ចូលរដូវបុណ្យភ្ជុំច្រាំងទន្លេមេគង្គនៅខេត្តត្បូងឃ្មុំ បាក់ស្រុតប្រវែង ១០០ម៉ែត្រ ខណៈវត្តរកាធំ រងការគំរាមកំហែង

ខេត្តត្បូងឃ្មុំ៖ ច្រាំងទន្លេមេគង្គនៅតំបន់វត្តរកាធំ ស្ថិតក្នុងភូមិរកាធំ ឃុំជីរោទ៍ទី១ ស្រុកត្បូងឃ្មុំ ខេត្តត្បូងឃ្មុំ បានបាក់ស្រុតចូលទៅក្នុងទន្លេ ខណៈកម្ពស់ទឹកទន្លេមេគង្គកំពុងថមថយចុះជាបន្តបន្ទាប់។ ការបាក់ច្រាំងនេះមានប្រវែងប្រមាណ ១០០ម៉ែត្រ និងបាក់ចូលទៅក្នុងទន្លេប្រមាណ ១០ម៉ែត្រនារសៀលថ្ងៃទី២៧ ខែកញ្ញា ឆ្នាំ២០២៦ ។ករណីយ៍នេះបានធ្វើឱ្យតំបន់វត្តរកាធំប្រឈមនឹងការបាក់ស្រុតបន្ថែម ហើយកញ្ចុះវត្តមួយត្រូវបានបាក់ធ្លាក់ចូលទន្លេ។ 

ដោយសារច្រាំងបន្តបាក់កាន់តែខិតជិតសាលាឆាន់ ព្រះចៅអធិការវត្ត អាចារ្យ គណៈកម្មការវត្ត ប្រជាពលរដ្ឋចំណុះជើងវត្ត ប្រជាការពារ និងនគរបាលប៉ុស្តិ៍រដ្ឋបាលឃុំជីរោទ៍ទី១ បានសហការគ្នាជម្លៀសសម្ភារៈ និងរុះរើសាលាឆាន់ ព្រមទាំងជម្លៀសទូកងចេញពីតំបន់ប្រឈម ចាប់ពីម៉ោងប្រមាណ ៣រសៀល រហូតដល់យប់។

លោកតា មួក អាចារ្យវត្តរកាធំ បានឱ្យដឹងថា ដំបូងក្រុមការងារបានជួយជញ្ជូនសម្ភារៈស្រាលៗចេញពីសាលាឆាន់ ប៉ុន្តែដោយសារច្រាំងទន្លេនៅតែបន្តបាក់ និងកាន់តែខិតជិតសាលាឆាន់ ទើបសម្រេចរុះរើសាលាឆាន់ និងជម្លៀសទូកងចេញ ដើម្បីបង្ការការខូចខាតដោយសារការបាក់ស្រុតច្រាំង។លោក តឹក លាង មេឃុំជីរោទ៍ទី១ បានឱ្យដឹងនាព្រឹកថ្ងៃទី២៨ ខែកញ្ញា ឆ្នាំ២០២៦ថា ករណីបាក់ច្រាំងនេះ មិនបានប៉ះពាល់ដល់ផ្ទះប្រជាពលរដ្ឋនោះទេ។

លោក ហាក់ ហុន ប្រធានមន្ទីរធម្មការ និងសាសនាខេត្តត្បូងឃ្មុំ បានឱ្យដឹងថា កញ្ចុះវត្តមួយបានបាក់ធ្លាក់ចូលទន្លេរួចហើយ ទើបអាជ្ញាធរ និងគណៈកម្មការវត្តសម្រេចរុះរើសាលាឆាន់ ដើម្បីជម្លៀសសម្ភារៈចេញពីតំបន់ប្រឈម។ គិតត្រឹមថ្ងៃទី២៨ ខែកញ្ញា ការរុះរើ និងជម្លៀសសម្ភារៈនៅមិនទាន់បញ្ចប់នៅឡើយ។

ជាមួយគ្នានេះ លោក សុខ ឡេង ម៉េង ប្រធានមន្ទីរធនធានទឹក និងឧតុនិយមខេត្តត្បូងឃ្មុំ បានឱ្យដឹងថា កាលពីឆ្នាំ២០១៩ ក្រសួងធនធានទឹក និងឧតុនិយមធ្លាប់បានរៀបចំបាវខ្សាច់ទប់ច្រាំងនៅតំបន់នេះរួចមកហើយ។ ចំពោះការបាក់ច្រាំងនៅឆ្នាំ២០២៦នេះ លោកបានពន្យល់ថា បណ្តាលមកពីមានកោះសំរោងដីដុះ ដែលធ្វើឱ្យចរន្តទឹកបុកចំតំបន់វត្ត បណ្តាលឱ្យច្រាំងបាក់ស្រុត។