នាយករដ្ឋមន្ត្រីចុះពិនិត្យផ្ទាល់ទឹកជំនន់នៅប៉ោយប៉ែតក្នុងពេលគ្រោះទឹកជំនន់ប៉ះពាល់ ១០ខេត្តក្នុងប្រទេសកម្ពុជាមាន គ្រួសាររងគ្រោះកើនឡើងដល់ជិត ៤,៥ម៉ឺនគ្រួសារ

ភ្នំពេញ៖ សម្តេចធិបតី​ ហ៊ុន​ ម៉ាណែត​ នាយករដ្ឋមន្រ្តីនៃកម្ពុជា នៅថ្ងៃទី២៨ ខែកញ្ញា ឆ្នាំ២០២៦នេះ បានអញ្ជើញ​ចុះត្រួតពិនិត្យផ្ទាល់ និងសួរសុខទុក្ខប្រជាពលរដ្ឋដែលរងគ្រោះដោយទឹកជំនន់​ នៅខេត្តបន្ទាយមានជ័យ។ 

ការចុះពិនិត្យនេះធ្វើឡើងក្នុងពេលប្រជាពលរដ្ឋដែលកំពុងរងផលប៉ះពាល់ដោយសារគ្រោះទឹកជំនន់ ខណៈស្ថានភាពនៅតំបន់ភាគពាយ័ព្យនៃប្រទេសនៅតែស្ថិតក្នុងកម្រិតប្រកាសអាសន្ន។ស្ថានភាពគ្រោះធម្មជាតិដ៏ស្មុគស្មាញនេះ បានបង្កការគំរាមកំហែងដល់ក្រុង-ស្រុកចំនួន៥ រួមមាន ក្រុងប៉ោយប៉ែត ស្រុកម៉ាឡៃ ស្រុកអូរជ្រៅ ក្រុងសិរីសោភ័ណ និងស្រុកមង្គលបុរី។

ជំនន់នេះបណ្តាលមកពីទឹកភ្លៀង និងទឹកហូរធ្លាក់ពីប្រទេសថៃបន្តហូរចូលមកកម្ពុជា ក្នុងបរិមាណប្រមាណ ៦១០ម៉ែត្រគូបក្នុងមួយវិនាទី ស្មើនឹងជិត ៥២លានម៉ែត្រគូបក្នុងមួយថ្ងៃ រួមជាមួយទឹកភ្លៀងនៅក្នុងមូលដ្ឋានដែលនៅតែបន្តធ្លាក់។

សូមបញ្ជាក់ថាគិតត្រឹមថ្ងៃទី២៧ ខែកញ្ញា ឆ្នាំ២០២៦ វេលាម៉ោង ៥និង០០នាទីល្ងាច ស្ថានភាពគ្រោះទឹកជំនន់ដែលបានកើតឡើងចាប់តាំងពីថ្ងៃទី៨ ខែកញ្ញា មក បានបង្កផលប៉ះពាល់ដល់រាជធានី-ខេត្តចំនួន ១០ក្នុងប្រទេសកម្ពុជា ដោយបង្កឱ្យមានការខូចខាតនិងប៉ះពាល់ដល់ជីវភាពរស់នៅរបស់ប្រជាពលរដ្ឋរាប់ម៉ឺនគ្រួសារ។ នេះបើយោងតាមការបញ្ជាក់ឱ្យដឹងពី លោក សុទ្ធ គឹមកុលមុន្នី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម.)។

គ្រោះធម្មជាតិនេះបានវាយប្រហារលើ ៥២ក្រុង-ស្រុក ក្នុងខេត្តចំនួន១០ រួមមាន ខេត្តបាត់ដំបង បន្ទាយមានជ័យ សៀមរាប កំពង់ធំ កំពង់ចាម ត្បូងឃ្មុំ ប៉ៃលិន ពោធិ៍សាត់ ព្រះវិហារ និងខេត្តឧត្តរមានជ័យ។

លោក បញ្ជាក់ថា មកដល់ពេលនេះ មានប្រជាពលរដ្ឋសរុបចំនួន ៤៤,៨៨៩គ្រួសារ បានរងផលប៉ះពាល់ (កើនឡើង ១៩,៣២៨គ្រួសារ) និងផ្ទះសម្បែងចំនួន ៤០,៣៨៤ខ្នងត្រូវបានប៉ះពាល់។ ក្នុងនោះ អាជ្ញាធរបានជម្លៀសប្រជាពលរដ្ឋចំនួន ៣,៦៨៥ គ្រួសារទៅកាន់ទីទួលសុវត្ថិភាព។ចំពោះផ្ទៃដីកសិកម្ម លោក សុទ្ធ គឹមកុលមុន្នី បានឱ្យដឹងថា ផ្ទៃដីបង្កបង្កើនផលស្រូវប្រមាណ ៤៩,៩២៥ហិកតា ត្រូវបានទឹកលិច និងប៉ះពាល់។

ចំពោះវិធានការអន្តរាគមន៍ ថ្នាក់ដឹកនាំ និងមន្ត្រីបច្ចេកទេសនៃ គ.ជ.គ.ម. បាននិងកំពុងបន្តចុះពិនិត្យ និងវាយតម្លៃស្ថានភាពផ្ទាល់នៅតំបន់ដែលរងផលប៉ះពាល់ធ្ងន់ធ្ងរជាងគេ គឺខេត្តបាត់ដំបង បន្ទាយមានជ័យ និងសៀមរាប។

ជាមួយគ្នានេះ រដ្ឋបាលខេត្តនីមួយៗ បានបង្ហាញពីភាពម្ចាស់ការយ៉ាងសកម្មក្នុងការដោះស្រាយ និងបានបន្តជួយជម្លៀសប្រជាពលរដ្ឋចេញពីតំបន់គ្រោះថ្នាក់បានទាន់ពេលវេលា។

ខណៈទឹកជំនន់តាមបណ្តោយមាត់អូរព្រំដែនក្នុងក្រុងប៉ោយប៉ែត កំពុងបន្តកើនឡើងខ្ពស់ ឯកឧត្តម កែ គឹមយ៉ាន តំណាងរាស្ត្រមណ្ឌលបន្ទាយមានជ័យ និងជាឧត្តមប្រឹក្សាផ្ទាល់ព្រះមហាក្សត្រ នៅរសៀលថ្ងៃទី២៧ ខែកញ្ញា ឆ្នាំ២០២៦ បានចាត់ចែងបញ្ជូនទូកសង្គ្រោះចំនួន ៣០គ្រឿង និងទូកពោងខ្យល់ ១៥គ្រឿង សរុប ៤៥គ្រឿង មកកាន់ក្រុងប៉ោយប៉ែត ដើម្បីចូលរួមជួយសង្គ្រោះ និងជម្លៀសប្រជាពលរដ្ឋចេញពីតំបន់ដែលកំពុងប្រឈមការជន់លិចខ្លាំង។

ទូកសង្គ្រោះទាំង ៤៥គ្រឿង ត្រូវបានដាក់ពង្រាយចូលរួមក្នុងប្រតិបត្តិការជាក់ស្តែង ដើម្បីដឹកជញ្ជូនស្បៀងអាហារ និងជម្លៀសគ្រួសាររងគ្រោះចេញពីតំបន់ដែលមានហានិភ័យខ្ពស់ ទៅកាន់ទីទួលសុវត្ថិភាពចំនួន ៤កន្លែង ដែលអាជ្ញាធរបានរៀបចំទុកជាមុន។