើរឡើងវិញឆាប់រហ័ស និងការវិលត្រឡប់ទៅរកភាពប្រក្រតី សន្តិភាព និងស្ថិរភាពយូរអង្វែងនៅតាមតំបន់ព្រំដែនកម្ពុជា-ថៃ។តែភាគីថៃមិនបានឃើញឆ្លើយតបបានត្រឹមត្រូវនៅឡើយមានតែការបន្តពង្វៀងនិងបង្កើនការទន្រានកាន់កាប់។