បញ្ជូនជនសង្ស័យ៣នាក់ ទៅតុលាការ ពាក់ព័ន្ធករណីលួចម៉ូតូ និងប្រើប្រាស់គ្រឿងញៀន និងបែកធ្លាយសំណុំរឿងរំលោភសេពសន្ថវៈមួយករណីទៀត

បន្ទាយមានជ័យ៖ កម្លាំងកងរាជអាវុធហត្ថខេត្តបន្ទាយមានជ័យ បានបញ្ជូនជនសង្ស័យ ៣នាក់ ទៅសាលាដំបូងខេត្ត នៅរសៀលថ្ងៃទី២០ ខែកញ្ញា ឆ្នាំ២០២៦ ដើម្បីចាត់ការតាមនីតិវិធី ពាក់ព័ន្ធករណីលួចម៉ូតូ និងប្រើប្រាស់គ្រឿងញៀន។បន្ថែមលើនេះទៀតក្នុងពេលស៊ើបអង្កេត ក៏លេចធ្លាយសំណុំរឿងពាក់ព័ន្ធការចាប់រំលោភស្ត្រីម្នាក់ទៀតផងដែរ។ 

ជនសង្ស័យទាំង៣នាក់ រួមមានឈ្មោះ ខា ជីវ័ន្ត, ស្រី វិបុត្រ និង ឆន ឆេន ត្រូវបានឃាត់ខ្លួនក្រោមការសម្របសម្រួលពីស្ថាប័នអយ្យការ បន្ទាប់ពីសមត្ថកិច្ចទទួលបានបណ្តឹងពីជនរងគ្រោះឈ្មោះ កយ ប៊ុនថង ដែលបានបាត់បង់ម៉ូតូកាលពីថ្ងៃទី១២ ខែកញ្ញា ឆ្នាំ២០២៦។

យោងតាមរបាយការណ៍របស់លោកវរសេនីយ៍ត្រី សុខ ឡេង មេបញ្ជាការមូលដ្ឋានកងរាជអាវុធហត្ថក្រុងសិរីសោភ័ណ បានឱ្យដឹងថា សមត្ថកិច្ចបានរកឃើញវត្ថុតាងពាក់ព័ន្ធ រួមមានម៉ូតូដែលបានប្រគល់ជូនម្ចាស់ដើមវិញ និងលទ្ធផលតេស្តទឹកនោមវិជ្ជមាន (+) ចំពោះការប្រើប្រាស់គ្រឿងញៀន។ ជនសង្ស័យក៏បានសារភាពពាក់ព័ន្ធបទល្មើសលួច និងការកាច់ផ្លាកលេខ ដើម្បីបំភ័ន្តសមត្ថកិច្ច។

ប្រភពដដែលបន្តថា តាមរយៈការស៊ើបអង្កេតស៊ីជម្រៅ ជនសង្ស័យឈ្មោះ ស្រី វិបុត្រ បានសារភាពថា ខ្លួនធ្លាប់ចូលរួមធ្វើសកម្មភាពចាប់រំលោភស្ត្រីម្នាក់ កាលពីខែមិថុនា ឆ្នាំ២០២៦ រួមជាមួយបក្ខពួកចំនួន ៥នាក់ទៀត។ ករណីនេះត្រូវបានសមត្ថកិច្ចចាត់ទុកថា ជាបទល្មើសព្រហ្មទណ្ឌធ្ងន់ធ្ងរ ដែលប៉ះពាល់ដល់សន្តិសុខ និងសុវត្ថិភាពសង្គម។

លោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវ និងបង្ក្រាបបទល្មើស បានឱ្យដឹងថា ការបញ្ជូនសំណុំរឿងទៅកាន់ស្ថាប័នអយ្យការ គឺដើម្បីឱ្យតុលាការចាត់ការតាមនីតិវិធីច្បាប់ចំពោះបទល្មើសពាក់ព័ន្ធ និងស្វែងរកយុត្តិធម៌ជូនជនរងគ្រោះ ព្រមទាំងចូលរួមពង្រឹងសន្តិសុខ សណ្តាប់ធ្នាប់ និងសុវត្ថិភាពសង្គមក្នុងមូលដ្ឋាន។