មន្រ្តីក្រសួងការបរទេស លោក ថូ សំណាង ដែលគ្រួសារប្រកាសថាបាត់ខ្លួន រកឃើញហើយនៅកន្លែង ACU

ភ្នំពេញ៖ លោក ថូ សំណាងមន្រ្តីក្រសួងការបរទេស ដែលសមាជិកឧត្តមក្រុមប្រឹក្សាព្រះមហាក្សត្រប្រកាសតាមហ្វេសប៊ុកស្វែងរកថាបាត់ខ្លួននោះ ដឹងតម្រុយហើយគឺត្រូវបានអង្គភាពប្រឆាំងអំពើពុករលួយ (ACU) នាំខ្លួនទៅសួរចម្លើយពាក់ព័ន្ធបទល្មើស Online Scams។ 

លោកទេសរដ្ឋមន្រ្តី ឱម យ៉ិនទៀង ប្រធានអង្គភាពប្រឆាំងអំពើពុករលួយ បានឲ្យកាសែតដឹងថា ករណីលោក ថូ សំណាង កំពុងត្រូវបាន ACU ស្តាប់ចម្លើយពាក់ព័ន្ធបទល្មើស Online Scams។

លោកទេសរដ្ឋមន្រ្តី ឱម យ៉ិនទៀង បានបញ្ជាក់ទៀតថា លោក ថូ សំណាង បានសារភាពលួចយកសន្លឹកទិដ្ឋការប្រភេទ C និង Cex ប្រើប្រាស់ខុសច្បាប់ ជាង ៦០០០សន្លឹក ហើយចំណែកសន្លឹកនៅសល់ ៤ពាន់សន្លឹក ACU ថាត្រូវបានលោកថូសំណាងកំទេចចោល។

លោកបណ្ឌិត គិន ភា អ្នកជំនាញវិទ្យាសាស្រ្តនយោបាយ និងតាមដានបញ្ហាសង្គម បានលើកឡើងថា៖ « តើនៅមានមន្ត្រីបែបនេះប៉ុន្មាននាក់ទៀត? បើរកឃើញកំហុសពិតប្រាកដ ត្រូវតែផ្ដន្ទាទោស រឹបអូសទ្រព្យសម្បត្តិ ហើយរឿងធំបែបនេះមិនអាចធ្វើតែម្នាក់ឯងបានទេ»។

តាមរយៈទំព័រហ្វេសប៊ុកផ្ទាល់ខ្លួននៅថ្ងៃទី២១ ខែសីហា ឆ្នាំ២០២៦នេះ លោកបណ្ឌិត គិន ភា បានរំលេចថា «លោក ថូ សំណាង គឺជាមន្ត្រីជាន់ខ្ពស់នៃក្រសួងដ៏សំខាន់មួយរបស់ជាតិ គាត់ធ្វើរឿងដែលបំផ្លាញមុខមាត់ជាតិ បង្កើតគ្រោះធំដល់ជាតិ និងបំផ្លាញទំនុកចិត្តលើស្ថាប័នជាតិ។ តើនៅមានមន្ត្រីបែបនេះប៉ុន្មាននាក់ទៀត? បើរកឃើញកំហុស មិនត្រូវសម្រួលភារកិច្ចទេ។ មន្ត្រីបែបនេះ បើរកឃើញកំហុសពិតប្រាកដ ត្រូវតែផ្ដន្ទាទោស រឹបអូសទ្រព្យសម្បត្តិ និងត្រូវតែស្រាវជ្រាវរកអ្នកពាក់ព័ន្ធទាំងអស់មកទទួលទោស។ រឿងធំបែបនេះ មិនអាចបុគ្គលតែម្នាក់អាចធ្វើតែឯងបានទេ ប្រហែលជាមានការគប់គិតគ្នាជាប្រព័ន្ធ។»

សូមបញ្ជាក់ថាសន្លឹកទិដ្ឋាការប្រភេទ C និង Cex គឺជាប្រភេទទិដ្ឋាការដែលក្រសួងការបរទេសកម្ពុជាផ្តល់ជូនទៅកាន់អ្នកស្នើសុំដែលមានលក្ខខណ្ឌគ្រប់គ្រាន់។ ទិដ្ឋាការប្រភេទ C (Courtesy Visa) ជាទិដ្ឋាការសម្រាប់ជនបរទេសដែលកាន់លិខិតឆ្លងដែនធម្មតា តែទទួលបានការអញ្ជើញ ឬមានកិច្ចសន្យាបំពេញការងារ ឬស្ម័គ្រចិត្តជាមួយអង្គការ ស្ថាប័ន ឬក្រុមហ៊ុនដែលបានចុះបញ្ជីត្រឹមត្រូវនៅកម្ពុជា។ ចំណែកទិដ្ឋាការប្រភេទ Cex ជាទម្រង់ពង្រីកបន្ថែម (Extension) ឬប្រភេទរងនៃទិដ្ឋាការប្រភេទ C ដែលប្រើប្រាស់សម្រាប់ការពន្យារពេល ឬលក្ខខណ្ឌជាក់លាក់ណាមួយបន្ថែមលើប្រភេទC។

តាមហ្រ្វេសញូវឲ្យដឹងថា លោក ថូ សំណាង ត្រូវបានប្រមុខរដ្ឋស្តីទី ចេញព្រះរាជក្រឹត្យចុះថ្ងៃទី២៨មេសាបញ្ចប់មុខតំណែងពី អគ្គនាយក នៃអគ្គនាយកដ្ឋានកិច្ចការច្បាប់ កុងស៊ុល និងព្រំដែន នៃក្រសួងការបរទេស និងសហប្រតិបត្តិការអន្តរជាតិ ហើយតែងតាំងលោកជាទីប្រឹក្សាក្រសួងជំនួសវិញ មានឋាន:ស្មើអគ្គនាយក.។