អាជ្ញាធរជម្លៀសពលរដ្ឋនៅតាមមាត់អូរព្រំដែននៅប៉ោយប៉ែតទៅរកទីទួលសុវត្ថិភាព បន្ទាប់ពីទឹកអូរហក់ឡើងខ្លាំង

ខេត្តបន្ទាយមានជ័យ៖ អាជ្ញាធរក្រុងប៉ោយប៉ែតមមាញឹកទាំងភ្លៀងរលឹមជម្លៀសពលរដ្ឋទៅរកទីទួលសុវត្ថិភាព បន្ទាប់ពីមានភ្លៀងធ្លាក់ជាប់គ្នាជាច្រើនថ្ងៃបណ្ដាលឲ្យជន់លិចតាមតំបន់ និងមាត់អូរព្រំដែន ស្របពេលជាមួយគ្នានោះដែរអាជ្ញាធរសៀមក៏បានជូនដំណឹងអំពីការបង្ហូរទឹកពីស្រុកអារញ្ញ ខេត្តស្រះកែវផងដែរ។ 

តាមសេចក្ដីរាយការណ៍ពីស្ថានការណ៍ក្រុមការងារអាជ្ញាធរក្រុងរួមជាមួយអាជ្ញាធរភូមិនិងប្រជាការពាទាំងអស់នៅក្នុងក្រុងប៉ោយប៉ែតបានបើកទ្វារទឹកជាច្រើនកន្លែងមកហើយដើម្បីគ្រប់គ្រងស្ថានការណ៍និងបញ្ជៀសហានិភ័យផ្សេងៗជូនពលរដ្ឋ ប៉ុន្តែដោយសារស្ថានភាពទឹកភ្លៀងផ្ទួនៗគ្នាបូករួមខាងភាគីថៃបានបញ្ចេញទឹកក្នុងអាងស្តុករបស់គេមកអូរព្រំដែនបណ្ដាលឲ្យជន់លិចភូមិរួមទាំងផ្លូវមួយចំនួន តែទោះជាយ៉ាងណាក្រុមការងារក្រុងបានយកចិត្តទុកដាក់បញ្ហាខាងលើនេះផងដែរ។

លោកញឹម ភឿង អភិបាលរងក្រុងប៉ោយប៉ែតមានប្រសាសន៍នៅរសៀលនេះថា ចំពោពលរដ្ឋដែលរស់នៅប្របតាមមាត់អូរព្រំដែនកម្ពុជា-ថៃនៅក្រុងប៉ោយប៉ែត ក្រុមការងាររួមជាមួយសមត្ថកិច្ចទាំងបីស្ថាប័នកំពុងតែមមាញឹកដឹកជញ្ជូនពលរដ្ឋរងគ្រោះតាមទូកស្មាច់និងជញ្ជូនដោយកម្លាំងផង ធ្វើតាមអ្វីដែលអាចធ្វើទៅបានដើម្បីស្ថិរភាពយើងនឹងធ្វើគ្រប់ទម្រង់។

លោកឧត្តមសេនីយ៍ត្រី សឿម សារិទ្ធ ស្នងការនៃស្នងការដ្ឋាននគរបាលខេត្តបន្ទាយមានជ័យក៏ បានចាត់បញ្ជូនកម្លាំងនគរបាលជាច្រើននាក់ រួមមានកម្លាំងអធិការដ្ឋាននគរបាលក្រុងប៉ោយប៉ែត កម្លាំងបញ្ជាការដ្ឋានវរសេនាតូចនគរបាលការពារព្រំដែនគោកលេខ៨៩១ ,៩១១ សហការជាមួយអាជ្ញាធរមូលដ្ឋាន ចេញប្រតិបត្តិការបន្ទាន់ភ្លាមៗ ដើម្បីចុះជួយប្រជាពលរដ្ឋរាប់ពាន់គ្រួសារដែលកំពុងតែរងការជន់លិចដោយជំនន់ទឹកភ្លៀង នៅក្រុងប៉ោយប៉ែតផងដែរ។

លោកបន្តថា ពលរដ្ឋដែលរងគ្រោះខាងលើក្រុមការងារដឹកជញ្ជូនដាក់ចំនួន៤ទីតាំង ក្នុងនោះមានដូចជាៈ១-ទីតាំងឡុងសំណាង ឋិតក្នុងភូមិគីឡូម៉ែត្រលេខបួនចំនួន៥០គ្រួសារ។

២-ទឺតាំងភោជនីយជ្ឋានអង្គរជាយដែនមានចំនួន១៣០គ្រួសារ។៣-វត្តប៉ាលិលេយ្យចំនួន១៤០គ្រួសារឋិតក្នុងភូមិក្បាលស្ពាន។។៤-ដោយឡែកទីតាំងមួយទៀតគីសាលារៀនព្រហ្មមិត្តឋិតក្នុងភូមិក្បាលស្ពានចំនួន៥០គ្រួសារ។

លោកបញ្ជាក់ថា រហូតមកដល់រសៀលម៉ោង២ថ្ងៃទី២៥ ខែកញ្ញាឆ្នាំ២០២៦នេះក្រុមការងារក្រុងនៅតែបន្តជួយពលរដ្ឋរងគ្រោះដោយទឹកជំនន់ព្រោះមេឃនៅតែបន្តមានភ្លៀងធ្លាក់រហូតមិនទានរាំងនៅឡើយ៕